MATYOO 2

Ɓɛ̀yiì-ɓìɓan ɓɛ yuù kì ghɛɛ̀ Yeesus

1Yɛ̀ɛ Yeesus à yalɛ̀ngà a Bɛtilɛhɛm ɓi ziì Zyude, ɓi cààmɛ̀n ki Eroodɛ à ɓaghà rìfòm, nni ɓɛ̀yiì-ɓìɓan ɓɛ Pɛsɛ̀ngày ɓi jàŋ ìnɛ ŋ̀wos a kpagii, ɓɛ yuiy a Yorisalɛm 2ɓɛ tɔg lɛ: Rìfòm ɗi Ɓɛ̀yudɛ̀n ɗi ɗi n-yalɛɛ fɛ ɗi ri fe? Tìi ǹghɛɛ fyɛy fi man ànɛ̀n a rìkpagìì ɗi ŋwos di fyɛɛ̀ lònlòm, fɔɔnnɛ tì yùu yì fɛ lɛ, ti ɓɔgsi nyi. 3Yɛ̀ɛ rìfòm ɗi lɛ Eroodɛ ɗi wokà kìɓan kiǹ, ki ɓuùsì nyi ǹto, ki ɓuùsì girig ɓum ɓɛ̀cèm ɓɛ a Yorisalɛm. 4Fɔɔnnɛ à taŋzɛ̀ngà ɓɛ̀pìrɛɛtìrɛ̀ ɓɛgwey ɓɛ̀cèm rì ɓɛ̀rèsàg-ɓìdɔ̀gsɛna ɓɛ ɓi kìlɔ̀ŋ à tɔg ɓɔ jàŋ inɛ Kiris à ghɛ̀ɛ̀sɛ̀ngà kì yalɛɛ. 5Ɓɛ̀roɓɛ̀n ɓɛ ɓàg nyi lɛ: A Bɛtilɛhɛm ɓi ziì Zyude, lɛ ǹkpaŋzì-ɓìɓan a kàngà lɛ:

6Wɔ̀ Bɛtilɛhɛm, ɓi kìden ki zi ki a Zyuda, ù yin loo maa bàn à zɛy rì zɛy ɓi nyìinyìm à bàn yi a Zyuda, lɛ a lɔ̀ŋkɔɔ ìnnɛ rìfòm ɗi ɗi ɓiì kɛ̀ɛ̀sii kilɔ̀ŋ kɛm̀ ki lɛ Isirayɛl, ɗi ɓiì kpaŋìì.

7Fɔɔnnɛ Eroodɛ à reŋìghà min ɓɛyiì-ɓìɓan ɓɛǹ a dwìɗ, à tɔg ɓɔ lɛ ɓɛɛ konag nyi kì kpaà fin innɛ fyɛy fiǹ fi tumɛ̀ngà rìlòm. 8Nni à romgà min ɓɔ a Bɛtilɛhɛm, à kpaa ɓɔ lɛ: Kɛ̀ɛna kì kaà jàŋ inɛ man ànɛ̀n à rì lɛ tiɓ-tiɓ, i ɓì ghɛɛ nyi, ɓì yù mɛ̀ kì wogsii lɛ, mɛ̀ɛ ǹkɛǹ girig nyi kì ɓɔgsii.

9Yɛ̀ɛ ɓɛ wokà ɓìɓan ɓi rìfòm ɗi kpaaghà ɓɔ ɓìn, nni ɓɛ kɛngà, ɓɛ ki sìgmɛn lɛ, fyɛy fi ɓɛ remzìghày a rìkpagìì ɗi ŋwos, fi ti ɓɔ ɓiì syòŋsyoŋi bee, a kpaŋ yɛ̀ɛ fi kɛngà kì rɛlii ɓi jàŋ inɛ man ànɛ̀n à ɓaghà. 10Yɛ̀ɛ ɓumɓɛ̀n ɓɛ ghɛngà fyɛy fiǹ, ɓɛ wokà kìnyàà lɛɛ̀gwey. 11Fɔɔnnɛ ɓɛ ɗiŋìghà ɓi naa, ɓɛ ghɛn man à m̀ɓwɛɗ rì Marii à jɛɛ, ɓɛ ɓag mɛ̀ɗu ɓi zi, ɓɛ ɓɔgsì man ànɛ̀n. Ɓɛ fumì min mɛtɛ̀g maa, ɓɛ fa nyi lɛ; rì gol rì àŋsaŋ rì miìr. 12Ajɛ̀m ìnɛn Bɛ̀ll à kalìghà ɓɔ a ɓìdɛ̀ndɛm̀ lɛ, ɓɛ̀ kɛɛ̀ sugti yɛ̀ɛ Eroodɛ. Fɔɔnnɛ ɓɛ sukà ɓi kìlɔ̀ŋ kaa ɓi bee ìdɛŋ.

Ɓɛ̀yalì ɓɛ Yeesus ɓɛ ghɛŋii rì nyi a Egiɓtɛn

13Yɛ̀ɛ ɓɛ̀yiì-ɓìɓan ɓɛ ɓaghà di ɓɛ mɛ sug, nni ŋwaà-fìtom a Kan à rèsɛ̀ngà Yoosɛɓ a ɓìdɛ̀ndɛm̀, à kpaa nyi lɛ: Pɛ̀sɛn aɗyoo, ù teɗ lɛ rì maa man ànɛ, rì jɛɛ, ù ghɛŋi rì ɓɔ a Egiɓtɛn, u ki kɔ̀ri wɔɔ, à kpaŋ yɛ̀ɛ ǹɗì wɔ̀ ɓiì kalii lɛ, u sugtiì, ɓisuulɛ Eroodɛ à ɓiì kaakaa man ànɛ, lɛ a wey. 14Nni Yoosɛɓ à pɛ̀sɛ̀ngà aɗyoo, à teɗ lɛ rì maa man ànɛ̀n rì jɛɛ, ɓɛ ghɛŋì lɔŋ ri ìru wìn a Egiɓtɛn. 15À kɔ̀rìghà wɔɔ à kpaŋ yɛ̀ɛ Eroodɛ à wughà, lɛ kɛɛ kilɛn lɔŋ yɛ̀ɛ Kan à kpaaghà ɓi ŋwɔm wu ǹkpaŋzì-ɓìɓan lɛ: Mɛ̀ɛ ǹɗegii man wɛm̀ lɛ a kpaŋdɛn a Egiɓtɛn.

16Nni yɛ̀ɛ Eroodɛ à ghɛngà lɛ, ɓɛ̀yiì-ɓìɓan ɓɛ m̀pwàa nyi, fɔɔnnɛ à wokà bim lɛɛ̀gwey, à ki rom ɓum lɛ ɓɛɛ kɛǹ kì cuusii ɓɔn ɓɛ̀cèm ɓɛ a Bɛtilɛhɛm à tumɛ̀n ɓi ɓɔn ɓɛ bèg yiɓɛɛ̀rɛn à sɛn, lɔŋ yɛ̀ɛ ɓɛ̀yiì-ɓìɓan ɓɛ reɓkà nyi, cààmɛ̀n ki fyɛy fi tumɛ̀ngà rìlòm. 17Kìɓan kiǹ kɛɛ roozìghà rìkpaa ɗi ǹkpaŋzì-ɓìɓan Zyeremii ɗi lɛ: 18Ɓɛ ǹwooghiì di ɓìkiŋ ɓi riì a Rama, rì mɛ̀kɛɛ̀gh, rì ɓìɓààsì, Rasyɛl nnyɛɛ rènɗen ɓɔn ɓii, kɛ̀ɛ gherɛn lɛ mum a fɔɔ̀si nyi ǹɗem ɓisuulɛ, ɓɔn ɓii ɓɛ mɛ cùù.

Yoosɛɓ à sughiì, yɛ̀ɛ à ghɛŋìghà a Egiɓtɛn

19Yɛ̀ɛ Eroodɛ à wughà, nni ŋwaà-fìtom a Kan à rèsɛ̀ngà Yoosɛɓ a ɓìdɛ̀ndɛm̀ a Egiɓtɛn; 20à kpaa nyi lɛ: Pɛ̀sɛn aɗyoo, u teɗ lɛ rì man ànɛ rì jɛɛ, u sugti rì ɓɔ ɓi ziì Isirayɛl, lɛ ɓumɓɛ ɓɛ kaakàghà lɛ ɓɛɛ wey man ànɛ, ɓɛ mɛ cùù. 21Fɔɔnnɛ Yoosɛɓ à pɛ̀sɛ̀ngà aɗyoo, à teɗ lɛ rì man ànɛ̀n rì jɛɛ, ɓɛ sug ɓi zi ì Isirayɛl. 22Kìɓan kifog, yɛ̀ɛ Yoosɛɓ à wokà lɛ, Arikelawus yɛɛ ǹteri ìkɔ̀ɔ̀ wu rilàmì wu seŋi ànɛ lɛ Eroodɛ ɓi ziì Zyude, nni à risìghà lɛ a kɛǹ kì kɔ̀rii wɔɔ. Bɛ̀ll à reɓ nyi a ɓìdɛ̀ndɛm̀ lɛ a kɛǹ kì kɔ̀rii a Galile. 23Fɔɔnnɛ à kɛ̀ngà kì kɔ̀rii ɓi bàn ìdɛŋ ɗii lɛ Naazarɛt, lɛ kɛɛ kilɛn lɔŋ yɛ̀ɛ ɓɛ̀kpaŋzì-ɓìɓan ɓɛ lokà kì kalii lɛ: Ɓɛ regii gɛ nyi lɛ muu Naazarɛt.

ที่ได้เลือกล่าสุด:

MATYOO 2: BAFNT

เน้นข้อความ

แบ่งปัน

คัดลอก