Maki 16
16
Tisasi Ɂe Taɂeraɂi Maania Oha Na
(Matiu 28:1-10; Ruku 24:1-12; Tione 20:1-10)
1Puri ɂana Hairatoa Hani Mamaroha ɂe siko ana rato ɂe suu, ma Meri keni ni Makatara haɂania Meri tetena Temesi haɂania Sarome ke raɂo, kira horia hii taki ni ɂare kira siɂini rete raekiɂa hana toɂi ana rapena Tisasi aɂi.
2Nena, ma waɂaria naɂo hana rato ka hane taha ana etana hairatoa ana wiki, hii keni nena kira raa tarea oha rapena Tisasi ɂe ɂoni raoɂi na. 3-4Nena, ma kira haɂe naɂa matorana kira ɂuriɂe, “Atai noɂo ɂe ka rao pehua hau paina maania maana oha na hana koru?” Kira niɂirae ɂuna tamana ɂe paina rikaɂa ma ɂe hiɂa taroriu kira. Nena, ma kira rio tarea oha na ma kira reesia hau na pehu ai ɂe rau noɂo. 5Nena, ma kira siri hi raona oha na, ma kira reesia te enisero ɂe rio ɂuri hana mane ka piɂi hoɂu, ma ɂe toɂoru ana poɂo ni ɂare ɂokira ma ɂe hokosia kareko paparahiɂa ɂe ɂewa. Ma kira ɂamiraɂi rikaɂa!
6Ɂoneha, ma enisero na ɂe naɂa ɂuriɂe, “Ɂau si maɂu. Na raea ɂau ka rio ɂohia Tisasi, mane ni Nasareti, ne kira musuria ana ɂai horo na. Ɂe taɂeraɂi noɂo! Ɂe mae ɂoni taiɂe. Ɂau ka raa mai hana reesi ana rihi kira hahuɂenosia ai. 7Ma ɂaiɂene ɂau ka raa ma ɂau ka rae haɂanoroa para ni mane naia ma ɂi naia Pita ɂuriɂe, ‘Tisasi ɂe ka rao raa sii hana ɂau hi Kariri. Ma ɂau ka rao reesia taina, mara ɂe iria tari ɂau warita na.’”
8Nena, ma hii keni nena kira rahe, ma kira rawariri. Kira tahi maania oha na, ma tona ɂana kira maɂu rikaɂa, kira mae haɂanoroa te noni ana taɂena ɂare.
Hahuɂisi Ana Puka Ɂaiɂene
9 # 16:9-20 Mani wara raona 9 tarea 20, ɂe mao ana rua pepa ana puka Maki ne kira rua rahuɂa ma rete rikaɂa.Tisasi ɂe taɂeraɂi ana etana hairatoa ana wiki. Nena, ma waɂaria ana hairatoa nena Tisasi ka haataɂi ana Meri, keni ni Makatara, ne ɂe ɂeroa hiu enisero mae sena hi apa maania sii na. 10Puri ɂana Meri ɂe reesia Tisasi, ɂe raa hana haɂanoro ana hihikuma Tisasi na ne kira ani raeuruha ma naraha kane. 11Ma Meri ɂe haɂanoro kira soɂona ɂe reesia Tisasi ma ɂe mauri noɂo. Ɂoneho, ma kira mae norutoɂo ana taɂeraɂiha naia na.
12Ma mai puri ruɂu, te rua mane ana taɂaa ne kira isua Tisasi, kira rua haɂe ori maania Terusaremu tarea hanua kira rua na. Ma Tisasi ɂe haataɂi ana kira rua ana te ririota ni ɂare mouta. 13Ma rua mane nena, kira ori hana haɂanoro ana kira ne kira isua Tisasi ke raɂo. Ɂoneho, ma kira mae norutoɂo ana haɂanoroha kira rua na.
14Puri ɂai, Tisasi ɂe piɂi hane taha ana awara ni mane mana taɂai naia na ana horoɂa kira ani hanaha kane. Ma ɂe naɂa teraɂania tare kira, tamana kira rarakaɂa hana norutoɂo ana haɂanoroha waraɂimori soɂona ɂi naia maania taɂaa ne kira reesia puri ɂana ɂe taɂeraɂi maania maeha noɂo.
15Nena, ma Tisasi ɂe iria hana kira ɂuriɂe, “Ɂau ka raa ma ɂau ka taro haɂania Haɂanoroha Rete raona maraukari haɂirau hana haɂanoro ana taɂaa haɂiraku. 16Ma Waratoɂo ɂe ka rao haɂamauria atai ɂe ka norutoɂo aku ma rotomaeaha ka rao rau ana. Ma ɂua ruɂu, Waratoɂo ɂe ka rao usumaɂania hana weoha taraunaɂi atai ne ɂe ka mae norutoɂo aku.
17“Ma taɂaa kira norutoɂo aku, kira ka rao taua hii rauta ni huɂihuɂita ɂaiɂene hana haataɂani ana Haɂanoroha Rete ɂaiɂene ɂe waraɂimori. Kira ka rao ɂeroa enisero mae sena hi apa maania taɂaa ana rataku, ma kira ka rao naɂa ana haru naɂaha mouta ne kira mae raea, 18ma kira ka rao toɂi ana maa ɂaɂara. Ma ɂaremara kira ka koɂuhia ɂare hani maeha, ma te ɂare ɂe si rau ana kira. Ma kira ka rao toɂi toɂo ana taɂaa kira kiru ma kiruhaɂa, ma kira ka rao mauri ruɂu.”
19Ma puri ɂana Araha Tisasi ɂe hahuɂisia naɂaha naia tare kira, ma Waratoɂo ɂe torea Tisasi hana ɂoniɂoniha taɂau uru. Nena, ma Tisasi ɂe toɂoru ana perapera hani painaha ana poɂo ɂokira ana Waratoɂo.
20Nena, ma para ni mane naia kira raa hai riu ma haɂe taro haɂania Haɂanoroha Rete nena taria taɂaa. Ma Araha ɂe haɂaɂokirai kira hana tau ana toɂiha nena, ma ɂe haɂawaraɂimoria Haɂanoroha Rete kira iria ana huɂihuɂita kira haɂe tauɂi.
ที่ได้เลือกล่าสุด:
Maki 16: ALU
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2023 (Active), Wycliffe Bible Translators, Inc. All rights reserved.
