लुका 22
22
येसु सेप्मा ओकोलुना
(मात्ति २६:१-५,१४-१६; मारकुस १४:१-२,१०-११; युहान्ना ११:४५-५३)
1खामिर मिठेन्ने चोक्बालाक् चालेपाङाना चाडा मानाँ चोक्माना बेला टाइसाना॥ नाम्बाक् याहुदिचिगा छुट्कारा चाडा ओलोडुना डाना॥#पारस्थान १२:१-२७ 2गाडुवाडाङ्बाचि हिट्नुङ् धारमाबिधि काहिसिक्बाचिङा येसु सेप्मा लोङ्सा ओकोलुए, टरो हिट्नागा याप्मिचिलोक् उकिट्टानाँ येसु सोगोप् लाब्माउङ् सेप्माना निङ्ग्वा ओचोगुए॥
3हिट्ना बेला डोक् बारो जाना चेलाचि माड्डे ठिबाङ् याहुदा इस्कारियोत ओलोडुना याप्मि उनिङ्ग्वाङि सैतानङा खोट्टुए॥ 4हिट्नुङ् ना याहुदा इस्कारियोत गाडुवाडाङ्बाचि हिट्नुङ् माङ्ठाना काकोबा हाकिमचिङि खाडाउङ् येसु लाब्मा ओचेट्नुना लाम्बो युङ्ग्वा पिक्सा रिङ्पान् चोगुए॥ 5ना रिङ् ओखेम्सुनाँ हिट्नागाँगा उन्चि चाप् टाए हिट्नुङ् हिट्नागाँ ओफाबा पिनाँ पिक्सा ओलोडुए॥ 6याहुदा ना रिङ्ङि टोङाउङ् येसु सोगोप् लाप्मा लोङ्सा ओलाम्बो पुमा ठालाँ चोगुए॥
याहुदिचिगा छुट्कारा चाडाङाना टेयार
(मात्ति २६:१७-२५; मारकुस १४:१२-२१; युहान्ना १३:२१-३०)
7खामिर मिठेन्ने चोक्बालाक् चालेपाङाना चाडा बेला लिसे, ना याहुदिचिगा छुट्काराङाना चाडाङिम्बाक् ठुँबाङाना उइछा भोक् पिमा कोलाना डाना॥ 8येसुङा पाटरुस हिट्नुङ् युहान्ना छेम्डुचिउङ् “आनि लोङ्सा छुट्कारा चाडाङाना भातेर टेयार चोक्ङा खाडाचि” पिक्सा पाङ्सुचे॥
9हिट्नुङ् हिट्नागाचिङा “ना भातेर खोनाइ टेयार चोक्चुङाना” पिक्सा येसु सिलाप्टाचुए॥
10येसुङा हिट्नागाचि लोडुचे, “खान्चि यरुसलेम खालाङ्गाङि आलिक्चिनामे गाक्रोङि चुवा काखुबा ठिबाङ् याप्मि आटुब्चुचु, हिट्ना लिग्ना पाङ् सोम्मा ओएङ्-ओएङ् खाडाचि॥ 11हिट्नुङ् हिट्ना लिग्ना पाङ्ङिना पाङ् ओडाङ्बा लोडाचु, ‘काहिसिक्बाङा नाड्डेना खाबोर खान्लोङ्सा माहाङ्सासे, आचेलाचिलोक् छुट्कारा चाडाङाना भातेर चामाना कोठा खोनाइ बो युङ्ग्वाना?’ 12हिट्नुङ् खान्चि हिट्नाँ पाङ् उठुङ्ङिना टाला ओचेट्नुलोक् ओचोगुएसुना ठेना कोठा मानिमेट्चिचि॥ हिट्नि डोक् खान्चिङा भातेर टेयार चोगाचु॥”
13पाटरुस हिट्नुङ् युहान्ना खाडा चे हिट्नुङ् येसुङा माट्टु गाड्डे डोक् सोब्बे रिङ् लिसाना टुबाचोए॥ हिट्नुङ् हिट्नागाचिङा हिट्निरोक् छुट्कारा चाडाङाना भातेर टेयार चोगाचुए॥
माङ्खोइ
(मात्ति २६:२६-३०; मारकुस १४:२२-२६; १ कोरिन्थि ११:२३-२५)
14जब चामा-ठुङ्मा चामा बेला लिसे, टब येसु ठिइप्पोक् मुलिचेलाचिलोक् चामा चाङा युङे॥ 15हिट्नुङ् येसुङा हिट्नागा लोडुचे, “आङा याङ्छामा टोग्मा नुङ्ना पाइले ना छुट्कारा चाडाङाना भातेर चामाना आड्डिक् टुक्लोक् आनिङ्ग्वा लोसेसाना॥ 16पोङ्भोने आङा खानि लोनाँनि, माङ्हाङ् उमुलुक्ङि ना छुट्कारा चाडाङाना भातेर मिचाए आङा ना भातेर फेरि चानिङ्ना॥”#२२:१६ ना छुट्काराङाना चाडाङाना भातेर मिचाए सोम्माङाना उटुप्बाक् ओयाप्मिचिङाना आन्तिम् छुट्कारा पुरो मिले सोम्मा लियुक्॥ 17हिट्नुङ् येसुङा आङ्गुर ओमोॽवा लोक्ना खोरे याङुङ् माङ्हाङ्ङि पोए-पोए चोगुङ् ओचेलाचि लोडुचे, “ना टाक्टानुम् हिट्नुङ् सोब्बेङा हान्डाजानुम्॥ 18आङा खानि लोनाँनि, माङ्हाङ् उमुलुक् मिटाए सोम्मा फेरि आङ्गुरङाना ओमोॽवा आङा ठुङ्निङ्ना॥”
19हिट्नुङ् उन्ङा चालेपा कोबुए हिट्नुङ् माङ्हाङ्ङि पोए-पोए ठाङ्सुङ् एगुए, हिट्नुङ् ओचेलाचि नाड्डे लोडुचे, “ना चालेपा खानि लोङ्सा पिनानिगा आयेम् ए॥ ना आङा मिप्मा लोङ्सा चोगानुम्॥” 20हिड्डे डोक् चामा उहिडुङ् येसुङा खोरे कोबुङ् ओचेलाचि लोडुचे, “ना खोरेउम्बाक् आहेलिक्ङि हुप्बालाक् ओछोङ्ग्वाट् माङ्हुप् ए॥ ना हेलिक् खानिलोङ्सा वेडाइसे॥ 21टरो नाहि खेम्सानुम्, आङा धोका याङ्चाट्ना याप्मि चा आङालोक् चासिङा युङेसे॥#छाम्लोमा छाप्ला ४१:९ 22हाट्ले याप्मि छा माङ्हाङ्ङा निङ्ग्वा चोगुना गाड्डे सिमा खाप्मा डोक् कोन्युक्, टरो धोका कापिबा लोङ्सा माङ्हाङ्ङा टुक्लोक् साजाए पिडुटु॥” 23चेलाचिङा ना रिङ् ओखेम्सुङ् नाड्डेना टोॽवा काचोक्बा साइना होला? पिक्सा आ-आप्पे फोसो फोसो उपिगे॥
ठेना लिमाना रिङ्
(मात्ति २०:२५-२८; १९:२८; मारकुस १०:४२-४५)
24हिट्नुङ् चेलाचि उन्चिङि सोब्बे नुङ्ना साक्उम्बाक् ठेना पिक्सा रिङ्पान् चोग्मा ठालाँ ओचोगे॥#मात्ति १८:१; मारकुस ९:३४; लुका ९:४६ 25येसुङा हिट्नागा लोडुचे, “ना नाराङिगा हाङ्बाचिङा याप्मिचिङि उन्चि आधिकार लाहाब् ओचोगुङ् सासान् ओचोगुगा हिट्नुङ् सासाक्चिङा ‘आन्याँ याप्मिचि घुवार काफाबाचि ए’ पिक्सा उमाट्टुगा॥#मात्ति २०:२५-२७; १०:४२ 26टरो खानिम्बाक् नाड्डे पारागा याप्मिचि लिमा लिनेनिन्, खानि माड्डेङि ठेना लिना कोन्नाम्बाक् खाट्टिउना लिमा कोन्युक् हिट्नुङ् ओठेडोङ्म्बाक् चाकार गाड्डे लिमा कोन्युक्॥#मात्ति २३:११; मारकुस ९:३५ 27हाट्ले मिट्टानुम्, साक्उम्बाक् ठेना लियुक्ना टे, चामा चासिङा युङ्ना डाङ्बा इ चामा पागुङ् कापिबा टोॽवा काचोक्बा याप्मि इ? पाक् चामा चासिङा युङ्ना याप्मि ठेना लिनिनै टे? टरो आङाउम्टे खानि सोरि ठिबाङ् सेवा काचोक्बा गाड्डेना डोक् ए पिक्सा लोनाँनि॥#युहान्ना १३:१२-१५
28“आङाना ख्वाप्पा याङ्छामाङि खानिङा टाक् आपिडिङे॥ 29आमाङ्हाङ् पाबाङा सासान् चोक्माना आधिकार आङा याङ्पिडा गाड्डे डोक् आङा चा सासान् चोक्माना आधिकार खानि पिनाँनि॥ 30आङा सासान् चोगुङ्ना बेला खानि आङालोक् एक्केउ आयुङिउङ् आचाम्टुम् हिट्नुङ् हाङ्बा युङ्ना सिङासान्ङि आयुङिउङ् इस्राएलि याप्मिचिगा बारो छोङ्बाचि डोक् सासान् आचोगुम्चिम्चिम्॥”#मात्ति १९:२८
पाटरुसङा येसु एङ्फुट् चोगुना बारे
(मात्ति २६:३१-३५; मारकुस १४:२७-३१; युहान्ना १३:३६-३८)
31हिट्नुङ्ना येसुङा सिमोन पाटरुस लोडुए, “सिमोन, हाउ सिमोन, खेम्सु, आङा खान् ठिक् रिङ् लोनाँ, टोॽवालासि काचोक्बाचिङा चामा उभुसुॽवा ओयेम्सुडेसु गाड्डे डोक् खानि चा आङालाम्मा साम्मा लोङ्सा सैतानङा माङ्हाङ्लोक् आग्याँ नाक्टुएसुए॥ 32टरो खान् आङि बिस्वासि लिसा नुङ् खान् लोङ्सा माङ्हाङ्ङा घुवार माफायाक् नुङ् आङा बिन्टि चोगुएसुङे॥ हिट्नुङ् जब खान् काएल्-काबु आलियुङ् आङालेङ् आनोक्युक्, टब काटाक्चि चा बिस्वास्ङि बोल्लेउ लिमा लोङ्सा घुवार फाडुचि॥”
33सिमोन पाटरुसङा लोडुए, “टाङ्बा, आङा खान्लोक् खाम्बाङ्ङि खाप्मा हिट्नुङ् सिमा चा टेयार लिङा॥”
34टरो येसुङा लोडुए, “पाटरुस, छेम्बा डोक् आङा खान् लोनाँ, हान्डेङ् भ्यानिक् कोक्साबा ओक्मा नुङ्ना पाइले खान्ङा आङा सुम्बोक् खेप् सोम्मा मिसेन् डोक् निनेन्ना नुङ् एङ्फुट् याङ्आचोक्ङा॥”
ओफाबा, जाप्रामा हिट्नुङ् चेप्सा बारे
35हिट्नुङ् येसुङा हिट्नागा लोडुचे, “आङा खानि नुना खाबोर लोसिङा ओफाबा, जाप्रामा हिट्नुङ् लाङ्सुप् माले पाङ्नाने, पाक् हिट्ना बेला जोम् रिङ्चि चाहाबा आलिसेगि टे?”
हिट्नागाँ ओमाट्टुए, “माइना॥”#मात्ति १०:९-१०; मारकुस ६:८-९; लुका ९:३; १०:४
36येसुङा हिट्नागा लोडुचे, “हाट्लेम्बाक् ओफाबा लोक्गाँ ओफाबा खुयानुम्, जाप्रामा युङ्ग्वा भोने जाप्रामा खुयानुम् हिट्नुङ् चेप्सा वाइना भोने ओटाखुम्बि छोङ्सुङ् चा चेप्सा उइनुवाक्॥ 37आङा खानि लोनाँनि, धारमाछाप्लाङि ‘उन् आपाराधिचि गाड्डे डोक् चाट्ला ओमेट्टुएसुए’#यासैया ५३:१२ पिक्सा छेप्टाना रिङ् आचोलाङि युमा डोक् कोन्युक्, पोङ्भोने छेम्बा डोक् आङाना बारेङि छेप्टाना रिङ् युसा खाट्युगेट्॥”
38ओचेलाचिङा ओलोडुए, “पुयु टाङ्बा, नाहि आन्याँलोक् इप्पोक् चेप्सा युङ्ग्वा॥”
उन्ङा लोडुचे, “ना रिङ् नाडानुम्॥”
जैतुन झोन्झोबोङि येसुङाना बिन्टि
(मात्ति २६:३६-४६; मारकुस १४:३२-४२)
39येसु यरुसलेम खालाङ्गाङि उयुङाना पाङ् नाडुङ् सोरोक् गाड्डे डोक् जैतुन झोन्झोबोङि खाडे हिट्नुङ् ओचेलाचि चा उन्लोक् ओखाडे॥
40हिट्ना डेन्ङि ओटासुङ् येसुङा ओचेलाचि लोडुचे, “पापङाना वारिक्ङि आठाइन्चा नुङ् बिन्टि चोगानि॥”
41हिट्नुङ् येसु ओचेलाचिलाम्मा चिपा याम्बा खाडाउङ् उटुम्भुट् येप्टुङ् नाड्डे पिक्सा बिन्टि चोगे, 42“हाउ आप्पो, कानिङ्ग्वा आचोगुए भोने ना याङ्छामाङाना खोरे आङालाम्मा सोम्मा आहिडुटु, टरो आनिङ्ग्वा माखाक् कानिङ्ग्वा गाड्डे डोक् उलियाक्॥” 43[हिट्नुङ् टोनालोग्लाम्मा टोनालोग् रिङ् काउग्बा उङ्साउङ् येसु घुवार फाडुए॥]#२२:४३ कोइ-कोइ सोरोत बाइबलङि ना पोद वाइना॥ 44येसुङाना आड्डिक् टुक्लोक् उनिङ्ग्वा एगाउङ् माइढा बिन्टि चोक्मा ठालाँ चोगुए, हिट्नुङ् ओहाङ्ग्वाट् ठे-ठेना हेलिक्ङाना ठेपोङ् गाड्डे डोक् खाम्मि ठामा ठालाँ चोगुए॥
45येसुङा बिन्टि चोग्मा हिडुङ् कोबे हिट्नुङ् ओचेलाचि उयुङागा डेन्ङि आबानाँ हिट्नागा सानिङ्ग्वा उलिसाउङ् उइम्सेसागा टुबुचे॥ 46उन्ङा हिट्नागा फोक्सा लोडुचे, “पोङ् खानि आइम्सियाक्टिटिगा? कोबानि हिट्नुङ् बिन्टि चोगानि, हिट्डेउङ् पापङाना वारिक्ङि आठाइन्गा॥”
येसु ओलाबुना
(मात्ति २६:४७-५६; मारकुस १४:४३-५०; युहान्ना १८:३-११)
47येसुङा ओचेलाचि हिट्डे लोडुगेट्टुचिलोक् हिट्नि याप्मिचिगा हुड्डा ओहोन्डा ओआबे॥ बारो जाना चेलाचि माड्डे याहुदा इस्करियोतिङा याप्मिचि आप्टुचिउङ् उन्चि टोकाना टोकाना आबे हिट्नुङ् चुप्पा चोगुङ् स्या मेट्सिङा येसु सोरि खाडे॥ 48टरो येसुङा हिट्ना लोडुए, “हाउ याहुदा, खान्ङा याप्मि छा चुप्पा मेप्माउङ् स्या मेट्सा साट्टुरचि मुक्ङि पिमाना इ टे?”
49हिट्नुङ् ओचेलाचिङा उन् लाब्मालोङ्सा याप्मिचि ओआबागा उनिसुङ् येसु उसिलाप्टुए, “टाङ्बा, पाक् नागा याप्मिचि चेप्साङा चेप्टुम्चिम्मागि टे?” 50हिट्नुङ् हिट्नागा माड्डे ठिबाङ्ङा सानिङ्डाङ्बाङाना ओचाकारङाना छुप्टाङ्लेङ्ना उनुभेक् रुप् रुबुबिडुए॥
51टरो येसुङा हिट्नागा लोडुचे, “लिसे, चुङ्मा नाडानुम्॥” पिक्सा हिट्ना याप्मिङाना उनुभेक् खोट्टुङ् नुमानिङ् चोगुबिडुए॥
52हिट्नुङ् येसु लाब्मा ओआबागा गाडुवाडाङ्बाचि, माङ्ठाना काकोचिगा हाकिमचि हिट्नुङ् याहुदि ओठेडोङ्चि उन्ङा लोडुचे, “पाक् आङा याङ्काखुट्उङ् चेप्सा हिट्नुङ् लाहुरिक्लोक् लाब्सिङा आटैइसेगि? 53आङा सोरोक् लेम्बा माङ्ठानाङि खानिलोक् वासाङे, टरो पाक्चा चोक्मा आहिडेटिन्ङा॥ टरो सैतानङा सासान् चोगुना बेला ना डोक् ए, हिट्नुङ् खानिगा टोॽवा चोक्मा बेला टाए॥”#लुका १९:४७; २१:३७
पाटरुसङा येसु एङ्फुट् चोगुना
(मात्ति २६:५७-५८,६९-७५; मारकुस १४:५३-५४,६६-७२; युहान्ना १८:१२-१८,२५-२७)
54माङ्ठाना काकोबा टिलिङ्गाचिङा येसु ओलाबुङ् सानिङ्डाङ्बा ओपाङ्ङि ओखाट्टुए॥ हिट्नुङ् पाटरुसम्बाक् नेट्टाङ् मिखाट्ने चिपा लाप्माङ्लाम्मा हिट्नागा ओएङ्-ओएङ् खाडे॥ 55जब हिट्नागा सानिङ्डाङ्बा ओपाङ्ङि ओटासुए हिट्नुङ् आम्टेप्मा याप्मिचिङा पाङ् टेल्लाङ्ङिना माझै मि ओहाट्टुङ् मि हुङ्सा याम्बा-नायाम्बा उयुङे॥ हिट्नुङ् पाटरुस चा हिट्नागालोक् युङे॥ 56हिट्नि ठिबाङ् चाकारनिङा पाटरुस मि हुङ्सा युङासाना निसुङ् नुलोक् पुयुङ् माट्टुए, “ना याप्मि चा येसुलोक् डाना॥”
57टरो पाटरुसङा लोडुए, “हाउ झान्झा, आङा येसु मिसेन् डोक् निनिङ्ना॥”
58होप्मोङा आरको याप्मिङा पाटरुस निसुङ् लोडुए, “खान् चा नागा याप्मिचिगा उन्चि टाक् डोक्॥”
टरो पाटरुसङा लोडुए, “आसाइबा, आङाउम्टे माखाक्॥”
59हामो ठिक् घान्टा ओएङ्स्वालेङ् आरको ठिबाङ् याप्मिङा पाटरुस निसुङ् माट्टुए, “छेम्बा डोक्, ना याप्मि चा येसुलोक् डाना, पोङ्भोने ना चा गालिल छेट्राङि युङ्ना याप्मि डोक् ए॥”
60टरो पाटरुसङा लोडुए, “हाउ आसाइबा, खान् पाक् आपिग्येट्ना॥ आङा माखाक्, आङा येसु मिसेन् डोक् निनिङ्ना॥”
पाटरुस चेक्टेट्टाना बेला डोक् कोक्साबा ओक्टे॥ 61हिट्नुङ् येसु पाटरुसलेङ् नोक्टाउङ् उन् पुयुए॥ “हान्डेङ् भ्यानिक् कोक्साबा ओक्मा नुङ्ना पाइले खान्ङा आङा सुम्बोक् खेप् सोम्मा इन्कार याङ्आचोक्ङा” पिक्सा येसुङा लोडुना रिङ् पाटरुसङा मिट्टोए॥ 62हिट्नुङ् पाटरुस भारा होन्डाउङ् टुक्लोक् हाबे॥
येसु एङ्फुट् ओचोगुना हिट्नुङ् ओलेम्सुना
(मात्ति २६:६७,६८; मारकुस १४:६५)
63येसु काकोबा माङ्ठानाङिगा टिलिङ्गाचिङा ओरेट्टुजोए हिट्नुङ् ओलेम्सुए॥ 64हिट्नुङ् लोट्लिङ्ङा उमिक् ओटेप्टुबिडुङ् लेम्सा उसिलाप्टुए, “लु माट्टुवाक् टे, खान् साङा मालेम्सेना?” 65नाड्डे पारिक् येसु ओचाफेन्लोक् चाट्ला मेट्सा नाना ओलि लोसा ओछोक्टुए॥
येसु काचाहारि-कुन्डाल सोरि ओखाट्टुना
(मात्ति २६:५९-६६; मारकुस १४:५५-६४; युहान्ना १८:१९-२४)
66हिट्नुङ् गाडुवाडाङ्बाचि हिट्नुङ् धारमाबिधि काहिसिक्बाचि, नागा ख्वाप्पा ओठेडाङ्चि भ्यानिक् डोक् उछुमे॥ हिट्नुङ् उन् काकोबा उपिङ्बाचिङा येसु काचाहारि-कुन्डालङि ओखाट्टुए॥ 67हिट्नुङ् हिट्नागाँ उसिलाप्टुए, “आन्याँ याप्मिलोडा, खान् डोक् खिरिस्ट इ?”
येसुङा लोडुचे, “आङा खानि लोनाँनि चा खानिङा आङा बिस्वास आचोगिन्नागा, 68हिट्नुङ् खानि आङा सिलाप्नानें भोने चा खानिङा आमाट्निम्ना॥ 69टरो हाट्ले एलालोक् याप्मि छा सोब्बे नुङ्ना बोल्लेउ माङ्हाङ्ङाना उछुप्टाङ्लेङ् आधिकारलोक् युङ्युक्॥”
70हिट्नागा सोब्बेङा उसिलाप्टुए, “हिट्डे भोने पाक् खान् माङ्हाङ् छा इ टे?”
येसुङा लोडुचे, “आए, खानिङा माहामा डोक् आमाट्टुम्मे आङा माङ्हाङ् छा डोक् ए॥”
71हिट्नुङ् हिट्नागा उपिगे, “हाट्ले नाङाना बिरुद्दाङि आरु रिङ् माप्मा कोन्निना॥ उरिङ्ङा आप्पे लोङ्सा फाट्टुर लाहाब् चोगुना रिङ् आनि सोब्बेङा खेम्सुम्एट्टुम्मे॥”
ที่ได้เลือกล่าสุด:
लुका 22: APH
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2023, Wycliffe Bible Translators, Inc. and Nepal Bible Society
