Matta 5

Mɛlalɨ A Dʌbʌl Yem

1Yesu a kuwo kaam nǝbɔ a lada nyɨɨ, nǝngɔ a gwi yemɔ a yɨ woi. Bɛtɔ mɛlalɨ gǝnɔ a yɔ a daa gǝ woi. 2Nǝngɔ a tǝl mɛla jim lɛ gɔ.

Bwilitɨn

(Luk 6:20-23)

3“Bwiligɔ na a nǝb nɨ ja nyǝm bʊnǝn jinɔ a mʊgɔ yʊwaɨ,

jʊ a bwɨɨ fɔlɔn lɔ Kwaamaɨ na a ji.

4Bwiligɔ na a nǝb nɨ nǝn kaltǝm nǝlɨ,

jʊ a bwɨɨ jǝ nya nya yʌbtǝm nǝl.

5Bwiligɔ na a nǝb nɨ mɨ nǝn gungtǝm duli,

jʊ a bwɨɨ kʊla tǝmɔ yǝlam a ji.

6Bwiligɔ na a nǝb nɨ a ya nǝl a maatǝm jʊ nɨ dǝngdǝngɨ,

jʊ a bwɨɨ jǝ bo bo.

7Bwiligɔ na a nǝb nɨ ji bʊnǝn nɛɨ,

jʊ a bwɨɨ jǝ ji ji bʊnǝn jinɔ tʌji.

8Bwiligɔ na a nǝbɔ nǝn nǝl sagsagɨɨ,

jʊ a bwɨɨ jǝ kuwo kuwo Kwaama.

9Bwiligɔ na a nǝb nɨ mʊrka yɨm kwamɨgǝn nɛɨ,

jʊ a bwɨɨ jǝ jo ji gɔ bɛtɔ lɔ Kwaamaɨ.

10Bwiligɔ na a nǝb nɨ nyʊwa gaalan nɛ a dul jʊ jʊ nɨ dǝngdǝngɨ,

jʊ a bwɨɨ fɔlɔn lɔ Kwaamaɨ na a ji.

11“Bwiligɔ na a jen, nǝn kwama nǝbɔ a tuwo jeni, ja nǝ jen gaalanɨ, ja sʊwala jen kɛl bwɨlantɨn a kɛl dul mɨɨ. 12Jǝ́ maa bǝlátǝm jǝbɔ fulotǝm nǝl dangǝn, jʊ a bwɨɨ jǝ́ yo yo lǝma gɔ a lada a kwama, nǝn gɔ gaalanɔ nǝbkuwotǝmkǝga nɨ a laa jen bɛtǝmɨ, a nɔɔɨ.

Mam Jǝbɔ Nyalǝm

(Mar 9:50; Luk 14:34,35)

13“Nǝjen jǝ́ mam tǝm nɨɨ. Na lǝma mamɔ a dɨmɨ, la jǝ bɛ nǝn lǝma gǝnɔ a fee? Mɨ nǝn bʊmǝn wo tag. Jǝ tǝlam fʌlen sǝ ja falam nǝn naa.

14“Nǝjen jǝ́ nyalǝm yooligɨɨ. Tuulɔ nɨ ja mɔ a dʌbʌl tuli ke bɔ jǝ yʊtǝm. 15Mɨ jǝ kul fitila lɛ ja sumtǝn kʌshifǝla tʌgo. Jǝ swa a dʌbʌl kʌngteng sǝ nǝbɔ a mʊgɔ lɔngɨɨ a kuwo nyalǝm gǝnɔ. 16A dul kɛl nɨ, jǝ́ bǝla nyalǝm jenɔ ya beta lɛ a kǝga nǝbɨɨ, sǝ ja kuwo maajɨ nyan jenɔ, sǝ ja dʊʊl Tɛtɛ jen nɨ a dʌbʌli.

Mɛlalɨ Yesui A Dul Diil Musaɨ

17“Ka jǝ́ bʊʊla lɛ jengɔ mǝ bɛ sǝ n kal diil Musaɨ jǝbɔ nǝbkuwotǝmkǝgagɔ. Mǝ bɛ bɔ sǝ ba n kalǝm ji, mǝ bɛ sǝ ba n yii ji. 18N bɨlǝngǝn mǝ sʊwa jen nɛɨ, na dʌbʌlɔ jǝbɔ tǝmɔ a shu bɨɨ, mɨ kaa mʊlalɨ nɨ wo jǝbɔ bɛ mʊlalɨ nɨ a mʊgɔ mʊlalɨ diilɔ gǝm shu lɛɨ, na ja yii bɔ kanjǝl nɨ gwamɨ. 19Nʊ nɨ a mǝla bɛ diilɔ win a mʊgɔ diiltɨnɔ gǝmɨ, a mɛla nǝbɔ gǝm nyɨɨ, jǝ sʊwa gǝn gɔ nǝn gɔ ga maa dǝm a mʊgɔ fɔlɔn lɔ Kwaamaɨ. A nʊ nɨ a bwangtǝn a mɛla jimi, jǝ sʊwa gǝn gɔ nǝn gɔ gǝ nǝ dʊʊɨ a fɔlɔn lɔ Kwaamaɨ. 20Mǝ sʊwa jen nɛ, na dǝngdǝng jenɔ a laa bɔ a nǝb mɛlalɨ diili jǝbɔ a nǝbɔ Farisaɨ, mɨsɔ jǝ́ dɔ fɔlɔn lɔ Kwaamaɨ lɛ wo.

Mɛlalɨ Yesui A Dul Nabwɨl

(Luk 12:57-59)

21“Jǝ́ kwɛl jǝ́ nyʊwa kanga ja sʊwa tʊgalam bǝnɔ galɨgǝnɨ gɔ, ‘Bɛ ka jǝ́ jʌ lɛ nǝl. Na nʊ nɨ a jʌ nǝlɨ, jǝ maa gǝm maa borang.’ 22Kǝngkɔ mǝ sʊwa jen nɛ, na nʊ nɨ a maa nabwɨl jǝbɔ kɨla gɨɨ, jǝ maa gǝm maa borang. Na nʊ nɨ a tuwo kɨla gɨɨ, jǝ yɔ yɔ nǝn gɔ a kǝga nǝb dʊʊm koteregɨɨ. Na nʊ nɨ a sʊwa gɔ ‘Nǝ swɛlatǝmɨ,’ a la maltǝm a lɔ kǝla.

23“A dul kɛl nɨɨ, na mʊ tǝla twama lɛ a daa twɨtǝm yulʌn a Kan Kwaaman, nǝngɔ mʊ bʊʊla nǝn kaa kɨla mɔ nɨ mʊ maa gǝm bwɨlangkɛlɨ, 24bɛ ń bǝla twɨtǝm yulʌnɔ a mʊgɔ Kan Kwaaman, ya nya kɨla mɔ jǝ́ fɛka, sǝla ń yǝla ń bɛ a daa twɨtǝm yulʌnɔ gǝm.

25“Bɛ ń fɛka tɨbǝl mʊnɔ jǝbɔ nʊ nɨ yɔ lɛ nǝn mɔ a kan borangɨɨ. Saa fɛkalɨ dǝbǝr nǝn kwama jǝ́ shu lɛ a golaɨ, na mɨ nyɨɨ, yɔ yɔ nǝn mɔ a daa nǝ gartǝm borangɔ woi. Nǝ gartǝm borangɔ yɔ yɔ nǝn mɔ a daagɔ nǝ dʊʊ lɔsomigɔ woi, a daagɔ jǝ kubʌl ń nɛ a lɔsomii. 26N sʊwa ń bɨlǝngǝn, mɨsɔ mʊ jel lɛ na mʊ ywa bɔ kemʌn sǝlǝnɔ gwamɨ.

Mɛlalɨ Yesui A Dul Bulon

27“Jǝ́ kwɛl jǝ́ nyʊwa kanga ja sʊwa gɔ, ‘Bɛ ka jǝ́ maa lɛ bulon.’ 28A dul kɛl nɨ kǝngkɔ mǝ sʊwa jen nɛ, na nʊ nɨ a dʌng nɔɔlɨ nǝn wɛl maatǝm buloni, a kwɛl a maa bulon jǝbɔ gɔ a mʊgɔ nǝl gǝn. 29Na nu kang jajǝng mʊnɔ dǝg ń dǝg ń ń maa bwɨlangkɛlɨ, kʊʊtam gǝn mam fʌlen. A laa jǝl ń jʊ jinʌn bʊtɔ mʊnɔ win, jǝbɔ a wʊnɨ jǝ mal bʊtɔ mʊnɔ lɛ gwam a mʊgɔ lɔ kǝlaɨ. 30Na kang jajǝng mʊnɔ dǝg ń dǝg ń maatǝm bwɨlangkɛlɨ, bɛ ń mwatɨm gǝn mam fʌlen. A laa jǝl ń jʊ jinʌn bʊtɔ mʊnɔ win jǝbɔ a wʊnɨ jǝ mal bʊtɔ mʊnɔ lɛ gwam a mʊgɔ lɔ kǝlaɨ.

Mɛlalɨ Yesui A Dul Jʌtǝm Naakan

(Mat 19:9; Mar 10:11,12; Luk 16:18)

31“Jǝ́ kwɛl jǝ́ nyʊwa nyʊwaɨ kɛltɨn nɨ ja sʊwaɨ gɔ, ‘Na nʊ nɨ a dem kang a nwala gɔ gǝmɨ, bɛ a nǝ gǝn langǝn bwangǝn jʌtǝm naakanɔ.’ 32Kǝngkǝnɨ mǝ sʊwa jen nɛ, na nʊ nɨ a dem kang a nwala gɔ gǝmɨ, na ke bɔ bulon a maaɨ, a dǝg gǝn a maatǝm bulon. Na balɨ nɨ a naa nɔɔlɨ nɨ a jʌ naakanɨ, gǝ maa bulon.

Mɛlalɨ Yesui A Dul Wɛɛlɨ

33“Jǝ́ kwɛl jǝ́ nyʊwa nyʊwaɨ kanga ja sʊwa tʊgalam bǝnɔ galɨgǝnɨ gɔ, ‘Ka jǝ́ wɛɛl lɛ wɛɛlɨ a dul gabakɛl. Bɛ jǝ́ yii wɛɛlɨgɔ jǝ́ wɛɛl a kǝga Tɛlalɔɨ.’ 34Kǝngkǝnɨ mǝ sʊwa jen nɛ, bɛ ka jǝ́ wɛɛl lɛ wɛɛlɨ, ka jǝ́ wɛɛl lɛ nǝn dʌbʌl kwama, jʊ a bwɨɨ dʌbʌlɔ n kotere fɔlɔn Kwaamaɨ. 35Ka jǝ́ wɛɛl lɛ wɛɛlɨ nǝn tǝmɔ, jʊ a bwɨɨ n daa fam naa gǝnɔ lɛɨ. Ka jǝ́ wɛɛl lɛ wɛɛlɨ nǝn Urushalimagɔ, jʊ a bwɨɨ nǝn gɔ tuulɔ fɔlɔ dʊʊnɨ. 36Ka ń wɛɛl lɛ wɛɛlɨ nǝn dul mʊnɔ, jʊ a bwɨɨ mɨ mʊ nǝn kwaan ń dǝg yitʌn dul mʊnɔ win a yǝlam a fulo jǝbɔ a filii. 37Jʊtǝb nɨ jǝ́ sʊwa lɛɨ, bɛ a yǝlam ‘Ɔɔ’ jǝbɔ ‘Ɔ ɔ.’ Na a shu nyɨɨ, a jel a daagɔ Mammɔ woi.

Mɛlalɨ Yesui A Dul Ywatǝm Naan

38“Jǝ́ kwɛl jǝ́ nyʊwa nyʊwaɨ jʊ ja sʊwaɨ gɔ, ‘Naan nugɔ n nu, naan nungʌnɔ n nungʌn.’ 39Kǝngkǝnɨ mǝ sʊwa jen nɛ, bɛ ka jǝ́ ywa lɛ naan a nʊ nɨ a maa jem bwɨlangkɛlɨ. Na nǝl a jǝga ń a dʊng kang jajǝngɨ, yǝla gǝm dʊng kang fɔlɔngɔ. 40Na nǝl a yɔ nǝn mɔ a kan borang swɨ lɛ gǝ yem bɛllɛ mʊnɨ, nǝ gǝn belʌn mʊnɔ. 41Na nǝl a dǝg ń nǝn kwaan gɔ yɔ yɔm jǝbɔ gɔ mɛlɔ wini, yɔ mɛlɔ yo jǝbɔ gɔ. 42Na nǝl a bʌ ń jǝlɨ, nǝ gǝn jʊgɔ. Na nʊ nɨ swɨ jǝl lɛ a daa mɔ woi, ka ń dang gǝn nɛ nǝn.

Swɨtǝm Nǝb Kiim

(Luk 6:27,28,32-36)

43“Jǝ́ kwɛl jǝ́ nyʊwa nyʊwaɨ jʊ ja sʊwaɨ gɔ, ‘Bɛ ń swɨ kɨla mɔ, kɔ nǝ kii mʊnɔ.’ 44Jʊ mǝ sʊwa jen nɛ kǝngkɨɨ, jǝ́ swɨ nǝb kiim jenɔ. Jǝ́ maa nǝb nɨ nǝ jen gaalan nɛɨ gǝm keli. 45Jǝ́ maa nyɔ sǝ jǝ́ yǝlam bɛtɔ lɔ Tɨya jen nɨ a dʌbʌli, jʊ a bwɨɨ gǝ dǝg dǝg nu kwamagɔ a gwi a dul nǝb bwɨlamɔ gǝm jǝbɔ nǝb nyanɔ, gǝ swiyo swiyo nǝb dǝngdǝngɔ jǝbɔ nǝbɔ mɨ dǝngdǝngɨ gǝm mwɛ. 46Na jǝ́ swɨ nǝb nɨ swɨ jen nɛɨ, la jǝ́ nya lǝma Kwaamaɨ nyǝn? Nǝb yotǝm kemʌn tǝmɔ mɨ maa lɛ nyɔ ka? 47Na n kɛtǝlam jenɔ jǝ́ yal lɛ kwaajii, n wɛ jǝ́ laa kaamɨ nǝnɨ? Ke bɔ nyɔ Bʌtʌbɔ maa lɛɨ ka? 48Bɛ jǝ́ yǝlam dǝngdǝng, kanga Tɨya jen nɨ a kwamaɨ n nǝ dǝngdǝngɨ.

ที่ได้เลือกล่าสุด:

Matta 5: DBD

เน้นข้อความ

แบ่งปัน

คัดลอก