Lug 18
18
Lipukɔɔl nin ubɔjir a bɔŋal
1Le Yisa gaa u bɔɔnɔɔb libɔŋal ki wɔɔn bi ke li ŋan ni bi li miɛ Uwonbɔr iyoo biɛn, wee ki laa bagir ki ta jiɛn ni. 2Le ki ke, “Ubɔjir uba le nan be kitiŋ kiba ni le kaa san Uwonbɔr le u baga mu kaa be bininfob ni. 3Lipukɔɔl mu nan be kitiŋ nmɔn yaan, ki gbaa chaan u ban ki nan bei u ke ‘Seim ibamɔn ni, wee n nya kidataag kan mugirim nan a nɔɔn.’
4“Iyonn iba u nan ti yiin le. Ni bɔɔn bu, le u nan tiɛr ke, ‘Hali maah kaa le san Uwonbɔr wee n baga kaa be bininfobin ni, 5amaa lipukɔɔl nan kaah chaan ki nan mugirim iyoo biɛn nan see ke n sei u ibamɔn, wee u fɔɔr ki sin jiɛnim ke n miɛl fa wa.’ ”
6Le Uyudaan len ke, “Ni pel ubɔjir wan kaa ye ubamɔndaan nan kaah len man. 7Ke Uwonbɔr kaa li sei u ninfogann kaab ban miɛ u nween nin kunyiɛgin ibamɔn naa? U li yii baa? 8“N bei ni le, u yin sei bi ibamɔn le weem. Amaa Uninfosaal a Big nan foon n-yonn man ke u li kan yada daam kutingbɔŋ nan yaan naa?”
Farasii nin ulanpogaar a bɔr
9Le Yisa gaa libɔŋal ki sei ban tiɛr ke bi ma ye bibuchim ki jon bininfob biɛn nan ke: 10“Bijab bilee le nan tan kɔɔ iwonjiɛn niin ke bin miɛ Uwonbɔr, uba nan ye, Farasii le wan gurin mu ye ulanpogaar. 11Le Farasii nmɔn sir ki miɛ u tɔɔl a miɛm ke: ‘Uwonbɔr, n pooriŋ, maah kaa nann n tab ban ye, ban feen, ban ŋaan tibir, ban tun iwanchɔgin toon, bee ulanpogaar nan ni. 12N lolig bimɔb itaa ilee le iweehn ilile a poolin. Maah jɔɔ nan biɛn piig a poolin, n nyan liba le ki sei Uwonbɔr.’
13“Le ulanpogaarin ma sir dindanl kaa chee un waan lig paabi. Le ki tibin u yul ki ke, ‘Uwonbɔr, sam min tibirdaan kunyunyunbaag ni.’ ”
14Le Yisa ji mann bei bi ke, “N bei ni le nan, ulanpogaar n-yaa miɛm le Uwonbɔr nan chee le u nan kun, amaa naa ye Farasii a ninfou n ni. Uninfo wan biɛn don uba paab nan, le Uwonbɔr yin jiin u tum, le wan mu jiin uba tum nan, le Uwonbɔr yin don u paab.”
Yisa kaah nan kaab jaa nbuwaab finfim bu man
(Matiu 19:13-15; Mag 10:13-16)
15Bininfob nan jɔɔ nbuwaab finfim le chaan Yisa ban ke un ta u nɔɔ ki paan bi bu. U bɔɔnɔɔbin kaah kan man ni; le bi fuun bi bu. 16Amaa le Yisa yin nbuwaabin ke bin dan u ban, le ki ke, “Ni che nbuwaab finfim nmɔn dan n ban, ki laa ŋɔɔ bi, nan bu-n Uwonbɔr a naamin ye bi yaa bosu nan yaan le. 17N bei ni ibamɔn le, uninfo wan kaa chee un gaa Uwonbɔr a naamin ke kibig finfiŋ ke, waa yin kɔɔ u naam nmɔn yaan ni.”
Ujɔɔndaan a bɔr
(Matiu 19:16-30; Mag 10:17-31)
18Uninkpel uba nan baan Yisa ke, “Wan wɔɔn ki ŋan, n yin ŋa nii wee ki nan kan limiɛl lan kaa jɔɔ ndiɛm maa?”
19Le Yisa jiin ki baan u ke, “Ba ŋa wee a yim wan ŋan naa?” “Uninfo ŋan kaa be see Uwonbɔr a binba. 20A nyi nsiimin: ‘Laa tun iwanchɔgin toon ni, laa ku uninfo, laa su, laa ji tibɔr kaar ki siɛra, ŋa jilima ki sei a baa nin a na.’ ”
21Le uja nmɔn jiin ki bei u ke, “N pii ŋmag ni niɛ nan biɛn le nbuwaan nin na.”
22Yisa kaah nan gbir man ni, le u bei u ke, “Niba le laa pariŋ. Kɔɔr tiwann tan biɛn wee a jɔɔ-n na, wee ki ta sei faladama, wee ki li jɔɔ lifaal paab wee ki dan ki nan nɔɔm.”
23Waah nan gbir man ni, le u sufu bii, nan bu-n u nan ye uja wan jɔɔ lifaal le takpem. 24Le Yisa lig u ki len ke, “Naah pɔɔ man ki sei nin bijɔɔndam nkɔɔ Uwonbɔr a naamin! 25Ibamɔn, alakoomi kaah li kuur siɛrig a bonlin kaa pɔɔ foo nin ujɔɔndaan n fir kɔɔ Uwonbɔr a naamin ni.”
26Ban nan gbir man nin nan baan ke, “Ŋma ni li fir ŋmaraa?”
27Le Yisa jiin ke, “Nan pɔɔ uninfosaal ban ni kaa pɔɔ Uwonbɔr ban ni.”
28Le Piita bei u ke, “Lig tim jiɛn nan biɛn wee ti jɔɔ-n le ki nɔɔŋ!”
29Le Yisa bei bi ke, “N bei ni ibamɔn le,” “Uba kaa be wee ki jiɛn u niin bee u poo, bee u baa, bee u na, bee u kpetiib, bee u watiib, Uwonbɔr a naamin bu, 30wee ki laa kan limiɛfol takpem lan kaa jɔɔ ndiɛm n-yonn nan yaan nin iyoo yan chaan nan ni.”
Yisa kaah nan pag u kum a bɔr ki kpiɛ nfim mitaa man
(Matiu 20:17-19; Mag 10:32-34)
31Le Yisa nan yin u bɔɔnɔɔb piig nin bilee-n ki nyan ngbaan ki tan bei bi ke, “Ti chaa do Jerusalam le nan, le niwann nan biɛn wee Bilinlemin nan sɔb ki jiin min Uninfosaal a Bigin paamin li gbeen. 32Bi na li taa u ki sei ban kaa ye Juu yaabin. Bi na li daar u nyɔɔrug, ki sugir u, ki siin timɔsann ki jaar u bu, ki fiɛb u ki nan ku u. 33Le ni ween itaa daal u li fii nkumin.”
34U bɔɔnɔɔb nmɔn kaa nan biɛ u bɔr nmɔn a taai kolibi. Bi nan woon ni taai le bi ban, le baa nan biɛ Yisa kaah nan pag jiin nan paami.
Yisa kaah nan ligir ujɔɔn wan miɛ man
(Matiu 20:29-34; Mag 10:46-52)
35Yisa kaah nan tan mal Jeriko a tiŋin nan, le ujɔɔn uba nan ka nsangbaan ki miɛ. 36Waah nan gbir bininfob takpem kaah choon ni, le u baan nan ŋaan. 37Le bi bei u ke, “Yisa wan ye Nazarif a ninfo win le chaa jo.”
38Le u yin nmɔpɔɔn bu ke, “Yisa, Defid a yaabil, sam kunyunyunbaag ni!”
39Le bininfob ban nan lii Yisa a samin tiɛn u bu ke un ŋmin ma, amaa le u mann ki yin nmɔpɔɔn ke, “Defid a yaabil, sam kunyunyunbaag ni!”
40Le Yisa sir, ki bei bi ke bin dar ujɔɔn nmɔn ki dan u ban ni. Waah nan chaan ki nan mal Yisa ban n-yonn man ni, le Yisa baan u ke, 41“A ban n tun baa ki sei ŋaa?”
Le u jiin bei Yisa ke, “U yudaau, n ban n ligir le,”
42Le Yisa bei u ke, “Ligira; a yada tebiŋa.” 43Libol nmɔn le u numbili ligir le u nɔɔ Yisa, ki donn Uwonbɔr a yinl. Bininfobin biɛn kaah nan kan man nin, le bi mu nan pag Uwonbɔr.
Kasalukuyang Napili:
Lug 18: KUGL
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Komba New Testament © Bible Society of Ghana, 2014.
