Zaˍhkaˍriˆ li‸ 8
8
Yeˍruˆsaˍlehnˍ hta‸ kʼaw‸ gu te tuˬ Gʼuiˬsha ka ti‸ te ve
1Gʼuiˬsha Zaˍhkaˍriˆ hta‸ chi hkʼe kʼaw‸ kʼoˆ piˇ ve yoˬ. 2Ngaˬ lehˬ Yeˍruˆsaˍlehnˍ venˇ yaˇ teˇ hpaˍ hta‸ ha‸ jaˇ ve pa taw, venˇ chi hta‸ kʼaw‸ gu piˇ leh yawˇ ve canˇ paˍ teˇ hpaˍ hta‸ te luˬ te sheˆ piˇ tuˬ dawˇ cheˆ taˍ peuˬ ve yoˬ. 3Da‸ kehˬ ve ngaˬ ve Yeˍruˆsaˍlehnˍ venˇ lo ngaˬ kʼaw‸ la leh, oˇ kaˬ lo chehˇ taˍ tuˬ yoˬ. Venˇ chi lehˬ, ka ti‸ yeˬ ve venˇ kʼaw‸ hpeh‸ la leh kanˇ paˆ uiˍ ve Jawˇmawˇ Gʼuiˬsha ve hkʼaw pui teh‸ kʼaw‸ meh tuˬ yoˬ. 4Venˇ chi hkʼaw lo chaw mawˇ teˇ hpaˍ hkʼa biˇ kʼaw‸ cawˬ la tuˬ yoˬ. Yawˇ hui lehˬ, mawˇ jaˇ peuˬ ve pa taw juˇ fuiˍ htawˆ toˇ leh, venˇ hkʼaw lo mui chehˇ tuˬ yoˬ. 5Venˇ hkʼaw cawˬ ve ya‸ kʼaw teˇ hpaˍ hkʼoˆ lo, yaˇ ehˉ teˇ hpaˍ hkʼa biˇ leˍ guiˇ chehˇ tuˬ yoˬ.
6Chi hkʼe kʼaw‸ hpeh‸ la tuˬ ve hta‸ chi beu‸ cawˬ taˍ ve chaw teˇ gʼaˇ ka‸ dawˇ tuˬ ve maˇ heˆ. Ya‸ hkʼaˇ, ngaˬ awˬ pon maˇ hpeh‸ la gʼa ve kanˉ te‸ chiˉ maˇ cawˬ. 7Mvuhˇ nyi tawˆ hpawˇ leh mvuhˇ nyi kʼehˬ hpawˇ lo chehˇ taˍ ve ngaˬ ve chaw teˇ hpaˍ hta‸ ngaˬ htaiˍ hkʼaw‸ piˇ leh, 8yawˇ hui hta‸ Yeˍruˆsaˍlehnˍ venˇ lo kʼaw‸ shiˍ hkʼaw‸ veu laˇ piˇ tuˬ yoˬ. Ngaˬ lehˬ yawˇ hui ve Gʼuiˬsha hpeh‸ leh, yawˇ hui lehˬ ngaˬ ve chaw hpeh‸ tuˬ yoˬ. Ngaˬ lehˬ ka ti‸ yeˬ leh hteˇ ve cawˇ ve hkʼaw yawˇ hui hta‸ uˉ peunˍ piˇ tuˬ yoˬ.
9Ha‸ hanˉ ve nyi ma cawˬ piˇ-oˆ. Bon yehˬ awˬ hkuiˉ puiˍ tanˬ kawˍ ve teˇ nyi htaˇ, tcuh kaˍ paˍ nawˬ hui hta‸ kʼoˆ piˇ taˍ ve tawˇ oˇ ve teˇ hpaˍ hta‸ chi beu‸ ka‸ nawˬ hui teˇ pawˆ gʼa kʼaw‸ kaˇ chehˇ ve yoˬ. 10Awˬ yanˇ oˇ ve maˇ gaˬ sheˍ gʼuˇ suhˍ, nawˬ hui teˇ gʼaˇ ka‸ shu geh ceˇ caˬ maˇ kʼoˆ, chaw maˇ kʼoˆ, ca ngaˍ maˇ gʼa. Nawˬ hui teˇ gʼaˇ ka‸ canˇ paˍ ve la‸ sheh hkʼaw ponˬ maˇ gʼa. Ngaˬ lehˬ chaw teˇ gʼaˇ leh teˇ gʼaˇ ya‸ da‸ tuˬ te piˇ taˍ ve yoˬ. 11Ya‸ hkʼaˇ, ngaˬ lehˬ chi beu‸ cawˬ taˍ sheˍ ve chaw teˇ hpaˍ hta‸ oˇ hkʼe maˇ kʼaw‸ te piˇ-o. 12Yawˇ hui lehˬ, gawˬ lehˍ ve hkʼaw gʼa kʼaw‸ muiˬ caˇ tuˬ yoˬ. Yawˇ hui ve a pehˉ meuˇ cehˬ teˇ hpaˍ awˬ shiˍ kʼaw‸ naw‸ la leh, miˬguiˬ lehˬ awˬ shiˍ awˬ nu maˇ maˇ kʼaw‸ naw‸ la tuˬ yoˬ. Mvuhˇ yeˬ htawˇ maˇ maˇ laˬ leh, mvuhˇmiˬ chi hkʼaw cawˬ taˍ sheˍ ve ngaˬ ve chaw teˇ hpaˍ hta‸ ngaˬ awˬ bon na‸ piˇ tuˬ yoˬ. 13Yuˇda‸ chaw leh Iˉsaˍreˍlaˆ chaw teˇ hpaˍ-oˬ, ponˬ laˬ htaˇ awˬ nu ve chaw ceuˬ teˇ hpaˍ, teˇ gʼaˇ hta‸ teˇ gʼaˇ hkeu piˇ htaˇ, Yuˇda‸ leh Iˉsaˍreˍlaˆ chaw hui awˬ hkʼoˆ gaˬ la ve tu‸ hkanˍ dawˇ haˍ ve awˬ ceuˬ nawˬ hui awˬ hkʼoˆ lo htawˇ gaˬ la piˇ-oˆ, teh‸ kʼoˆ jaw ve yoˬ. Ya‸ hkʼaˇ, ngaˬ nawˬ hui hta‸ ponˬ laˇ leh awˬ nu ve chaw ceuˬ teˇ hpaˍ lehˬ, Yuˇda‸ leh Iˉsaˍreˍlaˆ chaw hui hkʼe nawˬ hui htawˇ da‸ ve awˬ bon gʼa piˇ-oˆ, teh‸ kʼaw‸ kʼoˆ tuˬ yoˬ. Chi hta‸ pa taw taˇ kawˆ. Ha‸ hanˉ ve nyi ma cawˬ piˇ-oˆ, teh‸ Gʼuiˬsha kʼoˆ ve yoˬ.
14Gʼuiˬsha kʼaw‸ kʼoˆ ve, Nawˬ hui ve awˬ puˍ awˬ pi teˇ hpaˍ ngaˬ hta‸ nyi ma zuhˆ tuˬ te laˇ ve teˇ yanˇ, yawˇ hui awˬ hkʼoˆ lo ngaˬ kawˆ tuˬ dawˇ haˍ tuˬ awˬ ceuˬ gaˬ la piˇ ve yoˬ. 15Ya‸ hkʼaˇ, ngaˬ lehˬ chi beu‸ Yuˇda‸ leh Yeˍruˆsaˍlehnˍ venˇ yaˇ teˇ hpaˍ hta‸ awˬ bon kʼaw‸ na‸ piˇ tuˬ awˬ hkʼaˇ gu taˍ ve yoˬ. Chi hta‸ pa taw taˇ kawˆ. 16Chi beu‸ nawˬ hui chi hkʼe te loˬ. Teˇ gʼaˇ hta‸ teˇ gʼaˇ hteˇ ve cawˇ ve tawˇ hta‸ tiˉ yaw da‸-o‸. Shaˉ nanˉ awˬ hkʼaw lo htawˇ, hteˇ ve cawˇ ve hta‸ tiˉ te leh, gawˬ lehˍ ve awˬ ceuˬ hta‸ tawˆ la piˇ-oˆ. 17Teˇ gʼaˇ hta‸ teˇ gʼaˇ naˬ tuˬ taˇ te da‸. Maˇ hteˇ maˇ cawˇ ve shaˉ hkiˆ taˇ hkanˍ. Ngaˬ lehˬ heˍ ve tawˇ, maˇ hteˇ maˇ cawˇ ve kanˉ, leh nyi ma uiˍ ve chaw hta‸ canˇ ve yoˬ, teh‸ kʼoˆ ve yoˬ.
18Gʼuiˬsha Zaˍhkaˍriˆ hta‸ chi hkʼe kʼaw‸ kʼoˆ piˇ ve yoˬ. 19Nawˬ hui awˇ ha pa, ngaˇ ha pa, suhˍ ha pa, leh teˇ chi ha pa htaˇ caˇ tuˬ ce leh te chehˇ ve pawehˇ chi teˇ hpaˍ lehˬ, Yuˇda‸ chaw hui awˬ pon ha lehˬ tuˬ uiˍ jaˇ ve pawehˇ teˇ hpaˍ kʼaw‸ hpeh‸ la tuˬ yoˬ. Nawˬ hui lehˬ hteˇ ve cawˇ ve leh dawˇ sha gawˬ lehˍ ve awˬ ceuˬ hta‸ ha‸ cawˇ ve yoˬ.
20Kanˇ paˆ uiˍ ve Gʼuiˬsha kʼoˆ ve, Venˇ lonˉ hkʼaw chehˇ ve chaw teˇ hpaˍ Yeˍruˆsaˍlehnˍ venˇ lo laˬ tuˬ ve awˬ yanˇ gaˬ la chehˇ ve yoˬ. 21Venˇ teˇ venˇ hkʼaw chehˇ ve chaw lehˬ, awˬ nu teˇ venˇ hkʼaw chehˇ ve chaw hta‸, Ngaˬ hui lehˬ kanˇ paˆ uiˍ ve Gʼuiˬsha hta‸ oˉ kʼoˍ ca pui leh Yawˇ geh bon ca lawˬ tuˬ yoˬ. Ngaˬ hui geh kʼai-a veuˬ, teh‸ kʼoˆ kuˬ piˇ tuˬ yoˬ. 22Awˬ gʼaˇ uiˍ ve awˬ nu ve mvuhˇmiˬ yaˇ teˇ hpaˍ lehˬ, Gʼuiˬsha hta‸ oˉ kʼoˍ pui leh Yawˇ geh bon lawˬ tuˬ Yeˍruˆsaˍlehnˍ venˇ lo laˬ tuˬ yoˬ. 23Awˬ yanˇ oˇ ve gaˬ la htaˇ, awˬ nu ve mvuhˇmiˬ yaˇ teˇ chi gʼaˇ Yuˇda‸ chaw teˇ gʼaˇ geh laˬ leh, Ngaˬ hui htawˇ nawˬ hui geh kʼai gaˇ ve yoˬ. Awˬ lawn kʼo, Gʼuiˬsha nawˬ hui geh chehˇ taˍ ve hta‸ ngaˬ hui gʼa kaˇ ve yoˬ, teh‸ yawˇ hta‸ kʼoˆ piˇ tuˬ yoˬ.
ที่ได้เลือกล่าสุด:
Zaˍhkaˍriˆ li‸ 8: LHBE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Lahu Bible Edited © Thailand Bible Society and Bible Society of Myanmar, 2010, 2020.