Piripae 3
3
Ɂe Sena Hana Taɂaa Ni Piripae Kira Ka Isua Tautaurana Pauro
1Haka ni waɂaku ma hahoneku ana Karaesi, te ɂare ruɂu kane. Ɂe hana ɂau ka raemano tamana ɂare rete Araha koru ɂe tauɂi ɂana koru.
Na niɂirae ɂe rete hana na ka kiria ɂaiɂene hii wara ne na iria tari ɂau wau sii. Na ka kiria hii wara ɂaiɂe, tamana kira ka rao ɂahorosi ɂau maania hii noni hani haɂausuriha kae kae. 2Ɂau ka ɂoni maania hii mane ne kira niɂirae ɂokira hana hunu ana sisimana toina mane#3:2 hunu ana sisimana toina mane: Totoraha ni ɂare ɂaiɂe ɂe mara te wara otooto Waratoɂo ɂe iria hana taɂaa ni Tiu ne Mosisi ɂe kiria. ne ɂe piɂi norutoɂo ana Karaesi. Kira kae ɂuria raena Waratoɂo ɂe hai. Rio maania hii mane nena, tamana tautaurana kira ɂe mae sena, mara taɂaa ni apa.#3:2 taɂaa ni apa; Pauro ɂe kiria hii kui ana hii mane ne kira haɂausuri kae kae. Kira kae ɂuria raena Waratoɂo ɂe hana rauta ni hunuha nena ka rau ana mane ana ɂe norutoɂo ana Tisasi. 3Ɂi koru taɂaa Waratoɂo waraɂimori, tona ɂana ɂi koru ne Anoa Maea Waratoɂo ɂe haipooni koru hana haɂapaina ana Waratoɂo, ma ɂi koru ka naɂa haɂasenaa Karaesi Tisasi. Ma ɂi koru mae uruna ana tautaurana koru, ɂuria Waratoɂo ɂe ka haɂamauri koru tona ɂai. 4Taɂa, tautauraku ɂe sena. Ɂaremara taɂena noni ruɂu ɂe ka niɂirae ɂuria ɂoniɂoniha naia ma tautaurana ɂe rae haɂamauri ana, haɂaraa ɂi nau, na rae urunaha ana ɂare na taua taroriu kira. 5Ɂe ɂuriɂe. Hiuna hairatoa puri ɂana hutaha nau ɂe siko, ma te mane paina ni Tiu ɂe hunua sisimana toiku mara wara otooto Waratoɂo ɂe watea hana ɂami, taɂaa ni Tiu. Ma ɂi nau, hutaa nau ɂe maania taɂaa ni Ɂisirere, ma na huta maania hutaa Penisimani. Ɂi nau mane ni Hipiru#3:5 Hipiru: Te rata ni ɂare hana taɂaa ni Ɂisirere. waraɂimori, tona ɂana haka ni marahuku ɂi kira taɂaa ni Hipiru waraɂimori. Ma na roɂo soɂona wara otooto ɂe ana taɂaa ni Tiu hautaɂai, tamana na mane ni Parisi#3:5 Parisi:Te para ni mane ni Tiu ne niɂiraeha kira ɂe ɂokira rikaɂa ɂuria roɂoha kira soɂona wara otooto Waratoɂo ɂe ka taua kira ka otooto ana maana.. 6Ma na niɂirae ɂokira hana haɂaweo ana taɂaa ne kira isua Tisasi, tamana na paɂa niɂirae raena Waratoɂo ɂe hai. Ma na roɂo soɂona rikimana wara otooto ɂe ana ɂami. Tona ɂai, te noni ɂe si orowara haahi nau, ɂuria na mae otooto. 7Warita, na niɂirae ɂuria rauta ni otootoha ɂuna ɂe ka haipooni nau hana haɂaruhu ana raena Waratoɂo. Taɂa ɂaiɂene, tona ɂana na uruna ana Karaesi noɂo, na raea te ɂare rete ɂe si rau aku ana ɂare ne na uruna ai sii na. 8Ma ruɂu kane, na raea noɂo Araha nau Karaesi Tisasi. Raeɂareha nena ɂe rete aku hautaɂai taroriua rikimana ɂare ne na uruna ai wau sii. Tamai, na niɂirae ɂewewaɂa soɂona kira noɂo. Tona ɂana na raea Karaesi Tisasi noɂo, na ɂinaɂania rikimana ɂare mouta ne na uruna ai na, mara pota pota hana taɂasi ai. Na ɂinaɂani kira hana Karaesi, 9ma hana na ka hiku taɂe rihi haɂania. Hikuha rete haɂania nena ɂe aku tona ɂana na otooto ana na norutoɂo ana Karaesi. Na si otooto maraaku ana roɂoha nau soɂona wara otooto taɂaa ni Tiu. Otootoha nau ɂe maania Waratoɂo, ma ɂe ana norutoɂoha nau ana Karaesi. 10Ana norutoɂoha nau ana Karaesi, raeku ɂe hana na ka raea kane ruɂu reteha ɂe ana ɂuriɂe. Raeku ɂe hana Waratoɂo ka toɂi ana ɂi nau ana ɂokiraha ɂe taɂeraɂania Tisasi maania maeha ai na. Ma raeku ɂe hana na ka weo ana toɂiha ɂana ɂi naia Waratoɂo, mara Karaesi ɂe weo ana roɂoha hana, hura taha ana na maroɂita hana na ka mae mara ɂi naia Karaesi ɂe mae. 11Tamai, maahaneha nau na ɂe hana Waratoɂo ɂe ka rao taɂeraɂani nau maania maeha.
12Ma na mae iria ɂuria na hura taha ana rikimana niɂiraeha nau nena ne na niɂirae hai. Ma na raea na mae ɂoɂoa haɂania Karaesi Tisasi kane. Taɂa, na ani toɂiha rikaɂa hana tarahua ana ɂare ɂutaa ne Karaesi Tisasi ɂe hirisi nau hana na ka toɂo ai. 13Haka ni waɂaku ma hahoneku ana Karaesi, na raea na mae toɂo ai siko kane. Taɂa, ɂuri hana mane ni oroha haikuikuiɂi, ɂare paina na ka tau taua ɂaiɂene. Na oro ɂokira hana ɂare rete ɂe naɂo haku, ma na si rio hi puri ɂaku tarea hii ɂare ana totoraha nau wau sii. 14Waratoɂo ɂe poi nau hi uru tona ɂana ɂare ɂutaa Karaesi Tisasi ɂe taua haku. Tamai, na ani oroha otooto kane hana haɂasiko ana oroha nau hana na ka tarahuaa ɂare rete maania Waratoɂo ne ɂe poi nau hai na. 15Ɂe ɂuna, ɂone ɂe hana rikimana noni ana koru ne norutoɂoha ɂau ɂe hahuru, ɂau ka niɂirae ɂoɂoa haɂani nau soɂona ɂare na piɂi iria ɂaiɂe. Ma ɂaremara niɂiraeha ɂau ɂe mouta, Waratoɂo ɂe ka rao taua hana ɂe ka horaa ana ɂau ke raɂo. 16Ma ɂihaitaa ɂare nena ɂe mae horaa amu kane, ɂe hana koru ka ɂoni otooto ana roɂoha koru soɂona manamanataha maania Waratoɂo ne ɂe ana koru ɂaiɂene.
17Haka ni waɂaku ma hahoneku, ɂe hana ɂi ɂau taɂi, ɂau ka haimaania tautauraku. Ma ɂau ka rio paupau hana haimaani ana hii noni ne ɂoniɂoniha kira ɂe ɂoɂoa haɂania tautaura ni ɂare ne ɂau reesia ana ɂi nau haɂania hii mane kira toɂi haɂani nau wau sii. 18Ɂau ka haimaania tautaurana ɂami, tamana ɂe mao hana ɂau ka haimaania haru noni mouta ne na haɂe haɂapasu ɂau soɂona kira noɂo. Ma ɂaiɂene na ka iria tari ɂau ruɂu, haɂi raeuruha ma naraha, taɂaa ɂiwera kira hari haɂania Karaesi. Kira suaraa maeha naia honosi koru ana ɂai horo na. 19Ma Waratoɂo ka rao haɂasuu kira ana horoɂa hi ususu. Kira niɂirae haɂapainaa opana kira, tamana raena kira ɂe hana hii ɂare hana haɂaruhu ana rapena kira ke, ma kira naɂa haɂasenaa ɂare mae sena kira tauɂi ne ɂe hana kira ka mara tona ɂai. Ma kira niɂirae heɂeta ke soɂona ɂare mai maraukari ɂaiɂene hana ɂoniɂoniha kira kosuna mako ɂaiɂe ɂe ka rete ana kira. 20Taɂa hana ɂi koru, hanua huu koru waraɂimori ɂe ɂoni taɂau uru. Araha koru Tisasi Karaesi ne ɂe haɂamauri koru, ɂe ka rao ori taɂau uru mai. Ma ɂaiɂene, koru ka ririo maasia hanetahaha naia. 21Ma ana ɂokiraha ne ɂe ana ɂi naia Tisasi Karaesi, ɂe rae toɂi roko ana rikimana ɂare hana ɂe ka waruhana painaha naia. Ma ana ɂokiraha naia nena, ɂe ka rao rikitaɂania roa ni rape ni ɂare ɂe ana koru ɂaiɂene hana ɂare seanaha ɂe ai mara rapena Tisasi puri ɂana ɂe taɂeraɂi maania maeha naia.
ที่ได้เลือกล่าสุด:
Piripae 3: ALU
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2023 (Active), Wycliffe Bible Translators, Inc. All rights reserved.
