MATIU 9
9
I Jisas mo vakahiki na tangaloi sarosaro
(Mak 2.1-12; Luk 5.17-26)
1I Jisas mo galo tilolo aga, mo vano utuhi na kwai tokatoka lakua hi, mo mule vaki lo gwatui-vanuana. 2A tangaloi ramo vanamai vaki mai Jisas, rau kwali na tangaloi sarosaro a tarabehina rau mate u ngwalulu lo here. I Jisas mo tagai na noga hauhuriana mo kwaha mana tangaloi sarosaro hi mo viti kwara, “Natugu. Ko hatu mataku. I nau nu domidomi koro na nomu hatiana, u rovo ba,” #a Mat 8.6; Luk 9.33; b Luk 7.48
3Vunu a tangaloi* kikikila na Uliuli* Kokona tuaki ramo kwahakwaha kinira siboga ramo viti kwara, “A tangaloi hika u tuku kwahakwaha hati vovohi God.”
4I Jisas u kikilai na domiga mo viti kwara, “?Kworohokinia tulu mo toko domi hatihatiki na leogu kwehini? #Mat 12.25 5?Aia makive u magemu? ?Na viti kwara, ‘I nau nu domidomi koro na nomu hatiana, u rovo ba,’ diko na viti ‘Maraka, ko lakao’? 6Vae na vosangi lakwakamu tulu ne kikilai kwara i nau, a Natu* na Tangaloi, a nogu huirana eia lo varamana kwara na domidomi koro na hatiana nona tangaloi.” Vunu mo kwaha mana tangaloi hi a tarabehina rau mate mo viti kwara, “Ko maraka, ko kwali heremu, ko mule vaki tatamu.”
7A tangaloi hi mo maraka, mo mule. 8Lolona a tangaloi ramo tagaia, rau mataku, ramo kaluhaki God huri mo bete na huirana hi lakwa na tangaloi kwara ne boloki luna hokinia hi. #Bol 9.33-35
I Jisas mo kware i Matiu
(Mak 2.13-17; Luk 5.27-32)
9I Jisas mo tiraki takwahini mo lakao, mo tagai na tangaloi a hinana i Matiu, u hugu lo nona tanotano na tau mane* a takis nona kavman. I Jisas mo kwaha maia mo viti kwara, “Ko huriau.”
Vae i Matiu mo maraka, mo huria. #Mat 8.22; Sione 1.43; 21.19
10Vunu takuni tiua hi i Jisas mo kanikani lolo ingwa i Matiu. A tangaloi* na vilevile mane, a takis nona kavman, mana tangaloi* vaivai hati tavalavarea ramo vanamai ramo hugu mai Jisas mana nona ngwalagelo, ramo kanikani maira. 11A Varisi* maira ramo tagaia, ramo uduhuri kina nona ngwalagelo ramo viti kwara, “?Kworohokinia a nomiu tisa mo kanikani mana tangaloi hokinira hi?” #Mat 11.19; Luk 7.34; 15.1-2; 19.7
12I Jisas mo rongora mo daraki lakwara mo viti kwara, “A tangaloi hinea rau rongo karea rahe lengai na tokita tea, vae aira kehekeheki hinea rau lenga rau lengai na tokita. 13Tulu vano tulu soro haro na domiana na Uliuli* Kokona hika hinea i God u viti kwara, ‘Nahe lengai tea kwara a tangaloi rana kwohi mate a boboroa kwara rana vai hura boniboni lakweau, vae nu lengaia kwara a tangaloi a hahakaviga ne eia.’ ” Vunu i Jisas mo viti kwara, “Nu viti kwehini huri nahe vanamai tea kwara na kware na tangaloi hinea rau bakoto, vae aira hinea a tangaloi vaivai hati tavalavarea.” #Hos 6.6; Mat 12.7
A leo uhiuhi huri na reterete
(Mak 2.18-22; Luk 5.33-39)
14Vunu a ngwalagelo noi Sione a tangaloi na bavtaes tangaloi ramo vano vaki mai Jisas, ramo uhia ramo viti kwara, “?Kworoho i kami mana Varisi* maira kemo rete tigwaravu, vae a nomu ngwalagelo rahe rete tea?” #Mat 11.18; Luk 18.12
15I Jisas mo daraki lakwara mo viti kwara, “?Tulu domi kwara a tangaloi aira hinea ramo vanamai huri a kanikani na lakiana rana rongo hati lolona a ngwera na lakiana aia maira radu? Hetea. Vae lo taroki a tangaloi rana lavi na ngwera na lakiana hi tiura, vunu ranari rete. #Sione 3.29
16“A tangaloi nehe obo na mahigwai-lugwa karagwa tea tilo lugwa ngwanika, huri a mahigwai-lugwa karagwa hini ne kuku ne reve dare na lugwa ngwanika, ne madare siletia tomua. 17Vunu vake a tangaloi nehe lilingi na waen karagwa tea tilolo tanga na waen tuai hinea a vinu na boboroa. Vae diko ne lilingi na waen karagwa tilolo tanga tuai, vae a waen karagwa hi, a nona huirana ne maraka ne vai dare na tanga tuai, ne magarakinia, a waen ne madidihi. Vae a tangaloi ne lilingi na waen karagwa tilolo tanga karagwa, i rarua vunu raru ne eno ne karea.”
I Jisas mo vakahiki na vavine vake u rakati na natu na tangaloi lakua tina mateana
(Mak 5.21-43; Luk 8.40-56)
18Lolona i Jisas mo toko kwaha radu nga, a tangaloi lakua na vale* na tiutangaroa mo vanamai vaki maia, mo sovi hivo koro na nakona mo viti lakwae kwara, “I natugu a natu vavine mori mate hi nga, vae ko vanamai ko tau kabamu luna ne ahi.” #Mat 8.3; Mak 6.5; 7.32; 8.23,25; Luk 13.13
19Vunu i Jisas mana nona ngwalagelo ramo maraka ramo huria.
20A vavine katukwale a daidai gwaravu u vaia a hukao hangavulu dongwana kairua, mo vanamai takuni ti Jisas mo kihi na gweregwere na lugwana vohoki. #a Lev 15.25; b Mat 14.36; Mak 6.56 21Mo domidomi sibona kwara, “Diko na kihi na lugwana vohoki na ahi.” 22I Jisas mo halebohi mo tagaia mo viti kwara, “Natugu, ko hatu mataku. A nomu hauhuriana u vaiko komo rongo karea.”
Lo taro hini vohoki a vavine hi mo rongo karea. #Mak 10.52; Luk 7.50; 17.19; Bol 3.16
23Lolona i Jisas mo maravuti mana ingwa na tangaloi lakua hini, mo tagai na tangaloi na kahokaho huri na tulatulaki, mana tangaloi rusa ramo kurekurere, 24mo viti kwara, “Tulu ngwalua tivarea i kamu vunu. A vavine kelekele hi he mate tea, aia u maturu.”
Vae a tangaloi ramo mana tiehia. #Sione 11.11 25I Jisas mo vaira ramo ngwalua tivarea, vunu aia mo soro tilo tanotano hini a vavine mo ngwalulu eia, mo hago lo kaba na natu hi, mo maraka. #Mak 1.31; 9.27 26A roro huria mo taviti doluaki na vanua takwahini.
I Jisas u vakahiki na matadodo kairua
27I Jisas mo tiraki na vanua hini mo lakao, a matadodo kairua raru mo maraka raru mo huria. Raru mo kwarekware raru mo viti kwara, “Gwaloana noi Devit, ko hakavikamirua.” #Mat 20.29-31
28I Jisas mo soro tilolo ingwa, vunu a matadodo hi kairua raru mo vanamai vaki maia, mo uhirarua mo viti kwara, “?Kuru hauhuri kwara na vai lai na vakahikikamurua hika?”
Vae raru mo daraki raru mo viti kwara, “Io, Hugwe*.”
29Vunu i Jisas mo kihi na matagaru mo viti “Ne mule luna hokinia hi kuru mo hauhuri.” #Mat 8.13; 15.28
30Hikani a matagaru rau karea taliku. Vae i Jisas mo korokorotirarua mo viti kwara, “Kuru hatu viti lakwa na tangaloi.” #Mat 20.34
31Vae raru mo tiraki takwahini raru mo talahaki na roro huri Jisas doluaki na vanua takwahini. #Mak 7.36
I Jisas mo vakahiki na tangaloi a meana u bulu
32Lolona a tangaloi kairua hi raru mo tiraki i Jisas, a tangaloi tuaki ramo lavi na tangaloi katukwale vaki maia he kwahakwaha lai tea, huri a vono u vaia. 33I Jisas mo livuti na vono tiua, a tangaloi hini mo tinakaki mo kwaha. A tangaloi savia rau idila, ramo viti kwara, “Tuai tahe toko tagataga te kinau hokinia hika lo vanua Isrel*.” #Mat 12.22; Mak 7.32,35; 9.17,25; Luk 11.14 #Mak 2.12
34Vae a Varisi* ramo viti kwara, “Aia a hugwe nona tanungwe hati maira aia u bete a huirana lakwae kwara ne livu a tanungwe hati maira kinia.” #Mat 12.24; Mak 3.22; Luk 11.15
I Jisas u hakavi na tangaloi
35Vunu i Jisas mo lakao laliki mo tiroki na gwatuivanua lalakua mana gwatuivanua kwaririgi. Mo huhui lolo noga vale* na tiutangaroa, mo kwalahaki na Roro Karea kwara i God u tuku boloki vae ne hugwe koro na tangaloi doluaki na varamana, mo vakahiki na tangaloi tina kaga lengeana a gwatuki u rusa. #a Mat 4.23; Mak 1.39; b Mat 10.1; Mak 1.34; Luk 7.21 36Lolona mo tagai na vao, lolo domina u hakavira haburu, huri a domiga rau kwalao laliki, a noga huirana tikei. Aira hoki na sivsivi hinea a kaitagahuriki tikei. #a Mat 14.14; 15.32; Mak 6.34; b Nam 27.17; 1 King 22.17; 2 Kron 18.16; Esik 34.5; Sek 10.2; Mak 6.34 37Hikani mo kwaha mana nona ngwalagelo mo viti kwara, “A makuriana u lakua haburu, vae a tangaloi boloki he rusa tea kwara rana vileki na hinaka tilolo ingwa. #Sione 4.35 38Vae tulu ne kwaha mana hugwe na makuriana kwara ne hora a tangaloi boloki rana vile tilolo ingwaki.” #Luk 10.2
Kasalukuyang Napili:
MATIU 9: HWT
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Havakinau New Testament © Bible Society of the South Pacific, 2016.
