MARK 15
15
Jisu Pilat Thedanga
(Mt 27.1-2,11-14; Lk 23.1-5; Jn 18.28-38)
1Lang ngebüyam, ungshedbü shuongei jaishou shuong si Ngühkhüm lenbou shuong hoba Thükkabü Kambü to ngühthang chela yenkei. Haoenei Jisu khühan leilangkei, hoba Pilat la khümbomeiko kuan apbei.
2Pilatei hao to phekei, “No Jihudabü Choba sai?” Haoei hao to jongaikei, “Kho nyi lauda.” 3Thükkabü ungshed shuongei hangsilam juongnyua hao attikei. 4Pilatei nyibou hao to phekei, “Nyi ajongailep lo? Haoenei kakhu limbo shedbü sungbada chühashi.” 5Jisuei aikei ajongai, khoei Pilat maangpangkei.
Jisu Haitibü
(Mt 27.15-26; Lk 23.13-25; Jn 18.39—19.16)
6Tou songei Lem chaloua müt shuongei phebü tegü thüngdanga kibü yo ka müt che haoen la litikulabü kiteikei. 7Baraba nyenan müt che, sangkhu limbo khüpyojinei haoenei müt haitibü aoa khüpyobü dan yoa thüngdanga lapan jinan kiteikei. 8Noknyüh angan Pilat to haoei nyishou kümbü tegü haoen shanga kümbula phekei. 9Haoei haoen to jongaikei, “Ngei kan la Jihudabü Choba kho litikula kanei maangangda lao?” 10Aishanga theshoubüei ungshedbü shuongei hao khümbo kukei dogo haoei ngekei. 11Lausikei Baraba ong haoei haoen la nalitikula shanga ungshedbü shuongei noknyüh pühnyintikei. 12Pilatei haoen to jongaikei, “Kanei Jihudabü Choba dogo laubou to ngei ai kümtimang sühda?” 13Haoenei, “Hao peiseia thüngashi!” dogo ngekyokei. 14Pilatei haoen to laukei, “Aila, haoei ai amaibü kümbei?” Haoenei aei kaangbou ngekkei, “Hao peiseia thüngashi!” 15Pilatei noknyüh maang haitimang sühla Baraba litikei, hoba Jisu to lühthepei semtian phaia peiseia thüngla shanga hao khümbo kuan apbei.
Sepai shuongei Jisu Nyikubü
(Mt 27.27-31; Jn 19.2-3)
16Sepai shuongei hao governor choba chem khongmang to leian atkei; hoba sepai san pendou ngashaikei. 17Haoenei hao la nakthüngan sakbü nei neikukei, hoba jakei choba khun che yikan hao la hankukei 18hoba salem kuko laukei, “Maisho kishi, Jihudabü Choba!” 19Haoenei haoeibü khu to lijuei setkei hoba hao to eokei thuokkei; hoba haoenei hao thedanga youkükei thungetko lembei. 20Haoenei hao nyikuan phaia, haoenei hao ka nakthüngan sakbü nei kho sungngaikei hoba hao la jembü neisimei neikukei.
Jisu Peiseia Thüngbü
(Mt 27.32-44; Lk 23.26-43; Jn 19.17-27)
Haoenei hao peiseia thüngla leilangkei; 21hoba haoenei kaonyek ka louko kiteibü danto haübü müt che, Alexander si Rufa bou, Kurinibü Simon la Jisueibü peisei tukosekko petikei. 22Haoenei Jisu Golgotha, laobou to “Khulo Kaoen” dogo lauda kho kaoen to leibakei; 23hoba haoenei hao la semlüh ih khauekbü to kheian kukei, lausikei haoei asunglet. 24Haoenei hao peiseia thüngkei, hoba mütpem wekoei ai haülaje dogo phaang pakan chühko haoeibü neisimei haoen yoa jankei. 25Haoenei hao nge- yang angh güa peiseia thüngkei. 26Hao attibü ngüh, “JIHUDABÜ CHOBA” dogo dokei.
27 #
Isa 53.12 Haoenei hao yoa kokbü müt nyi che haoeibü maenei hoba che nanaenei dogo thüngkei. 28(Hobaje Laishibaei, “Hobaje hao ngühkhüm lulimbü yoa pakyokei” dogo laubü loushedkei.) 29Danbü phaibü shuongei haoeneibü khu yetko hao khulimbo nyikuko laukei, “Akhai dogo! No, lembüchem leilutian chalou semnyeta dangngailabü kho 30peisei ka kaiyena hoba no lulu püetashi!” 31Kho tegütham ong thükkabü ungshedbü shuongeikei Ngühkhüm lenbou shuong yoan haoen yoa nyikuko laukei, “Haoei mü püetkei! Hobaje haoei hao lulu püetla athükda. 32Künei hapan mailemlabü lele, Israelbü Choba, Khrista, tou peisei ka lotashi.” Hobaje hao yoa peiseia thüngbü shuongeikei hao la nyikukei.
Jisu Haibü
(Mt 27.45-56; Lk 23.44-49; Jn 19.28-30)
33Ladang chajihbou onkei, angh sem asühshongko kaodak khümbo nakthühei küplepbei. 34Angh sem jiha Jisuei ngüh yaangbüei ngekkei, “Eloi, Eloi, lema sabakthani?”, laobou tetlabü, “Kü Mühghaü, kü Mühghaü, nyi aila ngo apyokei?” 35Ladang nyangko kibü shuongei ditkei, haoenei laukei, “Chühashi, haoei Elija ngada.” 36Cheei langjung hauan, od che haijepbü dei shenko haman, phodong chenei kho lonan, hao la yungla kuko laukei, “Khei phokushi. Elija louyenan hao sungleda saoje senei chühkho.” 37Jisuei kaang ngekkei hoba soushou satkei. 38Hobaje Lembüchema peithetbü nei kui ka kaoa sühko penyila jitnyinkei. 39Ladang hao thedanga loan kibou saongao thükkabouei hao khei haiko hapbei, haoei laukei, “Maimaitham ho müt Mühghaü Shou yinga!” 40Hobaje yaksa shuongeikei saabü ka chühko kiteikei. Haoen yoa Mari Magdalin, Jakob nashoubou si Jose nyu Mari, hoba Salome, 41aoyouei hao Galila kijinei hao phai sembei hoba hao thuikei; hoba lubü yaksa juong hao yoa Jerusalem to loubü haoen yoa yoan kiteikei.
Jisu Khünbü
(Mt 28.1-8; Lk 24.1-12; Jn 20.1-10)
42Ladang chasem sühkei, hoba kho Lamlebü chalou yingsije, khei ngiet kho Nounyet kiteisije, 43Arimathiabü Josef, damanchühbou yaangenbü che, aoei Mühghaü Sangle chüheiko kikei, hao loukei. Hao maang yaangngeian Pilat jungto haukei hoba Jisueibü mang hikei. 44Pilatei Jisu haia saima dogo maangpangkei, hoba haoei saongao thükkabou ngaan hao mudonga haiasai dogo phekei. 45Ladang Pilatei saongao thükkabou ka khei yingakei dogo ditletkei, haoei Josef la haibü mang kho kukei. 46Haoei inyaibü nei jekkei, hoba hao tonletan khonei shokei, hoba laanga haübü hee chenei hao phokei; hoba haoei heekhün thüka laang che tongjung hauan küplepbei. 47Hobaje Mari Magdalin si Jose nyu Mariei hao khünshang hapbei.
ที่ได้เลือกล่าสุด:
MARK 15: CHANGBSI
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
