Wenía 23
23
Sara vopiti ivo yoã
1Askái aatiã Sara 127 vari tsaósho, 2Canaã mai naki Hebrom shavánamãsho yamati. Aaivo maĩ ane wetsaro Quiriate-Arba. Askái ãwẽ vopimaĩnõ, Abraão ãwẽ aĩmẽ ronai. 3Askávai ãwẽ yora shaká enevaĩi kaí, heteu yorarasĩnĩ vananõ iinã tachikaĩsho, 4“earo matopamarívi askámẽkĩ mai kashke wetsa ea inãna, anõ ẽ aĩ ẽ roa anõ”, ãwẽ imaĩnõ, 5anõ eséyakĩ revívo. 6“Ase neská nĩkãtso, miaro nõ oĩtana Yové Koĩni yorarvi. Askásho, arí, mĩ aĩ roa arí, roapanamã, ‘ano mĩ aĩ aská aroa’, mia noke akátĩpa”, akávo.
7Atõ aská akatõsho, ato veyó maikiri vetĩ ipai kaí. 8Askávai vanaói. “Ase, ‘mĩ aĩ neno roa arí’, iinãro Efrom Zoarnẽ vake ea mato nĩkãshoatĩpará? 9Shasho pepi ãwẽnáse ẽ viãkãnõ. Naa Macpela mai kesoanamã ea ave inãnõ, anõ yora oneti. Aatishõ akĩkase ẽ kopímakatsai”, ikí vanai.
10Ãwẽ askámaĩnõ, Efrom cidade kepoti orakama atonĩ tsaósho, vanainái, aaparasĩni nĩkãne. 11“Mã ase, aská akáma mia akátĩpa, nĩkãtso. Mai, shasho pepi aká mia ẽ inãnõ, ẽ avé shaváyavorasĩni nĩkãne, mĩ aĩ anõ onenoshõ”, akĩ.
12Ãwẽ aská nĩkãinã, atõ kãtxía veyó maikiri vetĩ ipaovaíki 13Efrom tanamakĩ, ashkãsho atõ nĩkãne. “Askáma neskáinã ẽ ikí, eãro mia kopímashõ mia ẽ viãkãkatsikírvi. ‘Aatishõ’ ea arí, mia kopímanõ. Aská akĩ vivaikĩro anõ ẽ aĩ ẽ roa atãnõ”, akĩ.
14Ãwẽ askámaĩnõ, Efromne revíki. 15“Mã ase naatishõ nĩkãtso mairo, 400 prata, askámẽkĩ ichnárvi, roa atã mĩ aĩ”, akĩ.
16Anosho Abraão, Efromnĩ askái vanã mekikinanãvaíki aatishõ akĩ ãwẽ ewe tanáshokĩ, ashkãsho atõ nĩkãne. Aaivo ewe tanáa askásevi, aatiã awe viananãa ivo keskái ãwẽ ikí. 17Aská akĩ Efromne mai Macpelanamã ãwẽnakéi. Mai, shasho pepi, niirasĩ aká õsiki viãkãki, Manre mainamã orakama. 18Askái heteu yorarasĩ ano cidade kepotinamã kãtxívarãsho atõ vana ashkãsho nĩkãvo. 19Askáki Abraãone ãwẽ aĩ ano roa akĩ, Hebrom shavá orakama, Canaã mai naki. 20Askáti, heteu yorarasĩni mai, shasho pepi aká Abraãonakéi.
ที่ได้เลือกล่าสุด:
Wenía 23: YKV
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Active: © Wycliffe Bible Translators, Inc. All rights reserved
