Matiu 23
23
Farisiiapụ Ma Na Ólóghó Nyẹ́dieapụ Dienyẹ
(Mak 12.38,39; Luk 11.43,46; 20.45,46)
1Anịsáa Jizọs warị ẹ́gẹ́rẹ́ túminị́ kpo ma na ori ọḅụduaapụ pịrị. 2<<Ólóghó nyẹ́dieapụ na Farisiiapụ ma anịị n kụrọ pa pịrịapụ sị nnị Mosis ólóghó ma dughofindi. 3Anịgo ọmịnị n bịpị pughu nyánam sị nnị dugho ọ pịrịnyẹ gonyẹ́ gonyẹ́ mịẹ, kụ́ma ọmịnị n daa n mịẹnyẹ mịẹma tegó nnị n diearịnyẹ ma mịẹgha. 4Nnị ikúnyẹ káká pa túminị́ abana gbánām kụ́ma nnị ḅụ gbọrụ dọghụgha nnị gbẹ́rẹ́ ḅara tụmgbọlụ saghị pa anị dighi.
5<<Tamuno ẹ́gẹ́rẹ́ ma bie fịnị kálá igbe nna angaá nyẹ duḅaḅam, nna bịtẹ bịpịkpọ árị́dírí ma nna angaá nyẹ nángwọḅam. 6Fị na ḅụ kiri nnị ịkasị sịbị ma ḅẹ́lẹ́mam, nna kobiri yọ, tórúku fịnị ịkasị ḅụ anịị n fịnị dọghọdọghụ nyẹ. 7N dọghụbẹm túminị́ osigha ḅara pa sịbịpị pa nna si fẹ́siri ḅụ sị pịghị n sị <Nyẹ́dieḅọ.>
8<<Kụ́ma o minima túminị́ <Nyẹ́dieḅọ> pa ọ sịị tegó gbẹ́rẹ́ Nyẹ́dieḅọ ngéré anịị ọ nyánáḅọ, ọmịnị kị́nị́mamgba pịghị owi mịnaapụ. 9Pịghị <Daḅọ> pa gbẹ́rẹ́ḅọ sọ sị ma tuminikiri, ḅẹẹ gbẹ́rẹ́ Daḅọ anịị ọ nyánányẹ ọ pịghị sobie imi. 10Anịgha <Nyẹ́dieḅọ> pa ọ sị bẹ, ḅẹẹ gbẹ́rẹ́ Nyẹ́dieḅọ anịị ọ nyanaḅọ ori anịị Krais ma. 11Dụḅaḅá ḅọ ọmịnị ogboku bie anịị ọmịna fịrịnwangịḅọ sọọ bẹḅọ. 12Amịna ḅụ dighi saghị ḅọ gonyẹ́ gonyẹ́ nnị n ḅọ sitérémabẹm, pịghị ọ ḅụ sitérémaḅọ gonyẹ́ gonyẹ́ nnị n ḅo saghị sóghólomabẹm.
Jizọs Igani Farisiiapụ Na Ólóghó Nyẹ́dieapụ Pịrịm
(Mak 12.40; Luk 11.39-42,44,52; 20.47)
13<<Anị opuma si ọ pịrịbẹm ólóghó nyẹ́dieapụ na Farisiiapụ, ọmịnị mmẹẹ́ tọ́rụ kingiapụ! Ọ so ama ásẹ́mẹ́kiri ḅụ́pọ́ ma ịkasị sọ dọghụapụ pịrịm, kụ́ma ọmịnị ọmịna ḅụgbọrụ mini sọgha, anịgha sọ dọghụapụ wáriso sị n sọọ! [14Anị opuma sii ọ pịrịbẹm, Ólóghó nyẹ́dieapụ na Farisiiapụ oḅori pa kịnịsịapụ! Ḅẹẹ ọ fúrú ḅara pa dee fịịmáa ẹ́rẹ́ámáapụ wárị akịm sị epele ḅara ḅụ nangwọ tẹ́ghẹ̄ kọọ, mịma gosi ọmịna tọ́rụ́siarị ma siḅabẹm.]
15<<Anị opuma sii ọ pịrịbẹm ólóghó nyẹ́dieapụ na Farisiiapụ, ọmịnị oḅori pa kị́nị́ sịapụ mmẹẹ́ tọ́rụ kingiapụ! Ọ tọ́rụ́ saḅam pịghị ama ama muu ọ pa gbẹ́rẹ́ tumḅọ nyánáḅọ sị n ḅọ ọmịnị dua, ọmịnị ọ nyánáḅomaẹrẹ ọmịnị ọ mịẹsị ori mmẹẹ́ a kiri pa sii ọ nẹ́ngị, warị mịẹsị ori ẹ́kpẹ́duaama ḅọ sọọ ọmịnị fịnị ḅara ma.
16<<Anị opuma sii ọ pịrịbẹm ọmịnị asọ pa jẹ́apụ diearị Tọ́rụ́pụ́apụ! O diearị ḅẹẹ ḅọ́rọ́ tumḅọ Tamunoopuwarị ma kuḅufị anị bẹnyẹ bẹnyẹ ḅụ ofori, kụ́ma ḅọ́rọ́ tumḅọ Tamunoopuwarị ma bie fịnị odoḅala kuḅu fịfịị anị n ḅoo ọlọbẹm. 17Ọmịnị tọ́rụ́pụ oḅoriapụ! Tẹ́ ngaa nyẹ nyẹ́la ḅa: odoḅala ma anịgha Tamunoopuwarị ma, odoḅala ma mịẹsị anị tọ́ntọ́ nyẹ sọọ? 18Ọ pịghị dughom ḅẹẹ, <Ḅọ́rọ́ tumḅọ ẹ́bẹ ma kuḅufị anị bẹnyẹ bẹnyẹ mịẹgha, kụ́ma ḅọ́rọ́ anị ọgọnọ fịnị diepịrịnyẹ ma kuḅu fịfịị n ḅọ fịị ọḅọọ ma n ḅọ kubẹm.> 19Ọmịnị tọ́rụ́pụ owiapụ! Tẹ́ ngaa nyẹ nyẹ́la ḅa: dienyẹ ma anịgha ẹ́bẹ ma dienyẹ ma mịẹsị anị tọ́ntọ́ ḅụ fịnị. 20Anịgosi ẹ́bẹ ma kuḅu fịḅo, anị na anị ọ́gọ́nọ fịnịnyẹ mamgba kuḅufịm. 21Tamunoopuwarị ma kuḅufịḅọ, Tamunoopuwárị ma kuḅufịm na pịghị Tamuno anị bie ngaa ḅọ. 22Pịghị so kuḅufịḅọ, Tamuno imine ma kuḅufịm na pịghị anị ḅụ kpọrọfị́nị́ḅọ ma kuḅufịm!
23<<Anị opuma sii ọ pịrịbẹm ọmịnị ólóghó nyẹ́dieapụ Farisiiapụ na mmẹẹ́ a tọ́rụ kingiapụ! Ọ pa fulosọ ḅẹ́lẹ́maarị pẹdiri pa oyia ngaa die ọ gbẹ́rẹ́ ngá pa Tamuno pịrịm anịị minti, dilli na kummini. Kụ́ma kụrọ ḅa nyẹ ólóghó ma ḅụ ọmịnị anị kokogha, anịị ibi ḅẹ́rẹ́kọ, tọ́rụ́kụrụkụ́rụ́ na kụ́rọ sẹ. Mịná ọḅụkụ́nọma nyẹ ma anịị ọ mịẹ na ibi nyẹ parị ngaa nyẹ ma dighisimagha pa. 24Ọmịnị asọ pa jẹ́apụ diearị Tọ́rụ́pụ́apụ! Ọmịnị ọmọmọ ẹ́kẹ́masim ọmịna iru ḅụ, kụ́ma kameli pa sị nama ma mẹnị.
25<<Anị opuma sii ọ pịrịbẹm ọmịnị ólóghó nyẹ́dieapụ na Farisiiapụ, ọmịnị mmẹẹ́ a tọ́rụ kingiapụ! Ọmịnị ọmọngọ oju ma na ẹ́fẹ́rẹ́ ma oju sịrịm, kụ́ma biebẹ tọ́rụ kpọ na opu tọ́rụ́ pa nyánáḅonyẹ anịị anị bie binyẹ. 26Ọmịnị Farisiiapụ, Tọ́rụ́pụ́apụ! Parị ọmọngọ ma na ẹ́fẹ́rẹ́ ma bie sịrị fiafiama, anịsáa oju ma so fiafiabẹm.
27<<Anị opuma sị ọ pịrịbẹm ọmịnị ólóghó nyẹ́dieapụ na Farisiiapụ, mmẹẹ́ a tọ́rụ kingiapụ! Ọ fịnị ḅara anịị n sịrịarị pị́na agbā pa taa dupu tọ́rụ́ ḅụ fíafía nyẹ, kụ́ma sughubie fịịmaapụ mgbe na tọ́rụ́kịrịkị́rị́ ịlọ́lị nyẹ. 28Anị gbẹ́rẹ́ ḅara ma túminị́ toruku ọmịnị karakárá ibiamịẹnyẹapụ kịkam kụma ọmịna bie siiamịẹnyẹ na mmẹẹ́ a tọ́rụ kingiapụ anị ọ ḅụ binyẹ.
Jizọs Dughom Nnị Láa Bẹ Fomḅara
(Luk 11.47-51)
29<<Anị opuma sii ọ pịrịbẹm ólóghó nyẹ́dieapụ na Farisiiapụ, mmẹẹ́ a tọ́rụ kingiapụ ọ dupu dapịrị tẹ́mẹ ikiakoroapụ ma pịrịm sị pịghị ibiamịẹnyẹapụ ma dupu dapịrị ma birima. 30Ọ warị dugho ḅẹẹ, <Ḅọ́rọ́ wa duma ọkụ́ma wa mịná tádọ́apụ sa biri, wamịnị n mịẹnyẹ mịẹbịgha, muu ikiakoroapụ ma ọmbịnyẹ́ ọsụụ.> 31Ọ pịghị ẹ́gẹ́rẹ́ ọ ḅụ pa ḅẹ́rẹ́ ḅụ sum ḅẹẹ, ọmịna daapụ anịị ikiakoroapụ ma ḅáapụ. 32Anịsa ọ mịẹ tórúku muu sii mịẹ kárámá ọmịna daapụ sághị nyẹ!
33<<Ọmịnị ododó na pịghị sii ododó awọ! Ọ tọ́rọ pa kóróma ḅẹẹ ọmịnị ẹ́kpẹ́duaama ma bie ọ sọbịgha? 34Mịma gosi a ikiakoroapụ na nyẹ́nimiapụ pa ọ fịrịmaarị na pịghị nyẹ́dieapụ. Jẹ́apụ ọmịnị n ḅabẹm pịghị mgbẹsẹ sị́ ḅụ nnị ḅaupálị, isiapụ ọmịnị n fombẹm ọmịna kobiri yọ sị pịghị n deesi ọmịna ama bie. 35Anịgosi tuminikiri nnị ọ sụụ karakárá ibiamịẹnyẹ ọmbịnyẹ́ ọmịna sịbị gbánabẹm karakárá ibiamịẹnyẹḅọ Ebẹl ọmbịnyẹ́ akị muu Zakaraya Ḅẹrẹkaya tụwọ ọmbịnyẹ́ ọ ḅáapụ Tamunoopuwarị ma bie, ẹ́bẹ ma na tọ́ntọ́ yọ ma ogboku. 36A karakárányẹ ma dugho ọ pịrịm mịnanyẹ mamgba mị ḅụ́ọ́apụ ma ḅụ pághábẹm.
Jizọs Nyáná Jerusalem Pịrị Ḅẹlẹma
(Luk 13.34,35)
37<<Yei, ọmịnị Jerusalemapụ! Jerusalem, ọmịnị ikiakoroapụ ma ḅáapụ pịghị mgbọ́lụ pa n pa ọfịrịmaapụ ma gbii! A ndẹa sáá pa dọ́ghụ́ma, a ọmịna awọ kubiri gboloma ọbịọ amịna dọghụdọghụ awọ kubiri ḅara anị pamba bie, kụ́ma ọ minigha. 38Dighi ọmịna Tamunoopuwarị ma n wáriso ọ pịrịbẹm túminị́ bie ófórigha nyẹ. 39Ḅẹẹ a dugho ọ pịrịm, ọmịnị jẹ́ pa ị́yẹ́ arịbịgha akị muu o dugho sáá ḅẹẹ, <Nnị karịibimaḅọ anị ori Gbámásóḅọ ma ẹ́rẹ́ ḅụ ḅoarịḅọ.> >>
ที่ได้เลือกล่าสุด:
Matiu 23: IBY
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©2024 Luke Initiative for Scripture Translation
