မာကု 4
4
ပုင်တဲႇ ပြံတ်ကအာင်ဆမာရ်
(မဿဲ ၁၃.၁–၉; လုကာ ၈.၄–၈)
1 #
လု ၅.၁–၃
လိူဝ်ႈရဘံန် ယေဆု ဆုင်မဆာင်ဆောန်ဒဲႈ တပြော ပြါအိုမ်ဆက္လုင်ဂါလိလဲ။ ဘံန်ဘီက်ုရ်စု ဘာ့်ဘာ့်ဘိူဝ်ဘိူဝ်ဂဲ လာ်ႈရောတ်ဒိုည်ႇ တပြောအ်ုန်၊ အ်ုန်ဟာ့်မာ့်ပွံတ်ဒေ တပါင်ရိူဝ် န်ုအိုမ်ဆက္လုင်။ ဖုင်ဘီက်ုရ်စုဂဲဒီန်မိူဝ်ႈ လာ်ႈဂွည်ဒိုည်ႇဒေ တပြောပြါအိုမ်ဆက္လုင် ပါင်ဆိုရ်။ 2အခိင်ဒီန် အ်ုန်ဒါငဲပုင်တဲႇ ဆာင်ဆောန်ဒဲႈတဂဲ တွံန်မျိုတွံန်နဲ၊ ပ်ုန်ဒါႈအ်ုန် တဂဲဒီန်မိူဝ်ႈ၊
3“ဆတီုင်ဘိူဝ်။ ယိူဝ်ဘီအူကူ လေႈလာ်ႈပွံတ်ဒေ အတွပြံတ်ကအာင်ဆမာရ်။ 4ယာမ်အ်ုန် ပြံတ်ကအာင်ဆမာရ် တနာ၊ ကအာင်ဆမာရ် ပ်ုရ်ဒီ ဘံန်ဇာ်ႈ တပါင်ရဒေင်၊ ဆီမ်ဂဲတပ္လေင် လာ်ႈပေါဒေ ထွံရ်ဒိုည်ႇဒေဟောမ်။ 5ပ်ုရ်ဒီ ဇာ်ႈတအရာပ် ကတဲဘြေ့ မိုဘ္လံမ်၊ ကအာင်ဆမာရ်ဒီန် ဘိူည်လဲ့ဖာည်ဂံတ်၊ ကောပ်ကတဲဘြေ့၊ 6အခိင်ဆငီလေႈ တာတ်ရဲင်လူတ်လာည်၊ ဘံန်ရျံရ်ႈကာစံပ်ရံတ် တကတဲ ဟောင်ဟျံတ်ဒိုည်ႇဒေ။ 7ကအာင်ဆမာရ်ပ်ုရ်ဒီ ဘံန်ဇာ်ႈတယူပ်ပ်ုရ်အောႇ၊ တီုင်ယူပ်ပ်ုရ်အောႇ ဟံန်ဒါင်လာ်ႈ ကောပ်ပိဖလူမ်ဒိုည်ႇတီုင်အ်ုန် ကာဘဲဒေပ္လေ။ 8ကောည်လိုည် ကအာင်ဆမာရ်ပ်ုရ်ဒီ ဘံန်ဇာ်ႈတကတဲကျ တီုင်အ်ုန်လဲ့ဟံန်ဒါင်၊ ဆမာဒဲႈပ္လေလေႈ ပ်ုရ်ဒီ ပူန်အွည်ကိူရ်၊ ပ်ုရ်ဒီ ပူန်တောရ်ကိူရ်၊ ပ်ုရ်ဒီ ပူန်အူပ်ုရ်ယာႈ။”
9ဟွည်ႇဒီန် ယေဆုဒါႈငဲပ်ုန်ဟွည်ႇ၊ “အီအ်ုန်ယိူဝ်ဟျာ့် ဒဲႈပဲယိူဝ်ဒေဆတီုင်။”
ပ်ုန်က်ုရ်ယေင် တငဲပုင်တဲႇ
(မဿဲ ၁၃.၁၀–၁၇; လုကာ ၈.၉–၁၀)
10ယာမ်ယေဆု ဂွည်ရာင်ကွည်ဒေ တအရာပ်ယေန်ညိမ်၊ ဘီဆတီုင်တရာ ပ်ုရ်ဒီ လာ်ႈရူမ်ဇောမ် တဘဲႇကိူရ်အာရ်ပါ ဂဲဆ်ုရ်မွံတ် အိုမ်ငဲပုင်တဲႇဒီန် တအ်ုန်။ 11ယေဆုႎီရ်ဒါႈ၊ “အောဟွည်ႇဒဲႈဒိုည်ႇပဲနံပ် ခံင်လီုဝ့်လီုဝ့်လံမ်လံမ် က်ုရ်အူပ်က်ုရ်မော ကပီုန်ကုင်ဖြာအီုဝ်။” ကောည်လိုည် က်ုန်မိူဝ်ႈ ဘီရရိူဝ့်ဂဲတည် ဘိူန်ဂိူဝ်ဂြည်ပျ ဇောမ်ငဲပုင်တဲႇ တဂဲ။ 12ကောပ်ဆေတဒါႈခိူည်ဒီန်၊
“ဂဲဘိူည်ငိူပ်ဂံတ်လလ၊
ကာယိူဝ်ပဲတ်ဒေငိူပ်။
ဂဲဘိူည်ဆတီုင်ဂံတ်လလ၊
ကာနံပ်ပဲတ် တီုင်အိုမ်ငဲ၊
ဂဲက်ုန်က်ုရ်လှာည် အချံင်ဒေ ႎီရ်ဇူလ်ုပ်ဖြာ၊
အ်ုန်ဒီ ပ္လိုတ်ခွါင်ဒဲႈတဂဲ။”
ယေဆု ဆာင်လာင်ဒဲႈ ငဲပုင်တဲႇ အီအ်ုန်ပြံတ်ကအာင်ဆမာရ်
(မဿဲ ၁၃.၁၈–၂၃; လုကာ ၈.၁၁–၁၅)
13ဟွည်ႇဒီန် ယေဆုဆ်ုရ်မွံတ်ဂဲ၊ “ပဲက်ုန်ကာနံပ် ငဲပုင်တဲႇအီုဝ်၊ ခိူည်မော ပဲဒီညာဒေနံပ် ဘ်ုရ်ယိူဝ်ငဲပုင်တဲႇ ဒိုည်ႇဒိုည်ႇအီုဝ်အဲႈ။” 14အီကူပြံတ်ကအာင်ဆမာရ်ဒီန် မိူဝ်ႈဘီပြံတ် ငဲတရာဖြာ။ 15ဘီပ်ုရ်ဒီ နှေရ်ကအာင်ဆမာရ် ဇာ်ႈတပါင်ရဒေင်။ အခိင် ဂဲယိူဝ်ဒေဆတီုင်ငဲတရာ ဘိူည်ဆွံင်လီပ်ဂံတ် တန်ုဖိူမ်ဒေ အူဒီန်တောအူဒီန် စာတန်ရောတ်ဒေ တိူဝ်ႈပဲတ်ပဲတ် ငဲတရာ ပ်ုန်ပြံတ်အူန် တဂဲဒီန်။ 16ဘီပ်ုရ်ဒီ နှေရ်ကအာင်ဆမာရ် ပြံတ်ဇာ်ႈ တအရာပ်မိုဘ္လံမ်။ အခိင်ဂဲယိူဝ်ဒေ ဆတီုင်ငဲတရာ ပည်နွံရ်ႈရျံင်ဖိူန်ပျော ရံပ်တိူဝ်ႈအူန်ဒေဆတီုင် အူဒီန်တောအူဒီန်။ 17ကောည်လိုည် ဘံန်ရျံရ်ႈကာစံပ်ရံတ် တန်ုဖိူမ်ဂဲ ခါမ်ဂိူဝ် အူကာပြေ့။ ကောပ်ငဲတရာဒီန် အခိင်ဒုခနာ့်နွံရ်ႈ က်ုန်ကာမိူဝ်ႈ ဆဂေလာလီညာ ရောတ်ပေါ နွံရ်ႈဖိူမ်ဂဲ ဆမာလူဒိုည်ႇ အူဒီန်တောအူဒီန်။ 18ဘီပ်ုရ်ဒီဂဲ နှေရ်ကအာင်ဆမာရ် က်ုရ်တူႈပြံတ် တန်ုပ်ုရ်အောႇ။ ပ်ုန်ဆ်ုန်ဒါႈအ်ုန်မိူဝ်ႈ၊ ဘိူည်ယိူဝ်ဂံတ်ဒေ ဆတီုင်ငဲတရာ၊ 19ကောည်လိုည် ဘံန်ယိူဝ်ဖိူမ်နွံရ်ႈဟ တလောကီ၊ ဆ်ုန်ဘိူန် အုဇာခြ်ုမ်ဆာဂါရ် ဆ်ုန်ဘိူန် ပ်ုန်ဟံရ်တွံန်မျိုတွံန်နဲ လီပ်ပေါဒေ ဒံန်ခြဲငဲတရာဒီန် ကာနံပ်ယာ့်ဒေပ္လေ။ 20ဘီပ်ုရ်ဒီဂဲ နှေရ်ကအာင်ဆမာရ် က်ုရ်တူႈပြံတ် တပါင်ကတဲကျဒီန်။ ပ်ုန်ဆ်ုန်ဒါႈအ်ုန်မိူဝ်ႈ ယိူဝ်ဒေဆတီုင်ငဲတရာ ဘံန်ရံပ်တိူဝ်ႈအူန်တဒေ၊ ဆမာဒဲႈ ပ္လေလေႈ ပ်ုရ်ဒီ ပူန်အွည်ကိူရ်၊ ပ်ုရ်ဒီ ပူန်တောရ်ကိူရ်၊ ပ်ုရ်ဒီ ပူန်အူပ်ုရ်ယာႈ။
ငံရ်ရာင်ကာ့် ဂွည်ရခြူမ်ဘာ့်ခွံရ်
(လုကာ ၈.၁၆–၁၈)
21 #
မ ၅.၁၅; လု ၁၁.၃၃ ယေဆုႎီရ်ဒါႈထဲင်၊ “ဘီအူကူအူဆိူဝ် ကျာင်တိူဝ်ႈကောဒေဒိူည် ငံရ်ရာင်ကာ့် အတွအူန် တရခြူမ်ဘာ့်ခွံရ် က်ုန်ကာမိူဝ်ႈ အတွအူန်တရခြူမ်ချှံင်။ ကာမိူဝ်ႈ တိူဝ်ႈဒေဒိူည် ငံရ်ရာင်ကာ့်ဒီန် အတွဂံမ်အူန် တပါင်ခုင်ငံရ်ရာင်အဲႈ။” 22#မ ၁၀.၂၆; လု ၁၂.၂ဘ်ုရ်ယိူဝ်ခံင်က်ုရ်အူပ်က်ုရ်မောဒီန် ဒီဘ်ုပ်ပိူဝ်ႈလိူရ်ႈဒိုည်ႇ။ ခံင်ဖလူမ်အူန် နဲမောမိူဝ်ႈဟွည်ႇ ဒီဘ်ုပ်ပိူဝ်ႈလိူရ်ႈဒိုည်ႇဒေ။ 23“အီအ်ုန် ယိူဝ်ဒေဟျာ့်၊ ဒဲႈပဲယိူဝ်ဒေဆတီုင်။”
24 #
မ ၇.၂; လု ၆.၃၈ ဟွည်ႇဒီန် အ်ုန်ႎီရ်ဒါႈထဲင်တဂဲ၊ “ပဲယိူဝ်ဒေဆတီုင်ဘ်ုရ်မော အူန်တနွံရ်ႈဖိူမ်ပဲ။ ခိူည်ပဲဂ်ုမ်တရာ တဘီဟံရ်ဂဲ ဘ်ုရ်မော၊ ဖြာ ဒီဂ်ုမ်တရာ တပဲခိူည်ဒီန် — ကောည်လိုည် ႎရနာထဲင်ဒိုရ်ဒီန်။ 25#မ ၁၃.၁၂; ၂၅.၂၉; လု ၁၉.၂၆ဆဲႈဒီန် တဘီအ်ုန်ယိူဝ် ဒီႎီရ်ဒဲႈထဲင်။ တဘီအ်ုန်ကာယိူဝ် ဒီႎီရ်တိူဝ်ႈဆီမ်ဒိုည်ႇ ဘ်ုရ်ယိူဝ်တဂဲဒီန်။”
ပုင်တဲႇ ကအာင်ဆမာရ်ဟံန်ဒါင်
26ဆဲႈဒီန် ယေဆုႎီရ်ဒါႈ၊ “ကပီုန်ကုင်ဖြာဒီန် ညာခိူည် အီကူပြံတ်ကအာင်ဆမာရ် တပါင်ကတဲ။ 27အီကူဒီန် ဟွည်ႇပြံတ်ကအာင်ဆမာရ် အခိင်ရမှိူဝ်၊ ရဆငီ၊ ယာမ်အ်ုန် ဒါ့်အီတ်အီတ်ဂွည်ဂွည်ဒေ ညာခိူည်ဒီန် ကအာင်ဆမာရ်ပီ တီုင်လဲ့ဟံန်ဒါင်လာ်ႈပွံတ်ဒေ။ ခိူည်မောတီုင်ဒီန် ညာဒေဟံန်ဒါင်လာ်ႈ အီကူဒီန်ကာနံပ်ပဲတ်။ 28ကတဲဒီန် ဒဲႈငှေါ ပ္လေရာင်ဒေ၊ ယာမ်စ မိူဝ်ႈတီုင်၊ ဟွည်ႇဒီန် ကီုရ်ယိုင်၊ တန်ုကီုရ်ယိုင်ဒီန် ပဲန်ပွံတ်ဒေ ကအာင်ဂြါ။ 29ဘံန်ပ္လေဒီန် ဟွည်ႇဆီန် ရောတ်ခါဝ်ႎေါႇတိူဝ်ႈအူန်ပ္လေ၊ အီကူဒီန် တိူဝ်ႈဒေဒါစာန် ႎေါႇပွံတ်အ်ုန်။”
ပုင်တဲႇ ကအာင်တူဂိုန်
(မဿဲ ၁၃.၃၁–၃၂,၃၄; လုကာ ၁၃.၁၈–၁၉)
30ယေဆုႎီရ်ဒါႈထဲင်တဂဲ၊ “ကပီုန်ကုင်ဖြာအီုဝ် ဇောမ်ခိူည်မောဒီက်ုရ်တဲႇ ဒဲႈတပဲ က်ုန်ကာမိူဝ်ႈ၊ တိူဝ်ႈဒါငဲပုင်တဲႇ ဇောမ်ခိူည်မော အောဒီဘ်ုပ်ဂြည်ပျတပဲ။ 31အီအီုဝ်မိူဝ်ႈ နှေရ်ပွံတ် ကအာင်ဆမာရ်တူဂိုန်။ ဘီအူကူ ယာမ်အ်ုန်တိူဝ်ႈ ကအာင်ဆမာရ်တူဂိုန် ပြံတ်တကတဲ၊ အ်ုန်ဘိူည်ဒျံတ်ဂံတ် ဒိုရ်ဘ်ုရ်ယိူဝ် ကအာင်ဆမာရ်ဒိုည်ႇဒိုည်ႇ။ 32ကာဇီုဝ့် တီုင်အ်ုန်ဟံန်ဒါင်လာ်ႈညှိုႈ ဒိုရ်ဘ်ုရ်ယိူဝ် ကာႇပ္လေတူပ္လေလှာ ဒိုည်ႇဒိုည်ႇ။ ဆီမ်တပ္လေင်ဂဲလာ်ႈပေါ ရ်ုရ်ဟူန်ဂါင် တကာႇဟေဒီန်။”
33ဖုင်ဘီဂဲ ဘဲဒေနံပ်ဘ်ုရ်မော ယေဆု ဒါငဲပုင်တဲႇဟံရ်တွံန်နဲ ဟောဂြည်ငဲတရာဒေ တဂဲ။ 34က်ုန်ကာပါငဲပုင်တဲႇ အ်ုန်ကာဟောဂြည်စိ တရာတဂဲ။ ကောည်လိုည် က်ုန်မိူဝ်ႈတဘဲႇဒေဂဲ အ်ုန်ဂြည်ဆာင်လာင်ဒဲႈ ရာင်ကောည် ခိူည်မိူဝ်ႈခိူည်ပိုည် ဒိုည်ႇဒိုည်ႇ။
ယေဆု ဒဲႈခူရ်ဒါင်ယေန်ညိမ်
(မဿဲ ၈.၂၃–၂၇; လုကာ ၈.၂၂–၂၅)
35ဆငီဒီန် ရောတ်အခိင်ရမှိူဝ် ယေဆု ဒါႈတ တဘဲႇဒေဂဲ၊ “ဆာ်ႈ အယ်ႎါည်လာ်ႈဒိုည်ႇ ဆဲႈပြါအိုမ်ဆက္လုင် လ်ုပ်တည်။” 36ကောပ်ခိူည်ဒီန် ဂဲပဲတ်အူန်ပဲတ် ဖုင်ဘီက်ုရ်စုဂဲ၊ တဘဲႇအ်ုန်ဂဲ လာ်ႈဇူပွံတ် ယေဆုမာ့် တပါင်ရိူဝ်ဒီန် ဂဲႎါည်လာ်ႈပွံတ်။ ရိူဝ်ဟံရ်ဂဲမိူဝ်ႈ ဇောမ်လာ်ႈဒိုည်ႇ။ 37ယာမ်ဒီန် ဘံန်ခူရ်ဒါင်ဇုင်ဒါင်ရဲင် ပေါရောတ်၊ က်ုရ်ပံရ်အိုမ်ဒီန် ပါ်ႈပွံတ်ရိူဝ်ဂဲ အိုမ်ဂိူပ်ဆ်ုန်နာ့်ပွံတ် တန်ုရိူဝ်။ 38ကောည်လိုည် ယေဆုဒါ့်အီတ် ဂံမ်ကိင်ဒေ မှောန်လ်ုပ်ရဘံန်ရိူဝ်။ တဘဲႇအ်ုန်ဂဲ ပျိူဝ်ႇအ်ုန် ဒါႈ၊ “အိူဝ် တာဆရာ၊ ယဲဒီဘ်ုပ်ယံမ်ဒိုည်ႇခိူည်အီုဝ် ဆေညာမီကာတိူဝ်ႈအရေယဲ။”
39အခိင်ဒီန် ယေဆုယိူဝ်ႇဒိုရ်အီတ်ဒေ အ်ုန်ငဲဆုင်မပွံတ် ခူရ်ဂါရ် က်ုရ်ပံရ်အိုမ်၊ “ယေန်ညီမ်အေ့” ဘံန်အ်ုန် ပိင်ငျှံပ်ခိူည်ဒီန် ခူရ်ဒီန် ညာယေန်ညီမ် ဆာယာညှိုႈညှိုႈပွံတ်ဒေ။ 40အခိင်ဒီန် ယေဆုဆ်ုရ်မွံတ် တဘဲႇဒေဂဲ၊ “ကောပ်ဆေ ပဲနံပ်ဒေယော ညာခိူည်အီုဝ်၊ ပဲညှံမ်ယိူဝ်ဂံတ် ဖိူမ်ညှိုမ် မောအူဒီန်အီုဝ်။”
41ဘီဂဲဒီန် ယောလူတ်လာည် ညာယူႈယူႈယ်ုရ်ယ်ုရ် ဂဲက်ုရ်မိုန်ဒိုည်ႇတဒေ အူကူတောအူကူ။ “အီကူအီုဝ် အဆေအ်ုန်မိူဝ်ႈအဲႈ၊ ခူရ်ဂါရ် က်ုရ်ပံရ်အိုမ်လိုည် ဆတီုင်ဒိုည်ႇငဲပ်ုန်ဒါႈအ်ုန်။”
ที่ได้เลือกล่าสุด:
မာကု 4: SPBT
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
The Word for the World International and The Shwe Palaung Bible Translation Reviewer Committee.
