Nuk 16
16
Nɛgana atub ɛwɨgha wɨgha mɔanjo
1Jisɛs atɔ ɛkan ɛjɛ si Ɛfɨŋa nnɛ ɛjɔnɔ ji ɛbɛnɛ mɔanjo yɔ yɛ anɔŋɔ si abába nsɔn akɛɛ. Ánɛ atɔrɔ atɔ nsɛnjo si yɛ ára amana nsɔn yi akɛɛ si ababa. 2Ɛnem Nsɛnjo abiŋɛ abɔmɔ si, “Nda yɔghɔ naŋ nna ntuba? Kɛm mfan ka nsɔn kprɔb yi nkɛa nɛyɔ si ɔbaba atubsi wan ndɛɛ kpɛ sɛb si ɔbaba nsɔn ɛyiŋa.”
3“Mɔanjo nyɔ ajam nɛtere ji ane si, ‘Nɛmaŋ yi nsɔjɨŋa njo akpimɛ tába nɛtom ka ŋga mkpem nɛyɔ ni nneé nkora nɛtom, ka mbibɔɔ afɨnem nnsɔn. 4Mmi gbɛrɛ ji nnee kasɔŋ nden yi amɛm na yighi ka nɛtom, anɛ ba akpe nsɔjiŋa njo abibɔ akɔghɔm ka ɛtiŋi nnɛ mmu na nɛreb ka bɛjo abɔɔ.’
5“Ka abiŋ nennɛ yɔku yɔ akpe nsɛnjo mbɔɔ. Ábɔmɔ mgbɔghamba, ‘Ɔkpe nsɔjiŋa mbɔɔ ka jɛɛ?’
6“ ‘Mmɛ mkpeɛ mbɔɔ akua onif ka atan arɔn,’ nnɛa mbɔɔ ákpɛɛ.
“Mbaaba nsɔn átɔɛ, ‘Kɔ mfan ɛya, jɔn ji frifri, ɛnyɔ ji ɔyɛnɛ ɛgɔr bibaa, kak si atan abaa ka wobo.’
7“Abɔmɔ ɛkpɛtɔŋɔ nnɛa mbɔɔ, ‘Wɔ ma?’
“ ‘Nsaŋa arasi ɛgɔr bɛrɔn, yɛ akpɛɛ.’ Mbába nsɔn átɔɛ, ‘Kɔ mfan ɛya, ɔyɛnɛ ɛgɔr bɛnɛ.’
8“Nsɛnjo akar Mbaaba nsɔn nyɔ ka edere anɛ ka ɛwak ɛbɛ. Átubsi, anɛ ba ɛyiŋ anyi ka asiŋi ka nɛgana anɛ abɔɔ aga ka abɔɔ ba ɛfɔŋɔ ara ne. 9Ka ntɔɔ war si, ba kɔ áfaŋ ɛyiŋ war ɛkpa ka anɛ, kasɔŋ nden yi ɔrɛ kpɛben afaŋ, anɛ ajɔnɔ ba akpera ka nɛwɛmɛ nɛwɛmɛ.
10“Nnɛ yɔku yɔ ama abaaba ntitɔŋ ɛjom ji ákɛɛ si afɨne átɨma akɛɛ atakpa nsɔn si afɨne, ka nnɛ yɔ arɛ ma afɨne ntitɔŋ ɛjom ji akiɛ amam afɨne atakpa nsɔn. 11Ka ɔrɛna maa nɛfɨne afaŋ ɛyiŋ, yɛnnɛ atama nɛsighi abɔ ka atiŋi afaŋ ya nɛwɛmɛ nɛwɛmɛ akɛa? 12Ka ɔrɛna ma ɔfine nsɔn anɛ nnɔbɔnnɔbɔ, yɛnnɛ akɛa yi ya mfɔnɔ?
13“Mɔanjo yɔku arem yɔ amá arɔghɔ nsɛnjo bibaa ka nden ɛyi. Ɛwi atera asɨgha kasɔŋ yɔga akɔra, si ɔgaa bɛn nden ɔkɛɛ nnɛ ɛwi ɛru si ɔtɛnɛ yɔga. Ɔmam ɔrɔghɔ Ɛsɔwɔ ka akpugha ka nden ɛyi.”
14Ba Farasi yɔ akpugha afɨŋa abɔɔ ará yɔghɔ Jisɛs ka kpakpa nsɔn yi arɨgha. 15Jisɛs atɔ abɔɔ si, “War ba ɛrɛtɨŋɔ anɛ si nɛwɛmɛ ɛnɨrɛ ɛfɔfɔm, ka Ɛsɔwɔ anyinyi nkater ɛyɨrɛ. Nsɔn yi ɛrɛ kɔrɔ anɛ ba ɛyiŋ akɔ akɨno ka ntem ɛrɛm jiku ka amar Ɛsɔwɔ.
16“Tɛtɛ Jɔn aba, atona Jus akpine anɛ ba Jus si atɔɔŋɔ ɛjighi Mosis ka ji Asɔgba Ɛsɔwɔ ayɛnɛ. Jam ka nden nyi, ɛtiŋi ntɔrɔ Ɛsɔwɔ atub ɛton Ɛsɔwɔ ji nda rɨgha ɛmi nem anɛ kpakpa anyɔghɔ ka ɛtiŋitiŋi si anam. 17Ɛyiŋ ji bɛsɔ ka nsise ɛmikɛmɛ yi ɛtana ka nɛyɔ ɛjighi jiku ɛyaŋam.
18“Nnɛ yɔku yɔ atɛnɛ ŋkawɛ ama kɔ maŋka yɔntiŋi are ka ɛrubu, ka mannom yɔ akɔna maŋka yɔ ami ru nɛban are ka ɛrubu.”
Jisɛs arag atub ɛfɨŋa nnɛ ka Nasɔrɔs
19“Jisɛs atubu nɛgana si, ɛjɔnɔ ɛfaŋa nnɛ yɔ ara nebe nsɔn yi ɛkoro asɛ, afɨna anɛghɛ nekpen ɛfobiku biku. 20Ka ká mbunju ɛga ɛjɛ, ára nɔŋɔ mbua mbibɔɔ yɔ abɛnɛ arɔg ka bɛji yɔ ane si Nasɔrɔs, 21yɔ ɛrɛ fanɛ si atɨma anɛ arurughu ya aru agbɔ ka nden yi ɛfɨŋa nɛ akpɨna na nnɛ. Ɛwɔ titi ara ba ama nɨbɛ arɔg ayɛ.
22“Ɛrɛ gaa ka, mbua mbibɔɔ akpɔ ka bɛsɔna-ateb Ɛsɔwɔ asɔnɛ ama bom ka nkɔa Ebragham. Ɛfaŋa nnɛ atɨma kpɔ akɔɛ ama sam. 23Atubɛ akak ka mfoa nɛnumu bi ára nɔŋɔ ba nea abibia nsɔn amɨna kpɔ kasɔŋ ayɛ nɛyiri, ataba ámar ayɛ Ebragham ka ajik ka bɛsɔ ka Nasɔrɔs ka mgbaŋa ɛyɛ. 24Ka abeŋɛ, ‘Ntaa Ebragham, nɔŋɔ mkpɔa ɛsi, tom Nasɔrɔs si asɔŋ ɛsi nnyighibɔ ɛyɛ ka anab ama nara nɛnibi ɛnɨŋa atubsi nde ka nɛyiri nga ka ngon.’
25“Ebragham akpɛɛ si, ‘Mmɔ, gbɔntera anɔbɔa nsɔn yɔ ɔbɛnɛ ka nekpen ɛyiŋ, nden nyi Nasɔrɔs ára yɛ nɛyiri ka ɛkpak, ka maŋ áre ka ɛyɛbɛ netem ka nɨŋa, wɔ jɔn ga ka nɛyiri. 26Ka ɛkɨgha kan, mkpaŋa ngɔŋɔa nebe abaŋa war yi nnɛ yɔku arɨghɛ ma asiŋ aba ga na ka nnɛ árɛghɛ ma aruga asii mfa.’
27“Ɛfaŋa nnɛ akpɛɛ si ‘Ɛrena na, Ntaa mia gɔrɔ, tom Nasɔrɔs amu ama tɔ abɔa nnajɨŋa, 28si mkpe ɛkɨno bɛrɔn ji nnom. Nɔŋɔ yɛ ama abó abɔɔ nɛnɛ kasɔŋ abɔɔ árɛtam aba ka mfoa nɛyiri ni.’
29“Ka Ebragham atɔɛ si, ‘akɨno aya akpe ɛjighi Mosis ka nsɔn yi Asɔgba Ɛsɔwɔ ayɛnɛ; nɔŋɔ abɔɔ ayoŋo atɔŋ akɛɛ ji arɨgha.’
30“Na saŋ Ntaa Ebragham, ɛfɨŋa nnɛ akpɛ rak ‘Ka nnɛ yɔ ami kpɔkpɔ amu na ama tɔ abɔɔ, ayaŋa yaŋa nekpen.’
31“Ka Ebragham atɔɛ, ‘Ana yi árɛ yoŋo atɔŋ akɛ Mosis ka Asɔgba Ɛsɔwɔ, nnɛ yɔku arem yɔ ama akpeghe abɔɔ netem aragasi anyimi ka nɛku áma tɔ abɔɔ.’ ”
ที่ได้เลือกล่าสุด:
Nuk 16: NDD-011
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©️2024 Luke Initiative for Scripture Translation
