Zaˍhkaˍriˆ li‸ 12
12
Yeˍruˆsaˍlehnˍ hta‸ htaiˍ hkʼaw‸ piˇ tuˬ
1Miˬguiˬ mvuhˇ naw ma hta‸ te hpanˍ leh chaw yaˇ hta‸ a sha‸ te‸ la piˇ shehˍ hpaˇ Gʼuiˬsha lehˬ, Iˉsaˍreˍlaˆ chaw hui hta‸ caˉ da‸ leh chi hkʼe kʼoˆ taˍ ve yoˬ. Yawˇ kʼoˆ ve, 2Ngaˬ lehˬ Yeˍruˆsaˍlehnˍ venˇ hta‸ a pehˉ meuˇ gʼuiˬ keu taˍ ve kawˆ hkʼa shuˍ hpeh‸ la piˇ tuˬ yoˬ. Venˇ oˇ ve awˬ paˇ awˬ kui lo chehˇ taˍ ve chaw ceuˬ teˇ hpaˍ lehˬ, a pehˉ meuˇ gʼuiˬ oˇ ve hta‸ dawˬ leh, tzuhˬ bvuhˆ paˍ hkʼa shuˍ maˇ nawˇ maˇ hteh te toˇ chehˇ tuˬ yoˬ. Yawˇ hui Yeˍruˆsaˍlehnˍ venˇ hta‸ ca bawˆ yuˬ la ve teˇ yanˇ, Yuˇda‸ mvuhˇmiˬ hkʼaw cawˬ ve awˬ nu ve venˇ teˇ hpaˍ htawˇ, shu bawˆ yuˬ ve hta‸ gʼa hkanˍ tuˬ yoˬ. 3Awˬ yanˇ oˇ ve gaˬ la htaˇ, ngaˬ lehˬ Yeˍruˆsaˍlehnˍ venˇ hta‸ hawˇ jaˇ ve haˉ pui shiˍ hkʼe hpeh‸ la piˇ tuˬ yoˬ. Haˉ pui shiˍ oˇ ve hta‸ ca chiˇ ve chaw lehˬ, gʼa naˬ tuˬ yoˬ. Awˬ nu ve chaw ceuˬ hkʼa peu-eˬ pawnˇ da‸ leh venˇ oˇ ve hta‸ ca bawˆ la tuˬ yoˬ. 4Awˬ yanˇ oˇ ve awˬ hkʼaw lo, ngaˬ lehˬ yawˇ hui ve iˉ mvuhˇ teˇ hpaˍ hta‸ kawˆ piˇ lawˬ leh, iˉ mvuhˇ ciˇ shehˍ hpaˇ teˇ hpaˍ hta‸ chaw gʼuˇ hkʼe hpeh‸ la piˇ tuˬ yoˬ. Yuˇda‸ chaw teˇ hpaˍ hta‸ ngaˬ ha‸ shaˉ taˍ leh, canˇ paˍ teˇ hpaˍ ve iˉ mvuhˇ teˇ hpaˍ hta‸ mehˆ cuˉ piˇ lawˬ tuˬ yoˬ. 5Oˇ htaˇ Yuˇda‸ awˬ ceuˬ awˬ hkʼaˇ teˇ hpaˍ lehˬ, Kanˇ paˆ uiˍ ve Jawˇmawˇ Gʼuiˬsha lehˬ, Yeˍruˆsaˍlehnˍ venˇ hkʼaw chehˇ taˍ ve yawˇ ve chaw teˇ hpaˍ hta‸ awˬ gʼaˇ uiˍ la piˇ ve yoˬ, teh‸ teˇ gʼaˇ leh teˇ gʼaˇ kʼoˆ da‸ tuˬ yoˬ.
6Awˬ yanˇ oˇ ve awˬ hkʼaw lo ngaˬ lehˬ Yuˇda‸ chaw teˇ hpaˍ hta‸ hteunˍ lonˉ leh caˬ meh taˍ ve ti mi hta‸ to‸ baˬ chehˇ ve aˬ miˍ hkʼa shuˍ hpeh‸ la piˇ tuˬ yoˬ. Yawˇ hui lehˬ awˬ nu ve chaw ceuˬ hkʼa peu-eˬ hta‸ te luˬ te sheˆ piˇ tuˬ yoˬ. Yeˍruˆsaˍlehnˍ venˇ yaˇ teˇ hpaˍ lehˬ, venˇ hkʼaw gawˬ lehˍ gʼa chehˇ tuˬ yoˬ.
7Daˍviˆ ve awˬ ceuˬ awˬ hkʼaˇ teˇ hpaˍ leh, Yeˍruˆsaˍlehnˍ venˇ yaˇ teˇ hpaˍ gʼa tuˬ ve awˬ me‸ awˬ hponˇ lehˬ, awˬ nu ve Yuˇda‸ chaw teˇ hpaˍ gʼa tuˬ ve awˬ me‸ awˬ hponˇ a‸ kehˉ maˇ gʼa uiˍ tuˬ, ngaˬ lehˬ Yuˇda‸ chaw hui ve canˇ paˍ teˇ hpaˍ hta‸ awˉ lawˉ peuˇ gʼaˇ shehˍ hpaˇ hpeh‸ la piˇ tuˬ yoˬ. 8Awˬ yanˇ oˇ ve awˬ hkʼaw lo, Gʼuiˬsha lehˬ Yeˍruˆsaˍlehnˍ venˇ hkʼaw chehˇ ve chaw hui hta‸ ha‸ shaˉ piˇ leh, yawˇ hui awˬ hkʼaw lo shu a‸ kehˉ awˬ gʼaˇ nuˇ jaˇ ve chaw lehˬ, Daˍviˆ hkʼa shuˍ awˬ gʼaˇ uiˍ jaˇ ve chaw hpeh‸ la tuˬ yoˬ. Daˍviˆ ve awˬ ceuˬ awˬ hkʼaˇ teˇ hpaˍ lehˬ, Gʼuiˬsha leh mvuhˇ naw ma tcuh yaˇ hkʼa shuˍ yawˇ hui hta‸ sheh kʼai piˇ tuˬ yoˬ. 9Awˬ yanˇ oˇ ve awˬ hkʼaw lo, ngaˬ lehˬ Yeˍruˆsaˍlehnˍ venˇ hta‸ ca bawˆ la ve chaw ceuˬ hkʼa peu-eˬ ve hta‸ te luˬ te sheˆ piˇ tuˬ yoˬ.
10Daˍviˆ ve awˬ ceuˬ awˬ hkʼaˇ teˇ hpaˍ leh, Yeˍruˆsaˍlehnˍ venˇ yaˇ teˇ hpaˍ hta‸ ngaˬ ha kʼaˉ puiˉ leh bon lawˬ gaˇ puiˉ ve nyi ma cawˬ la piˇ tuˬ yoˬ. Yawˇ hui lehˬ, yawˇ hui juˆ pehˍ taˍ ve chaw hta‸ nyi taˍ leh, teˇ gʼaˇ tiˉ cawˬ ve yaˇ suh-e leh dawˇ haˍ chehˇ ve chaw hkʼa shuˍ yawˇ hui chaw oˇ ve awˬ pon dawˇ haˍ chehˇ tuˬ yoˬ. Yaˇ paˍ uiˍ suh-e leh dawˇ haˍ chehˇ ve chaw hkʼa shuˍ, yawˇ hui gʼaˇ hte‸ kuˬ hawˬ paˆ hawˬ chehˇ tuˬ yoˬ. 11Awˬ yanˇ oˇ ve awˬ hkʼaw lo, Yeˍruˆsaˍlehnˍ venˇ hkʼaw kuˬ hawˬ paˆ hawˬ ve awˬ hkawˇ lehˬ, Mehˆgiˇdoˍ miˬ tawˬ kuiˬ lo chaw yaˇ teˇ hpaˍ Haˍdaˆriˆmonˍ gʼuiˬsha awˬ pon kuˬ hawˬ paˆ hawˬ ve hkʼe taw awˬ hkawˇ bvuhˬ jaˇ tuˬ yoˬ. 12Mvuhˇmiˬ hkʼaw cawˬ ve yehˬ kʼa teˇ maˬ le le htawˇ, kuˬ hawˬ paˆ hawˬ tuˬ yoˬ. Yawˇ hui ve awˬ miˇ ma teˇ hpaˍ htawˇ gʼaˇ hte‸ paˆ hawˬ tuˬ yoˬ. Naˍtanˍ ve awˬ ceuˬ awˬ hkʼaˇ, yehˬ shehˍ hpaˇ yehˬ shehˍ ma teˇ gʼaˇ le le htawˇ, oˇ ve hkʼa shuˍ paˆ hawˬ tuˬ yoˬ. 13Leˍviˆ awˬ ceuˬ awˬ hkʼaˇ, yehˬ shehˍ hpaˇ yehˬ shehˍ ma teˇ hpaˍ, Sheˍmiˆ awˬ ceuˬ awˬ hkʼaˇ, yehˬ shehˍ hpaˇ yehˬ shehˍ ma teˇ hpaˍ, oˇ ve hkʼa shuˍ paˆ hawˬ tuˬ yoˬ. 14Awˬ nu ve yehˬ kʼa teˇ hpaˍ htawˇ, oˇ ve hkʼa shuˍ gʼaˇ hte‸ kuˬ hawˬ paˆ hawˬ tuˬ yoˬ, teh‸ Gʼuiˬsha kʼoˆ ve yoˬ.
ที่ได้เลือกล่าสุด:
Zaˍhkaˍriˆ li‸ 12: LHBE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Lahu Bible Edited © Thailand Bible Society and Bible Society of Myanmar, 2010, 2020.