Jon 6
6
Jisas te vangni tarutni tevata vakalim
1Tei limalen ba Jisas ban rotvi selngan ut Galili. Io tahkin ut Taebirias. 2Tarutmumu rat tahkuru gonani rat kita illnan rowok tegol ah te leli, niah tevamesa goah rat ras. 3Jisas mwe sak mwe sadok li rep mini non tarutni. 4Taron kanleut nan Pasova non Jiusni ba tedi bwelwel. 5Jisas tegam git mapmapma ba mwi gita tarutmumu ah ram mapma. Bep mini Pilip nuhu, “Tan gele hinak ibeh niah man dokoi tarut ahe?” 6Tei tega vep nge nuhu nema kit dopmi Pilip, ba teililngi apma masi niah bat leli. 7Pilip balu ini bep nuhu, “Masen ah tabat kele hinak i dola tewudelu vakaru, ba bat ba dokoi tarutni nge ahe.” 8Datngin non tarutni, Andru niah kisan Saemon Pita, bep nuhu, 9“Aji malgel ngei mwidi ah, mwe gavin kan bered biribiri kalim, bi ik nuju karu, ba man dokoi apma masen bwera tarutni ahe.” 10Ut iginan ba tei le ruvilih, bi Jisas bep mini non tarutni nuhu, “Karu vep mini tarutni nuhu ra sadok tavan.” Ram sadok tavan, tei mulngan dalmani nong ba tei ni tevata vakalim rat wulki dalmani nante. 11Jisas mali bered bi bavatla God uru, bi maskani mini tarutni niah rat sadok tavan. Mwelel mwetani tapmak mini ik niah tei bwera karu. Tarutni nong rat kani, ba rat kubu sera. 12Entorah ni sera rat gubu, bi Jisas bep mini non tarutni nuhu, “Karu apko mapmaisan hinak, apma bwaleh man ba godo tean.” 13Rat songni watang tesngwul vepnan karu i riaknan bered niah tei maisa kalim niah tarutni rat kani.
14Tarutni sera ah rat kita ililnan rowok tegol ah teleli ba rat tetkoh togol ini, ra bep sera nuhu, “Mwetaknga na ngate nagoah bi ni Ajinan Dalen God niah tatwovani goah bat sipma li uruu.” 15Jisas teililngi nuhu tarutni nong rat ba gamupma neli bi ra batjuru i no subu, entorah bat ti rada bee. Mamlu dini ni bi nwe sak li rep nihken.
Jisas te hural li teh
16Tei ut tebwarek ba non tarutni ram sip le sileng. 17Rat sip li aga bi ramul rotvi teh, boswos i ut Kapaneam. Ut tei tebungte ba Jisas tei tebadopma nga bee. 18Tei le to nong ba bwera leng mamlu bi mwe leli teh mwegapkawu. 19Tarut non Jisas rat viliste ban, nawutnan ba tei sasari mael kajil io mael kavet. Rat gam git ba ram gita goah Jisas mu hural mapma be lin teh sasari aga. Rat temtaji bos ini. 20Jisas bep mini ni nuhu, “Kan bamtaji tean. Nana nge.” 21Ram mali Jisas vali aga. Tei bwaleh ba ra bupngak ut ah rat van uru.
Tarutni rat tongvi Jisas
22Tei matjubung nan ba tarutni rat gita goah tei aga bwaleh nge tegamudi. Bi rat teililngi goah Jisas ba teba van tenga jukun non tarutni, ba rat van nge dini. 23Datngin aga at Taebirias ratmu sama ut dobo iginan ut ah Subu Jisas te vavatla God u bered iginan niah tarutni rat kani. 24Entorah tarutni nong rat kita goah Jisas mini non tarutni rat bulongte iginan bi ram mali datngin aga bi ra ban Kapaneam nedongvi.
Jisas bibi hinkan masradaan
25Tarutni rat gam ban almaun teh ba ra butdihi, bi ra bep mini, “Sesesrakan, kot tepma nangih dogah?” 26Jisas balu ini bep nuhu, “Mwetaknga lelet nam bep mini gimi kam dongvi nana nge u hinak ah kat kani, ba kat ba donvite nana nge u ililnan rowok tegol niah nat leli. 27Kaba uman u hinak ah monok nge, ba kama um u hinak niah mwi di mulngan tebu. Hinak nanong ba nana niah nambi Nujun Aji nam maskani mini gimi. Gonani God niah Tadat te skani ililnan leut mini nana.” 28Ram uhleli ini nuhu, “Manei apma ah kaman leli, niah man leli uman non God?” 29Jisas balu ini bep nuhu, “Apma naah niah God modoni nuhu kan leli, karu vihni mwetaknga nak niah tesro nana.” 30Rabep mini nuhu, “Ililnan rowok tegol apma niah kon leli niah kaman gita bi nem bihni mwetaknga nam? Manei apma ah kaman leli? 31Jibima ni, entorah rat van nedok li vini tebu, ba rat kani hinak at mere. Tapmak goah matpo le ululan at mwate, niah te vep nuhu, ‘God te skani bered at mere mini ni niah rat kani.’ ” 32Jisas balu ini bep nuhu, “Mwetaknga letlet nam bep mini gimi. Apma ah Moses te skani mini gimi, ba tei tebaite hinak at mere le bini nga, ba bi Tadat niah masakani mamjin bered at mere le bini mini gimi. 33Gonani bered niah God maskani, ba naah niah aji ah tesipma mere bi aji nanong ba maskani masan mini tarut at li uruu.” 34Ram uhleli nuhu, “Subu, ko skak ras i bered nanong mini gema.” 35Jisas bep mini ni nuhu, “Nana naah nambi hinkan masan, aji ah man nepma bek ba ma man ba kaji nga, bi aji ah man bihni mwetaknga nak ba man bam mumdi nga.
36“Nam bep mini gimi nuhu, kat kita nana nanong ba kat ba vihni mwetaknga nak nga. 37Go sera ah Tadat maskani ni mini nana ba nan ba varik ni nga, bi nan na varik go nga ah ran nepma bek. 38Nat ba soran tenga nuhu nan lelte nok tonian goma, ba nat soran nuhu nan leli tonian non aji ah tesro nana. 39Tonian non aji ah tesro nana ba naah modoni nuhu goah maskani ni mini nana ba nam bat ba vaslatean bwaleh. Nambat vamwesa bamula ni vale masan le noknan ren. 40Tonian non Tadat ba modoni nuhu go sera niah ram gita nana niah nambi Nujun bi ra bihni mwetaknga nak, ba ran mas i masradaan, bi nan bamwesa bamula ni le nokon ren.”
41Lelen Jiusni tekakat i Jisas u gonani tega vep nuhu, “Nana ba nambi bered niah te sipma mere.” 42Ra bep nuhu, “Jisas ahe ba tegai nujun Josep nge niah tam maililngi. Tam maililngi teman nuru dajin. Nan nga ba mwega bep nuhu te sipma mere le bini?” 43Jisas bep nuhu, “Karu di ronga lelemi nemba kakat an i aji go. 44Aji man baililngi go nga ah man nepmabek, nanate ah Tadat niah tesra nana, man nesro mapmabek. Bi nan vamwesa bamula vale masan le noknan ren. 45Ajinan dalen God rat teulu nuhu, ‘God mwe sesra aji sera.’ Bi go sera ah ram rongo Tadat bi ram huru apma ah bep, ba ram mapma bek. 46Kan ba lepte vihnihan an nuhu aji tekita Tadat, gonani nana nante niah nat sipma ben God niah nat kita Tadat.
47“Mwetaknga letlet nam bep mini gimi, aji ah bihni mwetaknga, ba man mas i masradaan. 48Nana nambi hinkan masan. 49Jibimi niah rat kani hinak at mere dobo li vini tebu ba rat mat sera. 50Majin hinak ah te sipma mere ba nah aji nan ah man gani ba man ba mat nga. 51Nana nambi bered ah te sipma mere bi aji ah man gani bered nanong ba man mas i masradaan. Bered niah nan neskani mini aji nanong ba naah niah mamjik, niah nam maskani nuhu man neskani masan mini.”
52Vehuran nong ba te vawora lelekakat kawu tokol mini Jiusni. Ra bep nuhu, “Aji ahe man neskak gavak i mamjin mini kidi niah tan gani?” 53Jisas bep mini ni nuhu, “Mwetaknga letlet nam bep mini gimi, tigoah kan ba kante mamjik nga niah nambi Nujun Aji, bi kan ba minte danak nga ba masan tebulong le gimi. 54Aji nan ah man gani mamjik bi mamni danak ba man mas i masradaan, bi nan bamwesa bamula vale masan le noknan ren. 55Mamjin hinak ba naah mamjik bi majin minan ba naah danak. 56Aji nan ah mwe gani mamjik bi mamni danak ba man dok le nana, bi nana nan dok lelen. 57Nana nam mas tapmak goah Tadat niah tesro, nana mas. Aji ah man gani mamjik ba mas tekeni goah nam mas. 58Bered naahe niah te sipma mere, teba kente go nga ah jibimini rat kani, niah entorah rat kani ba rat mao nge limalen. Ba aji ah man gani bered goah ba man mas i masan niah mulngan tebulong.” 59Jisas te vep leut ni nong entorah te sesesrak le valin tangroan Kapaneam.
Dalen masradaan
60Sesnan non tarutni rat rongo apma ah te vep, bi ra bep nuhu, “Non Sesesrakan tetkol basla itan ah maililngi mwatwen?” 61Rat ba vep tenga mini, ba Jisas teililngi goah rognan nokon non tarutni tekapma i vehuran ah te vep. Bep mini ni nuhu, “Gavak nam bihni nuhu ronganan nokomi mwe gapma i vehuran ahe? 62Bat tei nomi vihnian ah nimbeh, tigoah ka bat kita goah nana niah nambi Nujun Aji nam bat samul mere ut ah nat tok bawo iginan? 63Apma ah maskani masan ba bi tabite kokon, bi mamjikte ba ba tokoinan tebulong. Vehuran ah nat vep mini gimi, ba bi tabite kokon bi maskani masan. 64Nan nga ba datngimi rat ba vihni mwetaknga nga.” Jisas tei teililngi nge le vawonan na goah ra bat ba vihnite mwetaknga nge bi temuililngi aji ah bat wos ini. 65Mumu bep nuhu, “Bujun naahe nagoah nat vep mini gimi, nuhu aji man bapma tenga bek ba go nante ah Tadat man nesro ni mapma bek.”
66Vehuran nong te leli ba datngin non tarutni ram dabwikil gonani rabat bamu ban nag junkun. 67Jisas bep mini non tarutni ah ni tesangwul vepnan karu nuhu, “Gavak u gimi, kamu doni nuhu kam mamu van dini nana?” 68Saemon Pita balu bep nuhu, “Subu, kaman ban ibeh, gonani kik nante ah kom mabuhu dalen masradaan. 69Bi nanong ba ka bihni mwetaknga nam, bi kam maililngi nuhu kik nante niah kobi Aji Sanbak non God.” 70Jisas balu ini bep nuhu, “Tei nana ah nat kit ulu gimi ah tesangwul vepnan karu, ba nan nga ba loah mwidi le aji rei gimi.” 71Tei te doptop nokon Judas niah tei njun Saemon Iskariot. Gonani Judas ba tei datngin go nge, ah ni tesangwul vepnan karu, nan nga ba tei ni nae niah tega wos i Jisas.
ที่ได้เลือกล่าสุด:
Jon 6: APMA
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Published by the Bible Society of the South Pacific in 1977.
