मत्ति 12
12
माइसाका दिनाको प्रभु
(मर्कुस २:२३-२८; ३:१-६; लुका ६:१-११)
1इङको पहर इसु माइसाका#१२:१ माइसाका जाइको माने “आरेका” जेङखे। दिनाता गहमको मिलिङ पाहासो हानेदोङघाहि। वाको चात्यागेलाइ म्हितुका हिघाखे रो गोहोमको सिसा पेङतेङ चालि तेङहि।#नियम २३:२५ 2कालाउ बुङ फरिसिगेलाइ इदोइ तिङतेङ वासेहेङ दोअ्हि, “खाङ, नाङको चात्यागेलाइ पुनित माइसाका दिनाता नियमता जेदोङ पालि मुनासिप मान्थु, इङकोङ पाखे।”
3कालाउ बुङ इसु एम्बालाइहेङ दोअ्हि, “दाउद, वा रो वाको दोसा हिकालाइ म्हितुलाउ हाइ पाका हिघाहि, हाइ नेलाइ धरम किताबता पर्हेका मान्थुसुन्हा? 4दाउद परमेस्वरको थानलिअ्ता दुल्तेङ परमेस्वरहेङ चार्हाइका तोले चाकाहिघाहि। इङको तोले चालि ना वासेहेङ, ना वादोफा हिकालाइहेङ, कालाउ बुङ धामिगेलाइ खिनिङ चालि दोघाहि।#१ समुएल २१:१-६; लेबि २४:९ 5आरोङ हाइ नेलाइ धरमकिताबता पर्हेका मान्थुसुन्हा? थानता धामिगेलाइ माइसाका दिनाता दिनाङ काम पाखे रो एसापा एम्बालाइ माइसाका दिनाको नियमहेङ बितुल पाखे। कालाउ बुङ एम्बालाइ दुसि माजेङखे।#गान्देका २८:९-१० 6कालाउ बुङ का नेलाइहेङ दोअ्खा, थानखान्तेङ बाराका हासु इता हि। 7कालाउ ‘का नेलाइको चार्हाइका भोक माको, भुरुङ नेलाइको दाया पाका भोखा’ दोअ्का माने नेलाइ गेका हिनु नेलाइ दुस मान्थुकाहेङ मादुसिसुधाना।#मत्ति ९:१३; होसे ६:६ 8हाइपानु का द्याङको चान माइसाका दिनाको बुङ प्रभु हिघा।”
9इन्तासो ओल्हेतेङ इसु एम्बालाइको कचहरिसाअ्ता हानेहि। 10इन्ता एमि खुर सेङका द्याङ हिघाहि। फरिसिगेलाइ इसुहेङ फतुर लागाइलि ठहर पातेङ वासेहेङ हिअ्हि, “हाइ माइसाका दिनाता हासुहेङ एल्पालि मुनासिप हि?” 11इसु एम्बालाइहेङ दोअ्हि, “नेलाइता हासुको एलोङ भेरा हि, माइसाका दिनाता इङको खाराता वालानु, हाइ ना इङकोहेङ बाहार माओल्हेपाना कुनु?#लुका १४:५ 12भेराखान्तेङ द्याङ हेथे हेन्जा मोलहिका मान्थु कुनु? इदोङखातिर माइसाका दिनाता भालाइ पालि मुनासिप हि।” 13कालाउ इसु इङको द्याङहेङ दोअ्हि, “नाङको खुर सोझापा।” इङको खुर सोझापाहि रो इङकोको खुर भेनेङ भाइपा रेम्का जेङहि। 14कालाउ बुङ फरिसिगेलाइ बाहार हानितेङ इसुहेङ हेसापा सेअ्लि द्वाङ दोअ्तेङ मतो पालि तेङहि।
परमेस्वरको साल्का सेबक
(मर्कुस ३:७-१२; लुका ६:१७-१९)
15कालाउ बुङ इसु इङको काथा गेतेङ वा इन्तासो हानेहि। हेन्जाङ द्याङगेलाइ वासेहेङ पिताइहि रो वा मासाअ्धेका झाराङहेङ एल्पाहि। 16कालाउ बुङ वा एम्बालाइहेङ, इदोइ बारेता हासुहेङ हाइदोङ मादोअ्सु दोअ्तेङ चेतानि पिहि। 17यसैया आगाधुइकासो दोअ्का कथन पोङघालि दोङ इदोइ जेङका एइ:
18“खाङसु, का साल्का काङको मोन्दाताका सेबक या दोङ हि।
वासेहेङ का हेन्जाङ दायाखा रो वादोफा का हेन्जा लेङचाका हिघा,
का ताइको हाङसा वासेहेङ प्याङका
कालाउ वा जात्या जात्याको द्याङगेलाइहेङ नियाको पारचार पावा।#यसैया ४२:१-४
19वा ना चेरस्वावा ना हेन्जा चिय्हास्वावा, ना हासुङ इङकोको गाला दामागेलाइता हिनावा।
20भोइका नाले वा माथुरावा,
सिलितोम्का गिसा वा मासेअ्तावा,
रो न्हुअ्सो निसापहेङ जितिकाथिकापा थुकापावा।
21इङकोकोङ मिङता जात्या जात्यागेलाइ आस ताअ्तावा।”
इसु रो दियाबलस
(मर्कुस ३:२०-३०; लुका ११:१४-२३)
22कालाउ द्याङगेलाइ मासान खोअ्तेङ कान्हा रो लाता जेङका एमि द्याङहेङ इसुकोता चुमाहि। इसु इङकोहेङ एल्पाहि, कालाउ इङको कान्हा रो लाता द्याङ धुइका रो तिङका जेङहि। 23कालाउ झाराङ द्याङगेलाइ भारभुसाइतेङ दोअ्हि, “हाइ या दोङ दाउदको खाल कुनु?” 24कालाउ बुङ इदोइ हिङतेङ फरिसिगेलाइ दोअ्हि, “इदोइ द्याङ मासानको गिर्हि दियाबलस#१२:२४ दियाबलस जाइहेङ “मासानको गिर्हि,” “दियाबलस” रो “बालजिबुल” दोअ्खे।सो खिनिङ मासानगेलाइहेङ ओल्हेपाखे।”#मत्ति ९:३४; १०:२५
25कालाउ बुङ इसु एम्बालाइको ठहर गेतेङ एम्बालाइहेङ दोअ्हि, “हिदि बुङ मुलुकता मामिलिसुका हिनु इङको मुलुक ताइमिङ मुअ्तावा। एन्साङ पातेङ हिदिङ पुर माकोनु खालता मामिलिसुतेङ पाल्सुनु इङको बुङ मुअ्तावा। 26एन्सा दोङ दियाबलस दियाबलसहेङ ओल्हेपानु, इङको ताइमिङ खेङन्हावा रो एन्सानु इङकोको सारभि हेसापा आरेलि द्वावा कुनु? 27एन्सा दोङ का दियाबलससो मासानगेलाइ ओल्हेपाखा पानु, नेलाइको चात्यागेलाइ चाहिँ हासुसो इङको ओल्हेपाखे? एन्सानु नेलाइको ताइको चात्यागेलाइ दोङ नेलाइहेङ फतुर लागायावा। 28कालाउ बुङ परमेस्वरको हाङसासो का मासान ओल्हेपाखा पानु, परमेस्वर राज पाका पहर नेलाइको माझाता लोलिदोका हि।
29“हिङसु, लाम्फा बोल्याका द्याङहेङ माधेउसिङ, इङकोको साअ्लिअ्ता दुल्तेङ हासु इङकोको मालमाता चुमपुतेङ हानेलि द्वावा? आरोङ इङको बोल्याका द्याङहेङ धेउकान्हुअ्सो खिनिङ इङकोको साअ् घिङलि द्वावा।
30“जाइ काङकोदोसा मान्थु, इङको काङको बिरुद्धता हि। जाइ कादोफा माजोम्पाखे, इङको राइन्हा पाखे।#मर्कुस ९:४० 31एन्साङ का नेलाइहेङ दोअ्खा, द्याङगेलाइको पाका गोताङ कुकरम रो बादनामि माफ ज्यावा, कालाउ बुङ पुनित हाङसाको खिलापता पाका बादनामि हेअ्लाउ माफ माज्यावा। 32हासुङ का द्याङको खिलापता हाइदोङ दोअ्हि पानु इङकोहेङ माफ ज्यावा, कालाउ बुङ हासुङ पुनित हाङसाको खिलापता धुइहि पानु इङकोहेङ इदोइ जुगता रो लोका जुगता बुङ माफ माज्यावा।#लुका १२:१०
सिङहेङ वाको फलसोङ नाल्खे
(लुका ६:४३-४५)
33“साअ्धेका सिङ साअ्धेकाङ फल सेपाखे। मासाअ्धेका सिङ मासाअ्धेकाङ फल सेपाखे। सिङ हिसिका हि दोअ्तेङ वाको फलसो दोङ नाल्खे।#मत्ति ७:२०; लुका ६:४४ 34ओइ बिसहिका पुह्याँको जामालाइ! नेलाइ ताइमिङ आसाति हिसुन्हा, रेम्का काथा हेसापा धुइलि दोस्वाना? हाइदोनु जेदोङ काथा लिअ्ता पोङघाका हिखे इङको दोङ बाहार ओल्हेखे।#मत्ति ३:७; १५:१८; २३:३३; लुका ३:७; ६:४५ 35रेम्का द्याङ ताइमि लिअ्ता पोङघाका रेम्का काथासो रेम्काङ काथा ओल्हेपाखे, कालाउ बुङ आसाति द्याङ ताइमिता पोङघाका आसातिसो आसाति काथा दोङ ओल्हेपाखे। 36का नेलाइहेङ दोअ्खा, ‘जाइ माजेङका काथा धुइखे, नियाको दिनाता एम्बालाइ इङकोको हिसाब पिलिगोयावा।’ 37हाइपानु नेलाइ धुइका काथासो दोङ नेलाइ नियाको दिनाता दुस माकोनु दुस मान्थुका जेङस्वाना।”
भारभुसाइका काम खाङलि भोका
(मर्कुस ८:११-१२; लुका ११:२९-३२)
38कालाउ धरममास्टर रो फरिसिगेलाइता आधेमि इसुहेङ दोअ्हि, “मास्टर, केलाइ नासो एलोङ भारभुसाइका काम खाङलि भोन्हाखे।”#मत्ति १६:१; मर्कुस ८:११; लुका ११:१६ 39इसु एम्बालाइहेङ दोअ्हि, “आसाति रो कासबिरि खाल चिन्हो भोखे। कालाउ बुङ इदोइ खालहेङ योना आगाधुइकाको चिन्होबाहेक बो चिन्हो माप्यावा।#युहन्ना १:१७-२:१०; मत्ति १६:४; मर्कुस ८:१२; योना १:१-४:११ 40हाइपानु जेसापा योना बारका हायाको हेमुङलिअ्ता सुम दिना रो सुम न्हिसिङ हिघाखे, एन्सा दोङ का द्याङको चान बुङ भोनोलेता सुम दिना रो सुम न्हिसिङ ह्यावा।#योना १:१७ 41नियाको दिनाता निनबेको द्याङगेलाइ इदोइ खालको द्याङगेलाइदोफाङ जाअ्तेङ फतुर लागायावा, हाइपानु योना पारचार पालाउ एम्बालाइ कुकरम पालि लाअ्का हिघाखे। कालाउ बुङ खाङसु, योनाखान्तेङ बाराका एमि इता हि।#योना ३:५ 42माहेँको रानि नियाको दिनाता इदोइ खालको द्याङगेलाइदोफाङ जाअ्तेङ वासेहेङ फतुर लागायावा, हाइपानु वा दुनियाको ओदोइ कोन्हासो सोलोमनको आकिलको काथा हिङलि लोहि। कालाउ बुङ खाङसु, सोलोमनखान्तेङ बाराका एमि इता हि।#१ राजा १०:१-१०; २ इतिहास ९:१-१२
मासान हाङसा घुरितेङ लोखे
(लुका ११:२४-२६)
43“जेलाउ मासानआत्मा द्याङसो ओल्हेतेङ हानेखे, इङको माइसालि भोतेङ सेङका थामेभारि हिगिल्खे, कालाउ बुङ हिसोङ मानिङखे। 44कालाउ इङको दोअ्खे, ‘जेतासो का ओल्हेतेङ लोघा, इङकोङ थामेता घुरितेङ हानाङका।’ घुरितेङ लोलाउ इङको थामे खालि, थाइथाइका रो साजाइतेङ ताअ्का निङखे। 45कालाउ इङको हानिखे रो ताइमिखान्तेङ हेन्जा आसाति बो न्हिअ् लोङ मासानआत्मा ताइमिदोफा चुमाखे रो लिअ्ता दुल्तेङ एम्बालाइ इन्ता बासा हिखे। कालाउ इङको द्याङको न्हुअ् दासा लाम्फाखान्तेङ मारेम्का जेङखे। इदोइ आसाति खालको द्याङगेलाइहेङ बुङ इन्सिकाङ ज्यावा।”
इसुको आमाइ रो ओनेगेलाइ
(मर्कुस ३:३१-३५; लुका ८:१९-२१)
46इसु जोम्कालाइदोफा धुइकाताङपालाउ, वाको आमाइ रो ओनेगेलाइ बाहार जाअ्तेङ हिघाखे रो वाकोदोफा काथा पालि भोघाखे। 47कालाउ एमि इसुहेङ दोअ्हि, “खाङ, नाङको आमाइ, नाङको ओनेगेलाइ बाहार जाअ्तेङ हि रो नाङकोदोफा काथा पालि भोदोङखे।” 48वाकोदोफा धुइकाहेङ इसु दोअ्हि, “काङको आमाइ हासु हि? काङको ओनेगेलाइ हासु हि?” 49कालाउ वा ताइको खुरहोइ चात्यागेलाइहेङ तिम्पातेङ दोअ्हि, “खाङसु काङको आमाइ रो ओनेगेलाइ। 50हाइदोनु जाइ सादेलता हितेङहिका काङको परमेस्वर आबाको काथा मानिखे, एम्बालाइ दोङ काङको दादा ओने रो काङको आमाइ एइ।”
ที่ได้เลือกล่าสุด:
मत्ति 12: DHIM
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2024 (Active), Wycliffe Bible Translators, Inc. All rights reserved.
