Иоанн 9

Түрэхэһөө һохор хүниие Иисүүс эдэгээбэ

1Энэ ушарай дараа Иисүүс ябажа ябатараа түрэхэһөө һохор хүниие хараба.

2– Багша аа, энэ хүн яахадаа һохор түрөө гээшэб? Хэниинь нүгэл хэһэн байгааб: энэ өөрөө гү, али энээнэй эхэ эсэгэнь гү? – гэжэ Тэрэнэй шабинарынь һураба.

3– Энэ хүн өөрөөшье, эхэ эсэгэньшье нүгэл хээгүй, – гэжэ Иисүүс харюусаба. Тиин үргэлжэлүүлэн:

– Тэрээнэй аргалуулһан ябадалаар Бурханай хаба хүсэ элирхэйлэгдэхын тула тэрэ һохор байгаа. 4Намайе эльгээһэн Эсэгын хэрэгүүдые үдэр байхада бүтээхэ ёһотойбди. Мэнэ гэһээр һүни болохоёо байна, харанхыда хэншье юумэ хэжэ шадахагүй. 5Дэлхэй дээрэ байха сагтаа Би энэ дэлхэйн гэрэл туяань гээшэб.

6Иигэжэ хэлээд, Иисүүс газарта нёлбобо. Нёлбоһоо шоройтой худхажа, тэрэ шабараараа һохор хүнэй нюдые түрхибэ.

7– Иигээд Шилоам сөөрэмдэ ошожо нюураа угаа, – гэжэ Иисүүс тэрэ һохор хүндэ хэлэбэ (Шилоам гэжэ үгэ «Эльгээгдэһэн» гэһэн удхатай).

Һохор хүниинь ошожо нюураа угаагаад, юумэ харадаг болоод, ерэбэ. 8Хүршэнэрынь, юумэ ходо гуйраншалжа һуухыень харадаг зон:

– Энэл хүн юумэ бадаржа һуудаг бэшэ һэн гү? – гэлсэбэ.

9– Тиимэл даа, тэрэл хүн, – гэжэ нүгөө зариманиинь харюусаба.

– Бэшэ, энэмнай миин лэ тэрээндэ адли хүн байна, – гэжэ үшөө нүгөөдүүлынь буруушааба.

– Үнэхөөрөө энэ би байнаб, – гэжэ тэрэ хүниинь хэлэбэ.

10– Теэд ши яагаад харадаг болоо гээшэбши? – гэжэ тэдэ хүнүүд урдаһаань һураба.

11– Иисүүс гэжэ нэрэтэй нэгэ хүн шабар худхажа, тэрэ шабараараа нюдыемни түрхеэд, «Шилоамда ошожо нюураа угаа» гээ. Би тиихэдэнь тэндэ ошожо нюураа угаагаад, юумэ харадаг болооб, – гэбэ.

12– Тэрэ хүн хаанаб? – гэжэ тэдэнь асууба.

– Би мэдэнэгүйб, – гэжэ аргалуулһан хүн харюусаба.

13Урдань һохор байһан тэрэ хүниие фарисейнүүдтэ асарба. 14Иисүүс амаралтын субботын үдэр шоройгоор шабар худхажа, тэрэ шабараараа һохор хүниие аргалһан байгаа. 15Хайшан гээд юумэ харадаг болоош гэжэ фарисейнүүд тэрээнһээ баһа асуужа оробо.

– Тэрэ хүн нюдыемни шабараар шабаа, би нюураа угаагаад, мүнөө юумэ харанаб, – гэжэ аргалуулһан хүниинь харюусаба.

16– Энэ хүн Бурханһаа заяагдаһан байха ёһогүй, юундэб гэбэл, субботые тооногүй, – гэжэ зарим фарисейнүүд мэдүүлбэ.

– Теэд нүгэлтэн һаа, энэ хүн иимэ гайхамшаг хэрэгүүдые бүтээхэ һэн гү? – гэжэ нүгөө зариманиинь буруушааба.

Тиин фарисейнүүд өөһэд хоорондоо арсалдан хубааралдаба. 17Аргалуулһан хүнһөө тэдэ дахин һураба:

– Тэрэ шамайе харадаг болгоо. Юун гэжэ Тэрээн тухай һананабши?

– Лүндэншэ гэжэ һананаб, – гэжэ нүгөөдынь харюусаба.

18Еврейнүүдэй ахамадууд һохор хүн харадаг болобо гэжэ юрэдөө этигэбэгүй. Тиигээд тэдэ юумэ харадаг болоһон хүнэй эхэ эсэгые ерүүлжэ, 19– Энэ танай хүбүүн түрэлэй һохор гэнэт. Теэд мүнөө хүбүүнтнай хайшан гээд юумэ харадаг болооб? – гэжэ асууба.

20-21– Энэ манай хүбүүн һохор түрэһэн юм. Теэд хайшан гээд харадаг болооб, хэн энээнииемнай хараатай болгооб гэжэ бидэ мэдэнэгүйбди. Өөрһөөнь һурагты. Хүбүүмнай наһаяа хүсөө, өөрөө хэлэжэ шадаха, – гэжэ эхэ эсэгэ хоёрынь харюусаба.

22Хүбүүнэй түрэлхидынь юундэ тиигэжэ харюусааб гэбэл, еврейнүүдэй ахамадуудһаа айгаа. Ушарынь хэлэбэл, Иисүүсые Бурханай табисуурта гэжэ тоолодог хүн бүхэниие мүргэлэй гэртэ оруулхагүй гэһэн шиидхэбэри тэдэ ахамадууд гаргаад байгаа. 23Тиимэһээ: «Хүбүүмнай наһаа хүсөө, өөрһөөнь һурагты», – гэжэ түрэлхидынь хэлэһэн байна.

24Тиин һохор түрэһэн хүниие хоёрдохиёо дуудажа асараад:

– Үнэн сэхэ руунь хэлэхэб гэжэ ши Бурханда тангаригаа үгэ! Манай мэдэһээр, Тэрэтнай нүгэлтэн, – гэжэ еврейнүүдэй ахамадууд хэлэбэ.

25– Нүгэлтэн юм гү, али үгы гү – мэдэнэгүйб. Харин би һохор байһанаа мүнөө харадаг болооб гэжэл мэдэнэб, – гээд тэрэнь харюусаба.

26– Тэрэ хүн шамда юу хээб? Хайшан гээд шамайе харадаг болгооб, – гэжэ дахин тэдэ һураба.

27– Би таанарта хэлээ һэнби, теэд таанар шагнаагүйлта. Яагаад дахин намаар хэлүүлхэеэ һананабта? Магад, Тэрэнэй шабинарынь болохо һанаатай байна гүт? – гэжэ тэрэнь харюусаба.

28– Ши Тэрэнэй шабинь байнаш! Харин бидэ Моисейн шабинар гээшэбди! – гэжэ еврейнүүдэй ахамадууд бадашаба.

29– Бурхан болбол Моисейтэй хөөрэлдэдэг байһан гэжэ бидэ мэдэнэбди. Харин Энэ хүн хаанаһаа бии болооб гэжэ мэдэнэгүйбди.

30– Ямар жэгтэй юм гээшэб! Тэрэнэй хаанаһаа ерэһые таанар мэдэнэгүйлта, харин Тэрэ хүн намайе юумэ харадаг болгоол, – гэжэ аргалуулһан хүниинь харюусан, саашань үргэлжэлүүлбэ:

31– Теэд Бурхан нүгэлтэнэй хэлэһые дууладаггүй, харин Бурханиие хүндэлдэг, дура хүсэлыень бэелүүлдэг хүнүүдые дууладаг гэжэ бидэ мэдэнэбди. 32Һохор түрэһэн хүниие харадаг болгоо гэжэ эртэ урданһаашье нааша дуулдаагүй. 33Хэрбээ Тэрэ хүн Бурханһаа заяагдаагүй һаа, иимэ юумэ хэжэ шадахагүй һэн!

34Тиихэдэнь еврейнүүдэй ахамадууд:

– Ши түрэхынгөө нүгэлтэй аад, маанадые һургаха һанаатай гүш, – гэжэ тэрэ хүниие хараагаад, мүргэлэй гэрһээ намнажархиба.

35Аргалуулһан хүниие намнаба гэжэ дуулаад, Иисүүс тэрэниие бэдэржэ олоод:

– Ши Хүн түрэлхитэнэй Хүбүүндэ этигэнэ гүш? – гэжэ асууба.

36– Эзэн аа, этигэхым тула Тэрэ хэн гээшэб гэжэ намда хэлыт даа, – гээд аргалуулһан хүниинь харюусаба.

37– Ши Тэрээниие харааш. Тэрэ хүн мүнөө шамтай хөөрэлдэнэ, – гэбэ Иисүүс.

38– Эзэн аа, этигэнэб! – гэжэ тэрэнь харюусаад, Иисүүсэй урда үбдэглэн һүгэдэбэ.

39– Зарга шүүбэри хэхэеэ Би энэ дэлхэйдэ ерээб. Тиихэдээ юумэ харадаггүй хүнүүд харадаг болохо, юумэ харадаг хүнүүд һохор болохо, – гэжэ Иисүүс хэлэбэ.

40Иисүүсэй хажууда байһан фарисейнүүд:

– Теэд Та бидэниие һохор гэжэ тоолоногүй бэзэт? – гэжэ асууба.

41– Үнэхөөрөө һохор байгаа һаа, таанар зэмэгүй байха һэнта. Теэд таанар юумэ харанабди гэнэт. Иимэ ушарһаа таанар зэмэтэй зандаа үлэнэт, – гэжэ Иисүүс харюусаба.

ที่ได้เลือกล่าสุด:

Иоанн 9: BurBBL2024

เน้นข้อความ

แบ่งปัน

คัดลอก