मर्कस् 2
2
1ओहाङःसैको दस् पन्र दीन् पुत्आक्तीको येसु कफर्नाहुम्ताङ् पाय्ह्ती वाङ्आकाय्। कफर्नाहुम्ताङ् पाय्ह्ती वाङ्आक्तीको “लौ येसु कीम्ताङ् पाय्ह्ती वाङ्ओआः” त दाय्ह्ती नोःकाय्ती 2नाःतो मान्तालम् ओउःकोः कीम्ताङ् हुम्लाङ् वाङ्आकाय्। हुम्ती वाङ्तोक्हाङः ओउःच्युक् नाःतो हुम्ती झ्यान्ते दय्ह्लौहाङः यातैचाक् चीङ्सा चोःचोङ्कोता थाव्मा नाःल। ओउः हुम्ती वाङ्ओलम्कायः येसुइ परमेस्वर्कोः कुरा स्यान्ती तोआथास। 3ओहाङःसैको ओउःइ स्यान्ती तोतोक्हाङःपाय् यात्चाक् जुगाङ् वाह्सा खाय्मालो मान्ताकायः न्हाप्लावःहाङः चार्जनइ लात्ती वानःआकानी। 4ओउःमयःइ येसुकःताङ् वानःसा बोङःनीतो नाःतो मान्ता नाःचाःराःत हुम्ती झ्यान्ते ओउःकःताङ् द्याङ्तो वानःसा दोःइली। ओउःकायः येसुकःताङ् वानःसा दोःमाःत झ्यान्ते ओउः चार्जनइ ओउः जीक्ओकायः कीम्कोः छानाताङ् लात्ती आलःती कीम्कोः छाना बल ल्ह्युती होल्ह्ताक्ती ओउःकायः घाङ्सै योल्ह्ती न्हाप्लावःहाङः ला छुःती येसुकःताङ् ओम्त क्लाःती ल्होक्आकानी। ओउःकःताङ् ल्होक्तोक्हाङः एत हायःओ च्यवःती “लौ इ मान्तालम्इजा ङाकायःजा आन ङ्हाम्नाःताङः रैस बा” त म्हर्ती येसुइ ओउः जीक्ओचाक्कःताङ् ल्हेःती 5“लौ हौय नाङ्इ जाङ्ह्ओ रेव्ओ काम्लम् द्याह् क्युम्ह्ती वाय्ओ लेःआः” त दाय्ह्ती तोआथै। 6ओउःत तोतोक्हाङः धर्मा स्यान्ओमयःइ सायःती मुओ खेःइतो 7“लौ इ मान्ताइपाय् दोह् हायःती इतलेः तोनौ। इत तासाकायः ‘ङापाय् परमेस्वर् लेःआः ङ’ त ताःनाःस बा। परमेस्वर्इ ह रेव्ओ काम् क्युम्ह्ती वाय्सा खाय्नौ” त दाय्ह्ती ओउः धर्मा स्यान्ओमयः लयःकोः ल्हुङ्हाङः म्हर्इतो 8येसुइ ओउःमयःकोः ल्हुङ्तुक्कोः कुरा चीःती झ्यान्ते “लौ दोह् हायःतीतेः इतलेः पेमालो ल्हुङ्हाङः म्हर्तेःनै। 9गाव्खे सजीलो त तोनाङ्स दा। वाह्सा खाय्मालो चाक्कायः ‘लौ नाङ्इ जाङ्ह्ओ रेव्ओ काम्लम् क्युम्ह्ती वाय्ओ लेःआः’ त दाय्ह्साया ‘लौ च्योक्अ नाङ्कोः न्हाप्लावः लात्ती वाह्अ’ त दाय्ह्ती ओउःकायः स्याक्ताक्साया गाव्खे सजीलो तोनाङ्स दा 10लौ ङा मान्ताकोः चोः त तोओपाय् ल्हाव्ह्दैबाङ्कोः रेव्ओ वाय्साकायःमा स्याक्ताक्साकायःमा ग्वम् दोःआलाङः त नीङ्कायः छ्यानःसाकायः ङाइ इकायः द्याह् स्याक्ताक्लेःनाङः” त दाय्ह्ती ओउः जीक्ओ मान्ताकःताङ् फेरी ल्हेःती 11“लौ च्योक्अ नाङ्कोः न्हाप्लावः लात्ती वाह्अ दा” त दाय्ह्ती ओउः जीक्ओ मान्ताकायः तोआकान् 12ओउःत तोओ कुस्ब्रक्त ओउः मान्ता च्योक्ती लयःकोः न्हाप्लावः खुम्ती लात्ती पाय्ह्आ। ओउः ङ्हा वाह्सा खाय्आक्मालो मान्ता च्योक्ती पाय्ह्ओ च्यवःती ओउः कीम्हाङः मुओलम् आन ग्याङ्ह्ती झ्यान्ते परमेस्वर्कायः लुङ्ती ताङ्ह्ताक्आथै “लौ इलो ताङ्ह्ओ कुरा ङीइ ङ्हासै गलमा च्यवःआक्तय्ह्नीली” त दाय्ह्तो नोःकाय्आकाय्।
13ओहाङःसैको कीम्सै ग्ल्युङ्ह्ती येसु ताङ्ह्ओ दुम्हान् तीःकोः छेव्हाङः वाह्ती ओउःकुस् हुम्ती वाह्ओलम्कायः स्यान्ती तोआकान्। 14ओहाङः वाह्तोक्हाङः येसुइ आल्फीयस् त तोओकोः चोः लेवीलेः त तोओ पैसा उथावओ आफीस्हाङः काम् जाङ्ह्ती मुओ च्यवःआकान्। ओउःकायः च्यवःती “लौ ङाकुस् वाह्अ” त दाय्ह्ती येसुइ तोआथै। इत तोआक्तीको उया लेवीपाय् चीङ्ती येसुकुस् वाह्आकाच। 15ओहाङःसैको वाह्ती ओउःकोः कीम्ताङ् आल्ती पोक्ती लेवीइ येसुकायःमा ओउःकुस् वाह्ओमयःकायःमा भोस् जाङ्ह्आकान्। भोस् जेःतोक्हाङः नाःतो अरु पैसा उथावओलम्मा अरु पेमालो मान्तालम्मा येसुकायः गुल्ह्ती वाङ्ती ओउःकुस् भोस् जेःआकानी। 16ओहाङःसैको ओउः मान्तालम्पाय् येसुकुस् ब्रेङःती जेःती मुतोक्हाङः यात्नीस् फरीसीलम्मा धर्मा स्यान्ओमयःइमा इत च्यवःती येसुकुस् वाह्ओमयःकःताङ् वाङ्ती “लौ इलो खेःओ पैसा माःती जेःओमयःमा अरु रेव्तो जाङ्ह्ओलम्कुस्मा ओउःइ दोह् हायःती ब्रेङःतीलेः जेःती तुङ्ती मुनाः” त दाय्ह्ती व्हत्नीतो 17ओउःमयःइ व्हत्ओ कुरा येसुखेइ सायःती “सेलः मुओ मान्ताखेकःताङ् दाक्तर् स्याक्ताक्लाङ् वाङ्सा परल जीक्ओ मान्ताकःताङ् ह वाङ्सा ज्योनाः। ओउःलो लेखालेः ङापाय् पेओ मान्ताखेकायः खेःल पेमालो मान्ताखेकायः ह ‘लौ नीङ्कोः रेव्ओ काम् फेती ङाकोः पेओ काम् जाङ्ह्नु’ त दाय्ह्ती तोलाङ् वाङ्ओआः ङ” त दाय्ह्ती येसुइ तोआथास।
18ओहाङःसैको ओनम्कोः दीन्लम्हाङःपाय् बाप्तीस्मा बयःओ युहनाकुस् वाह्ओमयःइमा ओउः फरीसीकुस् वाह्ओमयःमा उपाङ् काःओ खेःइतो। ओउःमयः येसुकःताङ् वाङ्ती “लौ युहनाकुस् वाह्ओ मान्तालम्खेइमा फरीसीकोः मान्तालम्खेइमा उपाङ् काःओ जवनानी दोह् हायःती नाङ्कुस् वाह्ओमयःखेइ ओउःतलेः जवनीली” त दाय्ह्ती येसुकायः व्हत्आकानी। 19“लौ बीहाताङ् वाङ्ओ पहुनालम्इ बीहाकोः भोस् जेःनानी माःदै। भाव् मुतोक्हाङः पहुनालम्कःगन सुइमा उपाङ् काःइसीली। 20लोने वाङ्सा दीन्लम्हाङः भाव्पाय् ओउःमयःकःसै आल्आक्तीको ह उपाङ् काःनाःइसी। इलो लेखालेः ङा मुमुबालेहाङः ङाकुस् वाह्ओमयःपाय् उपाङ् काःसा परइली। ङा आल्आक्तीको ह उपाङ् काःनाःइसी” त दाय्ह्ती येसु त्याङ्आ। 21“लौ आय् नाय्हाङः सुइमा रौ नाय्इ काप्नीली। रौ नाय्इ काप्ओ त खेःया ओउः रौ नाय्इ प्रान्ह्ती आय् नाय्कायः न्हाङ्तोलेः पङःताक्ती वाय्ताक्नौ बा। 22फेरी रौ धाक्सायःकोः तीः आय् वङ्ह्ओ पोम्हाङः बोमःती काःनीली उया स्योङ्ती पक्ताक्ती पोम्मा तीःमा वाय्चाः। रौ धाक्सायःकोः रौ पोम्हाङः कानानी। इलो लेखा ङाकोः नया कुरा आय् जवओ कुराकुस् ब्राङ्चल” त दाय्ह्तीमा येसु दाय्ह्आ।
23ओहाङःसैको यहुदी मान्तालम्कोः काम् न्यास्ती धोओ दीन्हाङः येसुमा ओउःकुस् वाह्ओमयःमा गहुङ् राङ्हाङः च्योल्ती वाह्ओ खेःइतो। च्योल्ती वाह्तोक्हाङः येसुकुस् वाह्ओमयःइ गहुङ्कोः चुय् जेःसाकायः काव्ह्आकानी। 24ओउःमयःइ चुय् काव्ह्ती जेःओ च्यवःती फरीसीलम् येसुकःताङ् वाङ्ती “योउ दै इ ङीइ जवओ धोओ दीन्हाङः नाङ्कुस् वाह्ओमयःइ दोह् हायःती इतलेः चुय् काव्ह्ओ काम् जाङ्ह्नानी। धोओ दीन्हाङः दोह् काम्मा जाङ्ह्सा स्याव्ल बा” त दाय्ह्ती जान्ती तोनीतो 25-26“लौ उय्ह्लेकोः दावुद् राजाइ दोह् दोह् जाङ्ह्ओ नीङ्इ पह्रती चीःतेःनीलीया। अबीआथार् प्रधान् पुरोहीत् खेःतोक्हाङः दावुद्मा ओउःकोः साथीलम्मा योङ्क्राय् सीती झ्यान्ते दावुद्इ परमेस्वर्कोः मन्दीर्हाङः पोक्ती परमेस्वर्कायः ल्हाती गम्ओ लाङ् रोत्ती जेःसाकायः आलःआकान्। ओउः लाङ्पाय् सुइमा जेःसा स्याव्ल ओउः मन्दीर्कोः पुरोहीत्लम्इ ह जेःसा स्याव्नाः त जवती गम्ओ मुनाः। ओउःत जवओआः दावुद्इमा जेःआकान् ओउःकोः साथीलम्कायः जेःसाकायःमा बयःआकान्। 27लौ धोओ दीन्लम्खे मान्ताकायः जवती गम्ओआः मान्ताखे धोओ दीन्कायः जाङ्ह्ओआः खेःइली। 28ओउःत झ्यान्ते ङा मान्ताकोः चोः त तोओपाय् धोओ दीन्हाङः दोह् काम्कायःमा ‘इखे जाङ्ह्सा स्याव्लेःनाः ओउःखे स्याव्ल’ त हुकुम् बयःसा प्रभुलेः खेःनाङः” त दाय्ह्ती येसु दाय्ह्आ।
ที่ได้เลือกล่าสุด:
मर्कस् 2: CDM93
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 1993 Wycliffe Bible Translators Inc., All Rights Reserved.
