Maatiyos 9

Yeesus wuli kafe tiya urusa

(Markos 2:1-12; Luukas 5:17-26)

1Yeesus jalbadde koreyaako tabeh ishi daafolle yemeete. 2Taykinna lel wuli kafeh sidolle dhiina tiya alle baahen. Yeesus lel ten imaan yuble gedda, amaa kafe tiyak: “Aydukum-erhex, yi barha, ku zambit koh xabbiimeh yane” akko yerhxe. 3Taykinna lel sercat dhiiceenitko gari sinni afcaadodde: “Tati Yallah kinni waatimak yanem” yerhxin. 4Yeesus laakin ten xisaab yeerhegeh: “Aymih sinni afcaadodde umaani taxeesebiinim? 5‘Ku zambit koh xabbiimeh yane’ yarhxiinim kee ‘Ugutaaki aduu’ yarhxiinimko awlihim ruhuwa? 6Amaydo, Xiyawti Barhi baarholle zambe xabshiisho reeza leyam taarhagoona ciloh” yerhxek sarrah, amaa kafe tiyak: “Ugut, ishi sido tuttuqhuceh aduu” akko yerhxe. 7Usuk lel uguteh ishi careh yedee. 8Amaa mango xiyaw tayim yublin gedda, mashshiiteenih, ta reeza xiyawah yoxoye Yalla yeynebin.

Yeesus Maatiyos deecima

(Markos 2:13-17; Luukas 5:27-32)

9Yeesus amakkeeko tillaabak, Maatiyos akko yarhxin xiyawto amaa miiri alle yaskattin caralle defeyeh kaa yubleyaako, “Yi kataa” akko yerhxe. Usuk lel uguteh kaa kataye.

10Yeesus maaddille cikkishiteh beetak, taykinna, mango miiri yaskattit kee zambi-wannun yemeetiinih Yeesus kee kaa katattaynitlih defeyen. 11Tayim Faarisiin yublin gedda, kaa katattaynitik: “Aymihi sin mudarris miiri yaskattit kee aki zambi-wannunlih beetam?” akko yerhxin. 12Usuk laakin tayim yoobbe gedda: “Xaakim farhshiisha mari laxuute mara kibah caafiyat-le mara maki. 13‘Sadaqhaako raxma kixiniyo’#Hosheeca 6:6 yarhxiinim ayim kinam aduwantaaki timirmiriinih irhiga. Amayim lel anu akah emeetem zambi-wannunuh deecimo kibah, xaqqi-wannunuh maki” akko yerhxe.

Siyaam essero

(Markos 2:18-22; Luukas 5:33-39)

14Sarrah Yohannis katattaynit Yeesusulle yemeetiinih: “Aymihi notta kee Faarisiin nasoome, ku katattaynit laakin miyasoomiinim?” akko yerhxin. 15Yeesus lel: “Waraddi marcawwi tenlih yanem fanah yaxzanoona dhiicaana? Marcawwi tenko beyan waqhti yamaato kinni. Amayek sarrah lel yasaamoona kinon” akko yerhxe. 16Cusub gamedda zirte sareenadde yayrhibbisheti miyane, amayim lel amaa leeza zirte sareena candhishshamhi sabbatah kinni. Amaa candhiirhi mangum yaame. 17Cusub wayni lel zirte idritidde mihayaana. Adde hayenimko, amaa idrit fotkishsha, amaa wayni xarhitta, amaa idrit lel caynita. Cusub wayni cusub idritidde kinni gaxam, sittiya lel mirhaga.

Yeesus wuli numa kee manabotti barhä urusa

(Markos 5:21-43; Luukas 8:40-56)

18Usuk tayim tenak arhxuk, taykinna, wuli manabotti yemeeteyaako kaa nifille gululluubuweh: “Yi barhä kado rabte, laakin atu temeeteh gaba alle haytemko malammih wafa alle gaxto kinni” akko yerhxe. 19Yeesus lel uguteyaako ishi katattaynitlih kaa kataye. 20Taykinna lel, wuli numa lamman kee taman iggidiya biili akko xarhitaya, caazaako temeeteyaako kaa sareenah erherha dhagte. 21Amayim lel ishi afcaadodde: “Kaa sareena dhagemko, uro kiyo” terhxemhi sabbatah kinni. 22Yeesus ufkun-yerhxeh tee yuble gedda: “Aydukum-erhex, yi barhäw, ku imaan ku uruseh yane” akko yerhxe. Amaa geddaako lel amaa numa urte. 23Yeesus amaa manabotti carelle yemeeteyaako machambara taatukem kee xazzanoyta mango xiyaw yuble gedda: 24“Aduwa, barhä dhiina tanenkah mirabooki” yerhxe. Usun lel alle yoosolin. 25Amaa xiyaw yewcin gedda, orobeh gabadde tee yibbirhe, amaa barhä lel ugutte. 26Tayimhi wari lel amaa baarholle faax-yerhxe.

Yeesus lamma inti-male urusa

27Yeesus amakkeeko tillaabak, wuli lamma inti-mali: “ Dawud Barha, nolle raxmat!” yarhxiinih zeerak lakadde akko katayen. 28Caredde orobe gedda, amaa inti-malit alle yemeetin, Yeesus lel: “Anu tayim abo dhiicamah taaminiini?” akko yerhxe. Usun lel: “Yoo, Maddara” akko yerhxin. 29Amaymik sarrah, “Sin imaan balih sinah yakkoo!” arhxuk ten intit akah dhagandhaage. 30Ten intit lel fakkite. Yeesus lel: “Ubula, walaa inketti aarhige wayo” yerhxeyaako sirii ginah ten asuuse. 31Usun laakin yedeyinyaako, kaa ware umbuka amaa baarholle faax-ishen.

Yeesus naxar-male urusa

32Usun amulalle aduuk, taykinna, wuli yimjinnine naxar-male alle baahen. 33Yeesus amaa jinnetta akah yeyyeece gedda lel amaa naxar-mali waanishe. Amaa mango xiyaw lel: “Ta gina lem Israa-eelille caduruh tumbulluweh mitaarhige” arhxuk xedenen. 34Faarisiin laakin: “Junuun yayyaacem, junuun manabottah abeh kinni” yerhxin.

Orba kee shaqqaala

35Yeesus lel ten sunagoogitidde aydurusuk, nigsinnat Mece Ware warroyshak kee umman laxuu kee waaxelta urusak umman daafof kee diikakalle hel-arhxuk yine. 36Mango xiyaw yuble gedda, loyna hin ciido balih, niya ciddem kee xato hinam kuuk yiniinimhi sabbatah, raxmah uluc akko xarhen. 37Sarrah ishi katattaynitik: “Orba rummah mangum kinni haaki shaqqaala laakin dago mara kinon. 38Amaydo, orbat Maddari ishi orballe shaqqaala dhirhiyooki dhaaco aba” akko yerhxe.

ที่ได้เลือกล่าสุด:

Maatiyos 9: SCC

เน้นข้อความ

แบ่งปัน

คัดลอก