Marcos 7
7
Qaselha akpaisengkeskama engvalhok
1Lhema aknem na ntemak ma'a, apkeliavei'o lhnak apnakha Jesús moklhem'a fariseos kakpota nhan escribas apkelleniem'o Jerusalen. 2Apkeliematkesaiangka lhnak apkelvesai'a apkeltamesaikamok ma'a ngkanek aptoiangko pan neksa alpaiseiam apmeio'ok, metka apkel·hatsosaikamok na apmeio'ok iemmen.#7:2 Nietnengkek nak apkeltemakha mota judios apkelienieskamo nkek apkenmopeskamo apmeio'ok amanie apmahai'a etavokha pan, apkellanemo nhan malha alalhnai'o apvalho'ok napaqtek Eniapom Neten ma'a. Koka have henganemakha apankok Eniapom Neten, apanko'ok apankavek koka nhan ma'a. 3Lhna songke ntemak Judios kakpota nhan Fariseos apkelieplavkeskamo lhna mota apkellanemmakpelha etnangkok apkelvaneiam. Apkeltakmelkeskamavek nak apkelieniesekamok apmeio'ok kakpota etavokhak ma'a. 4Lhnak apkeleniakto la kelhakhama aptoma, apkelienieseiangkek nak na sekhek aptekamok kakpota nhan el·hatsosekha av'alho'ok nohaikok, aphak kakpota nhan apkeltanema, lhna ntemak apkeltemakha m'a.
5Lhna nkeniemai'ak elelmalhnama Jesús ma'a, lhna aptaiangkok
—¿Se lha ntemak apkeltamesaikamok anak lheiap melvaneiangko nellanemmalhkelha mota antangkok aniem'o apkelvaneiam, he? Metka apkeltakmelkeskamo apkelieniesaikamok anak apmeio'ok aptavokho la'a —lhna aptaiangkok ma'a.
6Ka apkatemmoiangka lhnak Jesús ma'a, lhna aptemak:
—¡Hengiennengkeskama niapma'ak ketlhengkap! Have niapak anke apketlheianmo lhnak nanek Isaias annenga ketlhengkap:
«Apkeltaikama apankek heleliehekho enenlhet'avok anak, mok apatno'ok koka, taiepe koka nhan aknangkolha apvalho'ok. 7Aqhemo hellai'o ngkanek apketlhekmosekamok henganemakha aniem'o enenlhet», lhnak na nek aptemak Isaias annenga m'a.
8Have niapak ankek aptemakha nak aplheianma m'a, apkelhakhangkek ketlhengkap henganemakha aniem'o Eniapom Neten, koka apkelieplavkeskamak ma'a apkellanemmakpelha mota etnangkok aniem'o enenlhet. 9Apkeliekai'ak henganemakha Eniapom Neten, apkelieplavkeskangkek apkellanemmakpelha etnangko mota apanko'ok apankavek. 10Lhnak na nek aptemak Moises apketlhekmoskamo m'a:
«¡Eniaho ta apiapom kanhan ngken! Koka aptevaso la alvesai'a ngkana'ak, ematnekhak hata m'a», lhnak nanek aptemak Moises.
11Koka apketlhekmoseiangke mota nhan ketlhengkap enenlhet ntasek eltehek ellana ngkana'ak, ka aptangkok heng:
"Mongapvankek alpasmok ketlhengka', ngkanek aspokkenkaskek qaselha ehenkok akvesai'a Corban kakpota angvangkok Eniapom Neten".
12Ka aptaiangko mota ketlhengkap ma'a apketlhekmoseiangko enenlhet mankaimommalhkak elpasmok ngkana'ak ma'a. 13Apkeltemeskesakhek koneng anke henganemakha aniem'o Eniapom Neten, koka apkeltemeskesakhek neten anke ma'a apkellanemmakpelha na mota etnangkok apanko'ok apankave'. Mantek na mo'ok qaselha ngkollatsekama apkellanekamok ketlhengkap —lhna aptema Jesús
14Ka apkellaveiangka lhnak Jesús apentalhnema enenlhet, lhna aptemak apkellanemo:
—¡Eltaqmelkaso no apkellailhemo kakpota eliangvomho! 15Akto alentalhnema qaselha apatong enenlhet, have akpaisengkeskama apvalho'ok. Koka m'a, lhamakho qaselha nak ngkolatsekama alenteiapma apatong enenlhet, ka akpaisengkeskeskama apvalho'ok ma'a —lhna aptemak.
16-17Netamen apkelieniekho lhnak Jesús enenlhet'avok ma'a, aptalhnengvekho lhnak konne pa'at ma'a. Ka apkeleltemo lhnak elpeiveskasekhak apkeltamesaikamok aktemakha apketlhekmoskama. 18Lhna aptemak Jesús apkellanemo m'a:
—¡Ketlhengkap na meliohok mokhom! Akto nak alentalhnema apatong enenlhet have akpaisengkeskama apvalhok. 19Mangkavanke nkoklhek apvalhok enenlhet ma'a, vanlha koka ntalhnak ma'a apvakmo nak netamen ma'a eiaqnek —lhna songkek aptemo Jesús ma'a ngkanek lhamakho nentoma allelto alalhnai'o.
20Aplhengkeskangkek nak Jesús apkelpeiveskasekha m'a, lhna aptemak:
—Koka akto have niapak anke' alpaisengkeskama apvalho'ok enenlhet lhamakho qaselha ngkollatsekama alenteiapma. 21Ka kto nak ma'a atlheianma nak apvalho'ok ngkollatsekama, apkenmensangveiam alhma', apkenmenielhma', apkaqhema po'ok. 22Aptevaskama aliemhapma, apvannaikamok qaselhaha, apkeltaiangkolha ngkollatsekama, apkenmopvanka ania'a, apiaspongkomakha panke' ngkolatsekama. Apnathaikamaha nhan, apkenmaikama ania'a, apkammakpoho, meihangveiakmo lhma nhan. 23Ka aklhamakho qaselha ngkollatsekama nak allenteiapma apvalho'ok enenlhet, ngkelpaisengkaskek na apvalho'ok ma'a —lhna aptemak Jesús.
Ngkelvana ngkotno judia mangkoiaskeiam Jesús
24Netamen Jesús apmeiekho lhnak iokhalhma Tiro, aptalhnengvekho lhnak konne pa'at. Apkeltemavek na niekhe eielhakpok kakpota melvetiek enenlhet'avok ma'a, koka mang na nkomopvanak ma'a. 25Nlengai'ak nak ania'a lhema ngkelvana apvaiam Jesús ma'a, atka lhnoka akmaikama kasekapok av'alhok akpaiseiam. Akmeiekho lhnak apnakha m'a, alpalengvekho lhnak akieto apkammelhakha. 26Ka ngkelvana nak ma'a lhna nkeniemai'ak Grecia, iokhalhma akvesai'a Sirio Fenicia, nkaiosekama lhnak ngkelvana alanei'o Jesús altemo elentepkeskesek keliaqhameio av'alhok atka m'a. 27Lhna aptemak Jesús apkanemo m'a:
—Ntasek sekhek etavokhak apmaniaie aptekamok apketkak anak, mangkolatsema al·hatsoskasekha aptekamok apketkak kakpota allangkongvomok semhetko'ok —lhna aptemak Jesús ma'a.
28Ka atemmoiangka lhnak ma'a, lhna ntemak:
—Apveske, have niapak aptakha nak lheiap, koka ntavengkek na semhetko'ok ma'a akpalleiam la koneng mesa aptoma otep —lhna ntemak ngkelvana m'a.
29Koka lhna aptemak Jesús apkanemo:
—Hai', nietavek aktakha nak akpaivoma lheia', kotaqhekha aknemakha metka aktaikama av'alhok, ntepkek kasekapok av'alhok atka lheia' —lhna aptemak Jesús ma'a.
30Ka aktaqhekho lhnak aknemakha, akvetangvekho lhnak atka takhalhet akietnemakha m'a, nteiapmek nak kasekapok av'alhok, ntaqmelekhek nak ma'a.
Jesús aptaqmelkeskaiam lhema enenlhet metka apaiko'ok, kanhan akientalhnema apalhkok eliatamaha
31Apteiapmek nak mokhom ma'a Jesús iokhalhma Tiro, apiekangvekho lhnak iokhalhma Sidón, apmeiekho alvata akvesai'a Galilea, akieto m'a konne iokhalhma akvesai'a Decapolis. 32Ka apkeliantemaiakmo lhnak lhema enenlhet mennai'a lhma m'a, akientalhnema nhan apalhkok eliatamaha', apkeleltemo lhnak enengkenek apmeiok takhaplhet ma'a. 33Ka apiantamo lhnak aplhepkennenga Jesús enenlhet ma'a, apkelatkeskamo lhnak apopheiok konne apaiko'ok. Netamen apkeliaskeso lhnak na apiemanong apopheiok, apmangveiakmo lhnak apalhkok enenlhet nak ma'a. 34Ka apkammelhmo lhnak neten, aptepkeskamo lhnak apkamnoma, lhna aptemak:
—¡Efata!
Neltema, ¡konmaihekha!
35Kolhvavek ankek nak nkenmaihekhak apaiko'ok ma'a, aktaqmelekho lhnak na apalhkok kanhan apkeliatekama. 36Netamen nak ma'a apkeleltennaskamavek nak Jesús enenlhet'avok melpaiaksek ania'a aktemakha apkelvetai'a m'a, koka apkeliangveskaiakmek nak ania'a m'a. 37Avanhek ankek nak alpelapkeskama apkellengai'o ania'a enenlhet'avok ma'a, lhna aptaiangkok:
—¡Ntasek anke nak apkelanai'a lhamakho qaselha, apkeltakmelkasakhe nak enenlhet'avok mellengai'a na lhma, kakpota nhan metka apkelpaqmeiasma! —lhna aptaiangkok enenlhet'avok ma'a.
ที่ได้เลือกล่าสุด:
Marcos 7: TMF
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©2023 LETRA Paraguay
