Zaŋ 3

Yesu ati Nikodem

1Mbur mekelem ada a wuzla Farisahay, a zilaka Nikodem, i mbur purla ngi si mizli madiɗa ngi Yudehey. 2A so luuma Yesu ngi duvuɗ, a ɓaŋ: «Kumani, i sinaka le, Buymisemuŋ a slino ka ɓa ki dubuna ndra gwat, asi cekene ka maga na, ko mbur maga gu kanah anta, sey da Buymisemuŋ naŋ da ati naŋ far.» 3Yesu a mbiɗaŋ di: «Gisiŋ gisiŋ, yi ɓuw na: Zumabuy ngi Buymisemuŋ, ko mbur mapura gu anta, sey da a yakaŋ le sar mucuw naŋ a muŋ far.»

4Nikodem a ɓaŋ: «Mbur migi midigila le si na, a yakaŋ mbri mbri maka? A ci sar mucuw naŋ gu nga kwacay mumuŋ, ɓa a yaŋ ma kwa?»

5Yesu a mbiɗaŋ di: «Gisiŋ gisiŋ yi ɓuw na: Zumabuy ngi Buymisemuŋ, ko mbur maci anga gu anta, sey da a yakaŋ le ti yam ati ˀUf far. 6Mbur titra a yi di i mbur titra ya, amma ˀUf ngi Buymisemuŋ kwana, a yi di i ˀuf aya. 7Ya muɓuw: ‹Anja sey a yukum paɗ ti muŋ› na, anja a guw welele ta. 8Himiɗ a gi ng'ar li naŋ muwuɗ le gar. Ki cine hurum naŋ ɓula, amma a so ti damaka, malla aru kini nga maka na, ki si na ta. ˀUf ngi Buymisemuŋ miya mburo le gar na, a gi di kanah ya.»

9Nikodem a ɓaŋ: «Ɓi misenna a gi gu mbri mbrike?»

10Yesu a mbiɗaŋ di: «Ki mudubuna gwat da Israyeley, ko ki si na gwat tayna ta mbrike? 11Gisiŋ gisiŋ, yi ɓuw na: i ɓam di i ɓi ngi gwat ndra misinaka le, i gam di i sedewo ngi gwat ndra mupuraka le. Amma ko kum anta tiɓaka sedewo ndra ta. 12Ya mira ɓukum ɓi ngi gwat ngi ruwuyoy na, kum anta ki tiɓaka ta. Na, da yi ɓukum di i ɓi ngi gwat ngi muŋhoy zleˀe na, kisa tiɓaka mbri mbrike? 13Ko mbur mijiɗ ɗaˀ nga muŋ anta ndiɗaˀ, sey Mangal ngi mbur mupo sar paɗ ti muŋ. 14Moyis a luwa kawa le ar dum a muŋ a wuzlaɓuh mikirɗak kirɗaka, naŋ kine, anja a luwaka Mangal ngi mbur a muŋ kanah ya, 15ɓa ko wa gar mitiɓaŋ le na, a lum siifa ngi sete.

16«Naŋ kine, Buymisemuŋ a wuɗ duniya le haɗi, hã a vulo Mangal naŋ kirmalay, ɓa mbur gar mitiɓaŋ le na, a zizi ta, amma a lum siifa ngi sete. 17Asi Buymisemuŋ a slino Mangal naŋ ar duniya, ɓa a ga kiita da duniya ta, amma ɓa duniya a lih mbele naŋ. 18Ko wa mitiɓaŋ le na, a gakaŋ kiita ta. Amma ko wa mitiɓaŋ ta na, kiita a jaŋ le si, asi a tiɓa slimiɗ ngi Mangal kirmalay ngi Buymisemuŋ ta. 19Kiita a gi anihĩ: li minjahha a so le ar duniya, amma mizli a hĩyãm luvuŋ fineˀ li minjahha tuwa, asi gwat ngi gi taŋ i malambaˀa. 20Naŋ kine, ko wa gar magi gwat malambaˀ na, a hirsa li minjahha, a ngum so ng'ara ta, a zluwun vur gwat ngi gi naŋ malambaˀhay tuwa masa njikam. 21Amma mbur magi gwat mikaslsla na, a so angi li minjahha, ɓa gwat ngi gi naŋhay ar naŋ mujom ati Buymisemuŋ na, a njikam.»

Yesu ati Zaŋ mici mizli ar yam

22A dirba nah, Yesu ati mizli ngi seˀehey a ram nga hirwuy Yude. A zik ati taŋ a diga neˀ, yo ara ci mizli ar yam. 23Zaŋ kwana, ara ci mizli ar yam a Aynoŋ, gweˀ avu Salim, vur yam ada haɗi a diga. Mizli a soko ng'ava, dar a ca taŋ ar yam. 24Asi ti nah na, a caka Zaŋ ar dangaya t'aruŋ. 25Dar mekelemey a wuzla mizli ngi si Zaŋhay a zlaka tiri ati mbur Yude, asi ɓi ngi mezegwel taŋ ngi buna haŋ ati saray. 26A ram ng'avi Zaŋ, a ɓakaŋ: «Kumani, mbur misi ati ka a dubazaw Zurdeŋ, ka miga sedewo naŋ tuwa na, ani a zla le, ara ci mizli ar yam aya. Mizli gar ara kilam ng'avaŋ!»

27Zaŋ a mbiɗa taŋ di: «Da a vulaka gwata paɗ a muŋ da mburo ta na, a lum gwat ko neˀ gu ta. 28Kum ti hirnga kum, kum i sedewo ngi ɓi ya miɓa zleˀe na: ‹Ya i Mesi ta, amma a slinoko ya a mbuŋ naŋ.› 29Zil ngi ngwasa, i mbur maɗuvaŋ. Amma ngama ngi zile a cici deŋ, a cin ti cin. ˀAy ngi zil maɓi, a gaŋ mumul haɗa. Ya i mumul kanah ya, a ndila le wãˀ. 30Anja naŋ a gil, ya kwana, yi mi nga dirba.»

Mbur muso paɗ ti muŋ

31«Mbur muso paɗ ti muŋ na, naŋ dum hirnga ngi mizli gar. Mbur ngi ruwuy kwana, naŋ i mbur ngi ruwuy aya, a ɓi ɓi ngi gwat ngi ruwuy aya. Mbur muso paɗ ti muŋ, 32a gi sedewo ngi gwat naŋ mupura ati naŋ micinaŋ, amma ko mbur matiɓa sedewo naŋ anta. 33Mbur matiɓa sedewo naŋ na, a tiɓa ɓi ngi Buymisemuŋ le, naŋ kaslsla. 34Naŋ kine, mbur Buymisemuŋ mislino di le na, a ɓi di i ɓi ngi Buymisemuŋ, asi Buymisemuŋ ara nahaŋ haɗa ti ˀUf naŋ. 35Cine a wuɗ Mangala, a vula gwatay gar asi haŋ naŋ. 36Mbur matiɓa Mangala na, naŋ ti siifa ngi sete. Mbur macina mi da Mangala ta na, anta sa lum siifa ta, amma Buymisemuŋ a sa ndir ti himaˀ a hirnga naŋ.»

ที่ได้เลือกล่าสุด:

Zaŋ 3: BEGDC

เน้นข้อความ

แบ่งปัน

คัดลอก