मत्ती 19
19
1ओउःतलेः येसुइ तोआथास ओहाङःसैको तोआक्तीका येसु गालीलसै आल्ती यहुदीया देस्हाङः योर्दन् खोलाकोः उःसै दाह्आकाय्। 2ओहाङः दाह्आक्तीको फेरीलेः मान्तालम् येसुकःताङ् काःहाल्लाङ् हुम्ती वाङ्आकाय्। वाङ्आक्तीको जीक्ओलम्कायः येसुइ सबै स्याक्ताक्आकान्। 3ओहाङःसैको फरीसी त तोओलम् येसुकःताङ् ल्हुङ्तुक् कुःती योलाङ् वाङ्ती “लौ गोय्चोःपाय् लयःकोः बुधीकायः दोह् खेःयाकायःमा सीङ्का तात्ती बयःसा स्याव्नाःया स्याव्लया गततेः तोनाःताङी” त दाय्ह्ती व्हत्थातो 4“ल्हाव्ह्दैबाङ्कोः तोहा जाङ्ह्तोक्हाङः परमेस्वर्इ गोय्चोःमा मोमःचोःमा नीस् खाल् जाङ्ह्ती 5‘लौ गोय्चोःपाय् लयःकोः आमा आपाकोः कीम् फेती लयःकोः बुधीकुस् भेनाःच। ओहाङःसैको ओउःनीस् पय्क्चाः आङ् ब्राङ्ती काःतय्ङ्ह्ती यातैज्योः मान्तालो लेखा स्याव्नाःच’ त उय्ह्लेकोः आखरःहाङः लेखओ नीङ्इ पह्रतेःआकानी माःर। 6ओउःनीस्पाय् यातैज्याङ् स्याव्नाःच ओउःत झ्यान्ते सुसु पय्क्चाःनीस्कायः परमेस्वर्इ काःतय्ङ्ह्ताक्आथाच ओउःनीस्कायः सुइमा फेकाय्ताक्लाम्” त दाय्ह्ती येसु त्याङ्आ। 7“ओउःत खेःया मोसाइ दोह् हायःती ‘लौ सीङ्का तात्ओ कागत् लेखआक्तीको मान्ता लयःकोः बुधी फेसा स्याव्नाः’ त दाय्ह्ती आखरःहाङः तोओ लेःआः” त दाय्ह्ती फरीसीलम्इ येसुकायः द्यानःती व्हत्आथै 8“नीङ्कोः ल्हुङ् चाक्तो स्याव्ती झ्यान्ते परमेस्वर्कोः ङ्हा बयःओ कुरा सायःसा ग्यातेःइली ओउःत खेःओकायः ह मोसाइ सीङ्का तात्ओ जाङ्ह्सा ताक्ओ खेःतो। परमेस्वर्इ ङ्हासै तोओ कुरा खेःल। 9‘सुसु लयःकोः बुधी फेती अरु मोमःचोः वानःचानी ओउः मान्ताइलेः जार् जाङ्ह्नानी’ त ङाइलेः तोनेःनाङ्स। मान्ताकोः बुधी अरु गोय्चोःकुस् एनःओकायः ह ओउःत पेमालो बुधीकायः फेसा स्याव्नाः” त दाय्ह्ती येसु त्याङ्आ। 10ओउःत त्याङ्ओ येसुकुस् वाह्ओमयः सायःती “लौ ओउःत खेःया मान्ता बुधी वानःमालो मुसालेः पेनाः” त दाय्ह्ती येसुकुस् वाह्ओमयः नोःआकाय्। 11“लौ बुधी वानःमालो मुसा नाःतो मान्तालम्इ खाय्नीली परमेस्वर्इ बयःओ ह मान्तालम् एत मुसा खाय्नानी। 12कोय् मान्तालम्खे ओत्ओहाङःसै बुधीपाय् परल कोय् मान्तालम्खे अरुइ तात्ओ त खेःओ बुधी परल। अरुपाय् परमेस्वर्कोः राजीकोः काम् जाङ्ह्साकायः लयः झाक्ती बुधी वानःमालो मुनै। सुसु बुधी वानःमाःत मुसा ग्यानै लौ ओउःपाय् बुधी वानःमाःत मुपै” त दाय्ह्ती येसुइ तोआथास।
13ओउःतलेः येसुइ तोआथास ओहाङःसैको तोआक्तीको मान्तालम्इ हौलम् येसुकःताङ् वानःती “इमयःकायः क्रुत् झाम्ह्ती परमेस्वर्कायः पेतो तोउ दै” त दाय्ह्ती वानःनीतो “लौ इ हौलम्पाय् येसुकःताङ् वानःलाम्” त दाय्ह्ती येसुकुस् वाह्ओमयःइ जान्ती तोआथास। 14हौलम्कायः वानःसा ताक्नीली त येसुइ च्यवःती “खेःल हौलम् त्याःमाःत ङाकःताङ् वाङ्पै। इ हौलो खेःओ मान्ता ह परमेस्वर्कोः राजी मुसा दोःनै” त दाय्ह्ती येसुइ तोआकान्। 15एत तोआक्तीको येसुइ क्रुत्इ झाम्ह्ती परमेस्वर्कायः तोआकान्। ओहाङःसैको सबैकायः तोआक्तीको येसु उःसै आल्आ।
16ओहाङःसैको आल्तोक् बेलाहाङः यात्चाक् येसुकःताङ् वाङ्ती “अ गुरुय गलमा द्योक्मालो रौ जीङः दोःसाकायः ङाइ द्याह् दोह् पेओ काम् जाङ्ह्सा खेःनाङः ती” त दाय्ह्ती व्हत्थातो 17“दोह् हायःतीतेः ङाकायःपाय् ‘पेओ काम् दोह्लो’ ततेः व्हत्तेःनाःची। यातैज्याङ् परमेस्वर्कायः ह ‘पेओ लेःआः’ त तोसा खेःनाः। लौ नाङ् रौ जीङः दोःसा झाक्तेःनाः त खेःया परमेस्वर्इ उय्ह्लेहाङः गानाक्ती बयःओ कुरा सायःती जाङ्ह्उदा” त दाय्ह्ती येसु त्याङ्आ 18“गाव्खे जाङ्ह्सा आने” त दाय्ह्ती ओउः मान्ता व्हत्थातो “मान्ताकायः सात्लाम् अरुकोः बुधीकुस् जार् जाङ्ह्लाम् अरुकोः माल्ताल्लम् कुःलाम्। अरुकायः माःती तोओ कुरा नोःलाम् 19लयःकोः आमा आपाइ तोओ कुरा पेतो वाय्क्तोलेः जाङ्ह्उ। नाङ्कुस् ब्रेङःकाय्ती याक्ओ मान्तालम्कायः लयःकायःच्युक् राप्ती स्यास्उ” त दाय्ह्ती येसु त्याङ्आ। 20“इ ङाइ हौलम् खेःतोक्हाङःसैकोः जुदालेः सायःती गम्आलाङः। अरु दोह् हायःसा खेःनाङः” त दाय्ह्ती ओउः मान्ता फेरी व्हत्आकान्। 21“नाङ्इ जुगाङ् पेतो हायःसा झाक्तेःनाः त खेःया लौ पाय्ह्ती नाङ्कोः सम्पती दोह् गुच्युक् मुनाः ओउःच्युक्लेः जुदा वीनःउ दा। वीनःआक्तीको ओउःकोः मोल्कोः पैसापाय् जेःसा दोःमालो ह्र्यात्लम्कायः वेःती बयःउसु ओहाङःसैको ओउः जुगाङ् फेती ङाकुस् वाह्अ। ओउःत हायःआक्तीको लाङ्काहाङः नाङ्कायः आनतेः दोःतेःनाः बा” त दाय्ह्ती येसुइ तोथातो 22ओउः कुरा सायःती ओउः मान्ता आन लीह्ती पाय्ह्अ। ओउःपाय् आन साहु खेःतो फेरी बुधा मान्ता खेःआक्ल। 23ओउः मान्ता लीह्ती पाय्ह्ओ च्यवःती “दोङ्सी दाय्ह्भनाङ् ओउःच्युक् नाःतो नाःओ मान्ताकायः परमेस्वर्कोः राजीताङ् पोक्सा आन चाक्तो लेःआः बा। 24माः रैस पैसा झाक्ती क्युओ मान्ता परमेस्वर्कोः राजी आन चाक्जेःतो। माः है उत्स्याःपाय् ग्याप्कोः घाङ्हाङः योल्ह्ती ज्याल्ओसै साहु मान्ता परमेस्वर्कोः राजीहाङः पोक्सा चाक्लेःनाः बा” त दाय्ह्ती येसुइ तोआथास। 25ओउःत तोओ सायःआक्तीको येसुकुस् वाह्ओमयः आन ग्याङ्ह्ती “ओउःत खेःया सुलो परमेस्वर्कोः राजीहाङः पोक्ती रौ जीङः दोःचै” त दाय्ह्ती नोःकाय्आकाय्। 26ओउःमयः नोःकाय्ओ कुरा येसुइ चीःती “एत जाङ्ह्साकायः मान्ताखेइ जुगाङ् खाय्नीली परमेस्वर्खेइ दोह् खेःयाकायःमा जाङ्ह्सा खाय्आनौ” त दाय्ह्ती येसुइ ओउःमयःकायः थेःती तोआथास। 27“लौ ङीपाय् जुदाकायःलेः फेती नाङ्कुस् वाह्ओ लेःआः ङी। ङीपाय् दोह्लो दोःनाङी” त दाय्ह्ती पत्रुस्इ व्हत्थातो 28“दोङ्सी दाय्ह्भनाङ् नीङ् ङाकुस् वाह्ओमयःपाय् लोने ओउः मान्ताकोः चोःत तोओकोः नया राजीहाङः आङ्ग थाङ्गत ताङ्ह्तो हुकुम् बयःओ स्याव्ओहाङः नीङ्मा बारगोता राजाकोः थाव्हाङः च्युङःती ओउःकुस् इस्राएल्कोः बार खलक्कायः तय्छनःती योतेःनानी। 29फेरी सुसुइ ङाकोः काम् जाङ्ह्साकायः लयःकोः आमा आपालम् चोःलम् नाःचोङ् पुःचोङ् बुधीमा कीम्लम्मा राङ्लम्कायःमा फेबत्नाःताङः ओउः मान्तालेः लोने आन नाःतो दोःनै। रौ जीङःमा दोःनै। 30ओहाङःसैको नाःतो तेन्छ्याङ्कोः ताङ्ह्ओ मान्तालम्सै लोन्तेसै मीतो स्याव्नै अरु तेन्छ्याङ्कोः मीओलम्खे लोन्ते ताङ्ह्तो स्याव्नै” त दाय्ह्ती येसुइ तोआथास।
ที่ได้เลือกล่าสุด:
मत्ती 19: CDM93
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 1993 Wycliffe Bible Translators Inc., All Rights Reserved.
