LUKAS 4

Matna nem Yesu

Mat 4:1-11; Mark 1:12-13

1Yesu hobay hiɗi Ŋusta-Peldetta, nam hotay goy hay Yordan pa, Ŋusta gum iram goy hay fulda, 2ɗawni hay fulda Matna nememu ir buur dok-fiɗi. Hay buur namna lakŋi nam may ti noŋɗi, hay li ma buur namna vatawana, mayta tun caw cumu. 3Matna dumu: La naŋ mi goora vi Lawna, vulaŋ hagata kay hiɗiyn waŋŋi ma muɗ goy fuwa. 4Yesu hot dit talamu: Ɗot ɗo'ay ala sana mus iriya kay fu ɦawaɗi,

5Matna kalam kulo'o kay hiɗiyta fiyokka, ir liyn neeɗa ɦawa nam ɗekem kay mulda vi nagat kafe, 6ka dum ala: Nan min vulaŋ gaŋeraŋa hiɗi gajijita vi mulda lakŋi kafe, kay na' vuli man nanu ni, nan as vula' mi gigekaw ma nan mina. 7Kay na'ta la naŋ herawa gaa vokanu kay girifanu ni, nam kaf lakŋi ma muɗ vaŋu. 8Yesu hotom dita: Ɗot di ala: Naŋ ma girifim mi Bum-Sumuna Lawna vaŋu, naŋ ma sunumti mi nam kepe.

9Matna kalam kulo'o hay Yerusalem lo, nam musum kulo kay yam tempella, ka dum ala: La naŋu mi goora vi Lawna, kulo tan pa gaŋ tuwaŋis gaa'a: 10Kay ɗot ɗo'ay ala:

Nam ma di sa suna-wuralawna valamu kaŋu kay ŋomaŋu,

11Nisi ma ziyaŋ kulo hay ɓisiya,

kay seŋ ma dab tam hiɗiyn noŋɗi.#4:11 fi kayni hay Nul 91:11-12.

12Yesu hot dumu: Ɗot di ala:

Naŋ ma nem Bum-Sumuna Lawna vaŋɗi.

13Hay li ma Matna vat nemda valamu vatna, nam kaliya, ta-ta cub buur mara'a.

LOPNA VI YESU HAY GALILEYA

Kusta hay Nasaret

14Yesu hot hay Galileya, hiɗi donota vi Ŋusta, selem tiy goy hay liy namna kafe. 15Nam ka hat hay sinagogayna, sumun kaf ka tiyim selemu.

16Nam kalay hay Nasaret, liyn ma nam wul hayna, ki nam ka li dok-dok nala, nam kal hay sinagogayna hay buura vi sabatna, nam fok kulo'o kay jaŋ ɗerwelda 17Nisi vulum ɗerwelda vi sa ma jobta-Lawna Esaya. Nam mal ɗerwelda goyo, nam jaŋ hay liy ma ɗoy ala:

18Ŋusta vi Bum-Sumuna ka kanu,

kay nam ɦok mul kanu kay nan yer goyo sum sa

sutaysi toyna,

Kay nan ma kus labara ma firina tam sa hawna;

kay vul butta-goyta tam nisi sa ka hay daŋgayna,

kay mal ir sa dukin goyo,

Kay but goyo nisi sa ka vun curo'da,

19Kay siwel goyo kay busata ta slugota vi Bum-Sumuna.#4:19 fi kayni hay Es 61:1-2.

20Bugolda nam ɗut ɗerwelda kulo'o, vula' mi sa sunda, hot mus gaa'a. Sumuna kaf hay sinagogŋa irsi ka cuki kalamu. 21Nam tun caw law tisi ala: Vaydi yoboyn ma nigi ka humum tanna vunam hobawa. 22Nisi kaf law ŋaa'a kalamu, nisi ka var kay yoboy ma slugona ma may goy hay vunam pana, nisi di'e: Nam zawni may mi goora vi Yosefɗi su? 23Yesu disiya: Gasiya, law ma nir-niramna kayni nigi ma dum kanu: Doktor, yeraŋ tuwaŋ goy kay tuwaŋ yer', sle ma numa humum labara valamu ma naŋ lum hay Kapernawumna, naŋ ma lum hay nagata vaŋ tani kaw lige. 24Yesu disiya: Nan digi gasita, sa ma jobta-Lawna ma sum sa hay nagata valamu vum ŋaa'a mayɗi. 25Nan digit kayn ti gasita, boy sa duhulla ay ŋolo hay Israyel hay buura vi Eliyas, hay li ma dukalawna ay dukiya hay busat ɦidi hiɗi til karkiya, hay li ma mayta li ŋolo kay nagata pet; 26may Lawn may gi Eliyas tam sa jarsi kep noŋɗi, may nam gum kayni kat cata duhulta kep hay Sarepta, hay nagat vi Sidon. 27Sa kuturuna ay ŋolo hay liyna vi Elisa ma jobta-Lawna, may sa jarsi kep kaw ma yer goy mayɗi, yer goy mi Naaman ma Siriyan kep tuta.

28Nisi kaf sa hay sinagogŋa muɗ ɦiy ŋolo hay li ma nisi hum kayni, 29nisi yaway kulo'o, nisi tanam goy gine hiɗi hoyok-ziyna, kalam kulo kay sin-hiɗiyta ta hoyok-ziyna visi ini kulo ka'ta kay nisi ma zutum gaa'a, 30may nam rawis jarsiya kalay goyo.

Yer-goyta mara'a mara'a

Mat 4:13-16; 8:14-17; Mark 1:21-39

31Nam ma hay Kapernawum, hoyok-ziyn kep hay Galileya, nam tun caw hatsiya hay buura vi sabatna, 32nisi lak ɦuyum', jiɓer kay hatta valamu, kay yoboyna valamu gaŋeraŋ ka kuɗumu. 33Hay sinagogŋa sa ma ful ma liwisna kalamna ay dam', nam siwel hiɗi delem kulo ŋolo di'e: 34Naŋ min lum hiɗi numa mi mige, naŋ Yesu ma Nasaretna? Naŋ maawa kay ɓulakma'a su? Nan waŋ ŋaa ŋolo, naŋu mi ma peldetna vi Lawna. 35Yesu bayamu di'e: Ziŋaŋu, kalaŋay goy hayamu. Ful ma joona gum gaa jarsiya, kalay goy hay san zawni, lum tuwam joo noŋɗi kaw. 36Nisi kaf narta visiya: Nisi di jar-tuwsiya: Kayni mi yoboyn mige? Hiɗi gaŋeraŋi hiɗi dono'o nam law tam fuliyan ma liwisna, fuliyan ma liwisna cuk goy hay sana may. 37Selem tiy goy hay nagat kafe.

38Hay li ma nam hin sinagogŋa, nam kal hay ziyna vi Simon. May kuno Simonda ka buri moyo, tuwa' ga' ku ŋolo, nisi siɗawam kay nam ma gut kuɗa'a. 39Nam col kulo ka'a law tam moyna, moyna hina'a. Wulini wulini na' fok kulo'o, tun caw sunsiya.

40Hay li ma fatta ɗigawa, nisi sa sumuna visi ka hiɗi moy mara'a mara'a kaf marsi tam Yesu. Nam tun ɓalam kisi kep kep kaf, muɗsi goy ŋaa'a. 41Fuliyan joona kaw kalay goy hay sumun ŋolo, ka siwel ala: Naŋu mi goora vi Lawna. Yesu law fuliyan ŋolo, hinim di vaɗi, kay fuliyan wi ala namu mi Kristu.

42May hay li ma liyn foowa goyo, nam kalay goyo, kal hay liyn ma fulla. Sumun tun caw garamu, nisi co ta-ta goy kuɗumu; nisi min telem gaa jarsiya kay nam ma kalɗi. 43May nam disiya: La nanige kaw nan ma kus labara vi mulda hay hoyok-ziyn hegen lay, kay nan ganay kayn kay na'ta. 44Nam kus yoboyna hay sinagogayna vi Galileya.

ที่ได้เลือกล่าสุด:

LUKAS 4: Massana

เน้นข้อความ

แบ่งปัน

คัดลอก