मत्ति 9
9
इसु गाहिलि खोअ्काहेङ एल्पाका
(मर्कुस २:१-१२; लुका ५:१७-२६)
1इङकोन्हुअ्सो इसु नाउता धोल्तेङ चावान्दिको ओदोइपार हानेहि रो ताइमि हिका पुरता लोहि। 2द्याङगेलाइ खाटता जिमतेङहिका एमि गाहिलि खोअ्काहेङ वाकोता चुमाहि। एम्बालाइको खान्धुर तिङतेङ इसु गाहिलि खोअ्काहेङ दोअ्हि, “ओइ ओने, आँट पा, नाङको कुकरम माफ जेङहोइ।” 3धरममास्टरगेलाइता हेअ्मि ताताइमिता दोअ्हि, “या परमेस्वरको बादनामि पादोङखे।” 4इसु एम्बालाइको ठहर गितेङ दोअ्हि, “नेलाइ हाइपालि आसाति ठहर पासुखेना? 5हाइपानु हाइ दोअ्लि सुगम हि, ‘नाङको कुकरम माफ जेङहोइ’ दोअ्लि ना ‘ल्हो रो ते’ दोअ्लि? 6कालाउ बुङ का द्याङको चानहेङ सुमिङता कुकरम माफ पाका खाबारा हि दोअ्तेङ नेलाइ गेलि दोसु।” कालाउ वा इङको गाहिलि खोअ्काहेङ दोअ्हि, “ल्हो, ताइको सिदाउ चुम रो सिता हाने।” 7कालाउ इङको ल्होहि रो ताइको साअ्भारि हानेहि। 8जेलाउ जोम्तेङ हिकालाइ तिङहि, कालाउ एम्बालाइ थिहि रो द्याङगेलाइहेङ इसिका सरबङ पिका परमेस्वरहेङ बाखिन्हि।
इसु मत्तिहेङ काइका
(मर्कुस २:१३-१७; लुका ५:२७-३२)
9इसु इन्तासो हानेलाउ मत्ति दोअ्का एमि द्याङहेङ तिरो ल्होपाका आफिसता योम्तेङहिका तिङहि रो वासेहेङ दोअ्हि, “कासेहेङ पिताइ।” कालाउ इङको ल्होहि रो वासेहेङ पिताइहि।
10इसु चालि योम्का पहर, हेन्जाङ तिरो ल्होपाकालाइ रो निठुरिगेलाइ #९:१०निठुरिगेलाइ यहुदि धरम मास्टरगेलाइ, मोसाको पिका नियम मामानिकालाइहेङ कुकरमगेलाइ दोअ्घाखे रो जाइ इदोइ कुकरमगेलाइ दोफा योम्तेङ चाकालाइ बुङ अपुनित जेङघाखे दोअ्तेङ एम्बालाइ फोम पाघाखे। लोतेङ इसु रो वाको चात्यागेलाइदोफा चालि योम्हि।#लुका १५:१-२ 11जेलाउ फरिसिगेलाइ इङको तिङहि, कालाउ वाको चात्यागेलाइहेङ दोअ्हि, “हाइपालि नेलाइको मास्टर तिरो ल्होपाकालाइ रो निठुरिगेलाइदोफा योम्तेङ चाखे?” 12इदोइ हिङतेङ इसु दोअ्हि, “साअ्धेकालाइहेङ बोइद्याको हरजा माजेङखे, कालाउ बुङ मासाअ्धेकालाइहेङ जेङखे। 13कालाउ बुङ हानितेङ धरमकिताबता लेखेका इदोइ काथाको माने हाइ को दोअ्तेङ नेलाइ धिरसु: ‘का भोक माको, बोमिहेङ दाया पाका भोखा।’ हाइपानु का धरमहेङ माको, कालाउ बुङ निठुरिगेलाइहेङ काइलि लोघा।”#मत्ति १२:७; होसे ६:६
म्हितुपाङ हिका बारेता हिअ्का
(मर्कुस २:१८-२२; लुका ५:३३-३९)
14कालाउ युहन्नाको चात्यागेलाइ इसुकोता लोहि रो वासेहेङ हिअ्हि, “केलाइ रो फरिसिगेलाइ म्हितुपाङ हिन्हाखे, कालाउ बुङ नाङको चात्यागेलाइ हाइपालि म्हितुपाङ माहिखे?” 15इसु एम्बालाइहेङ दोअ्हि, “जेलाउथिकापा दारुवा काल्ह्यागेलाइदोफा हिखे, हाइ एम्बालाइ बिलाप पाखे कुनु? कालाउ बुङ इङको दिना बुङ ल्वावा, जेलाउ दारुवा एम्बालाइसो चुमप्वावा। कालाउ खिनिङ एम्बालाइ म्हितुपाङ ह्यावा।
16“हासु बुङ पुरना धाबाता नावा धाबाको चाकानाइ माटालाइखे। हाइपानु नावा चाकानाइ चुन्चालातेङ धाबाहेङ झन हेन्जा थेअ्पावा।
17“एसाङ पातेङ हासु बुङ पुरना धालेको जाबिता नोनो अङगुरको निघार माताअ्खे, माकोनु जाबि भोइतेङ अङगुरको निघार होकावा। कालाउ बुङ नोनो अङगुरको निघार नावा धालेको जाबिता ताअ्लाउ हाइदोङ माज्यावा।”
सिका बेजान सिन्हुका रो मासाअ्धेका बेबाल एल्का
(मर्कुस ५:२१-४३; लुका ८:४०-५६)
18जेलाउ इसु एम्बालाइहेङ इदोइ काथा दोअ्दोङघाखे, कालाउ कचहरिसाअ्को एमि हाकिम लोहि रो वासेहेङ सेउपातेङ दोअ्हि, “काङको चामिन्दि एलाङखिनिङ सिहि, कालाउ बुङ लोतेङ इङकोर्हुता नाङको खुर ताअ्पि रो वा सिन्हुतावा।” 19इसु ल्होहि रो ताइको चात्यागेलाइदोफा इङकोको न्हुअ्न्हुअ् हानेहि।
20इङको दोङ पहर एमि तेन्हे बाअ्सारसो हिति होका बेथा हिका एमि बेबाल न्हुअ्पाहासो लोतेङ इसुको धाबाको फेन्चा साइहि। 21हाइपानु वा मनमनताङ फोमपाका हिघाहि, “का वाको धाबा खिनिङ साइघा पानु बुङ का एल्धाङका।” 22कालाउ इसु घुरितेङ खाङलाउ इङको बेबालहेङ तिङहि रो दोअ्लि, “चामिन्दि, हिमत पा, नाङको खान्धुरसो नासेहेङ एल्पाका हि।” इङको दोङ घरि इङको बेबाल एल्हि।
23जेलाउ इसु हाकिमको साअ्ता थुकालिलोहि, वा बासुलि धुइपाका रो खारतेङ हिका द्याङगेलाइहेङ तिङहि। 24वा एम्बालाइहेङ दोअ्लि, “बाहार हानेसु, हाइपानु बेजान सिनाङ मान्थु, कालाउ बुङ निन्धाका हि।” एम्बालाइ वासेहेङ लेङपिहि। 25जोम्तेङ हिकालाइहेङ बाहार ओल्हेपाकान्हुअ्सो वा लिअ्ता दुल्हि रो इङको बेजानको खुर चाहि, कालाउ इङको बेजान जुरुक्पा ल्होहि। 26कालाउ इदोइ काथाको नावाइ माउजाको गोताङ थामेता चारचाराइहि।
कान्हा रो लाटा एल्का
27इसु इन्तासो हानेलाउ न्हेमि कान्हागेलाइ दामाता वासेहेङ पिताइतेङ र्हिकाइतेङ दोअ्हि, “दाउदको खाल केलाइहेङ दाया पा।” 28वा साअ्ता दुल्कान्हुअ्सो इङको न्हेमि कान्हागेलाइ बुङ इन्ताङ थुकालि लोहि। इसु एम्बालाइहेङ हिअ्हि, “का इदोइ पालि द्वाङका दोअ्तेङ हाइ नेलाइ खान्धुर पासुखेना?” एम्बालाइ वासेहेङ दोअ्हि, “एइ, प्रभु।” 29कालाउ वा एम्बालाइको मिँ साइपितेङ दोअ्हि, “नेलाइको खान्धुरमाफिक भाइपाङ नेलाइहेङ ज्याको।” 30कालाउ एम्बालाइ मिँ तिङका जेङहि। इसु एसा दोअ्तेङ एम्बालाइहेङ कारा हुकुम पितेङ दोअ्हि, “इदोइ काथा हासुहेङ बुङ मादोअ्सु।” 31कालाउ बुङ एम्बालाइ हानिहि रो इङको माउजाता वाको जस हिम्पागिल्हि। 32जेलाउ ओबालाइ ओल्हेतेङ हानेदोङघाहि, कालाउ मासान खोअ्का एमि लाटा द्याङ वाकोता चुमाहि। 33मासान ओल्हेपाकान्हुअ्सो इङको लाटा धुइका जेङहि। कालाउ “इस्राएलता हेअ्लाउ इसिका मातिन्हाहि” दोअ्तेङ द्याङगेलाइ भारभुसाइहि। 34कालाउ बुङ फरिसिगेलाइ दोअ्लि तेङहि, “मासानको गिर्हिसो इङको मासान ओल्हेपाखे।”#मत्ति १०:२५; १२:२४; मर्कुस ३:२२; लुका ११:१५
आतुइसा खेतालागेलाइ
(मर्कुस ६:३४; लुका १०:२)
35इसु गोताङ पुरगेलाइ रो देरागेलाइभारि एम्बालाइको कचहरिसाअ्ता बिद्या पितेङ सादेलको सारभिको रेम्काबानाल हिम्पातेङ द्याङगेलाइको गोताङ खाल्को एल्पातेङ हिगिल्हि।#मत्ति ४:२३; मर्कुस १:३९; लुका ४:४४ 36द्याङगेलाइको चेअ्सुमेअ्सुकाहेङ तिङतेङ वा दायाहि। हाइदोनु एम्बालाइ घोकालाइ मान्थुका भेरागेलाइभाइपाङ माउर्या जेङका हिघाखे।#गान्देका २७:१७; १ राजा २२:१७; २ इतिहास १८:१६; इजकिएल ३४:५; मर्कुस ६:३४ 37कालाउ वा ताइको चात्यागेलाइहेङ दोअ्हि, “बालि हेन्जाङ हि, कालाउ बुङ हाउलिगेलाइ आतुइसा हि।#लुका १०:२ 38इदोइभाअ्सिङ बालिको प्रभुहेङ ताइको बालि ल्होपालि हाउलिगेलाइ दिङगिलप्याको दोअ्तेङ पुकार पासु।”
ที่ได้เลือกล่าสุด:
मत्ति 9: DHIM
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2024 (Active), Wycliffe Bible Translators, Inc. All rights reserved.
