JOHAN 2
2
Kana Sanga Chemkanbü
1Sembounyeta Galila Kana sanga chemkanbü kikei, hoba Jisueibü nyukei khünei kiteikei. 2Jisu si hao eikshuong pendou kho chemkanbü lem to ngakei. 3Ladang ih khümbei, Jisueibü nyuei hao to laukei, “Haoenei ih aki.” 4Jisuei sao to laukei, “Yaksa, aila nyi küla kipjim kuda?” Ngeibü jih asühkei. 5Hao nyuei sambü shuong to lenkei, “Haoei kan la ai ong lenlaje kümashi.” 6Tou Jihudabü saüenbü songa kibü tegü, che chenei jephot nyi si sem atbü, laang ka jakenbü ilechak pem lak tenan kikei. 7Jisuei haoen to laukei, “Ilechak kho deiei shentishi.” Haoenei khübü kho sopbo shentikei. 8Kheijinei haoei haoen to laukei, “Tou at khuenashi, hoba lembubou jungto jungan haushi.” Hobaje haoenei kho khuenkei. 9Lem bunyuei, ih la yeitibü dei kho jepan chühkei, dei khubü sambü shuongei ngeasikei, kho lakabüje haoei ange. Haoei chemkanbou kho ngakei 10hoba hao to laukei, “Müt pendouei shaang ih maibou kho shomda, hoba müt juongbouei yungan phaia ong amaishangbou shomda, lausikei nyi tou sühko ih maibü kho phoakei.” 11Jisuei kho Galil kabü Kana sanga haoeibü shaangbou amaaphilabü kümbei, hoba haoeibü soneikangbü lenkei; hoba hao eikshuongei hao to mailembei.
12Kho phaia hao, nyu, haonasi shuong hoba haoeibü eikshuong Kapernaum to yankei, hoba haoen khünei bale shijo thüngkei.
Jisu Lembüchem to Haubü
(Mt 21.12-13; Mk 11.15-17; Lk 19.45-46)
13 #
NA 16.1 Jihudabü Püetbü Lem nyangko kikei hoba Jisu Jerusalem to angkei. 14Lembüchema haoei masu, sanlon hoba dukutuk yakbü shuong hoba namjeibü dan setan hapbei. 15Haoei semlabü lühthep kümbei hoba san si masu yoan pendou lembüchem ka shian sattikei. Haoei namjeibü shuongeibü namnet sakletkukei hoba haoeneibü denshang khokan apbukei, 16hoba dukutuk yakbü shuong to laukei, “Habü ho haka langashi; Küboueibü chem namseishang la teyeiti.” 17“Ka chem maangtakbüei ngo lonlabü” dogo Laiei laubü kho haoeibü eikshuongei damenkei. 18Jihudabü shuongei hao to laukei, “Habü kümsilei kümbü danko nyi ai amaaphilabü kün la lenda?” 19Jisuei haoen to jongaikei, “Ho lembüchem leiluashi hoba chalou sema ngei phonlabü.” 20Kheijinei Jihudabüei laukei, “Ho lembü- chem dangla po saonyito lak lea, nyi ho chalou sema phonngailep lo?” 21Lausikei haoeibü mang lembüchem shangabü lauko kiteikei. 22Ladang hao haibü ka langngaikei, haoei ho laukei dogo haoeibü eikshuongei damenkei; hoba haoenei Laishiba ngüh, hoba Jisuei laubü ngüh to mailembei.
Jisuei Müt Pendou Ngeakei
23Püetbülem chaloua, Jisu Jerusalema kijinei, haoei kümbü amaaphilabü hapan müt juongei hao to mailembei. 24Lankei, Jisuei haoen to maangalem, aishanga haoei müt pendou ngekei 25hoba müt shangabü aukabü künla aokei akham, aishanga müt to ai ki kho haoei ngekei.
ที่ได้เลือกล่าสุด:
JOHAN 2: CHANGBSI
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
