Exodus 3:8-22

Kaya bumaba ako upang iligtas sila sa kamay ng mga Ehipsiyo, at upang dalhin sila sa mayaman, malawak at masaganang lupain na tinitirhan ngayon ng mga Cananeo, Heteo, Amoreo, Perezeo, Heveo at mga Jebuseo. Narinig ko ang paghingi ng tulong ng mga Israelita, at nakita ko kung paano sila inalipin ng mga Ehipsiyo. Kaya ipapadala kita sa Faraon upang palayain ang aking mga mamamayang Israelita sa Ehipto.” Ngunit sinabi ni Moises sa Diyos, “Sino po ba ako upang pumunta sa Faraon at ilabas ang mga Israelita mula sa Ehipto?” Sinabi ng Diyos, “Sasamahan kita, at ito ang tanda na ako ang nagpadala sa iyo: Kapag nailabas mo na ang mga Israelita sa Ehipto, sasambahin ninyo ako sa bundok na ito.” Sinabi ni Moises sa Diyos, “Kung sakali pong pumunta ako ngayon sa mga Israelita at sabihin ko sa kanila na ang Diyos ng kanilang mga ninuno ang nagpadala sa akin upang iligtas sila, at magtanong sila sa akin, ‘Ano ang pangalan niya?’ Ano po ang isasagot ko sa kanila?” Sumagot ang Diyos kay Moises, “AKO AY AKO. Ito ang isagot mo sa kanila: ‘AKO AY AKO ang nagpadala sa akin.’ ” Sinabi pa ng Diyos kay Moises, “Sabihin mo ito sa mga Israelita: ‘Ang PANGINOON, ang Diyos ng inyong mga ninuno na sina Abraham, Isaac, at Jacob, ang nagpadala sa akin sa inyo.’ Ito ang aking pangalang magpakailanman na itatawag sa akin ng lahat ng mga salinlahi. “Ngayon humayo ka at tipunin ang mga pinuno ng Israel at sabihin mo sa kanila, ‘Ang PANGINOON, ang Diyos ng inyong mga ninuno na sina Abraham, Isaac, at Jacob ay nagpakita sa akin, at nagsabi na: Binabantayan ko kayo, at nakita ko ang ginagawa ng mga Ehipsiyo sa inyo. Nangako ako na palalabasin ko kayo sa Ehipto kung saan naghihirap kayo, at dadalhin sa maganda at masaganang lupain: ang lupain ng mga Cananeo, Heteo, Amoreo, Perezeo, Heveo at mga Jebuseo.’ “Pakikinggan ka ng mga pinuno ng Israel. At pagkatapos, pumunta kayo ng mga pinuno ng Israel sa hari ng Ehipto, at sabihin sa kanya, ‘Nagpakita sa amin ang PANGINOON, ang Diyos ng mga Hebreo. Kaya kung maaari, payagan nʼyo kaming umalis nang tatlong araw papunta sa disyerto upang maghandog sa PANGINOON naming Diyos.’ Ngunit alam kong hindi kayo papayagan ng hari ng Ehipto maliban na lang kung mapipilitan siya. Kaya parurusahan ko ang mga Ehipsiyo sa pamamagitan ng mga kababalaghang gagawin ko sa kanila. At pagkatapos noon, papayagan na niya kayong umalis. “Magiging mabuti sa inyo ang mga Ehipsiyo, at pababaunan pa nila kayo sa pag-alis ninyo. Ang mga babaeng lahi ni Israel ay manghihingi ng mga alahas na pilak at ginto at mga damit sa mga kapitbahay nilang Ehipsiyo at sa mga babaeng bisita nito. At ipapasuot ninyo ang mga bagay na ito sa inyong mga anak. Sa pamamagitan nito, masasamsam ninyo ang mga ari-arian ng mga Ehipsiyo.”