Juɛl a pwɔdɛn tɛ Mak 12
12
1YECU noŋdɛ gɔkjɛn tɛ juɛl parabɔl. Minɛ wɔn pitɛ jangɛ a wain bal ji, ɔci purtɛ kany bal warɛda, ɔci lurɛ kol akɛ noŋdɛ wakɛ nyadɛ wain, ɔci ɣiyɛn ɣon a biyɛn, ɔci mugɛ ma aŋkɛ gɔrcɛ bal, ɔci eke atɛ ban a parɛ ti. 2Tɛ ɣoŋ bɛdɛn eke cwonɛn minɛ kɛngɔn bal ji, akɛ jangɛ tɔlgɛn oodɛ ta makɛ gɔrcɛ bal. 3Ɔci makɛ bal ji nɛnɛ minɛ kɛngɔn mwuŋɛn, ɔci dwɔdɛn, ɔci minɛ dɔktɛn wegen ti budan. 4Tɛ ɣoŋ a parɛ eke cwonɛ kɛngɔn parɛ; ɔci eke jɛmɛ ma winyu ti, ɔci jɛmɛ ma warɛ ti. Wontɛ eke cwonɛn kɛngɔn minɛn; 5ɔci eke nhugdɛ ma dokɛ; ɔci makɛ coŋɛn pokɛn, gɛk dwɔdɛn, ɔci gɛk nhugdɛn. 6Ɔci bal wegen, kacɛ ballɛ eke ti a ciɛlɔ, minɛ eke anɛ nɛ tolɛn: minɛ cwunɛn ŋwoyɛ ti, gɔkjɛn: Ma akɛ noŋɛ pwɔnɛ tɛ kacɛ ya. 7Aŋkɛ makɛ gɔrcɛ bal a nɛnɛ gɔkjɛn, eken gɔkjɛn pokɛn: Nɛnɛ a minɛ lortɛ wakɛ wegen ti tɛ ɣoŋ eke tudɛ; bɛdɛ, dalɛ ikin nhogdin eke, ɔci bal luldin ikin, mwuŋin ikin. 8Ɔci eken muktɛn minɛ, ɔci minɛ nhuŋɛ dokɛ, ɔci warɛ yɛptɛn burɛ ɔntɔ. 9Aca nɛntɛ wegen bal ji nɛnɛ akɛ noŋdɛ aginɛ? Eke bɛdɛn aŋkɛ makɛ gɔrcɛ bal nhugdɛ, ɔci muktɛ makɛ pokɛn akɛ gɔrcɛ bal. 10Ɣɛke wɛragɛ Juɔŋ a Tolɛn yowɛrnɛ bɛ? gɔkjɛ ɔŋ:
Gwuna a wan makɛ gɔkɛ yuokɛn,
Nɛnɛ aŋkɛ naŋɛn ɣon ŋwɔyɛ ti:
11Nɛnɛ bɛnɛ ta Ciagɔn Tolɛn,
Ɔci nyingɛ ɔn punɛn dokɛ.
12Ɔci ma bwɔgɛ muktɛ Yecu; bwɔyɛ makɛ coŋɛn; juɛl parabɔl yowɛrnɛn eken Yecu gɔktɛn tha eken: Yecu dulɛn, eken atɛn ɔntɔ.
13Ɔci eken cwonɛn Yecu ti makɛ Paraci yakɛn makɛ Kerod, akɛ lupɛn jig Eke ti. 14Ɔci tɛ eken bɛnɛ, eken gɔkjɛn Yecu ti: Minɛ lotɛ, I a Minɛ yuɔŋɛ nhijɔn ɔn, ɔci toktɛ minɛ a ciɛlɔ bɛ: aŋkɛ I gɔrtɛn wakɛ maban bɛ, I lotɛ pɔy Juɔn a Tolɛn, juɛl yuɔŋɛ: Tulba ɣondɛn ma tɛ Kaijar a pwɔcɛn walɛ yayɛ? 15Ɣondɔn ɔn? walɛ ɣondɔn ɔn bɛ? Ɔci Yecu, tumɛ eken nhijɛn, gɔkjɛn: Gircɛ ɣondɛ Ya, aŋkɛ Ya gɔrcɛ. 16Ɔci ma ɛcɛn gircɛ. Yecu gɔkjɛn ma ti: Pɔymɛ minɛ a nɛnɛ? Ɔci juɛl minɛ a nɛnɛ? Ɔci ma gɔkjɛn: Kaijar. 17Ɔci Yecu gɔkjɛn eken ti: Dalɛ wakɛ Kaijar ɣondɛ tɛ eke, ɔci wakɛ Juɔŋ a Tolɛn ɣondɛn tɛ Ekta daŋkɛn. Ɔci ma punɛn nɛ tolɛn tɛ Eke.
18Ɔci makɛ Caduci bɛnɛ Yecu ti, makɛ nɛnɛ gɔkjɛ makɛ tuwɛ jɔŋɛ nyalɔ mokɛ bɛ; ɔci eken gɔkjɛn Yecu ti: 19Minɛ lotɛ, Mojet kijɛ ikin ti; kan minɛ tunɛ, ɔci eŋ dulɛn, ɔci kegen bawɛ, ɔci mod eken ballɛ, mod eken eŋ edɛ, jidɛ kegen tɛ minɛ tunɛ. 20Modgɛn ballɛ a intu witkɛn ayo: ɔci minɛ dɛnyɛ eŋ, ɔci tunɛ, kegen bawɛ; 21ɔci mod a parɛ dɛnyɛ eke, ɔci tunɛ kegen bawɛ; ɔci mod a parɛ noŋɛn ɔŋ: 22ɔci modgɛ da wakɛnda dɛnyɛ eke, ɔci tunɛ, eŋ dulɛn, kegen ballɛ bɛ. Ɔci eŋ tunɛ daakɛn. 23Tɛ ɣoŋ ma jɔŋɛ tɛ kolgɛ eŋ a nɛnɛ a eŋ minɛ? eke dɛyɛn wɔy a intu witkɛn ayo. 24Yecu gɔkjɛn eken ti: Wɛragɛ Juɔŋ a Tolɛn kwiyɛ ɣɛke, ɔci aginɛ tecɛn Juɔŋ a Tolɛn kwiyɛ ɣɛke, aŋkɛ ɣɛke pɔɔdɛ. 25Tɛ ɣoŋ ma jɔŋdɛ ta wakɛ tunɛ, eken dɛtɛ bɛ, eken muŋɛ akɛ dɛnyɛ bɛ; ma ciyɛ ba makɛ enjel ban nyalɔ. 26Tɛ juɛl wakɛ tunɛn, akɛ eken jɔŋɛn; wɛragɛ Mojet yowɛrnɛ ɣɛke bɛ? tɛ juɛl jangɛ jitɛn Juɔŋ a Tolɛn gɔkjɛn eke ti ɔŋ: Ya Juɔŋ Abram, ɔci Juɔŋ Ijak, ɔci Juɔŋ Jakob? 27Eke a Juɔŋ makɛ tunɛn bɛ, Eke a Juɔŋ makɛ ɣodɛn: ɣɛke pɔɔnɛ nɛ tolɛn.
28Ɔci minɛ kijɛ wɛragɛ bɛnɛ a ciɛlɔ, ɔci tiŋɛn juɛl ma tocɛn pokɛn, ɔci Yecu dɔkɛ juɛl a pot pot nhijɛn, tocɛn Yecu ti: Juɛl ɣonnɛn Juɔŋ a Tolɛn jɔcɛn nyamɔ a ɔki? 29Yecu dɔkɛ jig: Juɛl jɔnɛn nyamɔ a ɔŋ; tiŋdɛ ma Ijrel; Ciagɔn Tolɛn Juɔŋ ikin a Ciagɔn a ciɛlɔ: 30ɔci dalɛ i anɛ Ciagɔn Tolɛn, Juɔŋ ɣɛke tɛ yum nɛ tolɛn, tɛ jiɛtkɛ nɛ tolɛn, tɛ winyu nɛ tolɛn, tɛ tɛcɛn nɛ tolɛn. 31Ɔci juɛl a botɛn nɛnɛ a ɔŋ; dalɛ i anɛ min ban ba anɛ i anɛ warɛ i. Juɛl wakɛnda bwɔnɛn juɛl a nɛnɛ. 32Ɔci minɛ kijɛ wɛragɛ gɔkjɛn Yecu ti: A warɛ, Minɛ lotɛ, I gɔŋɛ a pwɔcɛn Juɔŋ a Tolɛn a ciɛlɔ; ɔci minɛ parɛ ballɛ bɛ, nɔtɛn Eke parɛ. 33Ɔci kan minɛ anɛ Juɔŋ a Tolɛn tɛ yum nɛ tolɛn, ɔci tɛ winyu nɛ tolɛn, ɔci tɛ tɛcɛn warɛda, ɔci anɛ min ban ba anɛ warɛ eke, ta nɛnɛ wakɛ yhɛrtɛ ɔci wakɛ piɛltɛn Juɔŋ ti bwɔnɛn nɛ tolɛn. 34Ɔci tɛ eke gwɔlɛ Yecu gɔŋɛn nɛ pwɔdɛn Eke gɔkjɛn: I ballɛ ɔntɔ ta ban Juɔŋ a Tolɛn loncɛn bɛ. Ɔci minɛ yakɛn ti tocɛ Yecu juɛl a wutɛ bawɛ.
35Ɔci Yecu dɔkɛ jig, Eke lotɛn juɛl tɛ tempal, gɔkjɛn: Makɛ kijɛ wɛragɛ gɔkjɛ Kitho a Kacɛ Dabid a ɔki? 36Dabid da gɔŋɛn tɛ Boŋ a Bɔwɛn:
Ciagɔn Tolɛn gɔkjɛn Ciagɔn yɛ ti,
Cocɛn yɛ ti tɛ biŋɛ birɛn,
Aŋkɛ Ya noŋdɛ makɛ yumgɛn yɛyɛn akɛ makɛ yɔŋnɛ tɛ kiegɛ i.
37Dabid da gɔkjɛn minɛ ti, Ciagɔn ya; ɔci minɛ agdɛ Kacɛ eke a ɔki? Ɔci makɛ ɔntɔ tiŋɛn Yecu tɛ yumgɛn pwɔcɛn tɛ juɛl.
38Yecu lotɛ juɛl, gɔkjɛn: Waŋ tiicɛ tha makɛ kijɛ wɛragɛ, eken tokɛ yhɛŋdɛ buruŋɛn a biyɛn, ɔci tokɛ nyipɛn ma nɛ tolɛn tɛ non a wiɛlɛ, 39ɔci tokɛ cocɛn nyalɔ cinagog, ɔci cocɛn nyalɔ tɛ non kuriŋa: 40eken omɛ wakɛ makɛ mongɛ, mongɛ wɔy tunɛ, ɔci gɔkɛ naŋkɛ tɛ Juɔŋ a Tolɛn aŋkɛ noŋɛ labjɛn ma ti; dalɛ nɛnɛ jɛbdɛ nɛ peny tɛ gadiya a tolɛn.
41Ɔci Yecu cocɛn non a ɣondɛ wakɛ tɛ Juɔŋ a Tolɛn, ɔci makɛ gwɔltɛn a coŋɛn bilkɛ uldɛn; ɔci makɛ dɔcɛ uldɛn a coŋɛn. 42Ɔci minɛ eŋ, wɔn tunɛ, minɛ amdɛ bɔnɛ, bɛnɛ aŋkɛ milim uldɛn ayo. 43Ɔci Yecu bortɛ makɛ botɛn, ɔci gɔkjɛn eken ti: Eŋ a nɛnɛ wakɛ uljɛn, ɔci wakɛ ma wakɛnda uldɛn bwɔnɛ wakɛ eke. 44Makɛ coŋɛn wakɛ ɣonnɛn a tolɛn, wakɛ eken ballɛ a coŋɛn; ɔci eŋ a nɛnɛ wakɛ eke ɣonnɛn wakɛnda, wakɛ ɣodɛn eke ɣonnɛn dokɛ.
Kasalukuyang Napili:
Juɛl a pwɔdɛn tɛ Mak 12: MFZ1947
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
First published by British and Foreign Bible Society in 1947.
