Matiu 13

Dụadipiḅọ Kaḅụ

(Mak 4.1-9; Luk 8.4-8)

1Anị gbẹ́rẹ́ éné ma, Jizọs wárị warịsom sị pághá muu tọ́rụ́ ma ngaa kpọrọfịnị. 2O gbiri ikelekelé túminị́ ma opuma dụḅam gosi ọ gbẹ́rẹ́ árụ́ ḅụlọm sị anị bie kpọrọfịnị, túminị́ mamgba warị posie aka ma ḅụ sẹ́fịnị. 3Anịsáa ọ warị tọgha nyẹ dugho n pịrị kaḅụ ḅụ dughoarị ḅẹẹ, <<Gbẹ́rẹ́ dụadipiḅọ pághá muu ori sịmgbọ́lụ dipim. 4Ọ sịmgbọ́lụ ma gbi gálágálámaarị sáá, jẹa nyẹ asọogbo sóghórókórom, fíní warị ḅo sị anị gbọfị fama. 5Jẹa nyẹ kpókpókiri ḅụ korom, anị ibima lịka nyanagha ngaa. Anị gbẹ́rẹ́kirikiri anị sẹ́nị págháḅom lịka ma póghólógha gosi. 6Kụ́ma ịrụa ma págháḅo sáá, anị dipi nyẹ ma dọghụmam tegó anị kune nyanagha gosi anị sámụ́nọm. 7Jẹ́ a sịmgbọlụ nangi bie sóghórókórom, nangi ma sẹ́nị págháḅom sị saghị dipi nyẹ ma timi. 8Jẹa nyẹ pa ibikiri ḅụ sóóró kóróm, anị sọ́nọ́ a si kiri, tẹ́rẹ́ a si kiri anịgha sue kiri sua pághámaḅo ngaa n dipi nyẹ gonyẹ́ gonyẹ́ ḅụ. 9Biri nyánáḅọ, n ḅọ náa.>>

Jizọs Tego Kaḅụ Kọọ

(Mak 4.10-12; Luk 8.9,10)

10Ọḅụduaapụ ma warị ọ damaḅo sị ọ gbíla, <<I tegó kaḅụ pa ẹ́gẹ́rẹ́kọ túminị́ ma pịrịarị?>>

11Ọ pagharam, <<So ásẹ́mẹ́kiri ḅọghunyẹ ma níminyẹ n pa ọ pịrịmam, kụ́ma n pa nnị pịrịgha. 12Nyẹ́ nyánáḅọ gonyẹ́ gonyẹ́, n jẹ́nyẹ pa n ḅọ pịrịbẹm, anịḅọ ma pịghị mánámāná nyẹ nyánábẹm. Nyẹ́ nyánághaḅọ gonyẹ́ gonyẹ́, n ḅọ nyáná kálányẹ ma sọ nnị n ḅọ ḅarabie anị ákịbẹm. 13Mịma go anị a go kaḅụ pa ẹ́gẹ́rẹ́kọ n pịrịarịnyẹ:

<<Nnị dighiarị kụ́ma nyẹ arịgha;

nnị pughuarị kụma naagha anịgha akanyaḅo.

14Mị ḅara ma ḅụ anịị Aizaya koro íkia ma ḅo kiriakịnyẹ:

<< <Ọ naábẹm kụ́ma akanyaḅobịgha,

ọmịnị árịbẹm kụ́ma ibima arịḅogha.

15Tegó nna tẹ́mẹ́bie mịnị álála nyẹ akanyaḅogha gosi;

nna biri sọ mịnị pịghị nyẹ naagha

n pịghị nna tọ́rụ́ gbẹmam.

Anị ḅọ́rọ́ ọkọ fịnịgha nnị ine nna tọ́rụ́ pa nyẹ árịbẹm,

pịghị nna biri pa nyẹ náa,

pịghị nna tẹ́mẹ́bie pa nyẹ akanyaḅo

sị pịghịma ḅoo a pịghị nna gwọbẹm.>

16Kụ́ma n karịibimanyẹ anịị ọmịna tọ́rụ́ tegó nnị nyẹ́ arịarị na pịghị ọmịna biri tegó n nyẹ́ naarị. 17Ḅẹẹ a karakárányẹ ma dugho ọ pịrịm, tọgha ikiakoroapụ na karakárá ibiamịẹnyẹ túminị́ dọghụarị nnị ọmịnị arịarị nyẹ ma árị, kụ́ma ine arịgha, sị pịghị ọ naarị nyẹ ma náa, kụma ine anị naagha.

Jizọs Dụadipiḅọ Ma Kaḅụ Dugho Findim

(Mak 4.13-20; Luk 8.11-15)

18<<Anịsáa pughu, mịị dụadipiḅọ kaḅụ ma dughoarị nyẹ: 19Asọogbo sóórókoro sịmgbọ́lụ ma sẹ́pịrịnyẹ anịị ásẹ́mẹ́kiri ma ibi oku naapụ, kụma akanyaḅogha, sii tumḅọ ma warị ḅoo nna tẹ́mẹ́bie n dipi sịmgbọ́lụ ma pughọakị. 20Kpókpókiri ḅụ sóórókoro sịmgbọ́lụ ma anịị bieḅẹlẹ pa oku ma daakịapụ nnị anị náa gbẹ́rẹ́kirikiri. 21Kụ́ma anị nna bie kune nyanagha, kálá sáá ngéré anịị anị pa fịnịarị nyẹ. Ḅụḅáláḅálá anịgha tọ́rụ́siarị ḅomaẹrẹ oku ma gosi, n ḅọ anị gbẹ́rẹ́kirikiri bịghị korom. 22Nangi ḅụ sóórókoro sịmgbọ́lụ ma anịị oku ma naapụ, kụ́ma mịị tuminikiri ma ḅụḅáláḅálá ma pịghị ngọ oḅori pa kị́nị́ sị, anị kpepumam, mịẹsị anị ine sịmgbọ́lụ suagha. 23Kụ́ma ibikiri ḅụ sóórókoro sịmgbọ́lụ ma anịị oku ma naapụ sị anị akanyaḅo: sịmgbọ́lụ sua, jẹa nyẹ sọ́nọ́ a si kiri, jẹa nyẹ tẹ́rẹ́ si kiri, jẹa nyẹ sue kiri.>>

Owi Osuka Kaḅụ

24Jizọs jẹ́ kaḅụ kọọ n pịrịm ḅẹẹ, <<So ásẹ́mẹ́kiri ma anị fịnị ḅara sọ́ḅọ́rọ́ ibi sịmgbọ́lụ dipiḅọ ori duakiri. 25Kụ́ma kị́nị́mamgba múnoarị sáá, ori iruonaḅọ ḅom sị owi osuka dipi witi, ọrọsị kịka sịmgbọ́lụ ama ogbobie sị nwángị sọọ. 26Witi, ọrọsị kịka sịmgbọlụ ma sẹ́nị págháḅo sịmgbọ́lụ sua sáá, túminị́ warị saghị owi osuka ma sọ arịị.

27<<Dua ma nyáná fịrịnwangịḅọ ọ damaḅom sị ḅẹẹ, <Inyanaḅọ, ị ibi sịmgbọ́lụ dipigha ị́yẹ́ duakiri ḅụ? Owi osuka ma anị tẹ́ angaá saghị ḅo?>

28<<Ọ warị págháraa, <Iruonaḅọ mịma mịẹm.>

<<Fịrịnwangịḅọ ma warị ọ gbíla, <I bii mọ ḅẹ́ wa muu anị wọrọ si?>

29<<Ọ warị ọ págháraa, <Errnh-errnh, tegó ị́ owi osuka ma wọrọ sịarị sáá ị́ ine nimigha pa witi, ọrọsị kịka sịmgbọlụ ma sọ wọrọsibẹm. 30Wáriso nnị mmẹapụ ma sẹ́nị págháḅo gbẹ́rẹ́ sáá akị muu duasughu sáá ma láa. Anịsáa ma ḅụ a dugho dua sughuapụ ma pịrịbẹm; parị owi osuka ma ikolokolo ḅo sị nkáká púghú púghú ḅụ sị nnị n dọ́ghụ́ma bẹ ḅara; anịsáa witi, ọrọsị kịka sịmgbọlụ ma kobiri sị anị akuoo ị́yẹ́ dua ḅụ n sughu nyẹ koko koko angaá.> >>

Mọstad Sịmgbọlụ Na Yisti Kaḅụ

(Mak 4.30-32; Luk 13.18,19)

31Ọ jẹ́ kaḅụ kọọ n pịrịm: <<So Ásẹ́mẹ́kiri ma mọstad sịmgbọ́lụ anị anịị kịkanyẹ, tumḅọ akị sị pa dipi nyẹ n ḅọ duakiri. 32Anị ọmịna ḅụ ịrụḅa sịmgbọ́lụ n ḅẹ sọ, anịsọ anị sẹnị maẹrẹ, anị anịị dụḅaḅá duakiri sịmgbọlụ dighim sị ḅo opu sị sọọ, sị fọ́rụ bie fighiarị fíní ḅo anị ḅụ gbana gbana anị ḅara ḅụ.>> 33Ọ pịghị jẹ́ kaḅụ kọọ n pịrịm ḅẹẹ: <<So ásẹ́mẹ́kiri ma, mịị anị fịnị ḅara, gbẹ́rẹ́ ọ́rụ́ḅọ jẹa yisti akịm sị pa ólóló a mmẹẹ́ si bi bẹ filawa na gwaa, mị kálá yisti ma warị mịná mánámāná filawa ma sụghụma.>>

Jizọs Kaḅụ Pa Ẹ́gẹ́rẹ́ Kọm

(Mak 4.33,34)

34Jizọs mịnanyẹ mamgba dugho túminị́ ma pịrịm kaḅụ ḅụ; ọ gbẹ́rẹ́nyẹ sọ dughogha kaḅụ kọgha pa. 35Mị ḅara ma anị ikiakoroḅọ ma ẹ́gẹ́rẹ́ ḅo kiriakị ḅara:

<<A kaḅụ kọọ n pịrịbẹm,

n saghị tuminikiri tẹ́mẹ́ sa éné éné

a ḅọghunyẹ dugho pághámabẹm.>>

Jizọs Owi Osuka Kaḅụ Ma Dugho Findim

36Ọ warị túminị́ kpo ma wárịso sị warị sọọ, ori ọḅụduaapụ warị ọ damaḅo sị dugho ḅẹẹ, <<Dughofindi wa pịrị owi osuka fịnị duakiri kaḅụ.>> 37Ọ pagharam, <<Ibi sịmgbọlụ dipiḅọ ma anịị Tumḅọ yii Tụwọ. 38Duakiri ma anịị tuminikiri ma, ibi sịmgbọ́lụ ma anịị ásẹ́mẹ́kiri ma awọ, owi osuka ma anịị sii tumḅọ ma awọ, 39pịghị nnị dipi iruonaḅọ ma anịị ẹ́kpẹ́dua ma. Duasughu ma anịị sáá ma kunema, pịghị dua ma suu bẹapụ anịị sookumuapụ ma.

40<<Nnị owi osuka ma nụ́nụ́si sị anị dọ́ghụ́ma ḅara fịnịbie, anịị anị fịnị ḅẹ́ ḅara tuminikiri ma kunema. 41Tumḅọ yii Tụwọ ma ori sookumuapụ fịrịma pághámabẹm, nnị pịghị ori ásẹ́mẹ́kiri ḅụ siinyẹ mịẹarịnyẹ gonyẹ́ gonyẹ́ na pịghị siinyẹ mịẹarịapụ gonyẹ́ gonyẹ́ isé si. 42Nnị n pa opu kọrịfịnị bie gbi suabẹm, nnị owu sị pịghị aka túrú bẹ angaá. 43Anịsáa karakárá ibiamịẹnyẹapụ ma warị ịrụa bia ḅara pa biabẹm nna Daá ásẹ́mẹ́kiri ma ḅụ. Biri nyanaḅọ gonyẹ́ gonyẹ́ náa.

Nnị Pa Ḅọghu Ngọ Kaḅụ

44<<Sọ ásẹ́mẹ́kiri ma anị fịnị ḅara sọ ḅọ́rọ́ nnị pa duakiri ḅụ ḅọghu warị ngọ, gbẹ́rẹ́ owitụ́wọ anị dọghụ pághámaḅo sáá, ọ sima anị pa ḅọghum, anịsáa ori bieḅẹlẹ ḅụ muu ọ nyánányẹ mamgba dẹrị sị anị duakiri ma fẹ́.

45<<Jẹ́ nyẹ, so ama ásẹ́mẹ́kiri anị fịnị ḅara anịị fíafía nyẹ́la onwo mgbọ́lụ dọghụarị tụ́ḅonaḅọ. 46Ọ ḅoo opuma nyẹ́la nyẹ dọghụ ḅo sáá, ọ sọm sị ọ nyánányẹ mamgba dẹrịm sị anị fẹ́.

Ịgbọ Kaḅụ

47<<Pịghị jẹ́nyẹ, so ama ásẹ́mẹ́kiri anị fịnị ḅara anịị n kọ́rọ́ma ịgbọ tọ́rụ́bie sị tọ́rụ́kịrịkị́rị́ nji kuu. 48Nji ịgbọ ma bi sáá, nnị anị nụnụkiri ḅom. Anịsáa n warị kpọrọfịnị sị ibi nji ma sẹ́lẹ́ nkanabie sua, kụ́ma sị nji ma gbi ḅuuma. 49Mịị anị fịnị bẹ ḅara sáá ma kunema. Sookumuapụ ma ḅobẹm sị siiapụ ma fófóoma ibiamịẹnyẹapụ ma ḅụ. 50Sị n gbi pa opu kọrịfịnị ma bie sua, owu na ákáturu na kiriakị bẹ angaá.>>

51Jizọs warị gbíla, <<Mịnanyẹ mamgba ọmịnị anị akanyaḅo ma?>> Nnị warị págháraa <<Innh.>> 52Ọ warị n ḅẹẹ, <<Ólóghó ma nyẹ́dieḅọ gonyẹ́ gonyẹ́, nnị so ama ásẹ́mẹ́kiri ma gbolomanyẹ pa diemaaḅọ, n ḅọ kịkanyẹ anịị warị nyánáḅọ ori ngọ koko koko yọ ḅụ ịwọ ngọ na pịghị olom ngọ pághámaḅom.>>

Nnị Jizọs Sịghịm Nazarẹtị Ḅụ

(Mak 6.1-6; Luk 4.16-30)

53Jizọs mịná kaḅụ ma kọọ fama sáá, ori anị ngaa ma warisom. 54Ọ ḅoo ori ama láa sáá, ọ saghị nyẹ pa túminị́ ma diem nna kobiri yọ ḅụ, anị warị n tọ́rụ́ nẹ́ngị. Nnị warị gbíla, <<Mị owitụ́wọ ma ọ tẹ́ angaá mị níminyẹ ma na mị ḅụ́gbérépuma fịrị ma nyáná ḅo? 55Mịị ḅọ ma ori akanịḅọ ma tụ́wọgha, o nyingi ẹ́rẹ́ Merigha ori mịná owiapụ Jems, Josẹf, Saimọn na Judasigha? 56Ori mịná ẹ́rẹ́ámáapụ mamgba nnị wamịnị na mịnga ofori? Mị owitụ́wọ ma, ọ tẹ́ angaá mịnanyẹ mamgba nyáná?>> 57Nnị warị bieoḅu ọ pịrị, kụ́ma Jizọs n ḅẹm, <<Ikiakoroḅọ, ama gonyẹ́ gonyẹ́ ḅụ kuusọm, kụma ori ama na ọ wárịbie anịị o kuu sọgha nyẹ.>> 58Ọ tọgha ḅụ́gbérépuma fịrịnwangịgha anị ngaa tegó nnị minini nyanagha gosi.

ที่ได้เลือกล่าสุด:

Matiu 13: IBY

เน้นข้อความ

แบ่งปัน

คัดลอก