Jean 19

1Niinee ní Piilati dū Yeesu ki tīī bí gbá-u anaalab. 2Soojab nìn dū ikuŋkum ki lùn̄ kibeefuulii ki dūu cíkiǹ Yeesu, ní ki dū dibɔkutil diba dì máǹ cínciŋ#19.2 dibɔkutil diba di máǹ cínciŋ: kpèè 15.17. ki dūu pēeǹ-u. 3Ní bi sútíi kɔ́l̀-u, ní ki lì yii: «Juuda yab bɔtiu, ti jáaḿ-si!» ní ki fátí-u.

4Ní Piilati fātìi tí nyánní, ní ki bí Juuda yab yii: «Kpèèmaan, m làá nyāntiń-ni-u mmɔŋki, ní béé yii man kaa ká kun pu ní kijapaai nee máaǹ ditafadaaldee.» 5Ní Yeesu nyáń ki cíkí ikuŋkum fuuliiki ki pēē dibɔkutimandi cínciŋ, ní Piilati bí-bi yii: «Kpèèmaan unil!» 6Bisaraaŋakpilib nì bi-pilisibee nín pée ká-uee, ní bi bíi tátí yii: «Bí kpáá-u ndɔpuntikaa pu! Bí kpáá-u ndɔpuntikaa pu!» Ní Piilati bí-bi yii: «Yòom̄maan-u kí cùú kpáá-u nimbi ni-ba ndɔpuntikaa pu, kun puee man kaa ká kun ní u ŋá ki máaǹ ditafadaaldee!» 7Ní Juuda yab kíí-u yii: «Timbi marau poonee, u máaǹ ŋkúm, kun puee u bí yii u sá Unimbɔti Jipɔɔn#19.7 Dūú ŋmàntī nì Akoo 24.16..» 8Piilati gbìl̄ mimmee, ní tifaandi mɔ̄tìi gíti kɔ́-u, 9ní u nín kóò kudiin, ki bālifì Yeesu yii: «A baasii nyánní la ní?» Ní Yeesu kaa kíí-u báà tiba. 10Ní Piilati bí-u yii: «Man ní saa làá kííii? Aa nyí yii m cáá mpɔn kí gíiǹ-si kí líí, ki cáá mpɔn kí yàntī bí kpáá-si ndɔpuntikaa puɔɔɔ?» 11Ní Yeesu kíí-u yii: «Aa cáá mpɔn ŋubɔ ki kútì ŋun Unimbɔti tīiń-si yilpuee. Míǹ pu ní un dū-mi ki ŋúbíǹ-see kpitii wīikíǹ sii yai.»

12Ki yōoǹ ŋyunti gbanti ní Piilati bíi nyàab̀ kí gíiǹ Yeesu kí líí. Ama ní Juuda yab bíi kūuntí ki lì yii: «A yaa gíiǹ kijapaai nee ki líìyee, aa ti sá gɔmina Seesaar bɔɔ! Un kamaa yaa yíì u-ba ubɔtee di sá Seesaar pulincɔnti.» 13Piilati gbìl̄ mimmee, ní ki nyántìń Yeesu mmɔŋki ki dɔ́miń ki kāl̀ dibɔsoonjal pu laakin bi yíì ataŋkpee paaŋŋuee, (eebru sooŋyin bi yíì Gabata). 14An nìn sá kuwiŋkuluu nyɔkɔm ní kutaa ń wúntí Dilákatil jiŋaaliu. Ní u lī Juuda yab yii: «Kpèèmaan, ni-bɔtiu sèé!» 15Ní bi bíi tátí yii: «Bí kpɔ̀-u, bí kpɔ̀-u, bí kpáá-u ndɔpuntikaa pu!» Ní Piilati bí-bi yii: «Mimmee, ḿ yàntī bí kpáá ni-bɔtiu ndɔpuntikaa puɔɔɔ?» Ní bisaraaŋakpilib kíí-u yii: «Timbi kaa ti cáá ubɔti ubɔ ki kútì Seesaar pu.» 16Niinee ní Piilati dū Yeesu ki tīī-bi bí cáá-u kí kpáá ndɔpuntikaa pu.

Bi kpáá Yeesu ndɔpuntikaa pu

(Kpèè Maat 27.32-44, Maar 15.21-32, Luuki 23.26-43)

Niinee ní bi cáá Yeesu ki búntì. 17Ní Yeesu yōoǹ u-dɔpuntikaaŋu ki nyánní kitiŋin ki nín cá laakin bi yíì Kuyikpabiku laŋkee, (eebru sooŋyin bi yíì Gɔlgɔta.) 18Niin ní soojab kpáá Yeesu ndɔpuntikaa pu, ní ki gíti kpáá binib bili ki ŋàl̄-u, ubɔ u-ŋaŋgiil pú, un kíǹee u-ŋaŋgan pú ní úǹ sáká kansikin. 19Piilati nìn ŋmàn̄ tiŋmaŋmabiti ki tīī bí cáá nákań Yeesu dɔpuntikaaŋu pu. U nìn ŋmàn̄ yii: «Yeesu Naasaareeti yɔu, un sá Juuda yab bɔtiuee.» 20Juuda yab tikpil nìn kàan̄ tiŋmaŋmabiti gbanti, kun puee laakin bi nìn kpáá Yeesuee nìn pìlīǹ kitiŋin, ní bi nìn ŋmàn̄ eebru sooŋyin ki ŋmàn̄ Room sooŋyin ní ki ŋmàn̄ greeki sooŋyin. 21Ní Juuda yab saraaŋakpilib bí Piilati yii: «Taa ŋmà yii: <Un sá Juuda yab bɔtiuee>, ŋmà yii: <Uninja nee bí yii úǹ di sá Juuda yab bɔtiu.>» 22Ní Piilati kíí-bi yii: «Tin tin m ŋmàn̄ee, tíǹ dee.»

23Bijanjaliibi bin nìn kpáá Yeesu ndɔpuntikaa puee nìn pēetì-u ki yōoǹ u-wampeeŋkaati ki yākatì minaa pu, bi-kɔkɔ yōoǹ diba diba pu. An kíǹ dibɔkutifɔkɔl #19.23 Dibɔkutifɔkɔl: Dibɔkutifɔkɔl gbantee, baa nìn gíí-dì ki ŋáĺ ki túkuǹ kii bi nín ŋál̀ abɔkuti puee, an nìn pée sá dimɔndi ní. Aa kāntí di-laaba ŋáĺ ki túkuǹ. din bi nìn lùn̄ dicilpu, kaa ŋáĺ ki kpáfì kpáfèe. 24Ní soojabee bíi lì tɔb yii: «Tí taa cátí dibɔkutil gbanti, tí tɔ̄maan kasi kí kpèè ŋma di làá jī díǹ.» Ní bi lafun ŋá míǹ. Min bi ŋá nee nóó nì Unimbɔti bɔti nín nìn sòon̄ ki síiǹ puee, yii:

«Bi dū m-wampeeŋkaati ki yākatì,

ní ki tɔ́ kasi m-bɔkutifɔkɔl pu#19.24 Ilan 22.19..»

Soojab nín nìn ŋá puee dee.

25Yeesu na nì Yeesu nawaa, nì Maarii Kloopasi nimpuu nì Maarii un sá Magidalaa tiŋkinee di nìn sí ki kɔ́ĺ Yeesu dɔpuntikaaŋu. 26Yeesu ká u-na nì u-boonnooliu un u néeńee yú ki kɔ́ĺ tɔb, ní u bí u-na yii: «M-na, kpèè a-jipɔɔn sèé», 27ní ki bí u-boonnooliuee mun yii: «Kpèè, a-na sèé.» Ki yōoǹ ŋyunti gbantee ní u-boonnooliuee yōoǹ-u u kíǹ ki bí u-cee.

Yeesu kúm

(Kpèè Maat 27.45-56, Maar 15.33-41, Luuki 23.44-49)

28Míǹ boonee, Yeesu ká yii kɔŋkɔnnee tikɔkɔ dóòyee, ní u bí yii: «Nnyinnyoo cáá-mi.» An ŋá kii Unimbɔti gbɔŋku nín nìn pée sòon̄ ki síiǹ puee dee#19.28 Ilan 22.16.. 29Dibool diba nìn yú niin, ndamam min gàm̀ee kā poon, ní bi dū kuca ki bɔ́ ndaamee poon#19.29 Dūú ŋmàntī nì Ilan 69.22. ní ki dūu túuń isɔpi kpaŋkpaaŋŋu pu, ní ki cáa gbēē Yeesu nyɔkɔ. 30Yeesu nyùn̄ee ní ki bí yii: «Tikɔkɔ dóò», ní ki tīntì u-yil ní ki dū u-fam ki tīī ki kpíì.

Bi dū kikpaŋ ki sāā Yeesu tikindi

31Ŋwìiń bíi jēetí ŋwiŋŋuŋfikaa ń kíĺee, Juuda yab kpilib kaa nìn là bin bi kpááyee wunti ń nīn lúń idɔpuntikaa pu ŋwiin gbanti. Ŋwiŋŋuŋfikaa gbanti nìn sá ŋwiŋkpaan ní, míǹ pu ní bi nìn mēē Piilati yii bí kɔ̄fì bi-taaŋi bí kpú malaa#19.31 kaa nìn là ...ŋwiŋŋuŋfikaa: kpèè Ditee 21.22-23. , bí cúú-bi kí kpáatí. 32Niinee soojab dɔ́miń ki kɔ́fì bin bin bi nìn kpáá idɔpuntikaa pu nì Yeesu dicilpuee upeepeekaa nì uliliiti taaŋi. 33Bi bāań Yeesuee, ní ki ká yii u kpíì dooooyee, míǹ pu ní baa ti kɔ́fì úǹ taaŋi. 34Ama ní sooja ubɔ bi-kansikin dū kikpaŋ ki sāā u-tikindi, ní fatiku nì nnyim nyáń. 35Un bíi lèekī seera tibɔti nee puee baasii ká-tì ní, ní u-seerauee sá ibaamɔn, ní u nyí yii tin u sòoǹee sá ibaamɔn, ni mun ń ŋmā kí fōō kí kíí. 36Tin bí nee ŋá míǹ, án ŋmā kí nóó nì Unimbɔti gbɔŋku nín nìn lī ki síiǹ puee, yii: «Baa làá wīī u-kpabil báà diba#19.36 Kpèè Disa 12.46, Dikà 9.12, Ilan 34.21..» 37Laaba mun gíti lī yii: «Bi làá dāá ká un tikindi bi sāā ki cíl̀ee#19.37 Saka 12.10..»

Bi síb́ Yeesu

38Míǹ boonee, Jooseefi un sá Arimatee#19.38 Arimatee : kpèè Maat 27.57 nì tin bi ŋmàn̄ kugbɔŋu faaku taapuee. tiŋkinee, cūtì ki mēē Piilati nsan kí yòon̄ Yeesu wunti. - Jooseefi gbanti nìn sá Yeesu boonnooliu ní kaa là binib ń béé, kun puee u nìn fàŋkí Juuda yab. - Ní Piilati pú-u nsan, ní u cūtìi yōoǹ Yeesu wunti. 39Niikoodeem un nìn cūtì dalba kunyeeu ki ká Yeesuee mun dɔ́miń, ki cáań tikaliŋkpun tin bi yíì miiree, tì ŋmàl̄ nì talaalu un bi yíì Alooweesi kiiloobi mmuŋku nì saalaa nyɔkɔm. 40Bi yōoǹ Yeesu wunti mimmee, ní ki dū iŋaabu ki fìn̄-u ki dū talaalubee ki yāaǹ u-pu, kii Juuda yab koobiliŋ nín bàlifī bi yaa làá síb́ unil bí ŋá puee. 41Laakin bi nìn kpáá Yeesuee, bukpaa bubɔ nìn bí niin. Bu-poon ní dikaakupɔndi din ni baa láá síb́ báà ubɔee nìn bí. 42Niin ní bi nìn cáá Yeesu ki síb́ kun puee án nìn sá kutaa ń wúntí Juuda yab wiŋŋuŋfikaaŋuaa, ní dikaakulee mun nìn pìl̄ niin.

Kasalukuyang Napili:

Jean 19: BASSARDC

Haylayt

Ibahagi

Kopyahin