Zaˍhkaˍriˆ li‸ 11
11
Maˇ hteˇ maˇ cawˇ ve jawˇmawˇ luˬ kʼai ve
1Leˍbaˍnonˍ hkʼaw-oˬ,
nawˬ ve htawˇ cehˬ teˇ hpaˍ hta‸ aˬ miˍ to‸ baˬ piˇ tuˬ nawˬ ve yehˬ miˉ hta‸ hpaw piˇ-oˆ.
2Yawnˉ cehˬ teˇ hpaˍ-oˬ, htawˇ cehˬ teˇ hpaˍ paiˍ peuˬ ve pa taw,
paˆ hawˬ kehˇ hawˬ chehˇ-oˆ.
Awˬ me‸ awˬ hponˇ cawˬ ve suhˆ cehˬ teˇ hpaˍ luˬ kʼai sheˆ kʼai peuˬ.
Baˍshanˍ mvuhˇmiˬ hkʼaw cawˬ ve maˉ kuˇ cehˬ teˇ hpaˍ-oˬ, nawˬ hui htawˇ paˆ hawˬ kehˇ hawˬ chehˇ-oˆ.
Awˬ lawn kʼo, hteunˍ lonˉ lehˬ htu baˬ ve hta‸ gʼa hkanˍ peuˬ.
3Jawˇmawˇ teˇ hpaˍ dawˇ haˍ jaˇ leh kuˬ hawˬ chehˇ ve yoˬ.
Yawˇ hui ve awˬ me‸ awˬ hponˇ mehˉ kʼai peuˬ.
Yawˇdanˍ iˉ kaˆ lawˬ paˇ lo cawˬ ve hteunˍ lonˉ luˬ kʼai sheˆ kʼai ve pa taw,
laˇ caˬ shiˉ teˇ hpaˍ kuˬ chehˇ ve awˬ hkawˇ hta‸ na sheˍ.
Yawˬ hawˉ paˍ nyiˇ gʼaˇ
4Ngaˬ ve Jawˇmawˇ Gʼuiˬsha ngaˬ hta‸ chi hkʼe kʼoˆ laˇ ve yoˬ. Shu tiˇ pehˍ ve hta‸ gʼa hkanˍ tuˬ ve yawˬ teˇ hpaˍ hta‸ nyi ha‸ shaˉ shehˍ hpaˇ hkʼe te chehˇ-oˆ. 5Yawˇ hui ve awˬ shehˍ hpaˇ lehˬ, yawˇ hui hta‸ tiˇ pehˍ piˇ chehˇ ve htawˇ ciˍ yanˍ ve hta‸ maˇ gʼa hkanˍ. Yawˇ hui shaˍ hawˇ leh kʼoˆ ve, Gʼuiˬsha hta‸ chiˇ mvuh-o. Ngaˬ hui paw sha la peuˬ, teh‸ kʼoˆ chehˇ ve yoˬ. Yawˇ hui ve yawˬ hawˉ shehˍ hpaˇ teˇ hpaˍ lehˬ, yawˇ hui hta‸ ha kʼaˉ ve nyi ma maˇ cawˬ.
6(Gʼuiˬsha kʼoˆ ve, Ngaˬ lehˬ miˬguiˬ hkʼoˆ chehˇ taˍ ve chaw teˇ gʼaˇ hta‸ ka‸ kʼaw‸ ha kʼaˉ piˇ tuˬ ve maˇ heˆ. Ngaˬ lehˬ chaw hkʼa peu-eˬ ve hta‸, yawˇ hui ve jawˇmawˇ teˇ hpaˍ ve la‸ sheh hkʼaw chiˇ a‸ piˇ tuˬ yoˬ. Yawˇ hui lehˬ mvuhˇmiˬ hta‸ te luˬ te sheˆ leh, ngaˬ yawˇ hui hta‸ ponˬ piˇ tuˬ ve maˇ heˆ, teh‸ kʼoˆ ve yoˬ.)
7Yawˬ ehˉ teˇ hpaˍ hta‸ vuiˬ hawˇ chehˇ ve chaw oˇ ve teˇ hpaˍ ngaˬ hta‸ ngaˍ taˍ ve yoˬ. Hkʼe te leh ngaˬ lehˬ, tiˇ pehˍ piˇ tuˬ ve yawˬ ehˉ teˇ hpaˍ hta‸ nyi ha‸ shaˉ shehˍ hpaˇ hpeh‸ la ve yoˬ. Ngaˬ lehˬ juˇ fuiˍ taˬ nyiˇ maˬ yuˬ taˍ ve yoˬ. Juˇ fuiˍ taˬ teˇ maˬ hta‸ ngaˬ nyi ma cawˇ ve teh‸ meh piˇ leh awˬ nu ve teˇ maˬ hta‸ cawˇ da‸ hui da‸ ve teh‸ meh piˇ taˍ ve yoˬ. Oˇ hkʼe te peuˬ hkʼaw‸ nawˉ, yawˬ teˇ hpaˍ hta‸ ngaˬ nyi ha‸ shaˉ piˇ chehˇ ve yoˬ. 8Ngaˬ hta‸ canˇ ve yawˬ hawˉ paˍ shehˆ gʼaˇ hta‸ ngaˬ nyi ma zuhˆ leh, teˇ ha pa awˬ hkʼaw lo ceh tiˉ ngaˬ gʼa‸ kʼoˬ piˇ ve yoˬ. 9Oˇ ve hkʼaw‸ nawˉ, ngaˬ yawˬ awˬ moˍ hta‸ chi hkʼe kʼoˆ piˇ ve yoˬ. Ngaˬ lehˬ nawˬ hui hta‸ kʼaw‸ nyi ha‸ shaˉ laˇ tuˬ ve maˇ heˆ. Suh-e cawˇ ve yawˬ teˇ hpaˍ suh-e piˇ-oˆ. Luˬ kʼai sheˆ kʼai cawˇ ve yawˬ teˇ hpaˍ luˬ kʼai sheˆ kʼai piˇ-oˆ. Cawˬ taˍ sheˍ ve yawˬ teˇ hpaˍ lehˬ, teˇ hkeh hta‸ teˇ hkeh te luˬ te sheˆ da‸ tuˬ yoˬ, teh‸ kʼoˆ piˇ ve yoˬ. 10Oˇ hkʼe kʼoˆ piˇ peuˬ hkʼaw‸ nawˉ, Gʼuiˬsha lehˬ awˬ nu ve chaw ceuˬ teˇ hpaˍ te da‸ taˍ ve ka ti‸ hta‸ te luˬ tuˬ Nyi ma cawˇ ve teh‸ kʼoˆ ve suhˆ taˬ hta‸ awˉ hteh ve yoˬ. 11Hkʼe te leh ka ti‸ oˇ ve luˬ kʼai ve yoˬ. Yawˬ ehˉ teˇ hpaˍ hta‸ vuiˬ hawˇ chehˇ ve chaw teˇ hpaˍ lehˬ ngaˬ hta‸ hkʼa deh‸ nyi taˍ ve yoˬ. Gʼuiˬsha lehˬ ngaˬ te maˍ piˇ chehˇ ve kanˉ hta‸ cuˇ leh tawˇ yaw laˇ chehˇ ve hta‸ yawˇ hui shiˍ la ve yoˬ. 12Oˇ htaˇ ngaˬ lehˬ, Nawˬ hui ngaˬ hta‸ nyi ma cawˇ ve kʼo, ngaˬ hta‸ gʼaˇ hpfuhˇ pe‸ laˇ-oˇ. Nyi ma maˇ cawˇ ve kʼo te‸ chiˉ maˇ heˆ, teh‸ yawˇ hui hta‸ kʼoˆ piˇ ve yoˬ. Hkʼe te leh yawˇ hui ngaˬ hta‸ gʼaˇ hpfuhˇ shehˆ chi hteh‸ piˇ laˇ ve yoˬ. Ngaˬ lehˬ shehˆ chi hteh‸ ceh tiˉ hpfuhˇ ve yoˬ teh‸ yawˇ hui dawˇ taˍ ve yoˬ.
13Oˇ htaˇ Gʼuiˬsha lehˬ, Hpu oˇ ve hta‸ bon yehˬ hkʼaw ca keu taˍ-o‸, teh‸ ngaˬ hta‸ kʼoˆ laˇ ve yoˬ. Hkʼe te leh, ngaˬ lehˬ hpu oˇ ve shehˆ chi hteh‸ hta‸ yuˬ leh, bon yehˬ hkʼaw ca keu taˍ ve yoˬ. 14Oˇ hkʼe te peuˬ hkʼaw‸ nawˉ, ngaˬ lehˬ Cawˇ da‸ hui da‸ ve teh‸ kʼoˆ ve suhˆ taˬ hta‸ kʼaw‸ awˉ hteh leh, Yuˇda‸ leh Iˉsaˍreˍlaˆ chaw teˇ hpaˍ hpaˆ da‸ guiˇ da‸ kʼai ve yoˬ.
15Oˇ ve hkʼaw‸ nawˉ, Gʼuiˬsha ngaˬ hta‸ chi hkʼe kʼaw‸ kʼoˆ laˇ ve yoˬ. Nawˬ yawˬ hawˉ paˍ hkʼe teˇ pawˆ kʼaw‸ te-o. Chi teˇ pawˆ nawˬ lehˬ te‸ chiˉ awˬ hpfuhˇ maˇ cawˬ ve yawˬ hawˉ paˍ hpeh‸ tuˬ yoˬ. 16Ngaˬ ve yawˬ teˇ hpaˍ hta‸ ha‸ shaˉ tuˬ, yawˬ hawˉ paˍ teˇ gʼaˇ hta‸ ngaˬ teh taˍ ve yoˬ. Ya‸ hkʼaˇ, yawˇ lehˬ luˬ kʼai sheˆ kʼai chehˇ ve yawˬ hta‸ maˇ gʼa‸ ca. Naˬ chehˇ ve yawˬ hta‸ naˆ tsuhˇ maˇ gu piˇ leh, yawˇ hui hta‸ maˇ caˍ maˇ taw piˇ. Yawˇ lehˬ chu jaˇ ve yawˬ teˇ hpaˍ hta‸ tiˇ caˇ leh yawˇ hui ve hkui kiˆ hta‸ hkʼeh‸ baˬ piˇ chehˇ ve yoˬ. 17Chi hkʼe ve yawˬ hawˉ paˍ lehˬ, luˬ kʼai sheˆ kʼai tuˬ yoˬ. Awˬ lawn kʼo, yawˇ lehˬ yawˬ teˇ hpaˍ hta‸ baˬ taˉ peuˬ. Ma‸ hpeh‸ la ve teˇ yanˇ yawˇ lehˬ te luˬ te sheˆ ve hta‸ gʼa hkanˍ tuˬ yoˬ. Yawˇ ve la‸ gʼawˇ goˇ kʼai leh, yawˇ ve la‸ sha paˉ mehˆ shiˍ cuˉ kʼai tuˬ yoˬ, teh‸ ngaˬ hta‸ kʼoˆ laˇ ve yoˬ.
ที่ได้เลือกล่าสุด:
Zaˍhkaˍriˆ li‸ 11: LHBE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Lahu Bible Edited © Thailand Bible Society and Bible Society of Myanmar, 2010, 2020.