Иоанн 10

Иисүүс шударгуу һайн адуулагша

1– Хониной хорёодо үүдээрнь оронгүй, ондоо тээгүүр шурган ородог хүн хадаа хулгайшан, дээрмэшэн гээшэ гэжэ үнэниие таанарта хэлэнэб. 2Үүдээрнь ородог хүн хонин һүрэгэй адуулагшань мүн. 3Харуулшан тэрээндэ хониной байрын үүдэ нээжэ үгэдэг. Хонидынь тэрэнэйнгээ дууень дууладаг, адуулагшань хонидоо нэрэ нэрээрнь дуудаад, газаашань гаргадаг. 4Хонидоо бултыень байраһаань гаргаад, хонишон хонидойнгоо урда ябадаг, харин хонидынь хонишоноо дуугаарнь танижа, хойноһоонь дахадаг. 5Ондоо хүнэй хойноһоо хонидынь дахахагүй, тэрэ хүнһөө зугадажа арилшадаг, юундэб гэхэдэ, ондоо хүнэй дууниинь танигданагүй бшуу.

6Иимэ һургаалта үгэнүүдые Иисүүс фарисейнүүдэй урдаһаа хэлэбэ, теэд тэдэнь ойлгобогүй.

7Иисүүс үргэлжэлүүлбэ:

– Таанарта үнэн зүбые хэлэнэб: хонидой байрын үүдэ гээшэнь Биб. 8Намһаа түрүүн ерээшэд бултадаа хулгайшад, дээрмэшэд байгаа. Теэд хонид тэдэнэй үгэ дуулаагүй. 9Үүдэ гээшэнь Биб. Хэн энэ үүдээр ороноб, тэрэ хүн абарагдаха. Тэрэ хүн үүдээр орожо, һүүлдэ газаашаа гараад, өөрынгөө бэлшээри олохо. 10Харин хулгайшан гансал хулуухаяа, алахаяа, һандаргаха хюдахаяа ерэдэг. Харин би хүнүүдэй амидархын тула, тэрээнһээ гадна, хүнүүдэй юрын амидаралһаа үлүү амидаралда хүртэхынь тула эндэ ерээб.

11Би шударгуу һайн адуулагшаб, шударгуу һайн адуулагшань хонидоо абархын тула ами наһаяа үгэдэг. 12Харин хүлһэншэн хадаа хони адуулагша бэшэ, тэдэ хонид тэрэнэй бэшэ. Тиимэһээ хүлһэншэн хонидтонь орохоёо ябаһан шонын дүтэлжэ байхые харахадаа, хонидоо орхёод зугададаг. Тиихэдэнь шоно хонидыень бариха, хонид иишэ тиишээ гүйлдэжэ тараха. 13Тэрэ хүн хони адуулагша бэшэ, харин хүлһэншэн гээшэ, тиимэһээ хонидто һанаагаа зобоногүй. 14Би хадаа шударгуу һайн адуулагшаб. Би Өөрын хонидые мэдэдэгби, Минии хонидшье Намайгаа мэдэдэг. 15Эсэгэмни Намайгаа мэдэдэгтэл адли, Бишье Эсэгэеэ мэдэдэгби. Би Өөрын хонидой түлөө ами наһаяа үгэнэб. 16Энэ хорёо соохи хонидһоо гадна, мүн ондоошье хонид Намда бии. Тэдэниие Би баһа иишэнь асарха ёһотойб. Тэдэ хонид Минии үгэ дуулаха, тиихэдээ нэгэл һүрэг хонид байха, нэгэл хонишон байха!

17Дахин амидырхынгаа тула Би ами наһаяа үгэхэб, тиимэһээ Эсэгэмни Намда дуратай юм. 18Минии ами наһые хэншье хороохогүй, харин Би Өөрөө ами наһаяа үгэхэб. Би ами наһаяа үгэхэ эрхэтэйб, Би ами наһаяа һөөргэнь абаха эрхэ засагтайб. Эсэгэмни Намда тиигэжэ захяа юм.

19Иигэжэ хэлэхэдэнь, еврейнүүд хоорондоо дахин асатаба.

20– Энэтнай досоогоо ада шүдхэртэй болоод, дэмыржэ байна. Таанар Энээниие юундэ шагнанабта? – гэжэ олониинь хэлэбэ.

21– Энэ досоогоо ада шүдхэртэй хүнэй үгэнүүд бэшэ. Ада шүдхэр һохор хүнүүдые харадаг болгожо шадаха һэн аал? – гээд нүгөөдүүлынь буруушааба.

«Эсэгэ бидэ хоёр нэгэбди»

22Үбэл ерээ. Һүмэ Шэнэлэлгын һайндэр Иерусалимда тэмдэглэжэ байба. 23Һүмын хорёодо Соломооной бахананууд гэгдэдэг һарабшатай газарта Иисүүс сэнгэжэ ябаа. 24Тэрэниие тойроод еврейнүүд сугларжа:

– Та хэды болотор бидэнэй тэсэбэри туршаха һанаатайбта? Хэрбээ Та Бурханай табисуурта һаа, манда сэхэ хэлыт, – гэлдэбэ.

25– Би таанарта хэлээ һэм, теэд таанар Намда этигэнэгүйт. Эсэгынгээ нэрэһээ Минии бэелүүлдэг хэрэгүүд Минии гэршэ болоно. 26Теэд таанар Намда этигэнэгүйт, таанар Минии хонид бэшэ ха юмта. 27Минии хонид үгыемни дууладаг, Бишье тэдэнээ мэдэхэб, тэдэмни Минии хойноһоо дахажа ябана. 28Би тэдэндэ мүнхэ наһа үгэнэб, тэдэ хэзээшье хосорхогүй, тэдэниие Намһаа хэншье буляажа абахагүй. 29Тэдэниие Намда үгэһэн Эсэгэмни бултанһаа холо дээгүүр юм. Минии хонидые Эсэгэһээмни хэншье буляажа шадахагүй. 30Эсэгэ бидэ хоёр нэгэн хамтабди.

31Тиихэдэнь еврейнүүд Иисүүсые алаха гэжэ дахин шулуунуудые бариба.

32– Эсэгынгээ хүсөөр Би таанарта ехэ олон һайн юумэнүүдые харуулааб. Тэдэ юумэнүүдэймни алинайнь түлөө Намайе шулуудажа алаха һанаатайт? – гэжэ Иисүүс һураба.

33– Бидэ Таниие һайн юумэ хэһэнэйтнай түлөө бэшэ, харин Бурханиие доромжолһонойтнай түлөө шулуудажа алахабди! Та юрын хүн аад, Өөрыгөө Бурханби гэжэ айладханат.

34Иисүүс харюусаба:

– «Таанад – бурхад гээшэт гэжэ Би хэлээб», – гээд танай Хуули соо бэшээтэй бэшэ гү? 35Хэдүүдтэ Бурхан Өөрынгөө үгэ хэлээб, тэдые Хуулитнай бурханууд гэжэ нэрлэнэ, тиихэдэ Нангин Бэшэг соо худал юумэн байха ёһогүй. 36Харин Намайе Эсэгэмни Өөртөө зорюулан, энэ дэлхэйдэ эльгээгээ юм. Тиимэһээ «Би Бурханай Хүбүүнби» гэхэдэмни, «Та Бурханиие доромжолнот» гэжэ таанар Намда юундэ хэлэнэт?! 37Эсэгынгээ хэрэг Би бүтээнэ бэшэ гүб? Юундэ таанар Намда этигэнэгүйбта? 38Эсэгынгээ хэрэгүүдые бэелүүлжэ байха үедөө хэлэһэн үгэнүүдтэмни этигээгүй һаа, Минии бүтээдэг хэрэгүүдтэ этигэгты! Тиихэдээ Эсэгэмни Минии досоо байна, Би Эсэгынгээ досоо байнаб гэжэ таанар мэдэхэт, мэдэжэшье байхат.

39Еврейнүүд Иисүүсые дахин барихаяа һэдэбэ, зүгөөр Иисүүс тэдэндэ баригдабагүй.

40Тиигээд Иисүүс Иорданай нүгөө эрьедэ ошоо. Урдань тэрэ газарта Иоанн хүнүүдые уһаар арюудхаһан байна. Тэндэ Иисүүс ойро зуура тогтобо. 41Тэрээндэ олон зон ерэһэн байна.

– Иоанн нэгэшье гайхамшаг хэрэг бүтээгээгүй һэн, теэд Иисүүс тухай хэлэһэн бүхэниинь зүб байна, – гэлсэбэ. 42Тэндэ ерэһэн олон хүнүүд Иисүүстэ этигэбэ.

ที่ได้เลือกล่าสุด:

Иоанн 10: BurBBL2024

เน้นข้อความ

แบ่งปัน

คัดลอก