Matyiu 17
17
1Hw‘ utoba tombango ka Jisus a nângâ Pitě, Jems, na mwana nyangwě Jân, ka Mâ‐a valana bâ o ukodi mua udomba, o pěpěkě; 2ka nyol‘ ’aju ya ’luwa o pwanj‘ ’abu: boho boaju bo panyaka ka joba, na ibâtâ jaju ja bě botano ka bwe. 3Umbwakiyate, ka omě wa pumiya Mosěs na Ilaias o bâ‐ba jadi, ba kalaka na ju. 4Jâ ndi ja Pitě ja yavwana, ka mâ‐a vâ na Jisus, na, Upangiyi, e ndi bwam‘ na ho diyaka okava: na hwa ha okava meâkâ melalo, oningě wa bâbâ: Âvě umbâkâ, Mosěs umbâkâ, n‘ umbâkâ mua Ilaias. 5Umbwakiyate, evindi ya bwe e yambakiyi bâ, o mâ‐a diyakidi a kalaka: na, umbwakiyate, ka joyi ja viya o evindi, i vâki, na, Ekaně a Mwan‘ ’amě a tândâkě, a tândâkidě ’Mba bwam‘; yokakiyi Mâni. 6Ka beyokwedi bea kwa na meoho meabu, o bâ‐ba yokakidi, na bâ na bangaka jângâ iitě. 7Ka Jisus a viya ka kupaně bâ, na, Umwakani, o bangaka tepěni. 8O bâ‐ba běki betěngo mihâ mabu, bu yěněkě pě moto, kabo Jisus dipâ.
9Ka Jisus a pakuwa bâ, o bâ‐ba diyakidi ba hubaka ukodi, na, O langwakeni ehihila těkae moto, kabo Mwana moto a pumbuwa pě oviya bawewe. 10Ka beyokwedi beaju bea uwa Mâ, na, E lě nde ya Balěndi e vâkě na Ilaias nd‘ a ka tâ pâ? 11Ka Jisus a yavwana ka Mâ‐a vâ na bâ, na, Pâkwěpâkwě Ilaias nd‘ a ka tâ viya, ka timbě belombo beěhěpi. 12Ndi Mbi vâki n‘ inyěni, na, Ilaias a diyendi a pâ, ndi bu yowakě mâ, ba hakite mâ nyang‘ ’abu e vahakidi. Nonaně tepě ndi o Mwana moto a ka yěně na bâ. 13Jâ ndi ja beyokwedi ja yowě na A kalaki na bâ o pělě ’a Jân Baptist.
14O bâ‐ba pâkidi o ebimba e jadi, moto a vakindi a vaka a humaka mabângâ o Mâ‐a jadi, 15na, Upangiyi, yokakiya ’mba mwan‘ ’amě wa momo ngěbě: ’kabojana a potwakandi, na mâ‐a yokaki mehiyo mětě: ’kabojana e kwehaki mâ ’gombe eitě o veya na egombe eitě o miba. 16K‘ umba‐mba valana mâ o beyokwedi beâvě be jadi, ndi bu yâlâkě o yongě mâ. 17Jâ ndi ja Jisus ja yavwana, na, E! igona ja belenganango na ipuhwa j‘ ikamidě, Mbi ka diya lě n‘ inyěni nj‘ ulingo ě? Mbi ka ’yika lě ’nyěni nj‘ ulingo ě? Vanaki mâni Umba mbi jadi okava. 18Ka Jisus a kandidě děvil; na jâ na věngěměkě o mâ‐a jadi; ka mwana a yonga oviya iwěla tědině.
19Jâ ndi ja beyokwedi bea viya o Jisus a jadi o pěpěkě, na, E lě nd‘ eahu e diyakidi ho yâlě o věngidě yâ? 20Ka Jisus a vâ na bâ, na, Na tina ya ipuhwa janyu j‘ ikamidě; ikabojana Mbi vâki n‘ inyěni, o pâkwěpâkwě, oningě o diyingěni n‘ ikamidě ona utonga mua ’buma ya mustard o ka vâteni n‘ ukodi těkamu, na, Emwaka okava na ’la iboko těkavině, u ka ’muwate; o ibě na ’lombo e ka diyě e haniye n‘ inyěni. 21Ndi jângâ těkadi jaa věngěměkě kabo n‘ ikaliya n‘ ihindina.
22Jisus a vâki na bâ, ukili muabu u diyakidi o Galili, na, Mwana moto a ka bweyudwěndi o benâ bea bato: 23ba ka weyi Mâ, ndi A ka pumbudwěndi o buhwa bo‘ ilalo. Ka bâ‐ba yěně ngěbě eitě.
24Ba ma yolakě pago ba vâki na Pitě, o bâ‐ba pâkidi o Kapěrnaum, na, Uyokwidi muanyu aa věke pago‐e? 25A vâki, na, E. Jisus a takindi o kala na mâ, o mâ‐a ngakiyedi o ndabo, na, O piviyaka lě na Saimân? ba lě ba nja ba mepolo mea he me nângânâk‘ ivě na ba pago? bana babu mětě, ipě bangi? 26Pitě a vâki na Mâ, na, Bangi. Ka Jisus a vâ na ju, na, Hângě na bana ba te hulamango. 27Nandi, obanga hoa numbidě bâ, kěkě o etima, na nâvě w‘ uhwa jâbâ, na nâvě oa bweya ejaka e ka tâ pâ: na nâvě‐o ka duwandi epuhu ya dâlě o udumbu muaju o âvě‐o ka bumudě muâ: wa nângâ eně, o ka věkě bâ o nyang‘ ’ahu na nâvě.
ที่ได้เลือกล่าสุด:
Matyiu 17: BNG1895
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Published by the American Bible Society in 1895.
