Zeˍhpaˍniˆ li‸ 1
1
Gʼuiˬsha suhˉ jehˬ ve awˬ nyi
1Yuˇda‸ mvuhˇmiˬ hta‸ Aˍmonˍ ve yaˇ paˍ Yawˇshiˆ uˉ peunˍ chehˇ ve teˇ yanˇ, Gʼuiˬsha lehˬ tawˇ chi teˇ hpaˍ Zeˍhpaˍniˆ hta‸ kʼoˆ piˇ ve yoˬ. (Zeˍhpaˍniˆ lehˬ jawˇmawˇ Heˍsaˍkiˆ, Aˍmaˍziˆ, Geˍdaˍliˆ leh Kuˇshiˆ hui ve awˬ ceuˬ awˬ hkʼaˇ hpeh‸ ve yoˬ.)
2Gʼuiˬsha kʼoˆ ve, Miˬguiˬ hkʼoˆ chehˇ ve chaw yaˇ, to nuˇ to shaˆ, ngaˆ leh ngaˇ teˇ hpaˍ hta‸ ngaˬ te luˬ piˇ tuˬ yoˬ. 3Ngaˬ lehˬ haiˬ ve chaw teˇ hpaˍ hta‸ paiˍ piˇ lawˬ leh, miˬguiˬ hkʼoˆ lo chaw teˇ gʼaˇ ka‸ maˇ cawˬ taˉ tuˬ, chaw ceuˬ hkʼa peu-eˬ hta‸ te luˬ piˇ tuˬ yoˬ. Ngaˬ, Gʼuiˬsha kʼoˆ taˍ peuˬ ve yoˬ.
4Yuˇda‸ leh Yeˍruˆsaˍlehnˍ venˇ hkʼaw chehˇ ve chaw hui hta‸ htawˇ, ngaˬ te luˬ te sheˆ piˇ tuˬ yoˬ. Oˇ kaˬ lo Baˍlaˆ gʼuiˬsha hta‸ oˉ kʼoˍ pui chehˇ ve chaw leh, Baˍlaˆ gʼuiˬsha ve paw hkuˇ te chehˇ ve chaw hkʼa peu-eˬ hta‸ htawˇ ngaˬ te luˬ piˇ tuˬ yoˬ. 5Yehˬ hkʼoˆ lo taˆ-e leh mvuhˇ nyi, ha pa, leh meu‸ keu shiˍ hta‸ oˉ kʼoˍ pui chehˇ ve chaw hui hta‸ htawˇ, ngaˬ te luˬ piˇ tuˬ yoˬ. Ngaˬ hta‸ oˉ kʼoˍ pui leh, ngaˬ hta‸ ka ti‸ yeˬ chehˇ ve yoˬ teh‸ kʼoˆ ve htawˇ, Miˆlaˍ konˍ gʼuiˬsha ve awˬ meh hta‸ cuˇ leh hkanˍ chehˇ ve chaw teˇ hpaˍ hta‸ ngaˬ te luˬ te sheˆ piˇ tuˬ yoˬ. 6Ngaˬ hta‸ baˬ taˉ leh ngaˬ hkʼaˇ suh maˇ laˬ ve chaw, leh ngaˬ hta‸ maˇ ca gʼaˇ va la ve chaw teˇ hpaˍ hta‸ htawˇ, ngaˬ te luˬ piˇ tuˬ yoˬ, teh‸ Gʼuiˬsha kʼoˆ ve yoˬ.
7Gʼuiˬsha suhˉ jehˬ tuˬ ve awˬ nyi gaˬ la paˇ neˇ ve yoˬ. Chi hta‸ pa taw, yawˇ mehˆ gʼuˇ suhˍ ta‸ iˉ gawˬ lehˍ chehˇ taˍ-o‸. Gʼuiˬsha lehˬ Yawˇ ve chaw teˇ hpaˍ hta‸ tuˉ tanˇ tuˬ gu chehˇ leh, Yuˇda‸ chaw hui hta‸ ca te luˬ la piˇ tuˬ canˇ paˍ teˇ hpaˍ hta‸ kuˬ piˇ taˍ ve yoˬ. 8Gʼuiˬsha kʼoˆ ve, Oˇ ve teˇ nyi gaˬ kʼo ngaˬ lehˬ ma‸ poˍ lonˉ teˇ hpaˍ, jawˇmawˇ yaˇ teˇ hpaˍ leh buiˇshaˆaˉnaˆ chaw hui ve awˬ liˇ hta‸ yehˇ ve chaw hkʼa peu-eˬ hta‸ ciˍ yanˍ piˇ tuˬ yoˬ. 9Buiˇshaˆaˉnaˆ chaw hui hkʼe oˉ kʼoˍ pui ve chaw, shu mawˇ hkʼawˇ leh shu hta‸ tiˇ pehˍ ve chaw, shu ve mawˇ hta‸ hiˉ yuˬ leh a shu yawˇ ve gʼuiˬsha ve bon yehˬ hkʼaw ca hpoˆ taˍ ve chaw hkʼa peu-eˬ hta‸ htawˇ ciˍ yanˍ piˇ tuˬ yoˬ.
10Oˇ ve teˇ nyi gaˬ kʼo, Yeˍruˆsaˍlehnˍvenˇ hkʼaw cawˬ ve Ngaˇ taˍ meu‸ hpe‸ lo chaw kuˬ hawˬ chehˇ ve awˬ hkawˇ hta‸ nawˬ hui gʼa kaˇ tuˬ yoˬ. Venˇ awˬ suhˉ teˇ tawn awˬ hkʼaw lo htawˇ, chaw yaˇ teˇ hpaˍ kuˬ hawˬ ve awˬ hkawˇ leh, hkʼaw hkʼoˆ lo poˆ hkoˇ chehˇ ve awˬ hkawˇ hta‸ htawˇ nawˬ hui gʼa kaˇ tuˬ yoˬ. 11Awˬ hkawˇ oˇ ve teˇ hpaˍ hta‸ nawˬ hui gʼa kaˇ ve teˇ yanˇ, nawˬ hui venˇ awˬ hawˉ hpawˇ teˇ tawn lo chehˇ ve chaw teˇ hpaˍ dawˇ haˍ leh kuˬ hawˬ chehˇ-oˆ. Awˬ lawn kʼo, tanˇ kaˬ paˍ hkʼa peu-eˬ suh peuˬ tuˬ yoˬ.
12Oˇ htaˇ, ngaˬ lehˬ kawˆ faiˇ teˇ maˬ yuˬ leh Yeˍruˆsaˍlehnˍ venˇ hkʼaw ca toˇ nyi tuˬ yoˬ. A shu yawˇ ve a loˍ hta‸ te chehˇ ve chaw leh, Gʼuiˬsha te‸ chiˉ maˇ te laˇ taˬ, teh‸ kʼoˆ chehˇ ve chaw hui hta‸ ngaˬ ciˍ yanˍ piˇ tuˬ yoˬ. 13Yawˇ hui ve hpu shi mawˇ jeˬ mehˉ kʼai shonˇ kʼai leh, yawˇ hui ve yehˬ teˇ hpaˍ htawˇ luˬ kʼai sheˆ kʼai tuˬ yoˬ. Yawˇ hui lehˬ a shu yawˇ te taˍ ve yehˬ hkʼaw gʼa chehˇ taˉ tuˬ ve maˇ heˆ. Yawˇ hui ti chehˇ ve a pehˉ meuˇ gʼuiˬ hta‸ htawˇ gʼa dawˬ taˉ tuˬ ve maˇ heˆ, teh‸ Gʼuiˬsha kʼoˆ ve yoˬ.
14Kawˆ tuˬ uiˍ jaˇ ve Gʼuiˬsha ve awˬ nyi gaˬ la paˇ neˇ ve yoˬ. Oˇ ve teˇ nyi gaˬ kʼo, ha‸ hanˉ jaˇ ve ma‸ yaˇ teˇ hpaˍ htawˇ dawˇ maˇ tawˆ leh gʼaˇ hte‸ kuˬ hawˬ tuˬ yoˬ. 15Awˬ nyi oˇ ve lehˬ, nyi ma zuhˆ jaˇ ve awˬ nyi, dawˇ tui‸ gaˇ tui‸ jaˇ ve awˬ nyi, moˬ fiˆ moˬ hoˆ ve awˬ nyi hpeh‸ leh, 16ma‸ yaˇ teˇ hpaˍ ta‸ yehˬ hta‸ bawˆ yuˬ tuˬ behˬ heh ma gʼaˇ hte‸ meuˆ chehˇ ve awˬ nyi hpeh‸ ve yoˬ.
17Gʼuiˬsha kʼoˆ ve, Chaw yaˇ teˇ hpaˍ awˬ hkʼoˆ lo ngaˬ lehˬ kawˆ tuˬ uiˍ ve awˬ ceuˬ chi teˇ hpaˍ gaˬ la piˇ leh, yawˇ hui lehˬ mehˆ cuˉ paˍ hkʼa shuˍ ca htaˇ shoˆ toˇ chehˇ tuˬ yoˬ. Yawˇ hui ngaˬ hta‸ te ya‸ jaˇ peuˬ. Chi hta‸ pa taw, yawˇ hui ve awˬ suhˍ lehˬ iˉ kaˆ hkʼa shuˍ ngeuˍ baˬ ve hta‸ gʼa hkanˍ leh, yawˇ hui ve awˬ to teˇ hpaˍ htawˇ miˬ chaˇ hkʼoˆ lo kuiˇ kʼai tuˬ yoˬ.
18Gʼuiˬsha nyi ma zuhˆ ve awˬ nyi oˇ ve gaˬ la htaˇ, yawˇ hui ve hpu shi mawˇ jeˬ teˇ hpaˍ lehˬ, yawˇ hui hta‸ htaiˍ hkʼaw‸ piˇ gʼa tuˬ ve maˇ heˆ. Gʼuiˬsha lehˬ, nyi ma zuhˆ jaˇ ve hkʼaw miˬguiˬ chi hta‸ aˬ miˍ to‸ baˬ piˇ lawˬ tuˬ yoˬ. Miˬguiˬ hkʼoˆ chehˇ ve chaw hkʼa peu-eˬ hta‸ Yawˇ awˬ leh meuˇ gaˬ la piˇ tuˬ yoˬ.
ที่ได้เลือกล่าสุด:
Zeˍhpaˍniˆ li‸ 1: LHBE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Lahu Bible Edited © Thailand Bible Society and Bible Society of Myanmar, 2010, 2020.