Nuk 14
14
Jisɛs ka njoa nnɛa Farasi
1Ka Ɛfo-Ɛsiayɔ ɛbii, atebe Jisɛs si amu ka njoa ntakpa nnɛ ka ɛbɔŋɔ ba Farasi ama nɛ ɛjonɛnɛghɛ, naŋga anɛ áre fa ára kporɛ. 2Nnɛ ɛwi yɔ atotó ajɔnɔ ka ɛsiamar ɛjɛ. 3Jisɛs abɔmɔ ba Farasi ka ba gbɛrɛ ajighi si, “Ɛrɛre ka ɛjighi kasɛ ɛrem nɛ ne bɛji ɛkoro nnɛ ka Ɛfo-Ɛsiayɔ bi ɛnɔŋɔ si ɛkak Ɛsɔwɔ?” 4Ka abɔɔ arɛ ma akpɛɛ. Ka Jisɛs agbɔɛ ɛjam, atabɛ ka ɛyaam, atɔɛ si sɔŋ kruu.
5Ka abɔmɔ abɔɔ, “Arena yi nnɛ yɔku ka ɛbɨŋɔ ɛja akpe mmɔa mfoŋ ya agbɔɔ anam ka nɛbe anab ka Ɛfo-Ɛsiayɔ, yɛ ɛyighim frifri?” 6Ka árɛ ma akpɛɛ jiku.
7Ɛsika áyɛɛ anɛ ba átebe ɛyighi ka ára saŋa afom ba agá nɔb nɛjɔnɔ anɛ ɛjonɛnɛghɛ, Jisɛs atub nɛgana nni atɔ abɔɔ: 8“Nnɛ ateba na nɛban, krɛ jɔn ka nji bi anɛ ba ɛsi ajɔnɔ, atubsi nkpɛnɛmɔŋɔ nnɛ arɨgha bɨgha yɔ ayɨrɛ agaa. 9Ka ɛjɔnɔ na na, mfɔnɔ ɛyighi yɔ atebe war anɛ abaaba, abɨgha ama tɔa si ‘Tam ete kɛɛ nɛɛ.’ Ɔrɔ tɨmɛ ka ɛnyɛɛ ɔmu ka nji ɛbɨŋɔ. 10Ka nden yi ateba na, jɔn ka nji bi anɛ Ba ŋga ajik kasɔŋ mfɔnɔ ɛyighi amɨna ba atɔa si ‘Nno, tam sɔŋ ka nnji abakogho.’ Nden nnyi yi ɔrɔ fɛnɛ nɛkɨgha ka ɛbɨŋɔ anɛ baga. 11Atubsi, nnɛ yɔ atába na bɛji asɨnɛ sɨnɛ, ka nnɛ yɔ asɨnɛ na bɛji atábɛ táb.”
12Ka Jisɛs atɔ nnɛ yɔ atebe ɛyighi, “Ɔkpɨna tebe anɛ ɛyighi, krɛ tebe atɛm ɛba, akɨno aya yanom si abakaa, abɔanaja si afaŋa anɛ ba áre akpera; onena na atɨma ateba ɛru si amia fɛrɛ. 13Ka ɔkpɛna yighi, tebe akpak, abɛnnɛ, ba ra jɔŋɔ ata, ba anaga amar, 14kasɔŋ wɔ bɛn nɛnɔbɔ. Ɛjɔ́nga si abɔɔ amam afɛra, Ɛsɔwɔ aganagan ka ɛfo bi ba nea anɔbɔa nsɔn anyimi ajɔn ka nekpen.”
Negana atub ntakpa ɛyighi
15Ɛsika nnɛ ɛwi ka ɛbɔŋɔ anɛ ba ajɔnɔ ka ɛte ɛjonɛnɛghɛ ka Jisɛs ayɔghɔ nna, atɔɛ, “Ɛnɔnɔb ka nnɛ yɔ anɛghɛ ka ɛyighi ji ɛton Ɛsɔwɔ.” 16Ka Jisɛs akpɛɛ: “Nnɛ ɛwi aboo si anem ntakpa ɛyighi ka atebe abembem anɛ 17Ka nden ɛyighi ji átom mɔanjo ɛwɛ si ama biŋ anɛba átebe si ‘Ba ba si ɛmi toŋɔ nsɔn ɛkan.’
18“Ka nɛnnɛ ára kɛɛ agbɨghaghɨgha ayɛ. Mgbɔghamba asi ‘Ngoó ɛgbɛ maŋ maŋ, mkpi mu ma mbri. Nnɨŋɔ ndɛ ba.’
19“Yɔga asi ‘Ngoó mfɔŋ ɛbaa ɛbaa ka nji ndɔn maŋ maŋ si ama bɔm ɛgbɛ, ka nda mughu si ma nyɛɛ ka ágara nɛbɨmɔ. Nnɨŋɔ ndɛ ba.’
20“Ɛwi atɔɛ nkɨbɛ nkɨbɛ si ‘Nkɔ maŋka maŋ maŋ, mmam ba.’
21“Mɔanjo ɛwɛ afɛnɛ ama tɔrɔ ji átɔɛ atɔɔ nsɛnjo. Ka mfɔna njo asak netem atɔ mɔanjo, ‘Sɔŋ frifri ka ɛno mbaa ka nna ɛjibɛ ɔma biŋ akpak, abɛnnɛ, ba anaga amar ka ba ɛjɔŋɔ ata.’
22“ ‘Ntaa,’ mmi nem ka ɔrɨgha si nnem, ‘ka ɛyigha ɛkpagha re ji anɛ ajɔnɔ nji.’
23“Ka nsɛnjo atɔ mɔanjo ɛwɛ, ‘Sɔŋ ka abaa ka ayɨgha ka ɛjɨbɛ wɔ ɔwɛrɛ abɔɔ si aba, kasɔŋ ɛyighi ɛjɨŋa ɛson. 24Yoŋo atɔŋ, nnɛ yɔku arem ka ɛbɔŋɔ anɛ ba ntebe na ka árɛ ba yɔ ayoŋo ɛjonɛnɛghɛ ɛjɨŋa.’ ”
Nɛyoŋo nɛjɔnɔ Ɛsɔgba Ɛsɔwɔ
25Ntakpa ɛkan ára jɛn ka Jisɛs, ɛsika amaŋá abri abɔɔ, árag si: 26Nnɛ yɔku yɔ arɨgha si atɔŋɔm ka árɛ̀ tan ntera nsɛ ka nnyɛɛ, nkawɛ ka abɔɔ bɛ, akɨno ayɛ bannom ka abakaa-aragasi nekpen ɛnɛ mfɔnɔ-amam ajɔn ka ɛkan ɛjɨŋa. 27Ka nnɛ yɔku yɔ arena tama nɛyiri ka nɛku amam atɔŋɔm ka ɛkan ɛjɨŋa.
28“Arena nnɛ ɛwi ka ɛbɨŋɔ ɛja asɛbɛ si asi ɛnyɔŋ, átɨghɔmɛ ajɔn ji agbɛrɛ akpugha ya animɛ kasɔŋ agbɛrɛ ɛrena yɛ amama asi njo nyi akan? 29Atubsi ɔjimɛ na atana njo ka ɔrɛkpɛma ɔkan ka yi, ɔjɔnɔ ka asɔn 30si, ‘Nnɛ nnyɔ anɔghɔ si asi njo ka árɛ maa.’
31“Árena yi nton akpi nɔk bɛta ka nton yintiŋi, agbɔghɔmba ajɔn anem nkater atub arena anɛ ɛbɛ ba áre ɛgɔr atan aba amama aga anɛ ba atu asi ɛgɔr atan anɛ ba ayim ka nton yiga? 32Arena yi arɛghɛ maa, atoó anɛ ama kɔŋɔ nton yiga ka nden yi bɛta ɛkɨgha jam ɛsika abɛnɛ nɛna. 33Ɛtɨmɛ ɛre kanakan na ka war bantiŋi ba ɛrɛ sɛb si ɛjom ɛtana war ɛmam ɛjɔn ka ɛkan ɛjɨŋa.
34“Akaŋ anɔnɔb, ka nɛyɛbɛ enɛ ɛrɛnakpɛjɔn, ane naŋ akpɛ njɔn akaŋ? 35Arɛkpɛ nɔb si akɔ awuru kasɔŋ nsise anɔb ka afɨna nem nsɔn yi ga ɛnɔb.
“Nnɛ yɔku yɔ akpe na atɔŋ ya yɔghɔ ɛjom, ayɔk.”
ที่ได้เลือกล่าสุด:
Nuk 14: NDD-011
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©️2024 Luke Initiative for Scripture Translation
