Lukéstar 5
5
1O naródos kána geló sa palál les, te šunél e Devléskere alavá, térdilo sas paš o baró paní Genesareth.
2Dikhljás doné korabjén, pašé paš o paní, amá ikístile sas o mačhéngere katár lénde, pe katlé thovénas.
3Geló paš jekhé korabjáte, e Simonéskere, phendjás léske, ta te mukél xaŗí katár i phuv, beštó‐da ándo korábi, othár sikljardjás e narodós.
4Kerdó o vakeribé, phendjás Simonéske: Muk‐ta ándo xaripé, čhivén‐ta tumaré katlé, mačhén t’astarén.
5Vakerdjás o Simónos: Abé Xulája (Góspodi)! amé tsálo rat butjarás, nána astardjám čípota, amí te mángsa, kateljaráv o katló.
6Kerdé čoká. Hékje okotár nái‐but mačhén dolén, hemén ta te phágjol o katló‐da.
7Vikínen pe amalén, kai siné e javré korabjénde ta t’aavén, te pomožínen len. Alé, pherén o korabjá, mačhén, hemén téljon telál o paní o korabjá‐da.
8Dikhljás o Simónos, o Pétres, peló pe kočénde mamúi e Isúste, vakerél: Dža mándar, Góspodi, bezexéngoro manúš sinjóm.
9Čoká phendjás, kai čudínel‐pes ov‐da, sáŗoŗe‐da, sostár edekí but mačhén dolénas.
10O Jákov‐da, thai o Ivános, e Zebedejéskere čhavé, kai e Simonésa kupáte butí kerénas. Phendjás e Simonéske o Ísus: Ma‐dar, akalké dieséstar manušén kadolés.
11O korabjá tradiné ándi phuv, sa muklé, gelé palál léste.
12Uló so uló, kána siné ov jekhé dizjáte, aló léske jek geraló, dikhljás les, peló pe móste ándi phuv, molínelas‐pes léske, čoká: Góspodi, te mángsa, astí šužljarésa man.
13Kerél pe vastésa, dokandínel les, thai phenél: Mangáv t’ovés šužó. Thai andékhora nakló léstar o ger.
14Phenél léske o Ísus: Ma izváker dekáte, amí dža, sikáv tut e rašajéske, t’ovés šehadéti mamúi lénde, sar phenél e džuténgoro zakónos.
15Amá buxljardjás‐pes ándo them i xórata, sa pó‐but, kídel‐pes but naródos, te šunél, kidisájle turjál les, nasfalipnástar te sástjon.
16Adavká‐da geló jekhé pustoné thanéste, ta te molínel‐pes.
17Nakló so nakló, jek diés bešélas, ko sikljaribé. Bešén pašé o Farizéi, thai o sikljardé katár e forénde ándi Galiléa, ándo Džutnipé, t’ándo Jerusalím; e Devléstar kuvéti sas léske, ta te sastjarél len.
18Áke igálen jekhé muršés mamúi léste, odolké muršéste isí nasfalipé, i dámla; kerén te igálen les mamúi léste uprál jekhé kervetjéste, te thovén les anglál léste ki phuv.
19Rodiné, nan’ araklé sar te anén les andré, sóske baró kalabaléki sas. Kerén, džan uprál o kher, teljarén les andrál, e kerevetjása berabér, maškár e narodóste, Isúske ko piŗé.
20Adavká, léngoro pakjaibé kána dikhljás, phendjás: Múrša‐ba, bašladínjoven te bezexá.
21Mislínen o Farizéi thai o sikljardé: Savó si adavká, ne‐li akušél e Devlés, ne‐li o Del kórkoŗo aští mukéla o bezexá e manušéngoro?
22Axáljol o Ísus, so mislínen, phenél: So mislínen tumaré godjáte?
23So si pó‐lesno te phenáv‐li: Prostíndjoven te bezexá, ili te phenáv: Uští, ta te phirés?
24Amí te džanés, kai isí mánge, (e Manušéskere Čhavéske) zor, andé dünjás te phuteráv e manušén katár o bezexá, uxtí, — phenél o Ísus e nasfaléske, — uxtí, le to kéreveti, džá‐tuke kheré.
25Vŭ́zdel‐pes andékhora o nasfaló, vŭzdinjás po kéreveti, geló‐peske pe kheréste, e Devlés ašarindós.
26Sáŗoŗe‐da čudínen‐pes, ašardé e Devlés, amá phérdile, traš, phenén: Baré šejlér avdiés dikhljám.
27Napalál ikístilo o Ísus, dikhljás jekhé gümrükdžís, o aláv léskoro Levi, bešélas ki gümrükxané. Phenél léske o Ísus: T’avés palál mánde.
28Ov‐da, o gümrükdžís sa mukhljás, uxtjél, džal palál léste.
29Kerél léske o Lévi baró xabé, gotvínel ándo kher, thai sas but džené gümrükdžídes othé, thai avér džené, bešté ki mása lésa berabér.
30Amá o Farizéi thai o sikljardé mŭrmŭrínen, phenén léskere amalénge: So xas, piés e gümrükdžidonéntsa, thai e bezexengeréntsa?
31Odovká phenél: O sastó manúš na mangél drah, amá o nasfaló mangél.
32Aljóm te vikínav odolkén kai si lénge bezexá, nanái te vikínav odolkén, e lačé manušén.
33Odolká phenén léske: E Ivanéskere amalá sóske but drom na xan, na pién, but molínen‐pes, thai čoká kerén e Farizejéngere amalá‐da, amá tumaré amalá, sa xan, pién.
34O Ísus phendjás lénge: Aští‐li bokhalé t’ačhalés e čhavén, kána bešéla léntsa o biavéskoro (o Džamutró).
35Amí kaavél o diés kána léndar kalínjovel o Džamutró, togái néka bokháljoven.
36Phendjás lénge jek paramísi, čoká: Nanái andé dünjás manúš edekí deniló, ta te lel nevó kotór than katár pe šéxja, ta te sivél les jekhé purané urjaibnáste, sóske te kerél adžuká, hem o nevó urjaibé phuterél, hem o nevó kotór e purané urjaibnáske na prépel.
37Thai jek dženó nána thovél neví mol andé purané šišénde, sóske te kerél adžuká, kapháŗjoven o šišé katár i mol, kačhórdjovel i mol, k’oovén o šiše phaglé.
38Amá trébe te thovél i neví mol andé nevé šišénde, thai čoká aští ikeréla hem i mol hem o šišé.
39Hem čoká nanái te piél puraní mol, thai pósle te mangél neví mol. Sóske phenél: I puraní pó‐lačí isí.
Kasalukuyang Napili:
Lukéstar 5: ARL1912
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
