Psalmyn 10
10
PSAL. 10.
Ut quid, Domine.
1Cre hon t’ow shassoo choud jeh, O Hiarn:
as follaghey dt’eddin ayns y traa fêmoil dy heaghyn?
2Ta’n mee-chrauee dy chooilleeney e aigney hene jannoo tranlaase er y voght:
lhig daue hene ve goit ayns ny kialgyn croutagh t’ad er ghoaill ayns nyn smooinaghtyn.
3Son ta’n dooinney mee-chrauee er voggyssagh jeh yeearree e chree hene:
as loayrt dy-mie jeh’n er sayntoilagh ta feoh ec Jee er.
4Ta’n mee-chrauee cha mooaralagh, nagh vel geill echey da Jee:
cha-moo ta Jee ayns ooilley e smooinaghtyn.
5Ta ny raaidyn echey kinjagh seaghnagh:
ta dty vriwnyssyn foddey er-skyn roshtyn e hilley, as er yn oyr shen t’eh cur-y-laan fo ooilley e noidyn.
6Son t’eh er ghra ayns e chree, Cha n’aggle dou, cha bee’m dy-bragh er my hilgey sheese:
cha daghyr skielley erbee my raad.
7Ta’n beeal echey laane dy ghweeaghyn, dy oalsaght as molteyrys:
fo e hengey ta mee-chraueeaght as fardail.
8T’eh soie fo-chlea myr maarliagh ayns corneilyn fadaan ny straaidyn:
as dy-follit ayns e oayldyn dorraghey t’eh dunverys yn dooinney gyn loght; ta e hooillyn soit noi’n voght.
9Son t’eh lhie farkiaght dy-follit, dy-jarroo myr lion t’eh ny lhie kellit ayns e ooig:
dy vod eh spooilley yn boght.
10T’eh jannoo niart er y voght:
tra t’eh tayrtyn eh ayns e ribbeh.
11T’eh tuittym sheese, as crommey eh hene:
dy vod sheshaght ny boghtyn tuittym ayns laueyn e leeideilee.
12T’eh er ghra ayns e chree, Cha vel aggle orrym, ta Jee er yarrood:
t’eh follaghey e eddin, as cha der eh dy-bragh geill da.
13Irree, O Hiarn Yee, as trogg seose dty laue:
ny jarrood yn boght.
14Cre’n-fa yinnagh y dooinney olkyssagh loayrt dy-mollaghtagh noi Jee:
choud as t’eh gra ayns e chree, Cha vel aggle orrym, s’cummey lhiats, O Yee, er y hon.
15Shickyr t’ow er vakin eh:
son t’ow goaill tastey jeh mee-chraueeaght as aggair.
16Dy vod oo goaill y chooish ayns dty laue hene:
ta’n boght coyrt e varrant hoods; son uss yn fer-coonee ocsyn ta gyn caarjyn.
17Brish uss pooar yn mee-chrauee as goanlyssagh:
gow ersooyl yn vee-chraueeaght echey, nagh bee veg jeh ry-gheddyn.
18Ta’n Chiarn ny Ree son dy-bragh as dy-bragh:
as ta ny ashoonyn er cherraghtyn ass y cheer.
19Hiarn, t’ow er chlashtyn yeearree ny boghtyn:
t’ow niartaghey ny creeaghyn oc, as ta dty chleaysh geaishtagh roo;
20Dy chooney lesh y chloan gyn ayr as y boght gys nyn gair:
nagh bee yn dooinney seihltagh ny sodjey er ny hoiaghey seose nyn ’oï.
Kasalukuyang Napili:
Psalmyn 10: PS1765
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
maintained by the British and Foreign Bible Society