Matiyo 7
7
Makapantag sang Paghokom sang Kadaigan
(Luk. 6:37, 38, 41-42)
1“Ayaw kamo paghokom sang kapag-onawa mayo untak di oman kamo hokoman ng Tohan. 2Kay hokoman kamo ng Tohan mag-onawa ng paghokom mayo sang kadaigan. Yang pangsokat na agamitun mayo sang kadaigan, yan oman yang ipangsokat kamayo ng Tohan. 3Nanga kono kinita mo yang bagaso sang mata ng lomon mo, awgaid yang kaoy na iyan sang mata mo pyasagdan da mo? 4Nanga makapaglaong kaw sang lomon mo, ‘Tabiya, kay lomon, akamangun ko ona yang bagaso sang mata mo,’ sarta aon kaoy sang kammo mata? 5Ikaw na yagapakita-kita gaid, kamanga ona yang kaoy sang mata mo untak kaw makakita ng madyaw sang pagkamang ng bagaso sang mata ng lomon mo.”
6Yagalaong oman si Isa, “Ayaw kamo pag-atag ng labi na mahalaga adto sang mga ido kay basin akagatun kamo nilan. Aw ayaw kamo pagdami ng kamayo perlas adto sang mga binatang kay pagagina-ginaan da gaid nilan.
Makapantag sang Pagpangayo adto sang Tohan
(Luk. 11:9-13)
7“Pangayo kamo kay atagan kamo. Panganap kamo kay makakita kamo. Pagtawag kamo kay apasuudun kamo. 8Kay sino-sino yang amangayo atagan, aw sino-sino yang amanganap makakita sang pyagapanganap nan, aw sino-sino yang magatawag, apasuudun.
9“Kamo na mga taganak, kong amangayo ng pagkan yang kamayo anak, atagan ba mayo ng bato? 10Kong amangayo yan ng isda, atagan ba mayo ng od? 11Na, kong kamo na maat na mga manosiya matigam mag-atag ng madyaw na mga butang adto sang mga anak mayo, labi-labi da yang Tohan na Ama mayo adto sa sorga! Sa way dowa-dowa i-atag nan yang maskin ono na madyaw adto sang otaw na amangayo kanan. 12Agaw sagaw pag-inang kamo sang kapag-onawa mayo daw ono yang karim mayo na inangun nilan kamayo. Yani yang kinatibokan ng Hokoman ni Nabi Mosa kipat yang indowan ng mga nabi.
Yang Mapiyut na Powertaan
(Luk. 13:24)
13“Pagsuud kamo sang mapiyut na powertaan. Kay maowag yang powertaan aw masayun yang daan paduug sang narka. Aw madaig yang yamagi sinyan. 14Awgaid mapiyut yang powertaan aw masikot yang daan paduug sang kinabowi na way kataposan. Aw tagbi gaid yang yakakita sinyan.
Yang Kaoy Akatigaman sabap sang Bonga nan
(Mat. 12:33-35; Luk. 6:43-45)
15“Pagbantay kamo sang mga otaw na yagalaong na mga nabi kono silan, awgaid dili kadi ng bunna. Yang pyaglaongan nilan maynang madyaw paningugan, awgaid main silan ng maisug na ido na amakasapad kamayo. 16Amakilaa mayo silan sabap sang ininang nilan mag-onawa na akatigaman mayo yang kaoy sabap sang bonga nan. Kay di maka-ipo ng grips sang sampinit, aw di oman maka-ipo ng igira sang bowa. 17Kong madyaw yang kaoy madyaw oman yang bonga nan, awgaid kong dili ng madyaw yang kaoy maat yang bonga nan. 18Kay yang madyaw na kaoy di makabonga ng maat, aw yang kaoy na dili ng madyaw di oman makabonga ng madyaw. 19Na, yang kariko ng kaoy na dili ng madyaw yang bonga, apilaun aw damian adto sang atoon. 20Idto sagaw, akatigaman mayo yang mga magpapayapatay na dili ng bunna kong tanawon mayo yang ininang nilan.
Yang di Amasakop sang Pyagdatowan ng Tohan
(Luk. 13:25-27)
21“Madaig yang mga otaw na yagalaong na ako yang Dato nilan, awgaid dili ng kariko nilan amasakop sang pyagdatowan ng Tohan kondi silan gaid na yagapangagad sang karim ng Tohan na kanak Ama adto sa sorga. 22Pagdatung ng allaw ng paghokom, madaig yang mga otaw na magalaong kanak, ‘Kay Dato, sang kammo ngaan pyapayapat nami yang pyaglaongan ng Tohan. Aw sang ngaan mo pyalogwa nami yang mga saytan aw madaig oman yang mga katingaan na ininang nami sabap sang kabarakat mo.’ 23Awgaid magalaong ako kanilan, ‘Wa ako akilaa kamayo. Panaw da kamo, kamo na yaga-inang ng maat!’
Yang dowangka Otaw na Yaga-inang ng Baay
(Luk. 6:47-49)
24“Agaw, sino-sino yang amaningug aw amangagad sang pyaglaongan ko, mag-onawa yan ng matigamay na otaw na yaga-inang ng baay sa babaw ng bato. 25Kay maskin dakowa yang owan aw yagabaa aw yasogat idtong baay ng makusug na samut, wa yan akatowad kay bato yang pyagapa-indugan nan. 26Awgaid sino-sino yang amaningug sang pyaglaongan ko awgaid di amangagad sinyan, mag-onawa yan ng sangu na yaga-inang ng baay sa babaw ng bowangin. 27Kay pagdatung ng dakowa na owan aw yagabaa aw yasogat idtong baay ng makusug na samut, na, yatowad da yan aw yadanas.”
28Pagkatapos ni Isa maglaong sinyan, yangkatingaa yang mga otaw sang pag-indo nan. 29Kay yaga-indo si Isa na aon kapatot nan aw dili mag-onawa ng mga magiindoway ng Hokoman.
Kasalukuyang Napili:
Matiyo 7: KI
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2012, Wycliffe Bible Translators, Inc. All rights reserved.
