MATIO 7

Ghəgha' ywə pu nthyə̀

(Lk 6.37-38,41-42)

1Ka po pɑ ji pɑ fyɛ̀', po'o gɑ pu kɑ fyɛ' wɔ; 2nə pa' pu gɔ sɔ' lə pɑ nthi fyɛ' yə po nə fyɛ' a nə fyɛ' wɔ, lɑ pɑ fo' yə po nə fo' a nə fo' wɔ. 3Nwə kɑ́ o lé ghəgha' ywə yə a bɛtsə́ fɑ o a tɑ tə zhyə́ gɑ nthyə̀ bɛtsə o? 4Kɑ́ o gɔ ghə m gɑ́ kɑ tə ghɔm bi fɑ o gɑ́ tiŋnyə nthé ghəgha' ywə yə a bɛtsə́ o a tə́ nthyə̀ pɑ bɛtsə o? 5Wə mo dzɛbǔ, ləŋdzə nthé nthyə̀ bɛtsə́ o tɑ̀ jɔ tsʉ' pɑpúŋ nə nthé ghəgha' ywə bɛtsə́ fɑ o.

Nə hɑ tɔkcyə bi pǒ gənɔm

6Ka po hɑ ywə dɔlɔ̌ bi mbvʉ̌, kɑ nə ma' mtɔkcyə mo bi pǒ gənɔm lɑ́, bwɔk gɑ wap kɑ́ nəŋtə biŋ fɛ nɑ tsap syatə wɔ.

Nə lǒ, nə cə̌ŋ, nə ko'tə jyədyə̌

(Lk 11.9-13)

7Po ló, pú gɔ hɑ bi po; po cə́ŋ, pǒ gɔ yɔ, po ko'tə jyədyə̌, pu gɔ hé bi po. 8Nə pa' mo yə e ló a ŋkwi, mo yə e cəŋ a yɔ, pu pɑ́ hé bi mo yə e ko'tə a. 9A po'o bi a ya mo pɑ́ nə po yə mú e lo e ywətsʉ bɑ e gɔ hɑ gwɔ' bi a? 10Kɑ bi a e lo e bapgu bɑ e gɔ hɑ́ nɔk bi é? 11A bi a dəŋ pa' bɑ po pɔk a po zhyə́ nə hɑ tsə pɑpuŋ bi pó pɔ, bɑ mcʉ̌m sʉ'ʉ nə Tá yɔ yə e kɛbəŋ a, pa' e gɔ hɑ tsə pɑpúŋ bi pɔ pyə wap ló bi e a?

12Po'o, bǎ yɑ ywə lə́ yə po shəŋ gɑ́ pɔmnəŋ ghə bi po a, kwa' wɔ ghə ya bi pú. A bɑ mcò', biŋ bɑ mghɔm mghɔm Si.

Pim jyədyə̌

(Lk 13.24)

13Po ko dyə m nə pim jyədyə̌. Jyədyə̌ yə a gɔ m nə pi á bɑ ǎ sɛtə biŋ gʉ́ɔnyə; pɔ pyə́ a bɑ wap cyə m nə a yɔm té' o. 14Tɑ́ jyədyə̌ vɔk bɑ a kɔ́k, məjyə piŋ ŋkhɔmtə, bɑ pɑ yɔ məjyə̀ bɔ ka yɔm.

Nthi thə́ m nthi mthɔ́m myə́

(Lk 6.43-44)

15Pó pɔm mghɔm ghɔm Si cwanwə, pyə wap sɔ' bəŋ po pa' jʉ̀jʉ̀ á tə bɑ m nthʉm o bɑ mbvʉ́ gǒ pyə wap sim tsʉ' a. 16Po gɔ zhyə wap pɑ nə nthɔm map. Pu ŋkhap nthɔm nthə́ nə nu' mlu' nə mka'tə a? Nəŋ bɑ ŋkhap figə nə thə júŋ a? 17A bɑ po'o tɑ bǎ yá ta'thə pɑpuŋ a jam nthɔm pɑpuŋ; da'gɑ bǎ ya ta' thə yə gho ko nə a pɑ jam nthɔm cwəpuŋ. 18Bi a pɑ ta'thə pɑpuŋ lə yam nthɔm cwəpuŋ kɑ ta'thə gogho lə yam nthɔm pɑpuŋ. 19Bǎ ya ta' thə lə́ yə a tɑ́ jam nthɔm pɑpuŋ a pɑ, pú ŋkho', ma' mɔk. 20A po'o tə́ po pɑ́ gɔ lɑ pɑ nthɔm máp nə zhyə́ wáp.

Pɑkhʉ pyə nyənyɔ

(Lk 13.25-27)

21Tə da' nə ghɔm bəm gɑ́: Cyəpɔ, Cyəpɔ! Nə gɔ ghə tɑ́ mo ko nə́ Nəfo kɛbəŋ pɑ. O gɔ ghə ywə yə Tá a kɛbəŋ shəŋ a. 22Pɔ tə́ jɔm gɔ sɔ' tyɛ'dzʉ́ bɔ ghɔm bəm gɑ: Cyəpɔ, Cyəpɔ! Pyə lé tə lɑ tsó tsǔ gɔm ghɔm Si a? Dɑ tsó tsǔ jəŋ zhwenyə cwəpuŋ a? Dɑ tsó tsǔ nthé vəŋ msya a? 23Biŋ gɔm bi pú gɑ: Ŋ da m jyə wɔ, po lú bəŋ m̀ wɔ pɑ ghə mnwə cwəpuŋ!

Mba' mɑ bʉə

(Lk 6.47-49)

24A po'o tə bǎ ya mo lə́ yə é ju' mghɔm myə gɑ̌ gɔm á giŋ nə á, bɑ́ dəŋdəŋ pa' mu' mo jyə nwə yə e lə kwɑ pa' e dəm wǔ gwɔ' a. 25Bəŋ lú, mcɑ tsəŋ; fəfa cʉ' guŋ e awɛ vʉ nə pa' bɔ̌, da' gɑ́ a lə vʉ nə pá' to pa' bɔ̌ bɑ́ dəm wǔ gwɔ' a. 26Mo yə e nəŋ jú' mghɔm myə gɑ̌ gɔm a la' e ghiŋ nə a, bɑ́ pá' mu' ŋkhəŋkhʉɔ yə e ŋkwɑ pa' e nə bvɛ a. 27Bəŋ lú, mcɑ tsəŋ; fəfa cʉ', guŋ e awɛ vʉ̀ nə pà' bɔ̌, a vʉ, mkhʉm myə́ yɔm tɑ́.

Tʉɔ Yeso

28A lə pɑ́ tə Yeso miŋ nə ghɔ̀m mghɔm bɔ, ywə yə e ji'tə a cəŋtə́ ŋkhó nə pɔmnəŋ 29nə pá' e lə bɑwə ji'tə m pa' mo yə e ghə tʉɔ a, la' e zhi' m pa' pɑ zhyə mco' a pɑ́.

ที่ได้เลือกล่าสุด:

MATIO 7: NTGomala

เน้นข้อความ

แบ่งปัน

คัดลอก