Matyiu 24
24
1Ka Jisus a věngěmě, ka Mâ‐a puma o těmpěl; ka beyokwedi beaju bea viya o Mâ‐a jadi, ka levidě Mâ‐a ilongidi ja těmpěl. 2Ka Jisus a vâ na bâ, na, Wa yěněkěni belombo těkabe beěhěpi? Pâkwěpâkwě, Mbi vâki n‘ inyěni, na, Wa dikane okava ilale kahamango ipâkwě, i ka měndě i sajwě.
3O Mâ‐a diyakidi diya o ukodi mua Âlives, ka beyokwedi bea viya o Mâ‐a jadi ikutakuta, na, Langwakiya hwě, egombe ya belombo těkabe e ka diyě? na ndembo y‘ iviya jâvě, na ya ihuku ja he e ka diya lě na e? 4Ka Jisus a timbwana bâ, na, Bandamakiděni o banga moto a temidě inyěni. 5Ikabojana baitě ba ka viyandi na dina jamě, na, Umba ndi Kraist; vâkâna ba ka temidi baitě. 6O ka yokandini beduka na sango ja beduka: yěněkěteni wa vavaleni: ’kabojana belombo těkabe beěhěpi be ka hamandi, ndi ihuku i ha pâye. 7Yeně ’tomba e ka yani na epâkwě, dině ipangiya na ipâkwě; usalâku, na bevuva, be ka diyandi, na he ninganakě o loboko lâkâ. 8Belombo těkabe beěhěpi ndi jali ja ngěbě. 9Vâkâna ba ka kândândi ’nyěni ka yěnudwě majili, na bâ‐ba ka weyaka ’nyěni: o ka binakwěni na betomba beěhěpi o nyanga ya dina jamě. 10Baitě ba ka kâbândi, na bâ‐ba ka kândânâkâ, na bâ‐ba ka binanaka. 11Basâki ba bojowa baitě ba ka těměndi, na bâ‐ba ka temakidě baitě. 12N‘ ikabojana bobe bo ka diyi boitě, itândě ja baitě i ka vâtândi. 13Ndi a ka lilimidě kwanga nal‘ ihuku, mâ tepě a ka yongě. 14Sango tě eyamu ya ipangiya ja Hěvěn ekaně e ka hamanudwěndi o he yěhěpi, ilanguwa ja betomba beěhěpi; vâkâna ihuku i pândi.
15Nandi ’nyěni o ka yěněni elombo e binakwě ya ujilo (ya usâki Danyěl e kalakidi) de o iboko via hole (a langakě, a bweyakidě,) 16nandi ba jadi o Judia ba kweyake o mekodi; 17a jad‘ o ndabo oba a hubake pě ka nângâ elombo o ndabo ’aju: 18tombe na, a jad‘ o mwanga aa timbake o mbuhwa ka nângâ ngâi jaju. 19Majili na ba ka diyě na memi, na ba ka diyě ba nyangakě o hwi tědině. 20Kalakiyani na ikweya janyu i diyake o ’gombe y‘ ivěvu, tombo na buhwa boa Iyâjâ. 21Ikabojana etuniya eněně e ka diyandi, e ha diyete oviya jali ja he na pâ kya těkaně; e! ya diye tepě epâkwě njo. 22Kabo hwi tědině ja vuvudwě, ya diye na moto a ka yongwě: ndi hwi tědině i ka vuvudwěndi o nyanga ya bato ba di pânwěngo. 23Nandi, oningě moto a vâ n‘ inyěni, na, Yěněkěteni, Kraist a nd‘ okava, na ba ’kavaně: o kamakiděni. 24Ikabojana Kraist ja bojowa i ka pândi, na basâki ba vela ba ka levidi ndembo na megoma; e jaka na e na ngudi e hamakě, te ba ka temiděndi ba pânwěngo. 25Yěněkěteni, Mbi tind‘ o languwa ’nyěni. 26Oningě ba vâ n‘ inyěni, na, Yěněkěteni, a nd‘ o nginga; O valaken‘ ovoně: Yěněkěteni, a nd‘ o ilika via ’kutakuta; O kamakiděni. 27Ikabojana ka epělupělu e vakiya o mbuhwa, na yâ e panyaka na ’la ulânga: nonaně tepě iviya ja Mwana moto i ka diyě. 28Ikabojana iboko via ubimba vi jadi viâ ndi via mbela vi ka diyě kotakota.
29Elěngiaha etuniya ya hwi tědině ya tomba vâkâna joba i vindindi, ngândě ya věye unanga muaju, nyětěti i ka kwandi oviya oba, ngudi ja oba i ka ninganěndi. 30Běngě nandi nděmbo ya Mwana moto e pumakiyě oba: běngě makaka měhěpi ma he ma yakě, ba ka yěněndi Mwana moto a vaka na bevindi bea oba na ngudi na ivend‘ iněně. 31Vâkâna A lomindi enjěl jaju na joyi iněně ja heba, na bâ‐ba ka yolakě ibaju ba pânwěngo oviya mahuku ma he manai, oviya pělě ya oba pâkâ nala ’pâkwě.
32Yokwakani, ukanakâdi mua ele ya itâla: Oningě mekilibanjo meaju me ngite mebâbu, na meâ me pumakě bekai, o yowuděteni na egombe ya viohi ya bi piělě; 33yâ nyanga tě te ’anyu, o inyěni o ka yěněni belombo těkabe beěhěpi, yowakěni, na, ya běndi piělě o mebiyâ. 34Igona těkadi ja tombe, mbambayě Mbi langwakiyandi ’nyěni, kabo belombo těkabe beěhěpi bea hama. 35Oba na he be ka tombandi, ndi ndaga jamě ja tombe. 36Ndi buhwa těboně n‘ iwěla tědině bea ’wane na moto, tombe na enjěl ja Hěvěn, kabo Hangwě ’amě pa. 37Pani ka hwi ja Noa i diyakidi, nyanga ya Mwana moto e ka viyě, e ka diya tepě nonaně. 38Ikabojana o hwi ja tonda e t‘ o pâ, ba diyakite ba jaka, ba mâtâkâ, ba baka, na bâ‐ba věněkě o maba, kwanga nala o buhwa boa Noa bo ngakiyedi o Ark, 39bu yowakě, kabo tonda e pâkidi, na nângâ bâ běhěpi; iviya ja Mwana moto i ka diya tepě nonaně. 40Babale ba ka diyandi o mwanga; umbâkâ a ka nângwěndi, n‘ umbâkâ a dikana. 41Bajo babale ba nyingaka o ilale i kâkânâkě; umbâkâ a ka nângwěndi, n‘ upâkwě a dikana. 42Nandi pepwakani: ’kabojana wa ’wěni iwěla ja Upangiyi muanyu i vakě. 43Ndi yowakěni ekae, hangwě ndabo a jak‘ a yowakě elahe na ’huhu ya mwibi e ka viyě, t‘ a pepwakite, t‘ au bâbâkâ ndabo ’aju na e tubakwě. 44Ndi diyakani tepě kokěngo; ’kabojana iwěla janyu i ha pikilakiya jâ ndi ja Mwana moto i pâkě.
45Nj‘ a jadi uhayi mu‘ ikěngě n‘ iyowě, ua upangiyi muaju a di těděngo oba ya ndabo ’aju, o ivě jabu beja o hongodi? 46Ibâtâ n‘ uhayi těmuně u ka bě o upangiyi muaju u ka pâyě, na mâ‐a kâbidě mâ a haka nonaně. 47Mbambayě Mbi vâki n‘ inyěni, na, A ka tědi mâ oba ya eaju e janidi yěhěpi. 48Nd‘ oningě uhayi t‘ ube muně u pikiliyingě, na, Upangiyi muamě a bembindi ipâ; 49na mâ‐a ka yalakě iboma ja bahayi na ju, n‘ ija, n‘ imâtâ na beyânga; 50upangiyi mua uhayi těmuně a ka pândi o buhwa boaju bo ha ’mbwakiyi mâ, n‘ iwěla jaju i ha ’wě, 51a ka leni mâ bolenaka na mâ‐a vě mâ mběi ’aju o njamba ya menoki; ovoně o ka diyi mbembe n‘ ikalidě ja mahonga.
ที่ได้เลือกล่าสุด:
Matyiu 24: BNG1895
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Published by the American Bible Society in 1895.
