SAN LUCAS 2
2
Jesús aptéyam
(Mt 1.18-25)
1Apkeltamhok axta kanaktáxesaxchek apkelwesey weykcha'áhak apkelánamákpoho énxet apheykha axta ekyókxoho yókxexma apmomakxa axta romano m'a wese' apwányam apwesey axta Augusto. 2Cháxa eyeynókxa axta eknaktáxésamaxche weykcha'áhak apkelwesey apyókxoho énxet, cham'a aptémakxa axta Cirenio apkeláneykha yókxexma m'a Siria. 3Apyókxoho énxet axta apkeláneyákpok elmeyekxak ma'a apkelókxa, yakwayam enxoho kanaktáxesaxchek apkelwesey weykcha'áhak.
4Ekeso eñamakxa aptepa axta José tegma apwányam Nazaret, yókxexma Galilea. Axta apmeyákxak ma'a nátegma Belén yókxexma Judea, cham'a apteyeykenxa axta wese' apwányam David, hakte José axta apteme David aptáwen neptámen. 5Apmahágkek axta m'a yakwayam enxoho katáxésaxchek apwesey weykcha'áhak yetlo m'a María, ektaha axta ekpagkanma José yakwayam katnehek atáwa, cham'a ektéma axta anhan lóso'. 6Wokmek axta ekhem yakwánxa katnehek nakláwa María, neyseksa ekheykha m'a nátegma Belén. 7Axta aptémhok apmonye ekweté étche m'a, apáwa axta pextétak, kañe' yántéseksek kélnaktóso kéleykegkaxa ektéyak axta pekkenwokmok, hakte méko axta ekhágkaxa m'a apheykegkaxa axta cha'a meyk'a.
Dios apkelásenneykha tén han ma'a keláneykha nekkések
8Keto' tegma apwányam Belén axta apheykha énxet apkeláneykha nekkések, apkelánteyapeykmók axta axta'a yókxexma apkeláneykencha'a m'a apnaktóso nekkések. 9Apxekmowáseykpok axta xama Dios apchásenneykha apkeñama néten, kelsásekmók axtaxma apcheymákpoho Wese' egegkok nepyáwa xa énxet'ák nak; apkelyegwakkek axta. 10Aptahak axta apkeláneya Dios apchásenneykha s'e: “Nágkólyegwé', amya'a ektakmela eksókasakmok kéxegke yakwayam kagkések ekyawe ekpayheykekxa apwáxók apxámokxoho énxet'ák: 11Sakhem apteyekmok David apchókxa m'a yakwayam nak etnehek apmasma kéxegke, cham'a aptaha nak Cristo m'a, aptaha nak Wese' egegkok. 12Megkólchenatchesek sat kéxegke kélwet'a sat sakcha'a kélpexteté apáwa tén han kélpekkenma m'a kañe' yántéseksek kéleykegkaxa nak ektéyak kélnaktóso.”
13Yetlókók axta anhan apkelxekmowásamákpoho Dios apkelásenneykha apxámokma apkeleñama néten xamo' xa Dios apchásenneykha nak, apkelpeykásók axta Dios. Aptahak axta nahan apkelpakmeta s'e:
14“¡Apcheymákpoho sat kóltemésesek Dios
apha nak ma'a néten!
¡Keytek sat meyke ektahakxa egwáxók keso náxop
nepyeseksa m'a énxet'ák appasmoma nak cha'a Dios!”
15Xama axta apkeltakháwo Dios apkelásenneykha m'a néten, aptahak axta apkelpakhetcháseykpoho keláneykha nekkések se'e:
—Nók ólmahagkok Belén, anteyánegwomhok ektahakxa exnek ma'a, cham'a sẽltennasa nak Wese' egegkok.
16Apkelpekhésawók axta apkelxega, apwetágwokmek axta María tén han José, apwetágwokmek axta anhan sakcha'a apyetna m'a kañe' yántéseksek ekteykegkaxa axta cha'a ektéyak weyke. 17Xama axta apwet'a sakcha'a, apkeltennáha axta m'a aptahakxa axta apcháneya Dios apchásenneykha apxéna m'a sakcha'a. 18Pelakkasek axta apkelleg'a apxámokxoho énxet'ák ektahakxa axta apkeltenneykha m'a keláneykha nekkések. 19Xéneykha axta awáxok María ekyókxoho xa amya'a nak, axta kalwagkágweykmok nahan. 20Apkeltakháwok axta m'a keláneykha nekkések nak, apkeltemésesek axta apcheymákpoho Dios, apkelpeykásók axta nahan eñama m'a ektahakxa axta apweté tén han ma'a ektahakxa axta apkellegé, hakte temék axta m'a ekyókxoho ektahakxa axta amya'a apkeláneyákpo.
Aptémakxa sakcha'a Jesús kélya'aso kañe' tegma appagkanamap
21Ocho ekhem axta entahak aptéyam sakcha'a, keñe axta kélyenyekhásesa apyempehek kélkahasa,#Lv 12.3. kéltemésesek axta apwesey Jesús cham'a aptahakxa axta apcháneya Dios apchásenneykha m'a María, amonye axta ekteme lóso'.#Lc 1.31.
22Xama axta ekyeyk'a ekhem apkeláneykegkaxa axta cha'a negaxñáseykekxa egyempehek, ekhawo m'a eltémókxa axta antehek Moisés segánamakxa apagkok, kélyentamákxeyk axta sakcha'a m'a tegma apwányam Jerusalén, yakwayam enxoho kólya'aksek nápakto' Wese' egegkok. 23Kéltemésesek axta xa, hakte temegkek axta eknaktáxésamaxche Wese' egegkok segánamakxa apagkok se'e: “Kólpagkanchesek sat Wese' egegkok ma'a apyókxoho sakcha'a apkenna' apmonye aptéyam nak.”#Ex 13.2,12. 24Kelxegkek axta eksawa aksok yakwayam kagkések Wese' egegkok ekhawo m'a eltémókxa axta antehek Wese' egegkok segánamakxa apagkok se'e: apkánet sapop, apkánet wáx'ay apketkók esenhan.#Lv 12.6-8.
25Aphegkek axta xama énxet apwesey axta Simeón ma'a tegma apwányam Jerusalén. Enxet appéwomo axta m'a, elpeykeshok axta cha'a Dios, apkelhaxanmeyk axta anhan etnésásekxak Dios énxet'ák Israel ma'a ektémakxa axta apheykha nano'. Espíritu Santo axta aphak xamo' ma'a Simeón, 26apya'asásegweykmek axta anhan peya megyetsepek met'a enxoho makham Cristo, cham'a apxeyenma axta yáphaksek Wese' egegkok. 27Espíritu Santo appeykesáseyak axta keñamak apmahágko Simeón ma'a tegma appagkanamap; xama axta ekyentama enchána Jesús ma'a yakwayam enxoho katnehek ma'a eltémókxa nak antehek segánamakxa, 28apcheynchek axta Simeón sakcha'a, keñe axta apkelpeykásawo Dios. Aptahak axta s'e:
29“Wese' ahagkok, temék kaxwo' ma'a
aptémakxa axta exchep appeywa,
apwanchek yohok aksa yetsapok apkeláneykha
yetlo meyke ektahakxa apwáxok.
30Hakte ekwet'ak kaxwo' nelmeyamáxche eñama exchep,
31cham'a apchénawo nak apkelana
nápakta'awo' apxámokxoho énxet'ák,
32cham'a elseyexma peya nak kalsásesamhoxma
apyókxoho énxet'ák nak#Is 42.6; 49.6; 52.10.
tén han peya kañék kélteméseso
apkeleymákpoho m'a énxet'ák Israel.”
33Pelakkasek axta elleg'a Jesús enchána aptahakxa axta Simeón apxéna m'a sakcha'a nak. 34Keñe axta apkelmaxnésásegko Simeón, aptahak axta anhan apcháneya María, Jesús egken se'e:
—Kalano, appagkanákpek se'e sakcha'a nak, yakwayam enxoho exámak énxet'ák Israel apkelxegányam, exámak esenhan apteme apkelmeyámap. Etnehek sat nahan magkenatcheso apkeñama Dios, cham'a peya sat exámhok énxet megkaleklo apwáxok, 35yakwayam enxoho keytnekxak yáxñakxoho m'a ektémakxa nak elchetamso apwáxók énxet. Máxa sat katnehek xeye' kélyetxakxo sókwenakte ekweykmoho kañók agko' awáxok eñama eklegeykegkoho xa ekyókxoho nak.
36Xama kelán'a axta nahan eghak ma'a ekwesey axta Ana, ekxeyenmo axta cha'a Dios apwesey, Fanuel axta apketche m'a, nepyeseksa Aser énxet'ák apagkok axta keñamak. Ekwañamók axta entahak. Etkok agko' axta elyamhopma, siete apyeyam axta entemék ekyepetcheykha atáwa; 37ochenta y cuatro apyeyam axta entemék ekteme tampe'. Axta katyapmak kañe' tegma appagkanamap, wánxa agkok tamheykha axta nápakto' Wese' egegkok axta'a tén han ekyókxoho ekhem, yetlo megkato ekto, tén han ekteme nempeywa nelmaxnagko. 38Chakhawók axta anhan ekwákxo Ana m'a, yetlókók axta ekméso ekxeyenma awáxok Dios, keltennáseyha axta anhan ekxéna Jesús ma'a apxámokxoho énxet'ák ektaha axta apkelhaxanma yakwayam etnésásekxak makham apheykha énxet'ák tegma apwányam Jerusalén ma'a ektémakxa axta apheykha nano'.
Jesús enchána eltakhémo Nazaret
39Kelmeyákxeyk axta makham Jesús enchána tegma apwányam Nazaret yókxexma Galilea natámen eksawhomo elané m'a eltémókxa nak antehek segánamakxa, cham'a ektahakxa axta eleñemékxa.#Mt 2.23. 40Apwánenyek axta anhan ma'a sakcha'a, apyennakkak axta anhan, yáwegkek axta anhan apya'áseyak, leklamók axta apwáxok Dios aptémakxa.
Aptémakxa apketkok Jesús aphayam tegma appagkanamap
41Ekyókxoho apyeyam axta elmeyeykekxa Jesús enchána m'a tegma apwányam Jerusalén, kapásegwakxohok axta cha'a ekhem melwagkayam axta cha'a énxet'ák judíos, cham'a kéltéma axta Pascua.#Ex 12.1-27; Dt 16.1-8. 42Xama axta apwokmo doce apyeyam apagkok Jesús, sawhéxkok axta enchána elxega elmahágko m'a Jerusalén, hakte ektamheykegkaxa ancha'awo' axta ekwákxo enxoho m'a ekhem melwagkayam axta énxet'ák judíos. 43Aphákxeyk axta Jesús tegma apwányam Jerusalén neyseksa megkalya'áseyak enchána natámen ekyeykhe xa ekhem nak, cham'a elmeyákxo axta makham axanák enchána. 44Xama ekhem axta entemék elxega ámay, keneykek axta epaxkeygkok Jesús neyseksa apkelxega énxet'ák; wánxa agkok, xama axta étama nepyeseksa m'a apteme apnámokkok, tén han ma'a nepyeseksa elweteykxa nak, 45axta kóteyákxa'. Keñe axta eltakháwo m'a Jerusalén yakwayam enxoho kaktamsakxak ma'a.
46Antanxo ekhem axta entemék étamso, keñe axta ekwetágwokmo m'a kañe' tegma appagkanamap, nepyeseksa énxet'ák apkelxekmóso apnámokkok ektémakxa segánamakxa axta aphak, aphaxnawók axta kéltennáseykha, apkelmaxneyáha axta anhan cha'a. 47Pelakkasek axta eklegáxko ektémakxa aksok apya'áseykegkoho tén han ma'a ektahakxa axta cha'a apchátegmowéyak Jesús kélmaxneyeykha. 48Pelakkasek axta ekwet'a m'a enchána; entahak axta eyáneya egken se'e:
—Hatte, ¿yaksak ektaha sentemésesama nak negko'o xa? Awanhek negko'o ekyetnakhayo egwáxok negketama exchep, apyap tén han ko'o.
49Aptahak axta apchátegmowágko Jesús se'e:
—¿Yaksak ektéma selchetamsama nak? ¿Yagkólya'ásegkok megkatnehek maxma ko'o Táta apxagkok?
50Axta eyke kalya'ásegkok enchána aptahakxa axta apkeláneya.
51Keñe axta apkelyetlákxo enchána m'a tegma apwányam Nazaret, aphákxeyk axta yetlo apkelyaheykekxoho enchána m'a. Xéneykha axta awáxok egken ekyókxoho xa. 52Apwánenyek axta Jesús, xegágkek axta anhan apya'áseyak, leklamók axta apwáxok Dios aptémakxa Jesús, tén han ekleklamo apwáxók ma'a énxet'ák.#1 S 2.26; Pr 3.4.
Kasalukuyang Napili:
SAN LUCAS 2: LEGN
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Lengua Sur (Enxet) New Testament © United Bible Societies, 1992.
