Mateyo 8
8
Mkoma.
1-4.
1Akisheela mwe uja mulima, wantu wangi muno wazamtongela. 2Kuna mkoma, azamwizila, azamkinila angwe: Zumbe, ati wakunda, wadaha kunihonya. 3Azakusula mkono, azamdowa angwe: Nakunda, uhone. Viya du lushe ukoma wakwe uzauka. 4Yesu azamuti: Olela, ushezavimγambila muntu! Miya hita, umlawile mvikizi, uiγale jiya tulo, Mose alaγilizejo, jiwaγalukile uwona!
Mkwee ja Petelo.
14-18.
5Akiingila Kapelinaumu, mkulu ywa washilikali azamwizila, azamhembeleza, angwe: 6Zumbe, mbwanga ywangu atoziγwa ni mahisho nyumbai, ana pengene, aisiiza kulumilwa. 7-8Angwe ndiye: Neniize, nimhonye. Yuja mkulu ywa washilikali azamlandula angwe: Zumbe nkaviniagiza, ukiingila mwangu; longa mbuli du! 9Ne mbwanga ywangu atahona. Hambu imi nami ni muntu neitika ufuṅwa, kangi vivyo nina washilikali weniitika, nikimγamba uyu Hita!, ahita, nikimγamba mtuhu: Iza!, aiza, nikimγamba mupuna ywangu: Γoshola visiku!, aγoshola. 10Yesu akiviiva, azamaka; azawalonga waja wemtongela: Kweli namiti: Kwa Waisilayeli saene muntu mwena mitozesheze ye ivyoho. 11Miya namiti: Wangi nezewalawe kwelawa zuwa na kweingila zuwa, waikale ndala haṅwe na Abulahamu na Isaka na Yakobo uzumbe wa lwingu. 12Miya wenyezi wa uja uzumbe nezewashindikwe na se na kwe iwiza; ne kwena kulila na kukemeza meno. 13Vikibinda Yesu azalonga yuja mkulu ywa washilikali: Hita! Uvyotozesha vikubontokele! Ija ngela ne yuja mbwanga ahohona.
Mkwee ja Petelo.
14-16.
14Yesu akiingila mwe nyumba ya Petelo azamwona nine ja mkaza Petelo kuti: Ailele sasai, ana mbu. 15Azamtoza mkono, ne mbu zihomleka; azainuka azamγoshwela ndima. 16Lwa ṅwiyaγulo wazamletela wangi wehuma mpepo; azaingata ziya mpepo na kulonga du, hata woshe watuhu wehuma azawahonya, 17kangwe vibontoke viya vilongiγwevyo ni mteγanyi Yesaya akiγamba: Ṅwenye azakiitwisha kulumila kwetu, azainula manyonge yetu. 18Yesu akiona wantu wangi, wakimdenganila, azalaγiliza, waomboke na sheja.
Kumtongela Yesu ku zeze?
19-22.
19Kuzaiza mtabaluwangwa, azamuti: Mfuzi, nikutongele, ndiko uhite nako! 20Yesu azamuti: Mpelele zina maleme, madeγe yeanga ulanga yana masasa, miya ṅwanangwa ywa muntu nkana ha ikila mutwi. 21Mhina mtuhu azamuti: Zumbe, nikundiza, ninehita kwa mzika tate! 22Yesu azamuti: Nitongela, uleke, wafilewo wazike weyae wawe wefa!
Yesu atongomaza bahali.
23-27.
23Akiingila mwe chombo, wahina wakwe wazamtongela. 24Kuzainuka mpeho nkulu mwe bahali, mpaka chombo chikiγubikwa ni maimbi, miya ṅwenye aisisile. 25Wazamwizila, wazamwinula angwe: Zumbe, tihonye! Taaγa. 26Azawati: Nini mkitaogoha ivyoho? Nini mkishetozesha vyedi? Vikibinda azainuka, azavaila ija mpeho na bahali, ne kuhohombwela kabisa. 27Wantu wazamaka angwe: Ni muntu ani uyu, mpeho na bahali zikimwitika?
Watamu waili wehuma mpepo.
28-34.
28Akibula sheja mwe shi ya Gadala azakintana na wantu waili wehuma mpepo, walawa kwe mbila, wana nkunguka kabisa, kwa ivyoho muntu nkazinka mwe ija sila. 29Wazakema angwe: Tina mbwai ishwi na iwe, ṅwana Mulungu? Uzaiza na kunu, utilumize, mishi yetu ishizati ibule? 30Miya haja, waliho, hale hana ifyo ja nguluwe nyingi zelishiγwa. 31Ziya mpepo zizamhembeleza angwe: Ati watiingata, titume, tiingile mwe jiya ifyo ja nguluwe! 32Azaziti: Hitai! Zizalawa, zizahita, zizaingila mwe ziya nguluwe. Ne ifyo joshe jiholumbila kunguwi na mwe bahali, zizafa muja mwe mazi. 33Walishi wazanyilika, wazahita na kaya, wazabilikila vyoshe, hata mbuli za waja wahumilewo mpepo. 34Ne wantu woshe wa muzi waholawa, wambashe Yesu; wakimwona, wazamhembeleza, auke mwe shi yawe.
Kasalukuyang Napili:
Mateyo 8: KISHNT05
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
New Testament in Kishambala © Bible Society of Tanzania, 2005.
