Marcos 3
3
Jesus mana ali raskata maskasa hapinayasa chapanakuskamanta
(Mt. 12.9-14; Lc. 6.6-11)
1Shu samana puncha Jesus kuti Diospa shimita yachana wasima yaykurka. Chaypi shu suchu makiyu runa tiyarka. 2Fariseo bulamanta runakunapas tiyarka. Paykuna Jesusta rikuranakurka —samana punchapi mana hampina kaskata kasunkachu unkuta hampinkachu— nisa. Payta hapichinayasa ima mana ali raskata maskasa chaparanakurka.
3Chasna kapipas Jesus chay suchu makiyu runata nirka:
—Hatarisa kay runakuna chawpipi shayari shamuy.—
4Shayarikripi Jesus chaypi tiyakunata tapurka:
—Dios sakiska killkapi paktachina kaskata kasusa samana punchapika imata ruraypa kan. Alita rana usharinchu. Rana usharinchu mana ali kaskata. Shu runata wañunamanta kishpichinata usharinchu. Wañunkapa sakinata usharinchu. Imata ninkichi.—
Paykuna mana kutipanata munasa chunlla uyasa sakirinakurka. 5Chasna kapi Jesus paykunata piñaywa rikurka. Paykuna mana uyanayakuna kaskata rikusa chay unku runata mana llakikuna kaskatapas achkata llakirirka. Chaypi unku runata rimarka:
—Kanpa makita chutachi— nisa.
Jesus rimaskata uyasa makita chutachirka. Ali sakirirka. 6Chay fariseo runa bula chay wasimanta llukshirka. Apu Herodeswa parihu yuyari runa bula kaskama rinakurka. Chay bulawa munturisa kwintarinakurka —imasnata Jesusta wañuchishunchi— nisa.
Tukuy partimanta runakuna Jesuspama shamunakuskamanta
7Jesus pay yachachiskata katikamakunaynti llakta ukumanta llukshisa Galilea kucha patama rinakurka. Achka runakuna katisa rinakurka. Maykankuna Galilea allpapi tiya llaktakunamanta kanakurka. 8Tukuy Judea allpapi tiya llaktakunamantapas runakuna tiyanakurka, Jerusalen llaktamanta, shu llaktakunamantapas. Idumea partimanta, Jordan yaku chimpa partimanta, Tiro Sidon llaktakunamantapas runakuna shamunakurka. Hatun ushaywa alikunata raskata yachasa shu partikunamanta runakunapas Jesuspama shamunakurka. 9Chasna yapa achka runakuna shamupi Jesus pay yachachiskata katikamakunata nirka:
—Shu botita alichikrichi rinalla kankapa ñukanchi runakuna niti tukusa wañunamanta kishpinkapa.—
10Ña achka unkuskakunata aliyachipi unku runakuna Jesusta llankanayasa paypama pawanakurka. 11Supay amuyaska runakuna Jesusta rikupi paykunapapi kawsa supaykunaka chay runakunata Jesuspa ñupama urmachisa kaparinakurka:
—Kan Diospa Churimi kanki— nisa.
12Ranti Jesus sinchita paykunata rimarka:
—Ñuka pi kaskata ama kwintankichichu.—
Apustulukuna#3.12 Apustulukuna ninayan mantaskakuna. Mantaska kanakurka Jesuspa yachachiskata shukunama pasachinkapa. kankapa Jesus chunka ishkay runata maskaskamanta
(Mt. 10.1-4; Lc. 6.12-16)
13Jesus shu urkuma sikasa pay munaska runakunata kayarka:
—Ñukama shamuychi— nisa.
14Jesus kayaskakuna paktapi paykunamanta chunka ishkay runakunata maskarka. Chay maskaskakunata apustulukuna nisa shutichirka. Munarka paywa parihu purikuna kankapa. Paykunata mantankapa munarka Diospa shimita shukunama pasachinkapa. 15Chasnallata munarka paykunama ushayta kunkapa supaykunata hichunkapa. 16Chay chunka ishkaykunamanta shu karka Simon. Payta Pedro niskata shutichirka (chay ninayan hatun rumi). 17Shukuna wawkipura kanakurka, Santiago, Juan shutiyukuna. Paykuna Zebedeopa churikuna kanakurka. Paykunata Boanerges niska shutichirka (chay ninayan rayushina runakuna). 18Shukuna kanakurka Andres, Felipe, Bartolome, Mateo, Tomas, Alfeopa churi Santiago, Tadeopas. Kuti shu karka Simon. Chay Simonka Israel allpata amuyaska runakunawa makarisa Israel ayllukunata lugaryachinaya wankuriska runa bulamanta karka. 19Shu karka Queriot llaktamanta runa Judas. Pay washa Jesusta hapichirka.
—Supaypa ushayta charinki— nisa Jesusta rimanakuskamanta
(Mt. 12.22-32; Lc. 11.14-23; 12.10)
20Jesus kuti pay paktana wasima rirka. Achka runa kuti munturipi, mikunkapapas mana lugarta kunakurkachu. 21Paypa ayllukuna nima mikunata ushaskata yachasa, —paymi nuspayaska— nisa Jesusta pushakrinkapa paypa wasima shamunakurka. 22Jerusalenmanta paktamuska Dios ñupa uras killkachiska killkata kutillata killkakamakunamanta maykankuna Jesusmanta rimanakurka:
—Kay runapi supaykunapa apumi kawsan. Supaykunapa apupa ushaywami runakunamanta supaykunata hichun.—
23Chasna paymanta rimanakupi Jesus paykunata kayasa yuyachina kwintukunawa yachachinkapa kallarirka. Supaykunata mana supaypa ushaywa hichuypa kaskata yuyachinkapa paykunata kasna rimarka:
—Supaykunapa apuka paypa kikin aylluta hichunmachu. Manami hichunka.—
24—Shu llaktallapi kawsakunata yuyarichi. Chay llaktapi kawsakunapura makarisa rimarisa kawsasaka shukma shukma rinakunka. Chay llakta runa illa sakirinka. 25Chasnallata shu wasillapi kawsa ayllupura makarisa kawsasaka shukma shukma risa mana parihu sakirinkachu. 26Chasnallata supaykunawapas kan. Supaykunapura piñanakusa kawsasaka mana sinchikunata ushasa yali tukunakunkami.—
27Jesus yachachisa katirka supaykunapa apu sinchi wasi amushina kaskata yuyachisa:
—Shuk yali sinchi runalla shu sinchi amupa wasipi yaykunata ushan amu chariskata kichunkapa. Amuta wataskawashalla pay chariskakunata kichunata ushanmi.—
28—Alita uyawaychi. Ima laya huchamantapas, ima hirus shimi rimaskamantapas runakuna mañapi Dios paykunata kishpichinka. 29Ranti maykan runa Diospa Samayta piñasa mana alita rima, mana ima uraspas kishpichi tukunkachu, chikapa huchata aparinka.—
30Jesus chasna nirka —supaykunapa apumi paypi kawsan— nisa paymanta rimanakuskarayku.
Pikunami shuti paypa ayllukuna Jesus riskamanta
(Mt. 12.46-50; Lc. 8.19-21)
31Jesus rimaraskapi paypa mama paypa wawkikunaynti paktamunakurka. Mana wasipi yaykunata ushasa kanchamanta kwintankapa shimita Jesuspama pasachinakurka. 32Jesuspa muyukta achka runakuna tiyariska kanakurka. Shukuna Jesuspama shimita pasachinakurka:
—Kishpichiway shukratu. Kanpa mama, kanpa wawkikuna kanchapi kanta chaparanakun.—
33Jesus kutipasa nirka:
—Kankunata rimaskankichi pikunami shuti ñuka ayllukuna kanakun.—
34Chasnapi muyukta tiyariskakunata rikusa Jesus nirka:
—Kaykunami ñuka mama, ñuka wawkikuna. 35Dios rimaskata paktachi runami ñuka wawki, ñuka pani, ñuka mama.—
Kasalukuyang Napili:
Marcos 3: BKN
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2020, Wycliffe Bible Translators, Inc.
