Matiu 15
15
Jizọs Biebẹ Fíafía Gbolomanyẹ Diem
(Mak 7.1-13)
1Jẹa Farisiiapụ na ólóghó nyẹ́dieapụ Jerusalem wárịso Jizọs damaḅom sị gbíla, 2<<Tegó sị ị́yẹ́ ọḅụduaapụ wámịna sẹ́nịapụ nyẹ mịẹmịẹ ḅara ma dua nyẹ́miẹgha nyẹ? Nnị nna ḅara sịrị sịrịgha n nyẹ́fị bẹ sáá!>> 3Jizọs pagharam, <<Ọmịnị o tegó Tamuno ologho ma kaarị ọmịna nyẹ mịẹmịẹ ḅara gosi? 4Ḅẹẹ Tamuno ḅẹm ḅẹ́, <Kuu pa ị nyingi na ị daa pịrị, amịna daaḅọ anịgha amịna nyingiḅọ wiri ḅo gonyẹ́ gonyẹ́ nnị n ḅo ḅáabẹm.> 5Kụ́ma ọ ḅẹm ḅẹẹ ḅọ́rọ́ tumḅọ nyẹ nyánam n ḅọ pa daḅọ anịgha nyingiḅọ pa ḅárásua n ḅọ pịrịbẹnyẹ n ḅọ warị nyingiḅọ anịgha daḅọ ḅẹ́ ḅẹẹ mịị nyẹ ma anị fịnị Tamuno pịrịm, 6anịgo n ḅọ kuu pa amịna daḅọ pịrị naibigha. Mị ḅara ma ọmịnị ọmịna nyẹ mịẹmịẹ ḅara ḅụ ḅọ́rọ́ ọ Tamuno ólóghó ma pa papanyẹ mịẹm. 7Ọmịnị mmẹẹ́ a tọ́rụ kingi! Aizaya karakáram ori o gboloma íkia koro sáá ḅẹẹ:
8<< <Mịná túminị́ ma ḅẹ́lẹ̄ ḅụ
anịị nnị kuu pa i pịrịnyẹ kụ́ma
nna tẹ́mẹ́bie ịḅụ ḅọlọanga ḅụ imi.
9Papa anịị nnị susi i pịrịarịnyẹ;
n diearịnyẹ ma anịị túminị́ tọ́ọ
kórómanyẹ sọ́ḅọ́rọ́ anịma anịị ị́yẹ́ ólóghó.> >>
Mịẹarịnyẹ
(Mak 7.14-23)
10Jizọs túminị́ ma sị ọ ḅụ pịrịm sị ḅẹẹ, <<Pughu sị akanyaḅo. 11Tumḅọ bịpịbie sọọ nyẹ mịẹbịgha n ḅọ pile kụma bịpị ma bie saghị págháḅo nyẹ anịị mịẹsị tumḅọ pilearị nyẹ.>>
12Anịsáa ọḅụduaapụ ma ọ damaḅom si gbíla, <<Ị nimi ḅẹẹ Farisiiapụ ma anị nnị igánimam nnị ị dughonyẹ ma náa sáá?>>
13Ọ pagharam, <<Iyẹ Daá sobie fịnịḅọ dipigha nyẹ gonyẹ́ gonyẹ́, kune ḅụ anịị nnị anị sughu si bẹnyẹ. 14Nnị wáriso nnị anịị tọ́rụ́pụụ́ si asọ pa tọ́rụ́ pụụapụ diearịapụ. Ḅọ́rọ́ tọ́rụ́ puuḅọ asọ pa tọ́rụ́pụụḅọ diearị nnị mmẹapụ ma sóórókoro olulu bie sọbẹm.>>
15Pita warị ḅẹẹ, <<Mị kaḅụ ma dughofindi wa pịrị.>>
16Jizọs warị n gbíla, <<Ọ pa na akanyaḅo nyánágha? 17Ọmịnị arịgha ḅẹ́ bịpị ma bie sọ́nyẹ gonyẹ́ gonyẹ́ furo ma bie ḅọ́rọ́ sọsọm sị oju ma ḅụ ḅọ́rọ́ pághá? 18Kụ́ma tumḅọ bịpịbie págháḅo nyẹ ma tẹ́mẹ́ ma bie saghịḅom mịnanyẹ ma anịị pịghị tumḅọ pilemaarị nyẹ. 19Ḅẹẹ tẹ́mẹ́ ma bie anịị sii kóróma, kị́nị́ḅáa, amadọghụ, yáakuu ḅụ ofori nwángị, fúrú, iruo onyẹ́sẹ, kị́nị́ dughosima. 20Mịnanyẹ ma anịị tumḅọ, <Pilemaarị nyẹ.> Kụma ḅara sịrịgha sị nyẹ́fị mịẹgha sị n ḅọ pile!>>
Kenan Ọ́rụ́ḅọ Minini
(Mak 7.24-30)
21Jizọs anị ngaa ma wáriso sáá, ori ọ ḅụ nụ́nụ́akị pa Taya na Sidọn ḅẹrẹtọ angaá múm. 22Gbẹ́rẹ́ Kenan ọ́rụ́ḅọ anị párángáa ma ḅụ ḅoḅọ ọ damaḅom, owu pághámaarị ḅẹ́, <<Kị́nị́nyánáḅọ, Deviti Tụwọ, tọ́rụ́kụrụkụ́rụ́ nyáná i pịrị! Iyẹ ndụ́ḅa sitẹ́mẹ́ kóróarị ḅọ opuma tọ́rụ́siarịarị.>>
23Jizọs gbẹ́rẹ́nyẹ sọ pagharagha. Anịgo ori ọḅụduaapụ warị sághị ọ suma ḅẹẹ, ori a fịrịma so, ḅẹẹ a pa owu owu si wa duarị.
24Ọ warị pagharaa, <<Nnị ị fịrịmam Izirẹlị bie faá ánáná ma gosi.>>
25Ọ́rụ́ḅọ ma warị ḅo ọ tórúku ẹkpẹrẹkị si ḅẹẹ, <<Kị́nị́nyánáḅọ ḅárásua i pịrịị!>> 26Ọ warị pagharaa, <<Anị karakáragha sị awọamaapụ ma fịtúrú akị sị anị gbi pa obiri pịrị.>>
27A warị ḅẹẹ, <<Innh, Kị́nị́nyánáḅọ, kụ́ma obiri ma sọ nna nyánáḅọ ịkasị ọ́gọ́nọ sóghóóró kórónyẹ ma sọ fịfịm.>>
28Anịsáa Jizọs warị pagharaa, <<Ọ́rụ́ḅọ ị opu minini nyánam! Anị ọkọ fịnị ị pịrị ị bi ḅara.>> Árị ndụ́ḅa warị gwọọ anị gbẹ́rẹ́ sáá ma ḅụ.
Jizọs Fị́nyẹ Pa Túminị́ Oyia Ndẹ́ẹ Pịrịm
29Jizọs anị ngaa ma warịsom si Galili tọ́rụ́ angaá ma ḅụ ḅọ́rọ́. Anịsáa ọ warị tụ́ndụ́ ngása tándị sị kpọrọfịnị. 30Tọgha túminị́ kpo ọ damaḅom ikúléapụ na Tọ́rụ́pụ́apụ na ikirịarịapụ na oḅu ọlọapụ na pịghị tọgha jẹapụ sị n pa ọ ḅụọ angaá warị, ọ warị n gwọọ. 31Anị túminị́ ma ḅụ́gbérépumam nnị árị sáá ḅẹẹ ọḅụ ọlọapụ saghị ẹ́gẹ́rẹ́arị sáá, ikirịarịapụ nna ḅụ mịẹ ibima, ikúléapụ nwángịarị, Tọ́rụ́pụ́apụ nyẹ árịarị. Nnị warị Izirẹlị Tamuno ma túmíní.
32Jizọs ori ọḅụduaapụ sị ọ ḅụ pịrịm sị ḅẹẹ, <<Mịná túminị́ ma a n dighi tọ́rụ́kụrụkụ́rụ́arị, n tẹ́rẹ́ adi pa ịrị na fịnịmam ḅẹnyẹ ḅẹnyẹ fịgha pa. A biigha ḅẹẹ a ḅurutarị ḅụ n fịrịma soo, anịgha nnị ine sóórókóróbẹm asọogbo.>>
33Ori ọḅụduaapụ pagharam, <<Wa tẹ́ angaá mịná túminị́ fúrōbi bẹ fịtúrú nyáná ḅo bẹ mị ḅọlọ angaá ma ḅụ sị pa mị túminị́ kpo ma siḅe?>> 34Jizọs gbilam, <<Ọmịnị ndẹẹ́ fịtúrú kpo nyáná?>>
Nnị pagharam, <<Sọ́nọ́ma kpo, na pịghị dụḅagha kálá nji.>>
35Ọ dugho túminị́ kpo ma pịrịm ḅẹ́ n kiri kpọrọfịnị. 36Anịsáa ọ warị sọ́nọ́ma fịtúrú kpo ma na nji akị, ori imiẹḅa pa Tamuno ḅẹ́ fama sáá, ori anị puum si anị pa ori ọḅụduaapụ pịrị nnị warị anị pa túminị́ ma pịrị. 37Nnị kị́nị́mamgba fịịm sị anị n fúrobi. Anịma ḅọ́rọ́ sáá, ori ọḅụduaapụ sọ́nọ́ma nkana mpara mpara fịtúrú gbálaḅom n fịkọma nyẹ ḅụ. 38Mị fịtúrú ma fịapụ kịẹbịpị anịị owiapụ túminị́ oyia ndẹ́ẹ, mịma ẹ́rẹ́ámáapụ na Káláawọ anị bie ofori.
39Anịsáa Jizọs túminị́ ma fịrịma sọm, sị sima árụ́ ma ḅụlọ sị so Magadan párángáa muu.
ที่ได้เลือกล่าสุด:
Matiu 15: IBY
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©2024 Luke Initiative for Scripture Translation
