Mak 6
6
Tarut at Nasaret rat varik negita Jisas an
1Jisas malngi ut iginan bi mul bamul li vininan mini non tarutni. 2Tei le ren ah Sabat bi bawo mwesesesrak le valin tangroan. Tarutmumu ratti iginan, entorah rat rongo ba rat tetkotkoh tokol ini. Ram uhleli nuhu, “Ani aji ahe teli bwera ililngian ahe ibeh? Ililngian apma si i teskak mini ah? Gavak nagoah mweleli karetan niah tam gita? 3Tebaite enang ngahe niah bibi ajinan lelnan val niah dajin ah Meri, bi kisan ah Jemes bi Joses bi Judas bi Saemon? Hojinni ramdi bede?” Ratvep tapmak bi rabawo nembep i vepajian. 4Jisas bep mini ni nuhu, “Ajinan dalen God ba vihni meresnan modok livini seranae ba mwegamui livinan ba vihni meresnan mabulong mini ni.” 5Tebam lelte karetan nga iginan, ba telngi ngan li datngin goah rat ras, bi bamwesa ni. 6Tetkoh tokol i goah vihni mwetakngaan non at iginan ba tei tebulong.
Jisas teso botwot i non tarutni niah ni tesangwul vepnan karu
Jisas tevan seranae ban li vinini ah iginan, bi mwesesra tarutni. 7Mahu non tarutni ah ni tesangwul vepnan karu vautbwaleh bi moso gakaruak i ni. Maskani rowok tegol mini ni, metan goah rabat koro loah. 8Maskani dalekte mini ni bep nuhu, “Tigoah kan ban ba kan ba wuhte apmaan u nomi huralan, kan gavin katokami nante. Kan ba wuhte maromian, io kan ba wuhte watangan, kan ba wuhte manean le nomi watang. 9Kan goro bwelan wokommi, ba kan ba kote bwelakte wakaruan. 10Entorah kan ban li vini ba tigoah tarutnan vini nanong ran lep gogo gimi, ba kan dok naben goni nanong mulngan ah kan nemlu dini ut nanong. 11Ba tigoah kan ban li vini go ba tarutnan vini nanong ranba lep gogo gimi nga, io ran ba rongtani gimi nga ba kan nelngi vini nanong. Kan dahli tankin vini nanong bahka wokomi lemta metan goah manei kasesrana.”
12Raban bi ram doptop, metan goah tarutni rabat wukak dini no kapmwaan. 13Rat koro loah dini goah loah tedi le ni bi ram salila sileng sangbak li goah rat ras, bi rabamwesa ni.
Metenan Jon Baptaes
14Nanong ba Herod subu non at Galilini, terongo vepnan Jisas. Gonani vepnan Jisas tekoro ut. Datngin tarutni rabep nuhu, “Nabih nuhu Jon Baptaes nong, temas bamul dini mete, gonani rowok tegol ahe maskak mini.” 15Ba datngin rabep nuhu, “Ni Elaeja.” Ba datngin rabep nuhu, “Ni ajinan dalen God, tapmak goah rattok mate.”
16Entorah Herod terongo bi bep nuhu, “Ni Jon Baptaes, niah nat leli ba ram dasrotvi kawan. Nanong ba temas bamul dini mete.”
17Tei Herod nanong niah teleli ba rat wuhu Jon, bi mweleli ram malngi le valin illan. Herod teleli tapmak gonani Herodias niah tei atleiman kisan ah Pilip ba Herod telak ini. 18Bi Jon ba tevalenga radaini dobo mini nuhu, “Teba woswos tenga nagoah kon lak bamul i atleiman kisam tedapmak.” 19Lelen Herodias tekakat i Jon, ba batba hi nga gonani temtani Herod. 20Gonani goi Herod bi temtani Jon, teililngi goah Jon tei ni aji woswosan, bi tei aji sangbak. Tei bujun nanong nagoah batba hi nga. Tedoni bamte goah terongtani Jon, ba nannga ba teba ililngite mwatwen toptowan nga non Jon.
21Tevan ngama ba Herodias butdihi hal tewoswos. Herod teleli bwera sasabisian u rennan non woran ah terop bwiswis. Mweleli kanleutan bi muuh sasabisi i goah rat tei walun bongon aji kawunan vini, bi goah ratei salenan bwalan, bi goah rattei lemtan tarutni at Galili. 22Nujun Herodias niah dalat mapma bi bwel. Non welan teleli ba rongnan nokon Herod, bi goah rat sasabisi u non kanleutan ba rongnan noko tei tekabis tokol ini. 23Herod bep mini aji dalat nong nuhu, “Nambwatle ini mini kik, nuhu nan neskani apma nannga ah kon uhleli i nana. Masen ah manei ngudun nok leut.” 24Aji dalat nong ban ben dajin, bi muhleli ini nuhu, “Nan uhleli apma ini?” Dajin bep mini nuhu, “Kon uhleli bujun Jon Baptaes.” 25Aji dalat nong mul ben subu nong bi bep mini nuhu, “Namdoni nuhu, koskani bujun Jon Baptaes na mini nana nong le belet.” 26Vehuran nong teleli ba rongnan nokon subu tekapma tokol ini, ba batbam bep tebu nga mini, gonani tewatle masi ini lemtan goah rat sasabisi. 27Masro goah rat sesep ban nuhu rama van neli bujun Jon mapma. Ajinan sesepan ni nong raban le valin illan, bi ram das rotvi bujun Jon, 28bi ramali mapma le belet, bi ramaskani mini aji dalat nong. Bi ban maskani mini dajin.
29Entorah tarut non Jon rat rongo goah Jon temat, bi ram mapma neselkani mamjin bi raban nedipmi.
Jisas tevangi tarut tevata vakalim
30Atnan kasosoni niah Jisas tesroni, ramulma vaben Jisas, bi ram mwatwo halan leutni mini, niah rat leli bi rat vep. 31Leto nanong ba tarutni halkawu lengleng ah rat tepma bi raban, rat leli ba taron go tei tebulong ah Jisas mini non tarutni rabat kanleut. Bi utnen go tei tebulong ah rabat lelte apma. Bep mini ni nuhu, “Taban tesi ibe ut ah manei kidi ma, metan goah kan membe.” 32Ramamlu li aga, tegamui ni ma, raban ut ah tei ut tedi ronga.
33Entorah rat sip li aga, ba tarutni rat kita goah rat temlu, bi ramaililngi nuhu tei ni. Rat teililngi luhmwi ut ah ratvan iginan, ram hural al ut bi ramdok nemban bawo ut ah Jisas mini non tarutni rabat van iginan. 34Entorah Jisas tesak ut ba mwigita bwera tarutmumu ah ratti. Bware tedok nokon Jisas gonani ratti tekeni sipsip ah ajinan kitan li ni mabulong. Mwesak be bi bawo mwesesra ni i apma halkawu lengleng.
35Tei sasari utebwarek ba tarut non Jisas ramapma bi rabep mini Jisas nuhu, “Utbwarek nanong, bi ut i tamdi iginan ahe ba vini tebu. 36Kosro tarutni rahe mul, metan go ran ban negelte apma ah ran gani li vini ni rahe.” 37Jisas balu ini nuhu, “Karuskakte hinak mini ni ba rama kani.” Rabep mini nuhu, “Kom doni nuhu kama van negelte bered i dola tewudelu vakaru, bi nebangi ni?” 38Jisas muhleli i ni nuhu, “Kami bered tekeni apma? Karuban negita.” Entorah rat wutdihi mulngan, bi ram mapma nembep mini nuhu, “Bered bol kalim bi ik bwera karu.”
39Jisas bep mini non tarutni nuhu, rama leli ba tarutni rama sadok mapma ut teses, le ruvilih. 40Tarutni nong ram sadok beverak, ni ngawul kakalimak, bi utgo tei tewudelu. 41Jisas mali bered ah bol kalim, bi ik ah bwera karu, bi mwigit vamere le bini bavatla God uru. Bwabwerawera bi maskani mini non tarutni nuhu rama vahtani mapma mini tarutni. Bahtani ik niah bwera karu mapma mase. 42Nisera rat kani, bi tei rat kubu sera. 43Non tarutni ram songi watang tesangwul vepnan keru i riaknan hinak ah rat kanmis ini. 44Mulngan dalmani niah rat kani bered nong, ba tei ni tevata vakalim.
Jisas tehural li teh
45Tei vilbwaleh, ba Jisas mweleli non tarutni ram sip li aga, bi ram dok nemban bawo ut ah rat tehu i Betsaeda, almaun teh. Limalen goah ratemlu ba Jisas mosobotwot i tarutni. 46Tei limalen goah telngi non tarutni, bi mwesak li rep nuhu nema dangro. 47Tei utebwarek, ba aga i non tarutni rat van ling nong ba tetpo rado ngama loloknan teh. Jisas tedi rada ngama ut. 48Tekita goah non tarutni ba ratti le illan, tokol, rat vilis dopmi ba tebu, gonani rowon leng tei tetkol basla. Tei alibe le masen to kajil bi to telapaleh ba muhural mapma bee li teh. 49Entorah rat kita goah tehural mapma bee li teh ba ratgam bihni nuhu tei ni loah, bi ram ngaa. 50Gonani entorah rat kita, ba rat temtaji tokol. Jisas modoptop mini ni bep nuhu, “Rongnan nokomi nemba kapmaan, kan bamtajian gonani nana nge.” 51Mwegala vali aga bi mwesak bee, tei vilbwaleh ba leng mut. Non tarutni rat temtaji bi rat tetkoh but ini. 52Rat baililngite mwatwen bered, nga gonani buju tei tetkol basla.
Jisas tevamwesa goah rat ras li vini ah Genesaret
53Rat van rotvi teh bi ram mapma li vini ah Genesaret, ut ah rat woji bata aga iginan. 54Entorah rat vaut dini aga, bi ram sak ut, entorah rat sak ba tarutni rat gitdihi Jisas vilbwaleh. 55Bi ram rop ban li vinini ah iginan, bi ram apko goah rat ras mapma li kabwali ben Jisas ut ah rat rongo ut ah tedi iginan. 56Ut ibenan ah Jisas tevan iginan, li biribiri vinini, bi li vinini ah kawu, bi mapma lekona. Ba tarutni rat apko goah rat ras mapma ut ah ti utnen maket, bi ram uhleli ini nuhu nema leli ba rasanni rama dibwiri mwatwen bwelan. Bi go sera ah rat tibwiri ba rat mas.
ที่ได้เลือกล่าสุด:
Mak 6: APMA
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Published by the Bible Society of the South Pacific in 1977.
