Pin'ilʋg 4
4
Kain nɛ Abɛl yɛla
1Adam da digin nɛ o pu'a Hawa ka o nɔk pʋʋgʋ du'a biribiŋ ka ba pʋd o yʋ'ʋr ye Kain#4:1 Ba buon yʋ'ʋkaŋa Hibiru ni ye, “Bɔɔm.”. Ka Hawa ye, “Nɛ Wina'am paŋ ka m du'a dau.” 2Lin nya'aŋ ka o lɛn du'a o pitʋ Abɛl n paas. Abɛl da gʋ'ʋnnɛ kɔnbid, ka Kain mɛ an kpaad. 3Ka saŋa ti paae ye ba maal maannɛ tis Wina'am la, Kain da nɔk o zʋʋd la sieba na tis Zugsɔb la, 4ka Abɛl mɛ da zaŋ o kɔnbkanɛ ka ba du'a yiiga ka o nɔb sʋ'ʋŋa la na tis Zugsɔb la. Ka Zugsɔb sʋnf malis nɛ Abɛl nɛ o maan la, 5amaa o sʋnf da pʋ malis nɛ Kain nɛ o maan laa. Ka Kain sʋnf duoe ka o lɔɔ o nindaa. 6Ka Zugsɔb yɛl Kain ye, “Bɔ ka fʋ sʋnf pɛligɛ? Bɔ ka fʋ lɔɔdi fʋ nindaa? 7Fʋ ya'a tʋmin dinɛ an sʋm, m naan kʋ di'enɛ fʋ maan laa? Amaa fʋn pʋ tʋm linɛ an sʋm la, tʋʋmbɛ'ɛd bɛɛ fʋ za'anɔɔrini bɔɔd ye o nyaŋif, amaa mɔɔm ka nyaŋ o.” 8Ka Kain ti yɛl o pitʋ Abɛl ye, “Kɛl ka ti yii keŋ mɔɔgin.” Ka ban paae mɔɔgin la ka Kain kpɛn nwɛ' o pitʋ Abɛl n kʋʋ o. 9Ka Zugsɔb la bu'os Kain ye, “Fʋ pitʋ la bɛ ya?” Ka o lɛbis ye, “Man zi'. Manɛ guri m pitʋ laa?” 10Ka Zugsɔb la yɛl ye, “Bɔɔ nwa' ka fʋ tʋm? Kɛlisim, fʋ pitʋ la ziim kaasid teŋin paadi m san'an na! 11Nannanna nɔpɔɔr bɛɛ fʋ zugin, ka teŋgbauŋ la mɛ na zan'asif bɔzugɔ o ya'ae o nɔɔri di'e fʋ pitʋ la ziim yii fʋ nu'usin. 12Fʋ ya'a kua, teŋ la kʋ lɛn maal zuudi tisif ya'asɛ. Fʋ na anɛ onɛ gɔɔndi giligid dunia la zug.”
13Kain da yɛl Zugsɔb la ye, “Namisʋg nwa' tʋʋgi m paŋ bɛn. 14Zina fʋ kadimi yis teŋ la pʋʋgin ka m kʋ lɛn bɛɛ fʋ tuonnɛ. M na anɛ onɛ gɔɔndi giligid dunia la zug, ka onɛ wʋsa nyɛ mam na kʋʋm!” 15Amaa ka Zugsɔb la yɛl o ye, “Li ka' ala, sɔ' ya'a kʋ Kain o na nyɛ namisʋg nɔɔra ayɔpɔi.” Ka Zugsɔb la zanbil Kain ye sɔ' ya'a nyɛɛ o, on da kʋʋ o. 16Kain da yi Zugsɔb la san'an keŋ bɛ Nod teŋin, Eden nya'aŋ sa.
17Kain da digin nɛ o pu'a ka o gban'e pʋʋgʋ du'a Enok. O da mɛɛdnɛ tempʋʋg, ka nɔk o biig Enok yʋ'ʋri pʋd teŋ la. 18Enok da du'a Irad, ka Irad du'a Mehuyael, ka Mehuyael du'a Metusael, ka Metusael du'a Lamek. 19Lamek mɛ da dinɛ pu'aba ayi', yinne yʋ'ʋri da buon Ada ka oŋa la yʋ'ʋr buon Zilla. 20Ka Ada da du'a biig ka pʋd o yʋ'ʋr ye, Jabal. Ka Jabal nɛ o nya'aŋ dim da an banɛ bɛ mɔɔgin sʋga nii gʋ'ʋn bʋnkɔnbid.
21Ka ba da lɛn du'a o pitʋ ka on yʋ'ʋr da buon Jubal. Ka on nɛ o nya'aŋ dim wʋsa da an banɛ nwɛ'ɛd bʋnnwɛ'ɛda ka piebid wiis. 22Ka Lamek pu'abil Zilla mɛ da du'a biig, ka o yʋ'ʋr buon ye Tuebal Kain. Ka onɛ mɛ da pin'il kʋnt tʋʋma wʋsa, ka o taʋn yʋ'ʋr da buon Naama. 23Ka Lamek da dʋ'ʋs o mɛŋi yʋ'ʋm tis o pu'aba ayi' la ye,
“Ada nɛ Zilla, kɛlisimi nwa'!
Yanam, banɛ an mam Lamek pu'aba, wʋmmi sʋ'ʋŋa!
Dau sɔ' da pu'alimim ka m kʋʋ o,
O da tisim dɛŋ ka m kʋʋ o.
24Ba ya'a kʋ nidiba ayɔpɔi yɔ Kain kʋʋb sam,
ba na kʋ nidib pisyɔpɔi nɛ ayɔpɔi yɔ man Lamek kʋʋb sam!”
25Ka Adam nɛ Hawa da lɛn du'a biig, ka Hawa da pʋd o yʋ'ʋr ye Set,#4:25 Set gbin nɛ Hibiru anɛ “O tisya.” ka yɛl ye, “Wina'am tisim biig nwa' ka o lɛdig Abɛl zin'igin, Kain n kʋ Abɛl la zug.” 26Ka Set mɛ da du'a biig ka pʋd o yʋ'ʋr ye Enos. Saŋkan la ka ba da dɛŋi pin'ili buon Zugsɔb la yʋ'ʋr ye Ti Zugsɔb.
ที่ได้เลือกล่าสุด:
Pin'ilʋg 4: kus_gh
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2023, Ghana Institute of Linguistics, Literacy and Bible Translation