Zaˍhkaˍriˆ li‸ 10
10
Ponˬ piˇ tuˬ ka ti‸ tawˇ hkawˇ
1Mvuhˇ kaˆ yanˇ htaˇ mvuhˇ yeˬ laˬ tuˬ, Gʼuiˬsha geh lawˬ-o‸. Awˬ lawn kʼo, chaw teˇ gʼaˇ le le ve ti mi nawˉ lehˍ cawˬ la tuˬ mvuhˇ yeˬ laˬ piˇ shehˍ hpaˇ lehˬ Gʼuiˬsha hpeh‸ ve yoˬ. 2Chaw yaˇ teˇ hpaˍ lehˬ, shaˉ ho‸ leh mawˉ paˍ hui hta‸ lawˬ hkawˉ chehˇ ve yoˬ. Ya‸ hkʼaˇ, yawˇ hui te‸ chiˉ lawˬ maˇ gʼa. Zuh‸ maˆ ve tcuhˉ kuiˬ yuˬ tawˆ chehˇ ve chaw teˇ hpaˍ lehˬ, chaw yaˇ hta‸ ya‸ kʼaw sheh ya‸ leh, yawˇ hui piˇ ve dawˇ hkʼaˇ htawˇ te‸ chiˉ tcuhˉ kuiˬ maˇ cawˬ. Chi hta‸ pa taw, chaw yaˇ teˇ hpaˍ lehˬ mehˉ kʼai peuˬ ve yawˬ ehˉ hkʼa shuˍ hpaw toˇ chehˇ ve yoˬ. Yawˇ hui awˬ hoˉ maˇ cawˬ ve pa taw tu‸ hkanˍ dawˇ haˍ chehˇ ve yoˬ.
3Gʼuiˬsha kʼoˆ ve, Ngaˬ ve chaw teˇ hpaˍ hta‸ uˉ peunˍ chehˇ ve chaw hui hta‸ ngaˬ nyi ma zuhˆ leh, yawˇ hui hta‸ ciˍ yanˍ piˇ tuˬ yoˬ. Yuˇda‸ chaw teˇ hpaˍ lehˬ, ngaˬ ve chaw hpeh‸ leh, ngaˬ yawˇ hui hta‸ ha‸ shaˉ piˇ tuˬ yoˬ. Yawˇ hui lehˬ, awˬ gʼaˇ uiˍ jaˇ ve ngaˬ ve iˉ mvuhˇ teˇ hpaˍ hpeh‸ tuˬ yoˬ. 4Yawˇ hui awˬ hkʼaw lo ngaˬ ve chaw teˇ hpaˍ hta‸ uˉ peunˍ tuˬ ve jawˇmawˇ teˇ hpaˍ, awˬ hoˉ awˬ naˬ teˇ hpaˍ, leh ma‸ poˍ lonˉ teˇ hpaˍ tawˆ la tuˬ yoˬ. 5Ma‸ bawˆ gʼaˇ ve ma‸ yaˇ teˇ hpaˍ lehˬ canˇ paˍ teˇ hpaˍ hta‸ je‸ nehˆ hkʼaw naˆ tiˆ piˇ ve hkʼe, Yuˇda‸ chaw teˇ hpaˍ lehˬ gʼaˇ shehˍ hpaˇ hpeh‸ la tuˬ yoˬ. Gʼuiˬsha yawˇ hui geh chehˇ taˍ ve pa taw, canˇ paˍ teˇ hpaˍ hta‸ yawˇ hui bawˆ gʼaˇ tuˬ yoˬ. 6Ngaˬ lehˬ Yuˇda‸ chaw teˇ hpaˍ hta‸ awˬ gʼaˇ uiˍ la piˇ leh, Iˉsaˍreˍlaˆ chaw teˇ hpaˍ hta‸ ngaˬ htaiˍ hkʼaw‸ piˇ tuˬ yoˬ. Ngaˬ yawˇ hui hta‸ ha kʼaˉ piˇ leh, yawˇ hui hta‸ aˉ hkʼaw lo shiˍ kʼaw‸ la piˇ tuˬ yoˬ. Yawˇ hui lehˬ ngaˬ teˇ pawˆ ka‸ maˇ chiˇ baˬ jaw sheˍ ve chaw hkʼe hpeh‸ tuˬ yoˬ. Ngaˬ lehˬ yawˇ hui ve Jawˇmawˇ Gʼuiˬsha hpeh‸ leh, yawˇ hui ve bon lawˬ hkawˇ hta‸ na yuˬ piˇ tuˬ yoˬ. 7Iˉsaˍreˍlaˆ chaw teˇ hpaˍ lehˬ,
ma‸ yaˇ hkʼa shuˍ awˬ gʼaˇ uiˍ leh a pehˉ meuˇ gʼuiˬ dawˬ ve chaw hkʼa shuˍ ha lehˬ chehˇ tuˬ yoˬ.
Yawˇ hui ve awˬ ceuˬ awˬ hkʼaˇ teˇ hpaˍ lehˬ,
yawˇ hui gʼaˇ shehˍ hpaˇ hpeh‸ ve hta‸ dawˇ nawˇ leh Gʼuiˬsha te taˍ peuˬ ve kanˉ awˬ hkʼaw lo ha lehˬ chehˇ tuˬ yoˬ.
8Ngaˬ lehˬ, ngaˬ ve chaw teˇ hpaˍ hta‸
teˇ geh kuˬ hpawnˬ tuˬ yoˬ.
Ngaˬ yawˇ hui hta‸ htaiˍ hkʼaw‸ piˇ leh,
ponˬ laˬ htaˇ hkʼe kʼaw‸ maˇ la piˇ tuˬ yoˬ.
9Ngaˬ yawˇ hui hta‸ awˬ nu ve mvuhˇmiˬ teˇ hpaˍ hkʼaw lo hpaˆ da‸ kʼai piˇ lawˬ ve htawˇ,
yawˇ hui hkʼa gaˬ ve chehˇ kuiˬ lo, yawˇ hui ngaˬ hta‸ dawˇ nawˇ chehˇ tuˬ yoˬ.
Yawˇ hui leh yawˇ hui ve yaˇ teˇ hpaˍ a sha‸ te‸ chehˇ leh,
yawˇ hui ve yehˬ lo teˇ geh kʼaw‸ hpoˆ kʼaw‸ la tuˬ yoˬ.
10Eˇjiˇtu‸ leh Aˍsuˇriˆ mvuhˇmiˬ hkʼaw chehˇ taˍ ve ngaˬ ve chaw teˇ hpaˍ hta‸ ngaˬ aˉ hkʼaw lo kʼaw‸ shiˍ hkʼaw‸ veu laˇ piˇ leh,
yawˇ hui ve mvuhˇmiˬ hkʼaw kʼaw‸ chehˇ tcuh tuˬ yoˬ.
Ngaˬ yawˇ hui hta‸ Giˇlaˆ leh Leˍbaˍnonˍ mvuhˇmiˬ hkʼaw lo htawˇ chehˇ tcuh piˇ leh,
mvuhˇmiˬ hkʼaw lo chaw yaˇ teˇ hpaˍ kʼaw‸ biˇ la tuˬ yoˬ.
11Yawˇ hui lehˬ kawˆ tuˬ uiˍ ve laˇ tsuhˇ gʼuiˬ hkʼaw lo hpanˍ kʼai chehˇ ve teˇ yanˇ,
ngaˬ lehˬ gʼuiˬ baˇ teˇ hpaˍ hta‸ dawˆ leh Niˍlaˆ iˉ kaˆ lawˬ fiˍ kʼai tuˬ yoˬ.
Aˍsuˇriˆ mvuhˇmiˬ lehˬ nyiˉ ya‸ ve hta‸ gʼa hkanˍ leh,
Eˇjiˇtu‸ mvuhˇmiˬ lehˬ awˬ gʼaˇ nuˇ kʼai tuˬ yoˬ.
12Ngaˬ lehˬ, ngaˬ ve chaw teˇ hpaˍ hta‸ awˬ gʼaˇ uiˍ la piˇ leh,
yawˇ hui ngaˬ hta‸ ceh tiˉ oˉ kʼoˍ pui leh ngaˬ ve tawˇ hkawˇ hta‸ na yuˬ tuˬ yoˬ, teh‸
Gʼuiˬsha kʼoˆ ve yoˬ.
ที่ได้เลือกล่าสุด:
Zaˍhkaˍriˆ li‸ 10: LHBE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Lahu Bible Edited © Thailand Bible Society and Bible Society of Myanmar, 2010, 2020.