VPHAUNGC VYAUNGC 3
3
Miqsaz rueq Phvnx muq
1Majuiuc puiuc kuex Yehowa Tishox rueq vtvdung sung phvnx ngvmx saz htenc wawc rot kaq hvlc phvnx yawxsaz rvtueq. Puiuc kvraq yalxjuik nyuiuz kvmac ngoc, “Tishox rueq sunc mungx nuex httax yaq pulx thuey jungx htenc kvwawc vthuey kuex svy mvy muq ngoz tueq vsuing haz jungx shec tvnx?” ngoz tueq wiz tueq.#Tvkh 12:9; 20:2
2Yalxjuik nyuiuz rueq, “Vruex sunc vmungx baung nuex kemz yaq jungx maq lvy vtueq mruex jungx wawc muinz vthuey jungx kuex nvnueyc rueq svy mvy yaq. 3Tishox rueq nvnueyc muex kvruex jungx wawc vthuey kuex nauk saq, nauk shuimx kaz; mkhoc shoc maq kvruex wawc vthuey kuex saq ruiux yuq nvnueyc kuex vthueyc juing rvtueq,” ngoz tueq tvralc tueq.
4Puiuc rueq, “Kvruex kuex vsuing rvmuq; nuimnueyc kuex thueyc kaz muit. 5Kvruex pulx thuey kuex saq ruiux yuq, nuimnueyc kuex Tishox#3:5 Tishox; rvmuq ngoz ruiux tishox htenc. ikhoc yaungx wvnc vtueq vhvlx nuiyc vbac#3:5 vhvlx nuiyc vbac tuiuz juing; rvmuq ngoz ruiux phvnx ruip saz tuiuz juing. kuex nuimnueyc rueq tv-phvlc tuiuz wvnc shuinx kuex vpiq rueq tuiuz vtueq, Tishox rueq kvkhoc jungx kv-phuinx,” ngoz tueq tvralc jungx tueq.
6Yalxjuik nyuiuz rueq pulx jungx svp hvlc kvruex muinz, vthuey vsvy roc juing kvruex muinz khiz tueq, kvmaq taksux tharc httax ruiux yuq vwangc juing rvtuex lvmz kuex tvmaung lvp tueq. Kvkhoc rvtueq piq rueq pulx thuey wvyvmc kuex puinz vtueq saq tueq. Kvruex yimaq vtaungx waz muex muinz vthuey wvyvmc kuq koq tueq, piq rueq muinz saq tueq. 7Kvkhoc svy gay lot rac dvyx tsuingnueyc kuex vtuiuz tay tharc httax wvnc vtueq, tsuingnueyc khoguez khvyguez httax yaq kuex tuiuz lvp wvnc tueq; kvkhoc rvtueq tsuingnueyc rueq phuiuq muiuq yauk kuex tvdamx kuk vtueq puingc wuez tueq.
8Tsuingnueyc rueq kvruex raungyac Yehowa Tishox sunc nuex khuemx kaz tueq tvruingc kuex tay vtueq, tsuingnueyc kuex khiz muq tvkoc pulx jungx htenc hvlwvl nuex kvhttuiyq tueq. 9Yuq muinz Yehowa Tishox rueq miqwaz kuex gvl tueq, “Mnoz m-yuq lac?” ngoz tueq gvl tueq.
10Piq rueq, “Mnoz sunc nuex httuiuc kaz toq tvruingc kuex ngaz rueq tay vtueq, khoguez khvyguez httax vtix ningkhvnc nuex hisvy thuiuz muex kvhttuiyq vtix,” ngoz tueq tvralc tueq.
11Tishox rueq, “Mnoz khoguez khvyguez httax vtuiux lvmz kuex uraq lac jungx kuq phvnx? Ngaz rueq nauk saq kaz ngoz tueq jungx kuq phaungx pulx thuey kuex saq gay tuit rvmuq haz?” ngoz tueq wiz tueq.
12Miqwaz kvraq, “Ngaz muex mnoz rueq kuq phux yalxjuik nyuiuz piq rueq pulx thuey kuex kuy ningkhvnc nuex ngaz rueq saq gay tauk,” ngoz tueq jungx tueq.
13Yehowa Tishox rueq yalxjuik nyuiuz kvmac ngoc, “Mnoz rueq yvmx rvtueq lac kvkhoc rvtonx?” ngoz tueq wiz tueq.
Piq rueq, “Puiuc rueq ngaz muex laulawc ningkhvnc nuex saq gay tauk,” ngoz tueq jungx tueq.#2Kor 11:3; 1Tim 2:14
Tishox rueq Phox gay tueq
14Kvruex yimaq Yehowa Tishox rueq puiuc muex ngoc, “Mnoz rueq kvkhoc rvtoq ningkhvnc nuex murx gurx shuiux; ngvmx saz htenc kvwawc mnoz dvyx vkhoc tuemc kuy rvhumc tuiux: majuiuc maq phaungc vtueq mnoz kuex wuk maq kvhet khuemx ruiux, bokkhuyx kuex rullungx pattup saq shuiux. 15Mnoz nuiyc yalxjuik nyuiuz kuex vshiz maq vshiz rvshuiuc pac wuez tuinx; mphvnx nuiyc yalxjuik nyuiuz kvruex phvnx kuex ralx muex rvyaungc tuinx. Miq rueq mkhux poz kvyuq tvbunx nuiuz gay kv-phux, mnoz rueq muinz piq yaz htuimx nuex kauk shuiux,” ngoz tueq jungx kuq tueq.#Tvkh 12:17
16Yalxjuik nyuiuz kvmac muinz, “Mnoz kuex wvgvnz nyuiuz yaungx vtueq kuilc daz juing paung wvnc tuex, saz jawc thuiuz muinz rvhumc tuiux. Yuq muinz mnoz kuex mtaungx waz muex tvluimc shuiux, piq rueq mhtauk nuex guimz kv-phux,” ngoz tueq jungx tueq.
17Vpiq rueq miqwaz muex muinz, “Mtaungx nyuiuz kvjaz kuex tay vtueq nauk saq kaz ngoz tueq ngaz rueq jungx phaungx pulx jungx wawc vthuey kuex mnoz rueq saq gay toq. Mnoz rueq shuimx gay toq yauk shuimc ningkhvnc nuex ghaq kuex mvnhttonc rvhumc tuex. Mrullungx nuex yauk shuimc hunnyex vtueq mtvkoc phuiuz vsvy kuex hungx laz htaungx laz shuimx kaz shuiux.#Heb 6:8 18Kvruex wawc shuiuq rumz nuiyc httuingx htenc kuex kemz tuex, mnoz rueq yaruix rumz wawc namx yauk namx yaz htenc kuex phauk saq shuiux. 19Mnoz kuex ghaq wawc yaungx kaz vtueq, ghaq nuex yek kaz tuiux nuex httuiuc laz ghaq wawc vthuey vngoz dungc tvkoc raungluimc dung laz hunnyex shuimx kaz shuiux. Mnoz kuex ghaq wawc vtvhungx ningkhvnc nuex ghaq muex yaungx kaz yek tuiux,” ngoz tueq jungx kuq tueq.
20Adam#3:20 Adam: Vruex muingc kuex Hebre maq “miq” ngoc kvjaz rvtueq. rueq vtaungx nyuiuz kuex Ewa#3:20 Ewa: Vruex muingc jungc kuex Hebre maq “thuiuzthuic” ngoc kvjaz rvtueq, kvruex kuex “miq” muex vnyuiuz yaungc ningkhvnc nuex rvtueq. ngoz tueq muingc tueq, yvmx khoc lac ngoz ruiux lec piq kuex miqsaz muex vnyuiuz yaungc wvnc ningkhvnc nuex rvtueq. 21Yehowa Tishox rueq Adam nuiyc Ewa tvkoc ngvmx khuix khvy htenc kuex tvhungx vtueq tsuingnueyc muex tvsvmc kuq tueq.
Adam nuiyc Ewa kuex Sunc wawc Yurc gay tueq
22Kvruex yimaq Yehowa Tishox rueq, “Majuiuc miq kuex nuiyshiq vkhoc yaungx wvnc vtueq, vhvlx nuiyc vbac kuex tuiuz wvnc vshuex shex. Thuiuzthuic kuq yaq jungx wawc vthuey kuex saq gay tueq ningkhvnc nuex, pattup thuiuzthuic tvraungx lvp lot muq,” ngoz tueq jungx tueq.#Tvkh 22:14 23Kvkhoc rvtueq Yehowa Tishox rueq miq kuex Eden sunc mungx wawc yurc gay ruiux, tsuingnueyc shvmx tvhungx tueq ghaq kvyuq tsuingnueyc muex tvshuimx saq tueq. 24Kvruex yimaq thuiuzthuic tvraungx tvyaungc yaq jungx hep nuex ukhaq muinz kvnvp kaz lot muq tvkoc kvroz rvyaq yaung wvr nuiyc kherubim#3:24 kherubim: Vlvmz vjalc taq shex nuex lawc shuinz. kuex sunc shaldungc kox nuex tvbvmc muex taq shec tueq.
Kasalukuyang Napili:
VPHAUNGC VYAUNGC 3: HNOT01
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Hawa Naga Bible © Bible Society of Myanmar, 2014.