Jean 21

Yeesu boonnooliibi biluli fātìi tí ká-u

1Boonee ní Yeesu fātìi tí nyántì u-ba u-boonnooliibi ká-u Tiibeeriyaadi mɔɔgbandi. Bi nín ká-u, tin jítèe sèé. 2Siimɔn Peetroo nì Toomasi un bi yíì Atee nì Natanayeel - un sá Kana Galiilee timbiliikinee - nì Seebeedee jipɔmbi nì Yeesu boonnooliibi bili biba mun di nìn kpáfì ki bí dicilpu. 3Ní Siimɔn Peetroo bí-bi yii: «M cá dilaantɔl.» Ní bi bí-u yii: «Ti mun làá nóó-si kí cù.» Ní bi búntì ki cūtìi kɔ́ buŋalimbun. Ama, yaadal nyeekuee, baa nìn cúú báà tiba nì tiba. 4Kutaa bíi wúntée, Yeesu dɔ́miń ki yú dimɔɔgbandi, ama u-boonnooliibi kaa nìn béè yii an sá úǹ di yú. 5Ní Yeesu bí-bi yii: «Binaacimpɔmbee, naa cúú ijɔmaaa?» Ní bi kíí-u yii: «Aayee, taa cúú.» 6Ní u bí-bi yii: «Dūmaan kulaaŋŋu kí tɔ̄ buŋalimbu ŋgiil pú, ni làá cúú ijɔm.» Ní bi dū kulaaŋŋu ki dūu tɔ́, ní an cúú ijɔm tikpil, áli gba baa ti kpáàa ŋūǹ kí dáaĺ kí nyāntiń#21.6 Dū B. 3 nì 6 kí ŋmàntī nì Luuki 5.4-7.. 7Niinee ní uboonnool un Yeesu nìn néeńee bí Peetroo yii: «An sá ti-Dindaan!»

Siimɔn Peetroo nín gbìl̄ yii an sá ti-Dindaanee, ní u dū u-bɔkutil ki pēeǹ, kun puee u nìn pēetì ní ki jéetì nnyimin ki wáŋkìi dūtì. 8Ní u-boonnooliibi bin kíǹee mun dāa bāań nì buŋalimbu, ki dátiń kulaaŋŋu nì ijɔm, kun puee baa nìn gíti dátiǹ dimɔɔgbandi, an nìn kíǹ fiii kí bà meetab dilaataal. 9Bi kpákatì kitiŋee ní ki ká ijɔm pá amɔsiŋkoon pu, nì kpɔnɔ. 10Ní Yeesu bí-bi yii: «Ní cáań ijɔm in ni cúúyee iba.» 11Ní Siimɔn Peetroo kɔ́ buŋalimbu poon ki dáaliń kulaaŋŋu ki bíl̀ kitiŋ, ijɔŋkpaan gbí poon, i nìn sá ijɔm dilaataal nì imuŋku ili nì saalaa nì ita. Nì min kɔkɔ ijɔm nìn wīikí kulaaŋŋuee poonee, kuaa nìn cátì. 12Ní Yeesu bí-bi yii: «Dāan̄ kí jīmaan tijin!» Ní u-boonnooliibi kansikin báà ubɔ kaa wāaǹ ki bālifì-u yii: «Sii di sá ŋma?» Bi nìn nyí yii an sá ti-Dindaan. 13Ní Yeesu sútìń, ki dū kpɔnɔ ki tīī-bi, ní ki tīī-bi ijɔm mun. 14Yeesu nín nìn kpíì ki fīkitèe, min bí nee di sá ntataatiim min u nìn nyántì u-ba ki dàkā u-boonnooliibee.

Yeesu bālifì Peetroo yii: «A néeń-maaa?»

15Bi jíń tijin ki dóòyee, ní Yeesu bālifì Siimɔn Peetroo yii: «Siimɔn, Yoowaneesi jipɔɔn, a néeń-mi ki jítiǹ bin bí neeee?» Ní u kíí-u yii: «Iiin, m-Dindaan, a nyí m nín néeń-see.» Ní Yeesu bí yii: «Á nīn kpàá m-pibiliŋ.» 16Ní u gíti bālifì-u nliliitiim yii: «Siimɔn, Yoowaneesi jipɔɔn, a néeń-maaa?» Ní u bí yii: «Iiin, m-Dindaan, a nyí m nín néeń-see.» Ní Yeesu bí-u yii: «Á nīn kpàá m-piii.» 17Ní u gíti bālifì-u ntataatiim yii: «Siimɔn, Yoowaneesi jipɔɔn, a néeń-maaa?» An nìn kɔ́ Peetroo kunimbaau min ní Yeesu nìn bālifì-u ntataatiim yii, a néeń-maaayee, ní u kíí Yeesu yii: «M-Dindaan, a nyí tikɔkɔ, ki nyí m nín néeń-see!» Ní Yeesu bí-u yii: «Á nīn kpàá m-piii#21.17 Dūú ŋmàntī nì Atuun 20.28, 1 Peet 5.2.. 18Ibaamɔn, ibaamɔn ní m sòoǹ nì si, a nín nìn sá unaacimpɔɔnee, a nìn gbìǹ a-dambalau a-ba, ní ki cá laakin a yaa lèe. Ama a yaa láa púĺee, a dāa tàntī a-ŋalii, ní ubɔ ń gbìn̄-si dambala, ní kí cáá-si kí cùnnì laakin aa bàà là kí cùee.» 19Yeesu nìn sòon̄ an bɔti kí dàkà Peetroo ŋkúm min u làá dāá kpú kí tīī Unimbɔti tinyoolee. U lī míǹ ki dóòyee, ní ki bí yii: «Nín̄ nóó-mi!»

Yeesu nì uboonnool un u nìn néeńee

20Peetroo fātèe, ki ká uboonnool un Yeesu néeńee di dòoń bi-boonee. Úǹ di sá un, bi nìn bíi jīǹ tijin u sútì ki nákáǹ Yeesu, ki bālifì-u yii: «Ti-Dindaan, ŋma di làá dū-si kí tīī a-nannanliibee?» 21Peetroo ká-uee, ní ki bālifì Yeesu yii: «Ti-Dindaan, tilati di làá bàń unee úǹ ní?» 22Ní Yeesu kíí-u yii: «M yaa là ú nīn bí kí nīn cí m-gítintam, tíǹ kaa ká-si. Sii dee, nóó-mi!» 23An nyɔɔbundi pu ní nnabiyaamu kíǹ ki lì yii uboonnoolee úǹ kaa làá ti kpú. Ama Yeesu kaa nìn lī yii uboonnoolee kaa làá kpú. Tin tin u nìn lēe di sá yii: «M yaa là ú nīn bí kí nīn cí m-gítintam, tíǹ ká-si la?»

Tibɔkuntikaal

24Uboonnool gbanti di ŋmàn̄ tibɔti nee, ní ti nyí yii tin kɔkɔwoooo u sòon̄ Yeesu puee sá ibaamɔn#21.24 Dūú ŋmàntī nì 19.35..

25Yeesu gíti túń atuun tikpil. Bi yaa bàà làá ŋmà u-tuuŋŋi ŋin u túńee diba diba, maa pàkā yii duulinya bàà ŋūǹ tigbɔn gbanti kɔkɔ#21.25 Dūú ŋmàntī nì 20.30..

Kasalukuyang Napili:

Jean 21: BASSARDC

Haylayt

Ibahagi

Kopyahin