Matiu 20
20
Vainị Duakiri Ḅụ Fịrịnwangịarị Fịrịnwangịapụ
1<<So ama ásẹ́mẹ́kiri ma fịnị ḅara anịị kirinyánáḅọ fịnị ḅara, dede dédé págháḅo sị mú fịrịnaapụ dọghụ ḅẹẹ n ḅo fịrịnwangị ori vainị duakiri. 2Ori nnị na mininim ḅẹẹ ori éné igbii ma pa n gbẹ́bẹm anịị denarịosi, sị n pa vainị duakiri ma fịrịma.
3<<Ésénie énékịẹnyẹ dedebie ọ fẹ́ dẹ́rị ngá múm sị mú jẹ́ a túminị́ arịm sẹ́fịnị sị ḅẹnyẹ ḅẹnyẹ mịẹgha. 4Ọ warị dugho n pịrị, <Ọmịnị sọ ọ muu ị́yẹ́ vainị duakiri ḅụ fịrịnwangị, a pịghị ọ gbẹ́ẹ̄ na ibinyẹ pa ọ gbẹ́bẹm.> 5Nnị warị muu.
<<Ọ pịghị sima pághám mú éné ógbóo biri na pịghị tẹ́rẹ́ énékịẹnyẹ biri éné baá sị gbẹ́rẹ́ ḅara ma mịẹm. 6Sọ́nọ́ a énékịẹnyẹ ḅupiri biri, ọ pịghị pághám si pịghị jẹ́apụ árị pa sẹ́fịnịarị. Ọ warị n gbíla, <Ọ tẹ́ go pa mịnga sẹ́fịnịarị éné gbọrụ ḅụ ḅẹnyẹ ḅẹnyẹ mịẹgha?> 7Nnị warị págháraa ḅẹẹ, <Gbẹ́rẹ́ḅọ sọ fịrị ḅụ wámịna akịịghaa, ọ warị n ḅẹẹ, ọmịnị sọ o muu ị́yẹ́ vainị duakiri ḅụ fịrịnwangị.>
8<<Éné ḅo ḅupiri sáá, vainị duakiri ma nyánáḅọ ma ori fịrịnaapụ sịbịdaḅọ ḅẹm, <Fịrịnaapụ ma sị kubiri sị nna igbii pa nna gbẹ́ẹ̄, kunema a fịrị ḅụ ákị́ḅọ muu parị fịrị ḅụ a ákị́ḅọ láa.>
9<<Sọ́nọ́ énékịẹnyẹ biri n fịrị ḅụ ákịapụ ḅom fịnịḅọ fịnịḅọ gbẹ́rẹ́ denarịosi nyánaḅom. 10Nnị parị fịrị ḅụ ákịapụ ma ḅoo sáá ḅẹẹ nnị nna igbii daakị, n sịm ḅẹẹ nna igbii isiapụ nyẹ nẹ́ngịbẹm, kụ́ma ọ́rụ́ḅọ ọ́rụ́ḅọ gbẹ́rẹ́ denarịosi nyánaḅom. 11Nnị anị nyáná ḅo sáá, nnị warị saghị suna suna duakiri nyánáḅọ ma pịrị. 12Nnị warị ḅẹẹ, <Ọḅụkụ́nọma nnị ákịapụ fịrị ḅụ gbẹ́rẹ́ énékịẹnyẹ anị n pa fịrịnwangị nyẹ, ị pịghị mịẹmam sị n wa nnị na gbasi wamịnị fịrị ma iku dighiapụ ọfịrị ịrụa ma bie.>
13<<Kụ́ma ori nna ḅụ gbẹ́rẹ́ḅọ pagharam ḅẹẹ, <Inangwọọ, a ị́yẹ́ inomagha, í irị na mininigha ḅẹẹ gbẹ́rẹ́ denarịosi gbẹ́rẹ́ éné bie fịrị? 14Ị́yẹ́ igbii akị si sọọ, a bim ḅẹ́ a kunema ákị́ḅọ ma igbii pa ọ pịrị, a pa ọ gbẹ́ẹ̄ gbẹ́rẹ́ ḅara ma. 15A kụrọ nyanagha ị́yẹ́ igbii pa a mịẹ dọghụnyẹ mịẹ? Anịgha anị ọ ḅụ akụmaarị ḅẹ́ i ḅara sárásárám gosi igbii ḅụ.>
16<<Anị fịnị ḅara, kunema ḅo, tórúku sọ ḅẹm parị ḅo pịghị ọḅụkụnọmaḅo sọbẹm.>>
Jizọs Pịghị Sima Ori Fịị Gbolomanyẹ Dughom
(Mak 10.32-34; Luk 18.31-34)
17Mị́sa Jizọs Jerusalem muarị ḅara ma, ori ọrẹ oyi mmẹapụ findi ma sị angaá pịrịm sị dugho n pịrị ḅẹẹ, 18<<Wa Jerusalem muarị, n pịghị Tumḅọ yii Tụ́wọ ma Dẹrịfị́bẹm igwagwaalaapụ na ólóghó nyẹ́dieapụ ḅara, n pịghị fịị ḅẹ́rẹ́ pẹ́lẹ́bẹm ọ sịbị. 19Sị pịghị ọ ḅọ́rọ́ma Juughaapụ pịrị sị nnị okombo pịghị ọ fom pịghị mgbẹsẹ sị́ ḅụ ọ ḅaupálị. Tẹ́rẹ́ kárámá éné ọ fịị ḅụ saghịbẹm!>>
Jems Na Jọn Nyingi Jizọs Ḅara Bi Nyẹ
(Mak 10.35-45)
20Anịsáa Zebidi awọ nyingi árị awọ pa Jizọs damaḅom, ẹkpẹrẹkị sị ọ ḅarabie nyẹ gbíla. 21Ọ warị a gbíla, <<Ọ tẹ́ nyẹ́ ị́ binyẹ!>> A warị ḅẹẹ, <<Mịẹ ḅẹẹ ị́yẹ́ mmẹẹ́ awọ ma gbẹ́rẹ́ḅọ ị́yẹ́ ámáḅara ngá, isiḅọ ị́yẹ́ ẹ́rẹ́ḅara ị́yẹ́ ásẹ́mẹ́kiri ḅụ.>> 22Jizọs dugho n pịrịm, <<Ọ nimigha ọ biarị nyẹ. Ọmịnị ine a ḅuu dumaarị tọ́rụ́siarị ọmọ́ngọ ma ḅuu ḅẹ́?>>
Nnị pagharam, <<Wamịnị inebẹm.>>
23Jizọs dugho n pịrịm, <<Ọ gbarịgha ḅara ḅụ ị́yẹ́ tọ́rụ́siarị ọmọngọ ma bie ḅuubẹm, kụ́ma ị́yẹ́ amaḅara ngá na ị́yẹ́ ẹ́rẹ́ḅara ngá kpọrọfịnị ma i ḅarabie ofori. Mịná kiri ma anị fịnị i Daá tẹ́lẹ́ma warị pịrịmáapụ ma pịrịm.>>
24Oyia ọḅụaduaapụ ma mịma náa sáá, n bieoḅu mịná mméa owiminaapụ ma pịrịm. 25Jizọs n sị kubirim sị ḅẹẹ, <<O nimim ḅẹẹ Juughaapụ ma táarịapụ nna bie kụrọ nyanam nna ḅụ, sịbịdaapụ ma pịghị káara kụrọ nyánam nna ḅụ. 26Anị ọkọfịnịbịgha ọmịna ḅụ. Anịmanakaragha ọmịna bie opu tumḅọ sọ biḅọ gonyẹ́ gonyẹ́ n ḅo ọmịna fịrịnwangịḅọ sọọ. 27Pịghị tórúku tarị dọghụḅọ gonyẹ́ gonyẹ́ n ḅọ ọmịna ómóniḅọ sọọ. 28Anị gbẹ́rẹ́ ḅara ma Tumḅọ yii Tụ́wọ ma ḅogha ḅẹ nnị fịrịnwangị ọ pịrị, kụ́ma ori fịrịnwangị kị́nị́ pịrị sị ori duma pa tọghaapụ sịbị sáá gbẹm.>>
Jizọs Mmẹẹ́ Tọ́rụ́pụ́apụ Gwọm
(Mak 10.46-52; Luk 18.35-43)
29Jizọs na ori ọḅụduaapụ Jeriko warịsoarị sáá tọgha túminị́ kpo ọ duam. 30Mmẹẹ́ a Tọ́rụ́pụ́apụ asọogbo angaá ma ḅụ kpọrọfịnịarị, n pịghị náa sáá ḅẹẹ Jizọs ḅọ́rọ́arị, nnị ilúghum, <<Kị́nị́nyánáḅọ, Deviti Tụwọ, tọ́rụ́kụrụkụ́rụ́ nyáná wa pịrị!>> 31Túminị́ kpo ma igani nnị pịrịm ḅẹ n bịpị gbẹ́ẹ̄, kụma n pụghọ sághị ilúghum, <<Kị́nị́nyánáḅọ, Deviti Tụwọ, tọ́rụ́kụrụkụ́rụ́ nyáná wa pịrị!>> 32Jizọs warị sẹ sị nnị gbíla, <<Ọ dọghụ ḅẹ a tẹ́ mịẹ ọ pịrị?>> 33Nnị pagharam, <<Kị́nị́nyánáḅọ, wa nyẹ́ árị dọ́ghụm.>> 34Jizọs tọ́rụ́kụrụkụ́rụ́ nyáná n pịrịm sị ḅara pa nna tọ́rụ́ lama. Anị gbẹ́rẹ́kiri nna tọ́rụ́ saghị nyẹ arịm nnị warị ọ dua.
ที่ได้เลือกล่าสุด:
Matiu 20: IBY
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©2024 Luke Initiative for Scripture Translation
