Matiu 8
8
Yisa kaah nan Teb Kikɔŋ man
(Mag 1:40-45; Lug 5:12-16)
1Yisa kaah nan nyan lijɔɔl a paab ki jiirin n-yonn man ni, le bininfob takpem nɔɔ u bɔɔn. 2Le ki miin kikɔŋ kiba mu dan ki nan gbaan u nintogil ki ke, “Uyudaan, ni ye a ban ke a li fir che n wiɛm nan n diɛ.” 3Le Yisa tann u nɔɔ ki maa u ki bei u ke, “N ban man, a wiɛm nmɔn n diɛm!” Libol nmɔn le u wiɛm nmɔn sin diɛ. 4Le Yisa kpaan u ke, “Li nyi a bei uba tibɔr nan, amaa li chaa Uwonbɔr a minmanu ban ki tan ta a ba ki wɔɔn u, wee ki jin mann kumanug kan wee Moziz nan siin ni, wee ni li ye siɛra.”
Yisa kaah Teb Rom a Tɔb a Sanliiru a Toontunnu man
(Lug 7:1-10)
5Yisa kaah nan tan kɔɔ Kapeniɛm n-yonn man ni, le Rom a tɔb a sanliiru wan ŋmag bitɔtogib kobig nan dan u ban ki nan balin u ke un ter u, 6Le ki ke, “Uyudaan, n toontunnu le dɔɔ iniin, le u gbanann kpo, le ni mugir u pam.”
7Le Yisa bei u ke, “N li jo ki tan teb u.”
8Le bitɔb a sanliir win jiin ke, “Uyudaan, maa kpaan nin a dan n niin ni. Amaa a pag limɔbonl a binba ke n toontunnu nmɔn li kan kutebug. 9Nan bu-n n baantɔɔl ye wan cheel tininkper a pɔɔm le, ki ŋmag bitɔtogib n bɔɔn. N bei uba le ke, ‘Li chaau,’ le un jo; ki bei utɔ mu ke, ‘Dan ni,’ le un dan. N le bei n toontunnu ke, ‘Ŋa nan na’ ke, u yin tun man le.”
10Yisa kaah nan gbir man nmɔn, le ni gar u; le u gbiɛ lig bininfob ban nɔɔ u bɔɔn nin ki bei bi ke, “Ibamɔn le n bei ni nan, maa laa kan uba wee u jɔɔ yada nan a booli Iziral yaabin ni. 11N bei ni le, bininfob takpem na li nyann titogil nin bɔɔn, le bi ma nin Abiraham nin Azig nin Jekɔb li lagin kal ki ji tijiir, paab a naamin. 12Amaa nim ban ye nnaam nmɔn a ninfob nan, bi na li ta ni ki gab ngbaan, libunbɔnlin; nin yaan nmɔn le ni tan yin fabin ki mɔr ki ŋma inyin.”
13Le Yisa bei bitɔb a sanliir win ke, “Li kun na ŋaah ŋa yada man ni, nin tun man ki seiŋa.” Le u toontunnu nmɔn sin nan kan kutebug n-yonn nmɔn.
Yisa kaah nan Teb Bibaarib takpem man
(Mag 1:29-34; Lug 4:38-41)
14N-yonn man wee Yisa nan kɔɔ Piita a niin ni, le u kan Piita a chɔɔpii kaah dɔ bu, ni nan ye kugbanantoŋ le. 15Le Yisa maa u nɔɔ; le u gbanantoŋ nmɔn diɛ, le u fii ki ŋa bi kuchɔŋ.
16Lidaal nmɔn a jɔɔg, bi nan ta bininfob takpem ban wee nnaanbiim nɔɔ bin ki dan Yisa ban; le u pag limɔbonl ki nyan nnaanbiim nmɔn, le ki ji teb bibaarib nmɔn biɛn. 17Waah nan tun man ni, nan gbeen ulinlenn Azaya kaah nan pag man n le ke,
“U ma baantɔɔl le gaa ti gbanantoŋ
nin ti wiɛn biɛn ki tu.”#Azaya 53:4
Ban ban bin Nɔɔ Yisa nan a bɔr
(Lug 9:57-62)
18Yisa kaah nan nan kan ki miin kuninfogbaluŋ gɔɔn u n-yonn man ni, le u bei u bɔɔnɔɔbin ke bin fiim wee bin lɔŋ limɔgil nan a dool. 19Le ban wɔɔnn Uwonbɔr a siim n-yaa ni uba dan ki nan bei u ke, “Wan wɔɔn n li nɔɔŋ ki jo ŋaah chaa nan yaan biɛn.”
20Le Yisa jiin ke, “Tiŋɔgir jɔɔ ifal, le nnɔɔm man laan paab nan mu jɔɔ titar, amaa Uninfosaal a Big kaa jɔɔ waah li dɔɔn nan yaan ni.”
21Le u bɔɔnɔɔru uba mu nan bei u ke, “N Yudaau, che n chinn jo tan pii n baa wee.”
22Le Yisa bei u ke, “Li nɔɔm ni wee ki che bitakpiib li pii bi taba.”
Nfaam nin Nnyum kaah Chee Yisa a Mɔb man
(Mag 4:35-41; Lug 8:22-25)
23Le Yisa kɔɔ kuŋaluŋin, le u bɔɔnɔɔbin biɛn nɔɔ kɔɔ. 24Le ki miin ntafapɔɔrim fii ki daar limɔgil n-yaan, le kunyungbɔŋ daar ki yugir kɔɔ kuŋaluŋ n-yaa poolin ki nan ban min gbee, amaa le Yisa ma dɔ ki jiɛn. 25Le u bɔɔnɔɔbin dan ki nan fiin u, ki bei u ke, “Uyudaan, fee ti ki jaau ke nnyum yin ji ti le!”
26Le Yisa bei bi ke, “Nim yada parim dam nan, ba ŋa wee ni san bijawaamaa?” Le ki fii ki tiɛn nfaam nin kunyungbɔŋ n bu ke min ŋmin na, le mi sin ŋmin soon.
27Le ni gar bi, le bi baan tab ke, “Uninfo nan ye ninfo bolin baa? Wee nfaam nin kunyungbɔŋ chee u mɔb baa!”
Yisa kaah nan Teb Bijab bilee ban Jɔɔ Nnaanbiim nan
(Mag 5:1-20; Lug 8:26-39)
28Yisa kaah nan lɔŋ Galilii a mɔgilin ki foo Gadara a tiŋin nan, le bijab bilee ban nan gbee nin nnaanbiim nan nyan tikarin ki kenn u. Bi nan bir pam ni bu che ni nan pɔɔ nin uba n fir ki nɔɔ nsan man chaa tikarin nmɔn yaan. 29Le bi tiɛn ki ke, “Fin Uwonbɔr a bija, tim nin fin babu, a dan a nan jin ti fala wee iyoo kaa la foo?”
30Idool takpem nan si ngbaan ki mal nin yaan ki ji. 31Le nnaanbiim nmɔn nan balin Yisa ki ke, “Ni ye a nyan ti ke a jaa ti wee ti tan kɔɔ idool nan yaan.”
32Le Yisa bei bi ke, “Ni li chaau!” Le bi nyan bijab n-yaan, ki jon tan kɔɔ idool nmɔn yaan; le idool nmɔn biɛn nan guun ki jiir limɔgil takpenl n-yaan le nnyum jin bi. 33Le ban guu idool nmɔn fii ki guun jon kitiŋ n-yaan, ki tan mɔɔn nan biɛn tun, nin nnaanbiim kaah nyan bijab n-yaan man. 34Lig, le ki miin kitiŋ n-yaa ninfob biɛn fii ki guun too Yisa. Baah nan kan u n-yonn man ni, le bi balin u ke un nya bi tingbɔŋin na.
Kasalukuyang Napili:
Matiu 8: KUGL
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Komba New Testament © Bible Society of Ghana, 2014.
